Read Alladian Matie 23 Bible Online

Matie 23 - Alladian bible

Matie 23

¹Zɛtɛn Zhezü kɛ dɔ́ fɛcüè hɔ̀n mán n'ɛsɛ̀nkɛn-bɔ̀ le:

²“Ɛnyànmàn-gbànvri-ankà-yé-bɔ̀ mán Ɔwɔ-nyànmàn-sùva-wá-bɔ̀ dú anwrɔn léyi yɛ wá ô kɛ̀ dɔ́ Mohizì nyànmàn lɔ n'ɛmɛ̀n ankà nɔn.

³Ke ji le nyɛ́n wá yɔ, ô nyɛ́n hán eci léyi yɔ wá tán nyɛ̀n nyɛ́n hán nɔn, tɛ́n nyɛ́n bɩ́ hán y'eci-hán-ci, ɔmuhi yɔ sɩ́ hán ankà léyi yɔ yé nɔn hɩ wú ci.

⁴Yɔ bɩ́ ɛnlowrú srɔnsrɔn yɔ wɔrɔ anwrɔn kɩ yɔ sɩ́ wá yɔ ɛkɔrɛ̀ antie-ẅì mùan yɔ wɔrɔ ɛnlowrú lɔ.

⁵Yɔ hán y'ɛci hɔ̀n lɔ fɛn kɛ dɛ́ ɛwú, ô anwrɔn kɛ̀ kán yɔ. Ɔmu lɔ de ankà-dɔ̀ prɔnprɔn hɔ̀n léyi ye merɛ́n, hɩ yɔ mú ezìwú, ɛnvra tɔ̀n ɛkɔrɛ̀bɔ̀n mɛ̀n nɔn, yɔ ẅɛn kotoku vri; y'ɛwú ceci-kɔrɛ̀ mùan mán ntrɛ̀.

⁶Yɔ cüɛn ɛyɛ́-yri ankrànkràn ɛci-zî vriemɛ̀n mán ezì-yɛ́-yri Ɔwɔ-sɛ́n-wɔn hɔ̀n mɛ̀n;

⁷yɔ cüɛn ebi-nyan léyi ẅɛn ɛwá anwrɔn lɔ fɛn zìwú, kɩ yɔ ji anwrɔn kè bi yɔ ‘Ankà-yé-wrɔn’.

⁸Tɛ́n nyɛ́n, nyɛ́n bɩ́ hán ye bi nyɛ̀n ‘Ankà-yé-wrɔn’, ɔmuhi nyɛ́n dú nyɛ lɛ fɛn lɔ, anwrɔn-nɛ́n-muan-ẅì hɔ̀n kɩ nyɛ́n ẅɛn Ankà-yé-wrɔn zri.

⁹Nyɛ́n bɩ́ bi ɔwrɔnẅì zriɛmɛ́n nyɛ́n ‘Zi’ ɛnhibù wú, ɔmuhi nyɛ́n Zi zri kɩ nyɛ́n ẅɛ̀n, nɛ́n léyi nɛ̀n dú anhobɩ́ nɔn.

¹⁰Nyɛ́n bɩ́ hán ye bi nyɛ̀n *‘Ɛfra-wrɔn’, ɔmuhi Ɛfra-wrɔn zri kɩ nyɛ́n ẅɛ̀n dú Ebɩdie-wrɔn lɔ nɔn.

¹¹Ny'ɛmɛ̀n lɔ ɔwrɔn léyi dú ecüìcüì nɔn, ke ji le nɛ̀n dú ny'eci-bɩtan-wrɔn.

¹²Ɔwrɔn léyi ke sɩ́ n'edomɛ̀n ɛwú nɔn, ye le sɩ́ nɛ̀n ɛnhi, kɩ ɔwrɔn léyi ke sɩ́ n'edomɛ̀n ɛnhi nɔn, ye le sɩ́ nɛ̀n ɛwú.”

