Read Alladian Matie 21 Bible Online

Matie 21 - Alladian bible

Matie 21

¹Ɛnvra léyi Zhezü mán n'ɛsɛ̀nkɛn-bɔ̀ bá Zherüzalɛmɛ̀n tɛ̀sɛ̀n, hɩ yɔ vá Bɛtfazhe anmàn bru-yri, ɛẅì-shi-tɛ̀ hɔ̀n léyi ye bi olivie, n'ɛnkpò cɛ tɔ̀n wú nɔn, Zhezü wá n'ɛsɛ̀nkɛn-bɔ̀ anhyrɛ̀ ɔkɔ̀hɔ̀n.

²Zhezü kɛ dɔ́ yɔ le: “Nyɛ́n hɔ́n anmàn léyi dú nyɛ̀n ezì nɔn; nyɛ lɛ cɔ́ zɛtɛ̀ lɔ frimú-sɛ̀n, yɛ mɔɛn nɛ̀n, nɛ́n mán n'ɛnẅì mɛhi. Nyɛ́n gbɔrɔ yɔ, ô nyɛ́n bɩ́ yɔ nyɛ́n và sɩ́ mɛ̀n.

³Ke dú kɛ ye yrɛ nyɛ̀n ankà hô, nyɛ́n mrɛ́n ɔmùan le: ‘Ɛẅɛnwrɔn ke ji annɔ̀n hɔ̀n lɔ.’ Kɩ ɛnvra zri lɔ ye le teze yɔ, yɔ hɔ̀n.”

⁴Eci lɔ hán, ô Ɔwɔ-mùanwú-ankà-dɔ́-wrɔn ankà léyi dɔ̀ nɔn kɛ̀ sá nmù:

⁵“Nyɛ́n dɔ́ Siɔn anmàn-bɔ̀ le: Nyàn, v'ɛnnɛ̀ncüì lɔ kɛ vá mɛ́n, anwɔwɔ yɩ́ nɛ̀n ɛmɛ̀n, nɛ̀n yɛ́ frimú-sɛ̀n mán frimú-ẅì wúɛ, frimú-sɛ̀n ẅì.”

⁶Ɛsɛ̀nkɛn-bɔ̀ lɔ hɔ̀n kɩ yɔ hán eci léyi Zhezü wá tán yɔ nɔn.

⁷Yɔ sɩ́ frimú-sɛ̀n mán frimú-ẅì lɔ, yɔ bɩ́ y'ɛceci hɔ̀n lɔ yɔ ku annɔ̀n hɔ̀n lɔ wú kɩ Zhezü ci ɛwú yɛ́.

⁸Anwrɔn fɛcüè vri tɔ̀n bɩ́ y'ɛceci hɔ̀n lɔ cüe ɛnlevriɛ; ndɔ hɔ̀n kɛ voyan antɛ̀-da cüe ɛnlevriɛ.

⁹Anwrɔn hɔ̀n léyi dú Zhezü ezì mán ɛmɛẅi kɛ nán esù nɔn, ke di bobo kɛ dɔ̀ le: “Eci-zrɔ kè dú Davidɛ̀n Ẅì tɛn! Ɔwɔ kè fú ɔwrɔn léyi kɛ vá Ɛẅɛnwrɔn bɩ́mɛ̀n nɔn ɛnshi! Eci-zrɔ kè dú Ɔwɔ tɛn anhobɩ́ ɛwú!”

¹⁰Ɛnvra léyi Zhezü bru Zherüzalɛmɛ̀n nɔn, anmàn-bɔ̀ bukru kɛ jɔ́kɔ́ y'edomɛ̀n. Yɔ yrɛ le: “Antɔn dú ɔwrɔn ndɔ lɔa?”

¹¹Anwrɔn mrɛ́n ɔmùan le: “Ɔwɔ-mùanwú-ankà-dɔ́-wrɔn Zhezü, Nazarɛtɛ̀n anmàn, Galile kpɔsɔ wú wrɔn.”

¹²Zhezü bru Ɔwɔ-cice-wɔn lɔ mɛ̀n kɩ kɛ wrɔ́ anwrɔn hɔ̀n léyi kɛ hɛ́ ɛci mán ndɔ hɔ̀n léyi kɛ wɔ́ ɛci nanvrɛn lɔ nɔn; nɛ taka ɔkùa-crɔn-bɔ̀ tɛbrɛ̀ mán brɛndre-hɛ́-bɔ̀ kpata cüe.

