Read Alladian Matie 19 Bible Online

Matie 19 - Alladian bible

Matie 19

¹Ɛnvra léyi Zhezü trɔ n'ankà-yé lɔ nɔn, nɛ̀n cɔhɔ́ Galile kpɔsɔ wú kɩ nɛ̀n hɔ́n Zhüde kpɔsɔ wú, Zhurdɛn shi mɛẅi.

²Anwrɔn fɛcüè kɛ kɛ́n nɛ̀n ɛsɛ̀n kɩ nɛ kɔrɛ y'ɛnlɔẅiɛ hɔ̀n lɔ.

³Ɔwɔ-nyànmàn-sùva-wá-bɔ̀ zrizri sɔnba nɛ̀n ɛtɛ̀sɛ̀n, ô kɛ̀ krɔn nɛ̀n antanwrɔn. Yɔ yrɛ nɛ̀n le: “Bɔ́ ɛnyànmàn lɔ kɛ tán ɛncɔnwrɔn ɛkɔrɛ̀levri kɛ̀ wrɔ́ nɛ́n hi eci lɔ fɛn mɛ̀n hàn?”

⁴Zhezü mrɛ́n ɔmùan le: “Nyɛ́n sɩ̀ krɛ̀ ankà léyi Owrú Prɔnprɔn merɛ́n nɛ́n? ‘Ɛnkrubɔmɛ̀n lɔ, Eci-lɔ-fɛn-hán-wrɔn hán yɔ, ɛncɔnwrɔn mán ɛnnyɔnwrɔn’,

⁵zɛtɛn nɛ́n dɔ̀ le: hɩ le kruhú de, ɛncɔnwrɔn ke le teze nɛ́n zi mán nɛ́n muan, ô kɛ̀ hɔ̀n sɔ́n ebɩ́ nɛ́n mán nɛ́n hi mɛhi, kɩ yɔ, anwrɔn anhyrɛ̀ lɔ, yɔ le dú eci zri.

⁶Ɔmu lɔ, yɔ sɩ̀ vru dú eci anhyrɛ̀, tɛ́n eci zri. Ke sɩ́ ji le ɔwrɔnẅì kɛ̀ gbɔrɔ eci léyi Ɔwɔ mú hɛ́n nɔn.”

⁷Ɔwɔ-nyànmàn-sùva-wá-bɔ̀ ke yrɛ Zhezü le: “Cɛci kruhú kɛ Mohizì wá tán le ye merɛ́n eyrì-bɔ́ wrú yɛ tán ɛnnyɔnwrɔn yakɛ yɛ wrɔ́ nɛ̀n hàn?”

⁸Zhezü mrɛ́n ɔmùan le: “Mohizì tán nyɛ̀n ɛkɔrɛ̀levri nyɛ́n wrɔ́ nyɛ́n hi hɔ̀n, ɔmuhi nyɛ́n ẅɛn ɛnbɔrɛ shishi nɔn. Tɛ́n ɛnkrubɔmɛ̀n lɔ, kè sɩ̀ dù ɔmu lɔ.

⁹Mɛ dɔ́ nyɛ̀n le: ke dú kɛ ɛncɔnwrɔn kɛ wrɔ́ nɛ́n hi, kɩ ke nyri ɔmu le, ɛnnyɔnwrɔn lɔ ke sɩ̀ fɔ̀ndɔ̀n ɛnyànmàn, nɛ̀n dú ɔmùan-zri-diemɛ̀n, kɩ ne yri ɛnnyɔnwrɔn nyàntɛn, nɛ́n, ɛncɔnwrɔn ndɔ lɔ nɛ hán ɛnnyɔnwrɔn-bi-gbàn.”

¹⁰Zhezü sɛ̀nkɛn-bɔ̀ lɔ kɛ dɔ́ nɛ̀n le: “Ke dú kɛ, ɔmu de ɛncɔnwrɔn mán ɛnnyɔnwrɔn granmɛ̀n ankà lɔ dù nɔn hô, zrɔ tán le ye bɩ́ yri ɛnnyɔnwrɔn.”

