Read Alladian Matie 22 Bible Online

Matie 22 - Alladian bible

Matie 22

¹Zhezü vru bɩ́ nyandrɛn kɛ dɔ́ anwrɔn hɔ̀n léyi ke die nɛ̀n nukùɛ nɔn ankà. Nɛ dɔ́ yɔ le:

²“Nyàn eci léyi Anhobɩ́ nɛ̀ncüì-dúyri kɛ cá nɔn: Ɛnnɛ̀ncüì tɔ̀n gbrɛ́ ɛci vri n'ɛnẅì yrì-koran lɔ mɛ̀n.

³Nɛ̀n wá n'ɛci-bɩtan-bɔ̀ ɔkɔ̀hɔ̀n kɛ̀ hɔ̀n kè bi anwrɔn hɔ̀n léyi ye bi ɛci-zî ndɔ lɔ mɛ̀n nɔn, tɛ́n anwrɔn hɔ̀n lɔ kè sɩ̀ shrì kɛ̀ và.

⁴Zɛtɛn nɛ̀n wá ɛci-bɩtan-bɔ̀ nyàntɛn hɔ̀n ɔkɔ̀hɔ̀n, nɛ̀n wá ɛnyànmàn ndɔ lɔ nɛ̀n tán yɔ: ‘Nyɛ́n dɔ́ anwrɔn hɔ̀n léyi ye bi ɛci-zîemɛ̀n nɔn le: M'ɛci-zî lɔ yɛ gbrɛ̀ trɔa, m'ɛnnànmán hɔ̀n mán m'ɛnzhì-wá-nɔ̀n hɔ̀n lɔ fɛn ye wrì, ɛci lɔ fɛn krɔn kpehɛ́n. Nyɛ́n vá eyrì-koran-ci-zîemɛ̀n!’

⁵Tɛ́n anwrɔn hɔ̀n léyi ye bi ɛci nɔn, kè sɩ̀ bɔ̀ ɛshi, kɩ hɔ́n y'ɛci-hán-yri: ɔtɔ̀n hɔ́n n'ankɛ̀tɛmɛ̀n, ndɔ lɔ hɔ́n n'anhàn-zhrɛ́-yri;

⁶anwrɔn ndɔ hɔ̀n ẅɛn ɛci-bɩtan-bɔ̀ léyi yɛ wá ɔkɔ̀hɔ̀n nɔn, wri yɔ eci edù, kɩ wri ndɔ hɔ̀n.

⁷Ɛnnɛ̀ncüì lɔ bɩ́ ɛmɛ̀nhyì: nɛ wá nɛ́n gɔliɛ-bɔ̀ ɔkɔ̀hɔ̀n wri anwrɔn wri-bɔ̀ lɔ kɩ wá y'anmàn lɔ ɛnhyà.

⁸Zɛtɛn nɛ dɔ́ n'ɛci-bɩtan-bɔ̀ lɔ le: ‘Eyrì-koran ci-zî lɔ krɔn kpehɛ́n, tɛ́n anwrɔn hɔ̀n léyi ye bi ɛci nɔn, ke sɩ̀ vɛ́n yɔ.

⁹Nyɛ́n hɔ́n anmàn drɛnmɔɛ́n lɔ fɛn mɛ̀n, ô nyɛ́n bi ɛci-zî lɔ mɛ̀n, anwrɔn hɔ̀n léyi nyɛ lɛ cɔ̀ nɔn.’

¹⁰Ɛci-bɩtan-bɔ̀ lɔ, hɔ́n *andrɛnmɔɛ́n lɔ fɛn mɛ̀n kɩ borɛ anwrɔn lɔ fɛn léyi yɛ cɔ̀ nɔn ɛkru, angbàngbàn hɔ̀n mán ankrànkràn hɔ̀n; kɩ ɔmu lɔ, ɛci-zî-yri lɔ anwrɔn yɩ̀.