¹³Zɛtɛn nɛ dɔ́ yɔ le: “Ɛwrú Prɔnprɔn hɔ̀n kɛ dɔ̀ le: ‘Ye le bi m'ɔwɔn lɔ, Ɔwɔ-sɛ́n-wɔn.’ Tɛ́n nyɛ́n bɩ́ nɛ̀n nyɛ́n srɔ ɛci-yerɛ-bɔ̀ kpò nànmàn!”

¹⁴Anvɛ̀-bɔyɛ-bɔ̀ mán ɛnan-kpò-bɔ̀ sɔnba Zhezü ɛtɛ̀sɛ̀n Ɔwɔ-cice-wɔn lɔ mɛ̀n kɩ nɛ̀n kɔrɛ yɔ.

¹⁵Ɔwɔ-cice-bɔ̀ cüìcüì hɔ̀n mán ɛnyànmàn-gbànvri-ankà-yé-bɔ̀ ke bɩ́ ɛmɛ̀nhyì ɛnvra léyi yɔ kán nɛ̀n nɛ hán anvɛmɛ̀n-frɛ́n-ci kɩ ɛẅì hɔ̀n ke di bobo Ɔwɔ-cice-wɔn lɔ mɛ̀n, kɩ kɛ dɔ̀ le: “Eci-zrɔ kè dú Davidɛ̀n Ẅì tɛn!”

¹⁶Zɛtɛn yɔ dɔ́ Zhezü le: “Ɛ yá ankà léyi yɔ dɔ̀ nɛ́n?” Zhezü mrɛ́n yɔ ɔmùan le: “Hɛ̀ɛ̀, ankà ndɔ lɔ nyɛ vá gɔ̀ krɛ́ nɛ̀n mrìmrì Owrú Prɔnprɔn lɔ mɛ̀n: ‘Ɛ hán tán ô ɛẅì hɔ̀n mán ɛẅì dɛ̀kɛ̀ hɔ̀n kɛ̀ mrɛ́n mɛ́n hán’?”

¹⁷Zɛtɛn nɛ̀n teze yɔ kɩ nɛ̀n srɔ ɛntrɛ, nɛ̀n hɔ́n Betani, nanvrɛn de nɛ̀n dɛ́ nɔn.

¹⁸Ɛcɛ̀n cüe, ɔsɔ̀wrɔ̀ fùtàn, Zhezü vru ɛmɛẅi kɛ vá anmàn, kɩ ɔmùanwù kɛ ẅɛ̀n.

¹⁹Nɛ̀n kán ɛẅì-shi-tɛ̀ tɔ̀n léyi ye bi figie nɔn ɛnlevri mùan kɩ nɛ́n sɔnba yi ɛtɛ̀sɛ̀n, tɛ́n ɛẅi sà kɩ dú nɛ̀n ɛwú. Zɛtɛn Zhezü kɛ dɔ́ ɛẅì-shi-tɛ̀ lɔ le: “E sɩ̀ vru shi ɛẅì mrìmrì!” Ɛnvra zri lɔ ɛẅì-shi-tɛ̀ lɔ wrú.

²⁰Ɛsɛ̀nkɛn-bɔ̀ lɔ kán eci léyi wɔɛ̀n nɔn kɩ yɔ dú anvɛmɛ̀n-frɛ́n-mɛ̀n. Yɔ yrɛ Zhezü le: “Anhɔntan kɛ̂ ɛẅì-shi-tɛ̀ ndɔ lɔ ke wrú zɛtɛ̀ lɔa?”

²¹Zhezü mrɛ́n yɔ ɔmùan le: “Mɛ dɔ́ nyɛ̀n annànwɔrɛ mɛ̀n le: ke dú kɛ nyɛ́n ẅɛn ankàẅì-bùtan, kɩ nyɛ́n sɩ̀ wà ɛnbɔrɛ anhyrɛ̀, kè sɩ̀ dù eci léyi mɛ̀n hán ɛẅì-shi-tɛ̀ ndɔ lɔ nɔn kɩ nyɛ lɛ hán, tɛ́n, nyɛ lɛ dɔ́ ɛnkpò cɛ ndɔ lɔ le: ‘Cɔhɔ́ ɛnu lɔ, ô ɛ̀ hɔ̀n bru ecüe’, kɩ eci lɔ kɛ lɛ hán.

