Read Alladian Matie 18 Bible Online

Matie 18 - Alladian bible

Matie 18

¹Ɛnvra lɔ mɛ̀n ɛsɛ̀nkɛn-bɔ̀ lɔ sɔnba Zhezü ɛtɛ̀sɛ̀n kɩ ke yrɛ nɛ̀n le: “Antɔn de dú ecüìcüì Anhobɩ́ Nɛ̀ncüì-dúyri lɔ nɛ́n?”

²Zhezü bi ɛnẅì cɛ tɔ̀n, bɩ́ nɛ̀n hɛ́n y'eziwú

³kɩ kɛ dɔ̀ le: “Mɛ dɔ́ nyɛ̀n annànwɔrɛ mɛ̀n le: ke dú kɛ nyɛ́n sɩ̀ crɔ̀n hàn, nyɛ́n srɔ̀ ɛẅì hɔ̀n hɔ́ hô, nyɛ́n sɩ̀ bru Anhobɩ́ Nɛ̀ncüì-dúyri lɔ rɔ́.

⁴Anhobɩ́ nɛ̀ncüì-dúyri lɔ ecüìcüì dú ɔwrɔn léyi ke sɩ́ n'edomɛ̀n ɛnhi kɩ kɛ srɔ ɛnẅì cɛ ndɔ lɔ nɔn hɔ́.

⁵Kɩ ɔwrɔn léyi ke bɩ́ ɛnẅì tɔ̀n, hán ndɔ léyi nyɔn nɔn, m'ɛcüɛ̀n kruhú, mɛ́n mumù de ne bɩ́ mɛ̀n nɔn.”

⁶“Ɔwrɔn léyi kɛ hán ɛẅì hɔ̀n ndɔ hɔ̀n léyi ke bú m'ankà kɛ tán ankàẅì, ɛnzri ke bru ɛgbàn mɛ̀n hô, zrɔ tán le ɔwrɔn ndɔ lɔ, ye mú nɛ̀n obù vri tɔ̀n ɔbɔ̀n, ô yɛ kɔ́n nɛ̀n di ecüe.

⁷Ɛnhibù muzhie lɔ, dú eci-hán ndɔ hɔ̀n léyi ndù ke sɩ́ anwrɔnẅì ɛgbàn mɛ̀n nɔn! Ɛnvra lɔ fɛn, eci-hán ndɔ lɔ ke dù, tɛ́n muzhie dú tán ɔwrɔn léyi ke le di n'ɛmɛ̀n *sùmannu nɔn!

⁸Ke dú kɛ v'ɛkɔrɛ̀, v'ɛnan de kɛ hán mɛ́n e bru ɛgbàn mɛ̀n hô, ɛ̀ ẅiɛ yɔ, ô ɛ̀ kɔ́n yɔ ze esù she v'ɛtɛ̀sɛ̀n; zrɔ tán mɛ́n, è bru annànwɔrɛ wúvà lɔ mɛ̀n, ɛkɔrɛ̀ mán ɛnan zri mɛhi, kɩ ɛ̀ ẅɛn ankɔ̀rɛ̀ anhyrɛ̀ mán annan anhyrɛ̀, ô yɛ kɔ́n mɛ́n di ɛnhyà léyi ke sɩ́ zɛ́n hán nɔn mɛ̀n.

⁹Kɩ ke dú v'ɛvɛ̀ de kɛ hán mɛ́n e bru ɛgbàn mɛ̀n hô, è fú nɛ̀n, ô ɛ̀ kɔ́n nɛ̀n ze esù she v'ɛtɛ̀sɛ̀n; zrɔ tán mɛ́n, ɛ̀ ẅɛn ɛvɛ̀ zri è bru annànwɔrɛ wúvà lɔ mɛ̀n, kɩ ɛ̀ ẅɛn anvɛ̀ anhyrɛ̀, ô yɛ kɔ́n mɛ́n di owú-bɔ̀ hyà lɔ mɛ̀n.”

¹⁰“Nyɛ́n wá esùva, nyɛ́n bɩ́ ẅɛn ɛẅì hɔ̀n ndɔ hɔ̀n lɔ ɛnzri mán egbrì; mɛ dɔ́ nyɛ̀n le, y'ɛnan-bɔ̀ léyi dú Ɔwɔ-kùyüre-bɔ̀ nɔn, dú ɛnvra lɔ fɛn Dade léyi dú anhobɩ́ nɔn zìwú. [

¹¹Ɔmuhi ɔwrɔnẅì Ẅì nvà ô kè bɩ́ yɔ léyi yɔ zrɛ́n nɔn kè die.]

¹²Anhɔntan nyɛ hán nye tro hɛ̀? Ke dú kɛ ɔwrɔn tɔ̀n kɛ ẅɛn Kɔ̀kɔ̀sɛ̀ ɛkoẅi-ɛnrì kɩ ɛnzri ke dú ɛmɛ̀n kɛ zrɛ́n, ɔwrɔn ndɔ lɔ ke sɩ̀ teze kɔ̀kɔ̀sɛ̀ ndɔ hɔ̀n léyi wɔrɔ nɔn, ô nɛ́n hɔ́n nɛ̀n ji ɛnzri léyi zrɛ́n nɛ́n?