¹¹Ɛnnɛ̀ncüì lɔ bru ɛci-zî-yri lɔ, ô kɛ̀ nyan ɛci-zî-bɔ̀ kɩ nɛ̀n kán ɔwrɔn tɔ̀n léyi kè sɩ̀ bɩ ɔkoran ceci nɔn.

¹²Ne yrɛ ɔwrɔn lɔ le: ‘Annyran anvrɛn, anhɔntan ɛ̀ hán è bru ɛnu lɔ, kɩ è sɩ̀ bɩ ɔkoran ceci hɛ́?’ Tɛ́n, ɔwrɔn lɔ ke sɩ́ dɔ́ ankà zriɛmɛ́n.

¹³Zɛtɛn ɛnnɛ̀ncüì lɔ kɛ dɔ́ ɛci-bɩtan-bɔ̀ lɔ le: ‘Nyɛ́n kora nɛ̀n annan mán ankɔ̀rɛ̀, ô nyɛ́n kɔ́n nɛ̀n die ɛntrɛ, ɛyri yɔwɔ mɛ̀n. Nanvrɛn lɔ de ɛnnyî-rá mán eyú-wù ke le dú nɛ tɛn nɔn.’

¹⁴Zɛtɛn Zhezü kɛ dɔ̀ le: Bobrebe ye bi ɛci, tɛ́n ɛẅiɛ kɩ yɛ cɔ̀.”

¹⁵Ɔwɔ-nyànmàn-sùva-wá-bɔ̀ krɔn ɔmùan, ô yɔ nyri ɔmu le yɔ lɛ hán, yɔ krɔn Zhezü antanwrɔn ankà-yrɛ mɛ̀n, ô yɔ ẅɛn nɛ̀n nɔn.

¹⁶Yɔ wá y'ɛsɛ̀nkɛn-bɔ̀ mán Herɔdɛ̀n zìwú bɔ̀ jan ɔkɔ̀hɔ̀n kɛ̀ hɔ̀n dɔ́ Zhezü le: “Ankà-yé-wrɔn, bɔ́ nyri ɔmu le ɛ dɔ́ ankàẅì ankà: E yé annànwɔrɛ ankà léyi Ɔwɔ ke ji nɔn, ɔwrɔn ankà ke sɩ́ ẅɛn mɛ́n ɛnjansù, kɩ e sɩ́ ci ɔwrɔn zriɛmɛ́n anvɛwú mrɛ̀n.

¹⁷Ɛ̀ dɔ́ bɔ̀, ankà-tro léyi ɛ̀ ẅɛn ankà ndɔ lɔ wú: Bɔ́ ɛnyànmàn lɔ kɛ tán bɔ̀ ɛkɔrɛ̀levri bɔ́ dì, kàle bɔ́ bɩ́ di govràn anmàn wɔɛ̀n hàn?”

¹⁸Tɛ́n Zhezü nyri y'ankà-tro gbàngbàn hɔ̀n; zɛtɛn nɛ dɔ́ yɔ le: “Anmùan-anhyrɛ̀-bɔ̀, cɛci kruhú kɛ nyɛ krɔn mɛ̀n antanwrɔn hán?

¹⁹Nyɛ́n yé mɛ̀n ɔkùa léyi nye bɩ nye di anmàn ɔwɔɛ̀n nɔn.” Yɔ bɩ́ ɔkùa-ẅì zri yɔ yé nɛ̀n,

²⁰kɩ Zhezü ke yrɛ yɔ le: “Picɛ̀ ndɔ lɔ mán ebɩ́ ndɔ lɔ antɔnwrɔn tɛn hán?”

²¹Yɔ mrɛ́n nɛ̀n ɔmùan le: “Govràn tɛn.” Zɛtɛn Zhezü kɛ dɔ́ yɔ le: “Nyɛ́n di govràn wɔɛ̀n léyi dú nɛ tɛn nɔn, kɩ Ɔwɔ mán nyɛ́n tán eci léyi dú nɛ tɛn nɔn.”