¹³“Muzhie dú nyɛ tɛn, ɛnyànmàn-gbànvri-ankà-yé-bɔ̀ mán nyɛ́n, Ɔwɔ-nyànmàn-sùva-wá-bɔ̀, anmùan-anhyrɛ̀-bɔ̀! Nyɛ sɛ́n Anhobɩ́ nɛ̀ncüì-dúyri sù-gbàtà anwrɔnẅì zìwú; nyɛ́n mumù nyɛ́n sɩ́ bruɛ, kɩ nyɛ́n sɩ́ teze anwrɔn hɔ̀n léyi ke ji kè bru nɔn, kè bru. [

¹⁴Muzhie dú nyɛ tɛn, ɛnyànmàn-gbànvri-ankà-yé-bɔ̀ mán ɛnyànmàn-sùva-wá-bɔ̀, anmùan-anhyrɛ̀-bɔ̀! Nye bɩ́ ɛngrɔn-wúyɔ̀ hɔ̀n ɛci edomɛ̀n kɩ, ɛnvra zri lɔ nyɛ sɛ́n ɛfrɛ́n Wɔ sheshe, ô nyɛ́n hán tán ye tro le nyɛ́n dú anwrɔn ankrànkràn hɔ̀n. Hɩ le kruhú de ye le ci nyɛ̀n ɛmrɛ̀n ɛshishiemɛ̀n nɔn!]

¹⁵Muzhie dú nyɛ tɛn, ɛnyànmàn-gbànvri-ankà-yé-bɔ̀ mán ɛnyànmàn-sùva-wá-bɔ̀, anmùan-anhyrɛ̀-bɔ̀! Nyɛ hɔ́n ɛyri ɛnhibù mumù lɔ fɛn wú mán ecüe wú, ô nyɛ́n crɔn ɔwrɔn zri ɛnkru, kɩ ɛnvra léyi nyɛ cɔ́ nɛ̀n nɔn, nyɛ jrɛ́ nɛ̀n andɛ̀n-anhyrɛ̀ kɛ vrán nyɛ́n mumù.

¹⁶Muzhie dú nyɛ tɛn, anwrɔn-nyrɔn-bɔ̀ hɔ̀n léyi anvɛ̀ bɔyɛ nɔn! Nyɛ dɔ̀ le: ‘Ke dú kɛ ɔwrɔn kɛ wá ɔmùan Ɔwɔ-cice-wɔn bɩ́mɛ̀n, ɔmùan-wá ndɔ lɔ ke sɩ̀ ẅɛn nɛ̀n kɛ̀ hɛ́n; tɛ́n ke dú kɛ ecice-wɔn ansɩ̀kɛ lɔ wú de nɛ wá ɔmùan nɔn hô, nɛ̀n dú ɔmùan-wá lɔ mɛ̀n.’

¹⁷Ɔbrɔ̀sà-bɔ̀, anvɛ̀-bɔyɛ-bɔ̀! Ecitan de ẅɛn vɔ̀nshɛ́: ansɩ̀kɛ, kàle Ɔwɔ-cice-wɔn léyi kɛ srɔ ansɩ̀kɛ ndɔ lɔ eci prɔnprɔn nɛ́n?

¹⁸Nye vru nyɛ dɔ̀ le: ‘Ke dú kɛ ɔwrɔn wá ɔmùan ecice tɛbrɛ̀ bɩ́mɛ̀n, ɔmùan-wá ndɔ lɔ ke sɩ̀ ẅɛn nɛ̀n kɛ hɛ́n; tɛ́n ke dú kɛ nɛ wá ɔmùan ecice-ci léyi dú tɛbrɛ̀ lɔ wú nɔn bɩ́mɛ̀n hô, nɛ̀n dú ɔmùan-wá lɔ mɛ̀n.’

¹⁹Anvɛ̀-bɔyɛ-bɔ̀! Ecitan de ẅɛn vɔ̀nshɛ́: ecice-ci, kàle ecice tɛbrɛ̀ léyi kɛ srɔ ecice-ci lɔ prɔnprɔn nɛ́n?

²⁰Ɔwrɔn léyi kɛ wá ɔmùan ecice tɛbrɛ̀ bɩ́mɛ̀n nɔn, nɛ wá ɔmùan ecice tɛbrɛ̀ bɩ́mɛ̀n kɩ n'ɔmùan-wá lɔ dú eci lɔ fɛn léyi dú ecice tɛbrɛ̀ wú nɔn bɩ́mɛ̀n.