¹³Annànwɔrɛ mɛ̀n, mɛ dɔ́ nyɛ̀n, ɛnvra léyi nɛ cɔ́ ɛnzri léyi zrɛ́n nɔn, ne dú pɔ̀püɛ̀ mɛ̀n kɛ vrán kɔ̀kɔ̀sɛ̀ ɛkoẅi-anzɔ̀ mán ɛẅì ɛvà-ɔmɔ̀rɔ̀ hɔ̀n léyi kè sɩ̀ zrɛ̀n hàn nɔn yɔ pɔ̀püɛ̀.

¹⁴Ɔmu zri lɔ, nyɛ́n Zi léyi dú anhobɩ́ nɔn, ke sɩ́ ji le n'ɛẅì hɔ̀n lɔ, ɛnzri mán kɛ̀ zrɛ́n.”

¹⁵“Ke dú kɛ ɔmuan-ẅì kɛ hán mɛ́n eci gbàngbàn, ɛ̀ hɔ̀n cɔ́ nɛ̀n, ô è yé nɛ̀n eci gbàngbàn léyi nɛ̀n hán nɔn, tɛ́n nɛ́n mán vɛ́n mɛhi kɩ nyɛ́n dɔ̀. Ke dú kɛ ne die mɛ́n nukùɛ, ɛ̀ cɔ́ ɔmuan-ẅì lɔa.

¹⁶Tɛ́n, ke dú kɛ nɛ̀n sɩ̀ shrì nɛ̀n die mɛ́n nukùɛ, è bɩ́ ɔwrɔn zri mán anhyrɛ̀, hán ɔmu le Owrú Prɔnprɔn kɛ dɔ̀ nɔn, ‘ɛdrɛ̀-hán-ankà lɔ fɛn, yɛ dɔ́ nɛ̀n dalɛfuɛ-di-bɔ̀ anhyrɛ̀ mán anhɔ̀n zìwú.’

¹⁷Tɛ́n ke dú kɛ nɛ́n sɩ́ ji nɛ̀n die yɔ nukùɛ, ɛ̀ dɔ́ Ɔwɔ-fɛcüè-bɔ̀; ke dú kɛ nɛ́n sɩ́ ji nɛ̀n die Ɔwɔ-fɛcüè-bɔ̀ nukùɛ, è bú nɛ̀n ɛ̀ hán ɔwrɔn léyi kè sɩ̀ nyrì Ɔwɔ nɔn, ɛnvra tɔ̀n hô, ɛci-yerɛ-wrɔn.

¹⁸Mɛ dɔ́ nyɛ̀n annànwɔrɛ mɛ̀n le: eci léyi nyɛ lɛ mrɛ́n sɔhɔ́ ɛnhibù wú nɔn, anhobɩ́ mán yɛ lɛ mrɛ́n sɔhɔ́; eci lɔ fɛn léyi nye le bɩ́ ɛnu hi nɔn, anhobɩ́ mán ye le bɩ.

¹⁹Mɛ dɔ́ nyɛ̀n le, ke dú kɛ, ny'ɛmɛ̀n lɔ, anwrɔn anhyrɛ̀ ɔmùan kɛ krɔn ɛnu hibù wú, kɛ sán y'Ɔwɔ-sɛ́n mɛ̀n eci totɔtɔ̀n léyi yɔ ji nɔn, Dade léyi dú anhobɩ́ nɔn, kɛ lɛ tán yɔ.

²⁰Ɔmuhi ɛyri léyi anwrɔn anhyrɛ̀ mán anhɔ̀n kɛ borɛkru m'ebɩ́ mɛ̀n nɔn, mɛ̀n dú yɔ anwanzi.”

²¹Zɛtɛn Piɛrɛ̀n sɔnba Zhezü ɛtɛ̀sɛ̀n kɩ ke yrɛ nɛ̀n le: “Ɛẅɛnwrɔn, andɛ̀n ɛ̀bɛ de ke ji le mɛ̀n bɩ́ ɛgbàn mɛ̀n ce nmàn-ẅì ke dú kɛ nɛ hán mɛ̀n eci gbàngbàn nɛ́n? Andɛ̀n ɔbɔ̀ɛn hàn?”

²²Zhezü mrɛ́n ɔmùan le: “Hɔ̂, mɛ́n sɩ́ dɔ́ mɛ́n le andɛ̀n ɔbɔɛ̀n, tɛ́n andɛ̀n ɛkoẅi-anhɔ̀n mán ɛẅì ɛvà, ɔmu lɔ hàn kɛ̀ cɔ́ andɛ̀n ɔbɔɛ̀n.

