Read Alladian Matie 15 Bible Online

Matie 15 - Alladian bible

Matie 15

¹Zɛtɛn Ɔwɔ-nyànmàn-sùva-wá-bɔ̀ mán ɛnyànmàn-gbànvri-ankà-yé-bɔ̀ dú Zherüzalɛmɛ̀n nvà cɔ́ Zhezü kɩ ke yrɛ nɛ̀n le:

²“Cɛci kruhú kɛ̂ v'ɛsɛ̀nkɛn-bɔ̀ tɛn ke sɩ́ ẅɛn ɛcüìcüì-bɔ̀ nyànmàn léyi tán bɔ̀ nɔn kɛ hɛ́n hán nɛ̀n? Ɔmuhi yɔ sɩ́ juru ankɔ̀rɛ̀, hán ɔmu le ɛnyànmàn kɛ wá tán nɔn kɩ yɔ zî ɛci.”

³Zhezü mrɛ́n yɔ ɔmùan le: “Nyɛ tɛn, ecitan kruhú kɛ̂ nyɛ́n sɩ́ ẅɛn Ɔwɔ nyànmàn nyɛ́n hɛ́n hán, kɩ nyɛ ẅɛn nyɛ́n dùku ny'ɛnyànmàn kɔrɛ̀zì nyɛ́n hɛ́n hán?

⁴Ɔwɔ dɔ̀ le: ‘Ɛ̀ wá ezi mán ɔmuan’, kɩ nɛ̀n vru nɛ́n dɔ̀ le: ‘Ɔwrɔn léyi kɛ dɔ́ nɛ́n zi mán nɛ́n muan ankà gbàngbàn nɔn, ke ji le ye wri nɛ̀n.’

⁵Nyɛ tɛn, nyɛ dɔ̀ le, ke dú kɛ ɔwrɔn kɛ dɔ́ nɛ́n zi mán nɛ́n muan le: ‘Eci léyi mɛ lɛ bɩ mɛ̀n wá mɛ́n ɛkɔrɛ̀ nɔn dú Ɔwɔ cice-ci’,

⁶kɩ ɔwrɔn ndɔ lɔ ke sɩ́ vru wá nɛ́n ziɛ. Ɔmu lɔ de nyɛ jrɛ́ Ɔwɔ mùan ankà vɔ̀nshɛ́ lɔ, kɩ nyɛ hán eci ke ci nyɛ́n dùku ny'ɛnyànmàn wú!

⁷Anmùan-anhyrɛ̀-bɔ̀! Ezàhi ankà zrɔ, ɛnvra léyi nɛ dɔ́ ny'ɛwú ankà ndɔ lɔ nɔn:

⁸Ɔwɔ kɛ dɔ̀ le: ‘Fɛcüè ndɔ lɔ kɛ mrɛ́n mɛ̀n ɔmuanwrú wú, tɛ́n n'ɛnbɔrɛ dú esù she m'ɛtɛ̀sɛ̀n.

⁹Ankɔrɛ̀ léyi anwrɔn ndɔ hɔ̀n lɔ cüe mɛ̀n ezìwú nɔn, kè sɩ̀ ẅɛ̀n vɔ̀nshɛ́ ɔmuhi yɔ yé anwrɔnẅì nyànmàn kɛ hán le m'ɛnyànmàn hɔ́.’ ”

¹⁰Zɛtɛn Zhezü bi fɛcüè lɔ kɩ nɛ dɔ́ yɔ le: “Nyɛ́n die mɛ̀n nukùɛ, ô nyɛ́n yá ankà ndɔ lɔ:

¹¹Kè sɩ̀ dù eci léyi ke dú ɛntrɛ ke bru ɔwrɔnẅì mùan lɔ mɛ̀n nɔn de kɛ wá nɛ̀n ɛnbrá edomɛ̀n nɔn. Tɛ́n eci léyi ke dú n'ɔmùan lɔ mɛ̀n kɛ srɔ ɛntrɛ nɔn de kɛ wá nɛ̀n ɛnbrá edomɛ̀n nɔn.”

¹²Zɛtɛn Zhezü sɛ̀nkɛn-bɔ̀ lɔ sɔnba nɛ̀n ɛtɛ̀sɛ̀n kɩ kɛ dɔ́ nɛ̀n le: “E nyrì le ankà léyi ɛ dɔ̀ nɔn dú Ɔwɔ-nyànmàn-sùva-wá-bɔ̀ ɛmɛ̀nhyí ankà hà?”

¹³Zhezü mrɛ́n ɔmùan le: “Ɛtɛ̀ totɔtɔ̀n léyi Dade léyi dú anhobɩ́ kè sɩ̀ tɛ̀a nɔn, ye le fú nɛ̀n yɛ sɔhɔ́.