²¹Ɔwrɔn léyi kɛ wá ɔmùan Ɔwɔ-cice-wɔn bɩ́mɛ̀n nɔn, nɛ wá ɔmùan Ɔwɔ-cice-wɔn bɩ́mɛ̀n kɩ n'ɔmùan-wá lɔ dú Ɔwɔ léyi sɔ́n ebɩ́ ecice-wɔn lɔ mɛ̀n nɔn bɩ́mɛ̀n;

²²ɔwrɔn léyi kɛ wá ɔmùan anhobɩ́ bɩ́mɛ̀n nɔn, nɛ wá ɔmùan Ɔwɔ gbú-tobù bɩ́mɛ̀n, kɩ n'ɔmùan-wá lɔ dú Ɔwɔ léyi yɛ́ ɛgbú-tobù lɔ wú nɔn bɩ́mɛ̀n.

²³Muzhie dú nyɛ tɛn, ɛnyànmàn-gbànvri-ankà-yé-bɔ̀ mán ɛnyànmàn-sùva-wá-bɔ̀, anmùan-anhyrɛ̀-bɔ̀! Nyɛ tán Ɔwɔ ny'ɛci-tɛ́-ci hɔ̀n léyi du ɛẅí banban nɔn n'ɛvá mɛ̀n tɛn, tɛ́n nyɛ kɔ́n ankà-yé hɔ̀n léyi ẅɛn vɔ̀nshɛ́, hɩ dú ɛnyànmàn wú nɔn ze, yɔ hɔ̀n léyi dú ɛnyrɔnnan, ɛnbɔrɛ-wɔ̀ mán ɔmùan-zri-dì: ndɔ lɔ de dú eci-hán-ci, ô ndɔ léyi wɔrɔ nɔn, ke bɩ́ yuru nyɛ̀n esùva.

²⁴Anwrɔn-nyrɔn-bɔ̀ léyi anvɛ̀ bɔyɛ! Nyɛ bɛ́n ny'ɛntàn-mi-tàn, ô nyɛ́n mrɛ́n ankprà ɛmɛ̀n nyɛ́n sɔhɔ́, tɛ́n nyɛ sɔ́n ɛnnanman nmù!

²⁵Muzhie dú nyɛ tɛn, ɛnyànmàn-gbànvri-ankà-yé-bɔ̀ mán ɛnyànmàn-sùva-wá-bɔ̀, anmùan-anhyrɛ̀-bɔ̀! Nyɛ́n juru grashɛ̀n mán ɛci-zî kpokpo edomɛ̀n, tɛ́n ny'ɛci-yerɛ-ci mán ny'ankà-tro gbàngbàn yɩ́ grashɛ̀n mán pkopko mɛ̀n.

²⁶Anvɛ̀-boyɛ-wrɔn, ɛnyànmàn-sùva-wá-wrɔn! Ɛ̀ gɔ̀ juru grashɛ̀n mɛ̀n, kɩ zɛtɛn edomɛ̀n mán ke le fi nɛ̀n.

²⁷Muzhie dú nyɛ tɛn, ɛnyànmàn-gbànvri-ankà-yé-bɔ̀ mán ɛnyànmàn-sùva-wá-bɔ̀, anmùan-anhyrɛ̀-bɔ̀! Nyɛ́n dù nyɛ́n cá ɛzhe-nànmàn hɔ̀n léyi yɛ cɔ́ ɛci wosu, hɩ edomɛ̀n ɛntrɛ nfì, tɛ́n y'ɛmɛ̀n tɛn, ɛzhe-lokro mán ɛci-nyɛ́n hɔ̀n lɔ fɛn kè sɩ̀ wɛ̀n ɔmùan.

²⁸Ɔmu zri lɔ de nyɛ́n mán, nyɛ́n hán tán, ô anwrɔn lɔ fɛn kè tro le, nye di ɔmùan-zri Ɔwɔ tɛ̀sɛ̀n, tɛ́n ny'ɛnbɔrɛ mɛ̀n lɔ, anmùan-anhyrɛ̀ mán eci gbàngbàn ɛnhyì.