²²Ke dú kɛ nyɛ ẅɛn ankàẅì-bùtan, nyɛ lɛ cɔ́ eci lɔ fɛn léyi nyɛ sán Ɔwɔ-sɛ́n mɛ̀n nɔn.”

²³Zhezü bru Ɔwɔ-cice wɔn lɔ mɛ̀n kɩ bukru ke yé ankà; Ɔwɔ-cice-bɔ̀ cüìcüì mán Zhüifɛ̀n fɛcüè cüìcüì-bɔ̀, zɛtɛn sɔnba Zhezü ɛtɛ̀sɛ̀n kɩ ke yrɛ nɛ̀n le: “Ɛkɔrɛ̀levri tán mɛ̀n de ɛ hán ɛci ndɔ hɔ̀n lɔ nɛ́n? Antɔn de tán mɛ́n hɩ kɔrɛ̀levri lɔ nɛ́n?”

²⁴Zhezü mrɛ́n yɔ ɔmùan le: “Mɛ̀n mán me le yrɛ nyɛ̀n ankà zri, ɛnzri kɩ; ke dú kɛ nyɛ tán mɛ̀n ɛmɛẅi ankà hô, zɛtɛn mɛ lɛ dɔ́ nyɛ̀n, ɛkɔrɛ̀levri léyi mɛ́n ẅɛ̀n, hɩ mɛ hán ɛci ndɔ hɔ̀n lɔ nɔn.

²⁵Antɔn de wá Zhan Batisì ɔkɔ̀hɔ̀n kɛ̀ wá anwrɔn ɛnshi ɛnkru nɛ́n? Ɔwɔ kàle anwrɔnẅì hɛ̀?” Tɛ́n, ecüìwrɔn dú yɔ angranmɛ̀n kɩ yɔ dɔ́ y'edomɛ̀n le: “Ke dú kɛ bɔ́ mrɛ́n ɔmùan le: ‘Ɔwɔ de wá nɛ̀n ɔkɔ̀hɔ̀n nɔn’, ne le yrɛ bɔ̀ le: ‘Cɛci kruhú kɛ nyɛ́n sɩ́ bú Zhan ankà nyɛ̀n tàn ankàẅì hɛ̀?’

²⁶Tɛ́n, ke dú kɛ bɔ́ dɔ̀ le: ‘Anwrɔnẅì de wá nɛ̀n ɔkɔ̀hɔ̀n nɔn’, ke ji le bɔ̀ ẅɛn fɛcüè sù, ɔmuhi yɔ lɔ fɛn yɔ tro le Zhan dú Ɔwɔ-mùanwú-ankà-dɔ́-wrɔn tɔ̀n nɔn.”

²⁷Zɛtɛn yɔ mrɛ́n Zhezü ɔmùan le: “Bɔ̀ sɩ̀ nyrìɛn.” Zhezü mrɛ́n yɔ ɔmùan le: “Ke dú ɔmu lɔ hô, mɛ̀n mán mɛ́n sɩ̀ dɔ́ nyɛ̀n m'ɛkɔrɛ̀levri ankà, ɛci hɔ̀n léyi mɛ hán nɔn hɩ wú.”

²⁸Zhezü ke yrɛ le: “Ankà-tro tán de nyɛ ẅɛn ankà ndɔ lɔ wú nɛ́n? Ɔwrɔn tɔ̀n ẅɛn ɛẅì hɔ̀n anhyrɛ̀. Nɛ dɔ́ kpàkpà ẅì lɔ le: ‘M'ɛnẅì, ɛnyɔncì lɔ, ɛ̀ hɔ́n ankɛ̀tɛmɛ̀n ɛ̀ hán ɔkɔ̀hɔ̀n.’

²⁹Ɛnẅì lɔ mrɛ́n nɛ̀n ɔmùan le: ‘Hɔ̂, mɛ́n sɩ̀ hɔ̀n’, tɛ́n ɛnẅì lɔ yɛ́, bɩ́ ɛnvra kɩ hɔ́n ankɛ̀tɛmɛ̀n.