²³Hɩ kruhú de, nyàn eci léyi Anhobɩ́ nɛ̀ncüì-dúyri kɛ cá nɔn: Ɛnnɛ̀ncüì tɔ̀n wá kɛ̀ krɛ́ ɛci nɛ́n mán n'ɛci-bɩtan-bɔ̀ mɛhi.

²⁴Nɛ̀n bukru nɛ hán hɩ kɔ̀hɔ̀n lɔ, kɩ ye bɩ́ ɔwrɔn tɔ̀n léyi ẅɛn nɛ̀n ɔwɔɛ̀n bobrebe nɔn, yɛ vá sɩ́ nɛ̀n.

²⁵Ɔwrɔn ndɔ lɔ kè sɩ̀ ẅɛ̀n ɔkùa hɩ ká di n'ɔwɔɛ̀n lɔ nɔn; Zɛtɛn n'ankà-yé-wrɔn wá tán le yɛ hɛ́ nɛ̀n kɛ hán ɔwɔ̀n-wrɔn hɔ́, ô yɛ hɛ́ nɛ́n hi mán n'ɛẅì hɔ̀n mán n'ɛci hɔ̀n lɔ fɛn léyi nɛ́n ẅɛ̀n nɔn, ô ye di n'ɔwɔɛ̀n lɔ fɛn.

²⁶Eci-bɩtan-wrɔn lɔ bore annankruemɛ̀n n'ankà-yé-wrɔn zìwú kɩ kɛ dɔ́ nɛ̀n le: ‘Ɛ̀ tán mɛ̀n ɛnvra, ô mɛ̀n di mɛ́n v'ɔwɔɛ̀n lɔ!’

²⁷Ankà-yé-wrɔn lɔ nyri nɛ̀n ɛnhyɔ̀bɔ̀: bɩ́ ɔwɔɛ̀n lɔ ce nɛ̀n kɩ teze nɛ̀n, nɛ́n hɔ̀n.

²⁸Eci-bɩtan-wrɔn lɔ srɔ ɛntrɛ, kɩ kán nɛ́n nyran tɔ̀n léyi yi mɛhi yɔ hán ɔkɔ̀hɔ̀n ɛyri zri, hɩ ẅɛn nɛ̀n ɔwɔɛ̀n ɔkùa ɛkoẅi-ɛnrì nɔn. Nɛ̀n ẅɛn yi esùvamɛ̀n nɛ borɛ ecüìemɛ̀n kɩ nɛ dɔ̀ le: ‘È di ɔwɔɛ̀n léyi ɛ̀ ẅɛn mɛ̀n nɔn!’

²⁹Nɛ́n nyran lɔ shɛ́n nɛ̀n annankru ezìwúɛ, kɛ sɛ́n nɛ̀n kɛ dɔ̀ le: ‘Ɛ̀ tán mɛ̀n ɛnvra jan, kɩ me le di mɛ́n v'ɔwɔɛ̀n lɔ!’

³⁰Tɛ́n ɔwrɔn ndɔ lɔ kɔrɔ; nɛ̀n vru nɛ̀n hán ye di nɛ́n nyran lɔ anwɔn-mɛ̀n-wá-wɔn mɛ̀n, hàn kɩ kè di n'ɔwɔɛ̀n lɔ kɛ̀ trɔ.

³¹Ɛnvra léyi eci-bɩtan-bɔ̀ ndɔ hɔ̀n lɔ kán eci léyi wɔɛ̀n nɔn, yɔ dú obòto mɛ̀n kɩ yɔ hɔ́n dɔ́ y'ankà-yé-wrɔn ɛmɛẅi ankà.

³²Zɛtɛn ankà-yé-wrɔn hán ye bi eci-bɩtan-wrɔn lɔ kɩ kɛ dɔ́ nɛ̀n le: ‘Eci-bɩtan-wrɔn gbàngbàn! Mɛ̀n bɩ́ v'ɔwɔɛ̀n lɔ fɛn mɛ̀n ce mɛ́n, ɔmuhi ɛ̀ sɛ́n mɛ̀n nɔn.

³³Vɛ́n mán ke ji le è nyri ɛnyran lɔ ɛnhyɔ̀bɔ̀, hán ɔmu le mɛ̀n nyri mɛ́n ɛnyhɔ̀bɔ̀ nɔn hɔ́.’

³⁴Ankà-yé-wrɔn lɔ bɩ́ ɛmɛ̀nhyì vri kɩ hán eci-bɩtan-wrɔn lɔ hɔ́n ɔkɔ̀hɔ̀n shishiemɛ̀n hàn kɩ nɛ̀n di n'ɔwɔɛ̀n lɔ fɛn kɛ̀ trɔ.”

³⁵Kɩ Zhezü vru kɛ dɔ̀ le: “Ɔmu lɔ de Dade léyi dú anhobɩ́ nɔn ke le ci nyɛ̀n ɛmrɛ̀n ke dú kɛ ɔwrɔn kè sɩ̀ bɩ ɛgbàn ke ce nɛ́n nyran n'ɛnbɔrɛ lɔ fɛn mɛ̀n.”