²²Ɛnvra léyi yɔ yá ankà ndɔ lɔ nɔn, yɔ dú anvɛmɛ̀n-frɛ́n-mɛ̀n. Yɔ teze nɛ̀n kɩ yɔ hɔ̀n.

²³Ɛnbì zri lɔ anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn vá Zhezü ɛtɛ̀sɛ̀n. Yɔ dú ɔwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn. Nyàn ɔmu le

²⁴yɔ hán yɔ yrɛ nɛ̀n ankà nɔn: “Ankà-yé-wrɔn, nyàn ankà léyi Mohizì dɔ̀ nɔn: ‘Ke dú kɛ ɔwrɔn tɔ̀n ke wù, kè sɩ̀ bî ɛnẅì, ke ji le nɛ́n muan-ẅì kè bɩ́ ɛngrɔn-hi lɔ, ô kè bî ɛnẅì kɛ̀ tán nɛ́n muan-ẅì léyi nwù nɔn.’

²⁵Tɛ́n, bɔ́ ɛmɛ̀n lɔ, anwrɔn-nɛ́n-muan-ẅì hɔ̀n ɔbɔɛ̀n de dù nɔn. Ɛnvrakpà wrɔn lɔ yri ɛnnyɔnwrɔn, ke sɩ̀ bî ɛnẅì, nwù kɩ teze ɛngrɔn-hi lɔ, kɩ anhyrɛmɛ̀n wrɔn lɔ bɩ́ ɛngrɔn-hi lɔ.

²⁶Eci zri lɔ wɔɛ́n anhyrɛmɛ̀n wrɔn lɔ, ɔmu zri lɔ de dú tán anhɔnmɛ̀n wrɔn lɔ, hàn kɩ kɛ́n yɔ anwrɔn ɔbɔɛ̀n lɔ fɛn, yɔ wù, yɔ sɩ̀ bî ɛnẅì.

²⁷Ɔtrɔmɛ̀n lɔ, ɛnnyɔnwrɔn lɔ mán wù.

²⁸Ɛnbì léyi owú-bɔ̀ ke le vru kɛ̀ vá ɔkɔrɛ-bɔ̀ mɛ̀n nɔn, ɛnnyɔnwrɔn ndɔ lɔ, antɔn de ke le dú nɛ́n cüì nɛ́n? Ɔmuhi anwrɔn-nɛ́n-muan-ẅì hɔ̀n ɔbɔɛ̀n lɔ fɛn dú nɛ́n cüì hɔ̀n nɔn!”

²⁹Zhezü mrɛ́n yɔ ɔmùan le: “Nyɛ́n dú ɛzɛ́n mɛ̀n, ɔmuhi nyɛ́n sɩ̀ nyrì Ɔwɔ wrú hɔ̀n lɔ mán Ɔwɔ kɔrɛ̀srɔn lɔ nɔn.

³⁰Annànwɔrɛ mɛ̀n lɔ, ɛnvra léyi owú-bɔ̀ ke le vru kɛ vá ɔkɔrɛ-bɔ̀ mɛ̀n nɔn, wúcɔ̀ mán wúyɔ̀ kè sɩ̀ yri y'edomɛ̀n, tɛ́n yɔ le dù kɛ lɛ hán Ɔwɔ-kùyüre-bɔ̀ léyi dú anhobɩ́ nɔn hɔ́.

³¹Owúemɛ̀n-dù-frɔ́ ankà lɔ, ɛnbì zriɛmɛ́n nyɛ vá krɛ́ mrìmrì Ɔwɔ wrú lɔ mɛ̀n ankà léyi Ɔwɔ dɔ̀ nɛ́n? Nɛ́n dɔ̀ le:

³²‘Mɛ́n dú Abrahamɛ̀n Wɔ, Izaakɛ̀n Wɔ mán Zhakɔbɛ̀n Wɔ.’ Zhezü vru dɔ̀ le: Ɔwɔ dú ɔkɔrɛ-bɔ̀ Wɔ, kɩ nɛ̀n sɩ̀ dù owú-bɔ̀ Wɔ.”