³⁰Zɛtɛn ɛnẅì-nɛ́n-zi lɔ dɔ́ ankà zri lɔ tán anhyrɛmɛ̀n ẅì lɔ. Ɛnẅì ndɔ lɔ mrɛ́n nɛ̀n ɔmùan le: ‘Hɛ̀ɛ̀, Dade, mɛ hɔ́n ankɛ̀tɛmɛ̀n’, tɛ́n ɛnẅì lɔ kè sɩ̀ hɔ̀n hàn.

³¹Ɛẅì hɔ̀n anhyrɛ̀ lɔ, tɛtán de hán nɛ́n zi kɔrɛ̀zì-ci nɛ́n?” Yɔ mrɛ́n nɛ̀n ɔmùan le: “Kpàkpà ẅì lɔ.” Zɛtɛn Zhezü kɛ dɔ́ yɔ le: “Mɛ dɔ́ nyɛ̀n annànwɔrɛ mɛ̀n le: anmàn-wɔɛ̀n-yrɛ-bɔ̀, mán woẅie-wúyɔ̀ kɛ lɛ hɛ́ nyɛ̀n ezì Anhobɩ́ nɛ̀ncüì-dúyri.

³²Ɔmuhi Zhan Batisì vá nyɛ̀n ɛnlevri ankrànkràn yé yri, kɩ nyɛ́n sɩ̀ bù n'ankà nyɛ́n tàn ankàẅì; tɛ́n anmàn-wɔɛ̀n-yrɛ-bɔ̀ mán woẅie-wúyɔ̀ bú n'ankà tán ankàẅì. Kɩ ɛnvra léyi nyɛ́n kán eci ndɔ lɔ nɔn, nyɛ́n sɩ̀ crɔ̀n ny'ɛnbɔrɛ lɔ, ô nyɛ́n bù n'ankà nyɛ́n tàn ankàẅì.”

³³“Nyɛ́n die nyandrɛn nyàntɛn tɔ̀n ankà-dɔ̀ nukùɛ: Ɛkɛ̀tɛ́-nɛ́n-zi tɔ̀n, tɛ́ ɛci ankɛ̀tɛmɛ̀n; nɛ̀n wá ɔkɔ̀ nɛ̀n sɛ́n ɛkɛ̀tɛ̀ lɔ, nɛ̀n bɔ́ ɛnnànmàn nɛ̀n hán ɛci-borɛ-yri, nɛ̀n hán ɛci-hɛ́n-yri, kɩ nɛ̀n ku ɛyri-nan-wɔn tɔ̀n. Zɛtɛn, nɛ̀n bɩ́ ɛkɛ̀tɛ̀ lɔ nɛ̀n wá ɛkɛ̀tɛ̀-kɔ̀hɔ̀n-hán-bɔ̀ antamɛ̀n, kɩ nɛ̀n hɔ́n ɛyri.

³⁴Ɛnvra léyi ɛci-küɛ vra cɔ̀ nɔn, ɛkɛ̀tɛ́-nɛ́n-zi wá n'ɛci-bɩtan-bɔ̀ ɔkɔ̀hɔ̀n ɛkɛ̀tɛ̀-kɔ̀hɔ̀n-hán-bɔ̀ lɔ yri, kè bɩ́ nɛ tɛn ɛci kɛ̀ và sɩ́ nɛ̀n.

³⁵Tɛ́n, ɛkɛ̀tɛ̀-kɔ̀hɔ̀n-hán-bɔ̀ lɔ ẅɛn ɛkɛ̀tɛ̀-nɛ́n-zi ci-bɩtan-bɔ̀ lɔ ɔtɔ̀n gorɛ, wri anhyrɛmɛ̀n mán anhɔnmɛ̀n tɛn lɔ, ɛbù mɛ̀n.

³⁶Zɛtɛn ɛkɛ̀tɛ́-nɛ́n-zi vru wá anwrɔn ɔkɔ̀hɔ̀n cüɛn vrán kpàkpà-bɔ̀ lɔ, tɛ́n ɛkɛ̀tɛ̀-kɔ̀hɔ̀n-hán-bɔ̀ lɔ, hán yɔ eci zri lɔ.