¹⁴Nyɛ́n teze yɔ: yɔ dú anvɛ̀-bɔyɛ-bɔ̀ kɔrɛ̀-ẅɛn-bɔ̀! Kɩ ke dú kɛ anvɛ̀-bɔyɛ-wrɔn tɔ̀n kɛ ẅɛn nɛ́n nyran anvɛ̀-bɔyɛ-wrɔn tɔ̀n ɛkɔrɛ̀ hô, anvɛ̀-bɔyɛ-bɔ̀ anhyrɛ̀ lɔ ke lɛ ku ɛnnànmàn mɛ̀n.”

¹⁵Piɛrɛ̀n bɩ́ ankà-dɔ̀ kɩ kɛ dɔ́ Zhezü le: “Ɛ̀ dɔ́ bɔ̀ nyandrɛn ndɔ lɔ n'ɛmɛ̀n ankà.”

¹⁶Zhezü kɛ dɔ̀ le: “Nyɛ́n mán, nyɛ́n sɩ̀ dù ɛnkruemɛ̀n-ẅɛn-bɔ̀a?

¹⁷Nyɛ́n sɩ̀ nyrìɛn le, eci lɔ fɛn léyi ke bru ɔwrɔnẅì mùan mɛ̀n nɔn, ke ci n'ɛmɛ̀ntɛ̀ lɔ mɛ̀n kɩ kɛ srɔ ɛntrɛa?

¹⁸Tɛ́n eci léyi ke dú ɔwrɔnẅì mùan mɛ̀n kɛ srɔ ɛntrɛ nɔn dú ɛnbɔrɛ mɛ̀n nvà, kɩ eci ndɔ lɔ de kɛ wá ɔwrɔn ɛnbrá edomɛ̀n nɔn.

¹⁹Ɔmuhi ankà-tro gbàngbàn hɔ̀n léyi ke dú ɔwrɔnẅì ɛnbɔrɛ mɛ̀n kɛ và nɔn de kɛ wá tán le ye wri ɔwrɔn, yɛ hán ɛnnyɔnwrɔn mán ɛncɔnwrɔn-bi-gbàn, yɛ hán eci gbàngbàn, ye yerɛ ɛci, yɛ ẅɛn ɛyɔ̀n ye ku ɔwrɔn ɛwú kɩ yɛ dɔ́ anwrɔn ankà gbàngbàn ɛmɛẅi.

²⁰Nyàn eci léyi kɛ wá ɔwrɔnẅì ɛnbrá edomɛ̀n nɔn! Tɛ́n kè sɩ̀ dù ankɔ̀rɛ̀ léyi ye sɩ́ juruɛ hɩ ye zî ɛci nɔn, hán ɔmu le Ɔwɔ-nyànmàn-sùva-wá-bɔ̀ kɛ dɔ̀ nɔn, de kɛ wá ɔwrɔnẅì ɛnbrá edomɛ̀n nɔn.”

²¹Zɛtɛn Zhezü cɔhɔ́ ɛyri léyi nɛ́n dù nɔn kɩ hɔ́n ɔkpɔsɔ léyi dú Tirɛ̀n mán Sidɔn anmàn hɔ̀n tɛ̀sɛ̀n nɔn wú.

²²Kanan anmàn nyɔnwrɔn tɔ̀n léyi dú ɔkpɔsɔ ndɔ lɔ wú vá Zhezü ɛtɛ̀sɛ̀n kɩ ke di bobo dɔ́ nɛ̀n le: “Ankà-yé-wrɔn, Davidɛ̀n Ẅì, è nyri mɛ̀n ɛnhyɔ̀bɔ̀! Ɛnhɛ́n gbàngbàn tɔ̀n ke di m'ɛnnyɔnwrɔn-ẅì ejüe, nɛ̀n dú ɛgbànkàn mɛ̀n.”

²³Tɛ́n Zhezü kè sɩ̀ mrɛ́n nɛ̀n ɔmùan. Zhezü sɛ̀nkɛn-bɔ̀ sɔnba nɛ̀n ɛtɛ̀sɛ̀n kɛ dɔ́ nɛ̀n le: “Wrɔ̀ ɛnnyɔnwrɔn lɔ, ɔmuhi ne di bobo kɛ́n bɔ̀ ɛsɛ̀n nɔn.”

²⁴Zhezü mrɛ́n ɔmùan le: “Izraɛlɛ̀n fɛcüè kɔ̀kɔ̀sɛ̀ ẅì hɔ̀n léyi zrɛ́n nɔn, y'ɛkruhú de yɛ wá mɛ̀n ɔkɔ̀hɔ̀n nɔn.”

²⁵Tɛ́n ɛnnyɔnwrɔn lɔ vá bore Zhezü ezìwú annankruemɛ̀n kɩ kɛ dɔ̀ le: “Ankà-yé-wrɔn, wá mɛ̀n ɛkɔrɛ̀!”

²⁶Zhezü mrɛ́n ɔmùan le: “Kè sɩ̀ zrɔ̀ tán le ye bɩ́ ɛẅì hɔ̀n ci-zî lɔ yɛ kɔ̀n cüe ɛnlɛ̀tù hɔ̀n hán.” Ɛnnyɔnwrɔn lɔ mrɛ́n ɔmùan le:

²⁷“Hɛ̀ɛ̀, ankàẅì, ankà-yé-wrɔn, ɔmu tɛ̀kɩ ɛnlɛ̀tù hɔ̀n mán ke zî ɛci léyi ke dú yɔ zi hɔ̀n tɛbrɛ̀ wú ke bore nɔn.”