¹¹Zhezü mrɛ́n yɔ ɔmùan le: “Ke sɩ̀ dù anwrɔn lɔ fɛn de kɛ lɛ ẅɛn ɛnbɔrɛ kɛ̀ hɛ́n kè shri ankà-yé ndɔ lɔ kè bɩ nɔn, tɛ́n anwrɔn hɔ̀n léyi Ɔwɔ kɛ tán hɩ ci-hán lɔ nɔn.

¹²Ankà-zrɔ-ankà bobrebe de kɛ wá tán wúcɔ̀ ke bɩ́ yri wúyɔ̀: ndɔ hɔ̀n tɛn, ɛcɛmɛ̀n hán hɛ́n yɔ sɩ̀ dù wúcɔ̀, ɛnlɔẅiɛ kruhú, ɛnjanbɔ̀ tɛn, y'anwrɔn hɔ̀n léyi ẅɛn yɔ nɔn, kɛ bó yɔ ke die; zɛtɛn ɔtrɔmɛ̀n lɔ ndɔ hɔ̀n ke sɩ́ ji ke yri wúyɔ̀, Anhobɩ́ Nɛ̀ncüì-dúyri kruhú. Ke dú kɛ ɔwrɔn kɛ lɛ ẅɛn ankà-yé ndɔ lɔ kɛ hɛ́n tɛ̀ hô, nɛ̀n shrì nɛ̀n bɩ!”

¹³Anwrɔn bɩ́ ɛẅì hɔ̀n vá sɩ́ Zhezü ô nɛ̀n di yɔ ankɔ̀rɛ̀ ɛwú, nɛ̀n sɛ̀n nɛ̀n tán yɔ, tɛ́n ɛsɛ̀nkɛn-bɔ̀ lɔ kɛ gbá anvɛ̀ wá anwrɔn hɔ̀n lɔ.

¹⁴Zɛtɛn Zhezü kɛ dɔ̀ le: “Nyɛ́n teze ɛẅì hɔ̀n kɛ̀ và cɔ́ mɛ̀n, kɩ nyɛ́n bɩ́ kɛ́n yɔ nyɛ́n hɛ́n hán, ɔmuhi Anhobɩ́ nɛ̀ncüì-dúyri dú anwrɔn hɔ̀n léyi ndù hán yɔ hɔ́ nɔn tɛn.”

¹⁵Nɛ̀n di yɔ ankɔ̀rɛ̀ ɛwú kɩ nɛ̀n cɔhɔ́ ɛyri léyi nɛ́n dù nɔn.

¹⁶Ɔwrɔn tɔ̀n sɔnba Zhezü ɛtɛ̀sɛ̀n kɩ ke yrɛ nɛ̀n le: “Ankà-yé-wrɔn, eci ankrànkràn tán de ke ji le mɛ́n hán ô mɛ̀n cɔ́ ɛwúvà léyi ke sɩ́ trɔa nɛ́n?”

¹⁷Zhezü kɛ dɔ́ nɛ̀n le: “Cɛci kruhú kɛ e yrɛ mɛ̀n ankà, eci léyi zrɔ nɔn hɩ wúɛ? Eci zri kɩ zrɔ. Ke dú kɛ e ji è bru ɛwúvà mɛ̀n, ɛ̀ ẅɛn ɛnyànmàn hɔ̀n lɔ ɛ̀ hɛ́n.”

¹⁸Ne yrɛ Zhezü le: “Tɛtán hɔ̀n lɔa?” Zhezü mrɛ́n ɔmùan le: “E bɩ́ wri ɔwrɔn, e bɩ́ hán ɛncɔnwrɔn-hi-bi-gbàn; e bɩ́ yerɛ ɛci; e bɩ́ di ɛyɔ̀n dalɛfuɛ ɔwrɔn tɛ̀sɛ̀n;

¹⁹ɛ̀ wá ezi mán ɔmuan; ɛ̀ cüɛn ɛnyran kɛ̀ hán vɛ́n mumù hɔ́.”

²⁰Sùgban-wrɔn lɔ kɛ dɔ́ nɛ̀n le: “Mɛ̀n ẅɛn ɛnyànmàn ndɔ hɔ̀n lɔ fɛn mɛ̀n hɛ́n. Ecitan de ke ji le mɛ̀n vru mɛ̀n hán nɛ́n?”