³³Anwrɔn hɔ̀n lɔ fɛn léyi yá n'ankà-dɔ̀ lɔ nɔn, dú anvɛmɛ̀n-frɛ́n-mɛ̀n n'ankà-yé lɔ kruhú.

³⁴Ɛnvra léyi ɛnyànmàn-sùva-wá-bɔ̀ yá le Zhezü dɔ́ ankà kɛ́n anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì ɔmùan hɛ́n nɔn, yɔ borɛ y'edomɛ̀n ɛkru.

³⁵Kɩ y'ɛmɛ̀n lɔ ɔwrɔn tɔ̀n, nɛ̀n dú ɛnyànmàn-gbànvri-ankà-yé-wrɔn, ne ji nɛ̀n krɔn Zhezü antanwrɔn; ne yrɛ yi le:

³⁶“Ankà-yé-wrɔn, ɛnyànmàn tán de dú ecüìcüì, ɛnyànmàn hɔ̀n lɔ fɛn wú nɛ́n?”

³⁷Zhezü mrɛ́n nɛ̀n ɔmùan le: “ ‘Ke ji le ɛ̀ cüɛn Ɛẅɛnwrɔn v'Ɔwɔ v'ɛnbɔrɛ lɔ fɛn mɛ̀n, vɛ́n wàwùyɛ lɔ fɛn mɛ̀n mán v'ɛhɛ́n lɔ fɛn mɛ̀n.’

³⁸Ndɔ lɔ de dú ɛnyànmàn cüìcüì mán hɩ léyi ẅɛn vɔ̀nshɛ́ nɔn.

³⁹Kɩ nyàn anhyrɛmɛ̀n tɛn léyi cá nɛ̀n nɔn: ‘Ke ji le ɛ̀ cüɛn ɛnyran-wrɔnẅì kɛ̀ hán vɛ́n mumù hɔ́.’

⁴⁰Mohizì nyànmàn lɔ fɛn mán ankà-yé léyi Ɔwɔ-mùanwú-ankà-dɔ́-bɔ̀ tán nɔn, kɛ crɛ nyan ɛnyànmàn anhyrɛ̀ ndɔ hɔ̀n lɔ.”

⁴¹Ɔwɔ-nyànmàn-sùva-wá-bɔ̀ borɛkru kɩ Zhezü ke yrɛ yɔ ankà ndɔ lɔ:

⁴²“Ankà tán de nye tro Ebɩdie-wrɔn lɔ wú nɛ́n? Antɔnwrɔn mɛẅi-wrɔn dú nɛ̀n?” Yɔ mrɛ́n nɛ̀n ɔmùan le: “Nɛ̀n dú Davidɛ̀n mɛẅi-wrɔn.”

⁴³Zhezü kɛ dɔ́ yɔ le: “Anhɔntan de Davidɛ̀n léyi Ɛnhɛ́n Prɔnprɔn kɛ nyrɔn, vru ke bi nɛ̀n ‘Ɛẅɛnwrɔn’ nɛ́n? Ɔmuhi Davidɛ̀n dɔ̀ le:

⁴⁴‘Ɛẅɛnwrɔn Ɔwɔ dɔ́ m'Ɛẅɛnwrɔn le: và yɛ́ mɛ̀n ezì-kɔrɛ̀ kɔrɛ̀a, hàn mán kɛ̀ krɔn ɛnvra léyi mɛ lɛ hán v'egbri-bɔ̀ kè cüe mɛ́n annantrɛ̀ mɛ̀n hán.’

⁴⁵Ke dú kɛ Davidɛ̀n ke bi nɛ̀n ‘Ɛẅɛnwrɔn’, anhɔntan de Ebɩdie-wrɔn ke vru ke dú Davidɛ̀n mɛẅi-wrɔn nɛ́n?”

⁴⁶Ɔwrɔn zriɛmɛ́n kè sɩ̀ cɔ̀ ankà-dɔ́-yri, kɩ bukru hɩ vra lɔ, yɔ sɩ́ vru yrɛ nɛ̀n ankà.