³⁷Ɔtrɔmɛ̀n lɔ, nɛ̀n wá n'ɛnẅì ɔkɔ̀hɔ̀n kɩ nɛ̀n ẅɛn ankà-tro le: ‘Yɔ lɛ ẅɛn m'ɛnẅì lɔ n'ɔwá.’

³⁸Tɛ́n, ɛnvra léyi ɛkɛ̀tɛ̀-kɔ̀hɔ̀n-hán-bɔ̀ lɔ kán ɛnẅì lɔ nɔn, yɔ dɔ́ y'edomɛ̀n le: ‘Nyàn anja-di-wrɔn lɔ! Bɔ̀ hɔ̀n, bɔ̀ wri nɛ̀n kɩ bɔ́ lɛ srɔ ɛkɛ̀tɛ́-nɛ́n-zi hɔ̀n!’

³⁹Zɛtɛn Yɔ ẅɛn nɛ̀n, yɔ kɔ́n ze ɔkɔ̀ mɛẅi, kɩ yɔ wri nɛ̀n.”

⁴⁰Zɛtɛn Zhezü ke yrɛ yɔ le: “Ɛnvra léyi ɛkɛ̀tɛ̀-nɛ́n-zi kɛ lɛ và nɔn, ecitan de nɛ lɛ hán ɛkɛ̀tɛ̀-kɔ̀hɔ̀n-hán-bɔ̀ ndɔ hɔ̀n lɔ nɛ́n?”

⁴¹Yɔ mrɛ́n nɛ̀n ɔmùan le: “Ne le wri ɛkɛ̀tɛ̀-kɔ̀hɔ̀n-hán-bɔ̀ gbàngbàn ndɔ hɔ̀n lɔ, nɛ́n sɩ̀ nyri ɛnzri mán ɛnhyɔ̀bɔ̀, kɩ ne le bɩ́ ɛkɛ̀tɛ̀ lɔ nɛ̀n wá ɛkɛ̀tɛ̀-kɔ̀hɔ̀n-hán-bɔ̀ nyàntɛn hɔ̀n antamɛ̀n; yɔ léyi, yɔ lɛ và sɩ́ nɛ̀n ɛci, ɛci-küɛ vra lɔ nɔn.”

⁴²Zɛtɛn Zhezü kɛ dɔ́ yɔ le: “Nyɛ vá krɛ́ mrìmrì, ankà léyi Owrú Prɔnprɔn kɛ dɔ̀ nɛ́n? ‘Obù léyi ɔwɔn-ku-bɔ̀ kɔ́n ze nɔn hɩ de srɔ ɔwɔn kavà-mɛ̀n-bù. Ndɔ lɔ dú Ɛẅɛnwrɔn yri và, bɔ́ tɛn, dú eci anvrɛnvrɛn bɔ́ zìwú!’

⁴³Zhezü vru kɛ dɔ̀ le: Hɩ le kruhú de mɛ dɔ́ nyɛ̀n le: ye le bɩ́ nyɛ̀n Anhobɩ́ nɛ̀ncüì-dúyri antamɛ̀n yɛ sɔhɔ́, ô yɛ wá fɛcüè léyi ke le shi ɛẅì fifi nɔn antamɛ̀n. [

⁴⁴Ɔwrɔn léyi ke le bore obù ndɔ lɔ wú nɔn, nɛ lɛ bɔyɛ n'edomɛ̀n wá; kɩ ke dú kɛ obù lɔ ke bru Ɔwrɔn tɔ̀n ɛwú hô, nɛ lɛ srɔ ɔwrɔn lɔ nwɔ̀n-hiẅia.]”

⁴⁵Ɔwɔ-cice-bɔ̀ cüìcüì hɔ̀n mán Ɔwɔ-nyànmàn-sùva-wá-bɔ̀ yá Zhezü nyandrɛn mɛ̀n ankà léyi dɔ̀ nɔn, kɩ yɔ nyri ɔmu le y'ankà de nɛ dɔ̀ nɔn.

⁴⁶Zɛtɛn yɔ ji ɛyri ô yɔ ẅɛn nɛ̀n, tɛ́n yɔ sú fɛcüè léyi ke bɩ́ Zhezü kɛ hán Ɔwɔ-mùanwú-ankà-dɔ́-wrɔn tɔ̀n nɔn.