²¹Zhezü kɛ dɔ́ nɛ̀n le: “Ke dú kɛ e ji è krɔn kpehɛ́n hô, ɛ̀ hɔ̀n hɛ́ v'ɛci hɔ̀n lɔ fɛn, è bɩ́ ɔkùa lɔ ɛ̀ tán ɛmian-bɔ̀, zɛtɛn ɛ lɛ cɔ́ ɛnnɛ̀ncüì-di-ci anhobɩ́; zɛtɛn è vru ɛ̀ và, ô ɛ̀ kɛ́n mɛ̀n ɛsɛ̀n.”

²²Tɛ́n ɛnvra léyi sùgbán-wrɔn lɔ yá ankà ndɔ lɔ nɔn, nɛ́n hɔ̀n kɩ nɛ̀n bɩ́ ɛnhyɔ̀bɔ̀ nɛ̀n ku edù, ɔmuhi nɛ̀n ẅɛn ɛci bobrebe nɔn.

²³Zɛtɛn Zhezü kɛ dɔ́ n'ɛsɛ̀nkɛn-bɔ̀ le: “Mɛ dɔ́ nyɛ̀n annànwɔrɛ mɛ̀n le: sɔ́ tán ɔwrɔn léyi di ɛnnɛ̀ncüì nɔn ke bru Anhobɩ́ nɛ̀ncüì-dúyri.

²⁴Kɩ me vru mɛ dɔ́ nyɛ̀n le: sɔ́ tán frimú kè ci frɛnfrɛn levri, tɛ́n vru sɔ́ tán ɛnnɛ̀ncüì ke bru Anhobɩ́ nɛ̀ncüì-dúyri.”

²⁵Ɛnvra léyi ɛsɛ̀nkɛn-bɔ̀ hɔ̀n lɔ yá ankà ndɔ hɔ̀n lɔ nɔn, yɔ dú anvɛmɛ̀n-frɛ́n mɛ̀n kɩ yɔ dɔ̀ le: “Zɛtɛn antɔn de kɛ lɛ cɔ́ ebɩdie nɛ́n?”

²⁶Zhezü nyan yɔ kɩ kɛ dɔ́ yɔ le: “Sɔ́ tán anwrɔnẅì, tɛ́n Ɔwɔ yri tɛn kè sɩ̀ sɔ̀a.”

²⁷Zɛtɛn Piɛrɛ̀n bɩ́ ankà-dɔ̀ kɩ kɛ dɔ̀ le: “E die nukùɛ, bɔ́ tecüe ɛci lɔ fɛn bɔ̀ kɛ́n mɛ́n ɛsɛ̀n. Ecitan de bɔ́ lɛ cɔ̀ nɛ́n?”

²⁸Zhezü kɛ dɔ́ yɔ le: “Mɛ dɔ́ nyɛ̀n annànwɔrɛ mɛ̀n le: ɛnvra léyi ɔwrɔnẅì Ẅì kɛ lɛ yɛ́ n'ecizrɔ gbú-tobù lɔ wú, ɛwúvà wrù lɔ mɛ̀n nɔn, nyɛ́n anwrɔn ɛvà-anhyrɛ̀ hɔ̀n léyi nyɛ́n kɛ́n mɛ̀n ɛsɛ̀n nɔn, nyɛ lɛ yɛ́ ɔmu zri lɔ ɛgbú-tobù wú, nyɛ́n ci Izraɛlɛ̀n mɛ̀n kru ɛvà-anhyrɛ̀ lɔ ɛmrɛ̀n.

²⁹Kɩ anwrɔn hɔ̀n léyi m'ɛkruhú tecüe y'ɔwrɔn, yɔ muan-ẅì hɔ́n wúyɔ̀ mán wúcɔ̀, yɔ zi mán yɔ muan, y'ɛẅì hɔ̀n, y'ankɛ̀tɛ̀, kɛ lɛ cɔ́ anjakpà ke le wí ɛkoẅi-ɛnrì kɩ kɛ lɛ cɔ́ ɛwúvà léyi ke sɩ́ trɔa nɔn.

³⁰Tɛ́n bobrebe ndɔ hɔ̀n léyi dú kpàkpà-bɔ̀ nɔn, kɛ lɛ trɔ ɛmɛẅi, kɩ ɛmɛẅi-trɔ-bɔ̀ lɔ bobrebe ke le dú kpàkpà-bɔ̀.”