²⁸Zɛtɛn Zhezü mrɛ́n nɛ̀n ɔmùan le: “O! Ankàẅì-bùtan sɩ́ mɛ́n evri! Ɔwɔ kɛ tán mɛ́n eci léyi e ji nɔn.” Kɩ ɛnvra zri lɔ mɛ̀n, n'ɛnnyɔnwrɔn-ẅì lɔ cɔ́ ɔkɔrɛ̀.

²⁹Zhezü cɔhɔ́ ɛyri léyi nɛ́n dù nɔn, kɩ hɔ́n Galile nɛnbà cɛ mùan. Nɛ̀n hɔ́n ɛnkpò cɛ tɔ̀n wú nɛ̀n yɛ́.

³⁰Fɛcüè bobrebe vá nɛ̀n ɛtɛ̀sɛ̀n, yɔ sɩ́ annan-yɔ-bɔ̀, anvɛ̀-bɔyɛ-bɔ̀, ɔkpɔ̀cɔ-bɔ̀ mán anwrɔn hɔ̀n léyi ke sɩ́ dɔ́ ankà mán ɛnlɔẅiɛ-bɔ̀ bobrebe ndɔ hɔ̀n. Ye bɩ́ yɔ yɛ vá hɛ́n Zhezü annan tɛ̀sɛ̀n, kɩ nɛ kɔrɛ yɔ.

³¹Anwrɔn dú anvɛmɛ̀n-frɛ́n-mɛ̀n ɛnvra léyi yɔ kán ɔmurɛ́n-bɔ̀ kɛ dɔ́ ankà, ɔkpɔ̀cɔ-bɔ̀ mán annan-kpò-bɔ̀ kɛ nán esù, kɩ anvɛ̀-bɔyɛ-bɔ̀ ke kán ɛyri, kɩ anwrɔn lɔ fɛn bukru kɛ mrɛ́n Izraɛlɛ̀n Wɔ.

³²Zhezü bi n'ɛsɛ̀nkɛn-bɔ̀ kɩ kɛ dɔ́ yɔ le: “Anwrɔn ndɔ hɔ̀n lɔ y'ankà kɛ hán mɛ̀n ɛnhyɔ̀bɔ̀, ɔmuhi kɛ hán ɛbi anhɔ̀n de yɔ dú mɛ̀n ɛtɛ̀sɛ̀n kɩ ɛci-zî mán trɔ yɔ nɔn. Mɛ́n sɩ́ ji mɛ̀n hán yɔ yɔ hɔ́n ɔmùanwúemɛ̀n; yɔ lɛ cɔ́ ɛjɛ̀ ɛnlevri wanzi.”

³³N'ɛsɛ̀nkɛn-bɔ̀ ke yrɛ nɛ̀n le: “Tɛyri de bɔ́ lɛ cɔ́ ɛci bɔ̀ tán yɔ yɔ zî, ɛnu ɛyri tramɛ̀n lɔ nɛ́n?”

³⁴Zhezü yerɛ yɔ le: “Abùtùkumɛ́n ɛ̀bɛ dú nyɛ̀n hàn?” Kɩ yɔ mrɛ́n ɔmùan le: “Abùtùkumɛ́n ɔbɔɛ̀n mán ɛcàn ẅì hɔ̀n jan.”

³⁵Zɛtɛn, Zhezü wá tán fɛcüè lɔ kɛ yɛ́ ɛnhibɩ́ɛ.

³⁶Kɩ nɛ̀n bɩ́ abùtùkumɛ́n ɔbɔɛ̀n mán ɛcàn hɔ̀n lɔ, nɛ̀n tán Ɔwɔ ɔkùɛn, nɛ̀n voyan abùtùkumɛ́n lɔ nɛ̀n tán n'ɛsɛ̀nkɛn-bɔ̀ kɛ̀ dɛ́ fɛcüè lɔ fɛn.

³⁷Anwrɔn lɔ fɛn zî ɛci kɩ ɛmɛ̀ntɛ̀ yɩ́ yɔ. Zhezü sɛ̀nkɛn-bɔ̀ bi ɛci léyi wɔrɔ nɔn, ankɛ́ ɔbɔɛ̀n.

³⁸Anwrɔn hɔ̀n léyi zî ɛci nɔn, dú anwrɔn tɛ̀bru-kru-anzɔ̀, ye sɩ̀ krɛ̀ wúyɔ̀ mán ɛẅì hɔ̀n.

³⁹Ɛnvra léyi Zhezü hán fɛcüè lɔ fɛn hɔ́n y'edúyri nɔn, nɛ̀n bru anhàka mɛ̀n kɩ nɛ̀n hɔ́n Magadan kpɔsɔ wú.