²⁹Muzhie dú nyɛ tɛn, ɛnyànmàn-gbànvri-ankà-yé-bɔ̀ mán ɛnyànmàn-sùva-wá-bɔ̀, anmùan-anhyrɛ̀-bɔ̀! Nyɛ bɔ́ ɛzhe-nànmàn ankrànkràn nyɛ tán Ɔwɔ-mùanwú-ankà-dɔ́-bɔ̀, nyɛ wá ɛnyrɔnnan-bɔ̀ zhe-nànmàn ɛci-fifi edomɛ̀n,

³⁰kɩ nyɛ dɔ̀ le: ‘Ke dú kɛ bɔ̀ kán bɔ́ nancüì hɔ̀n lɔ, bɔ́ sɩ̀ dú yɔ ɛmɛẅi, ô yɔ wri Ɔwɔ-mùanwú-ankà-dɔ́-bɔ̀.’

³¹Ɔmu lɔ de nyɛ́n mán nyɛ́n nyrì le, nyɛ́n dú anwrɔn hɔ̀n léyi wri Ɔwɔ-mùanwú-ankà-dɔ́-bɔ̀ lɔ nɔn, yɔ nan-ẅì hɔ̀n.

³²Zɛtɛn, nyɛ́n dú ɛmɛ̀n nyɛ́n hán, ô nyɛ́n trɔ ɛhán, eci léyi nyɛ́n nancüì hɔ̀n bukru nɔn!

³³Ɛnlɛbrì, andà-di-lɛ̀brì fɛcüè! Anhɔntan nyɛ hán tro, ô nyɛ́n bɩ́ cɔ́ ɛnhyà mɛ̀n gbàn-wɔɛ̀n-dì lɔ nɛ́n?

³⁴Hɩ le kruhú, nyɛ́n die nukùɛ: me le yüre nyɛ̀n Ɔwɔ-mùanwú-ankà-dɔ́-bɔ̀, ankà-nyri-bɔ̀ mán ɛnyànmàn-ankà-yé-bɔ̀ annànwɔrɛ. Nye le wri jan, nyɛ lɛ gɔ́n ndɔ hɔ̀n brɛ́ ɛgbàn-hán-tɛ̀ domɛ̀n, nye le gorɛ bobrebe ndɔ hɔ̀n ɛngbele mɛ̀n ny'Ɔwɔ-sɛ́n-wɔn lɔ mɛ̀n kɩ nyɛ lɛ kɛ́n ndɔ hɔ̀n ɛsɛ̀n anmàn anmàn nyɛ́n cì.

³⁵Ɔmu lɔ, ny'ɛwú de ke le ku anwrɔn wri kɔ̀hɔ̀n lɔ fɛn léyi nyɛ́n hán ɛẅì hɔ̀n kpòkpò domɛ̀n, bukru ɛnyrɔnnan-wrɔn Abɛlɛ̀n yri hàn kɩ cɔ́ Zakari, Barashi ẅì léyi nyɛ́n wri Ɔwɔ-yri-prɔnprɔn mán ɛcice tɛbrɛ̀ granmɛ̀n nɔn.

³⁶Mɛ dɔ́ nyɛ̀n, annànwɔrɛ mɛ̀n le: ɛci gbàngbàn ndɔ hɔ̀n lɔ fɛn léyi dú anwrɔn-wri kɔ̀hɔ̀n nɔn, yɔ muzhie lɔ ke le dú ɛnvra ndɔ lɔ mɛ̀n bɔ̀ lɔ ɛwú!”

³⁷“Zherüzalɛmɛ̀n, Zherüzalɛmɛ̀n, vɛ́n léyi e di Ɔwɔ-mùanwú-ankà-dɔ́-bɔ̀ owúemɛ̀n kɩ e wri ɛbùemɛ̀n anwrɔn hɔ̀n léyi Ɔwɔ ke yüre mɛ́n nɔn! Andɛ̀n ɛ̀bɛ de mɛ̀n ji v'ɛẅì hɔ̀n ɛkruborɛ m'ɛtɛ̀sɛ̀n hán ɔmu le ɔkɔ̀sɔ̀-sɛ̀n kɛ wá n'ɛẅì hɔ̀n ɛtùvà-kɔrɛ̀ krùgbɛ̀n, tɛ́n nyɛ́n sɩ́ ji ɔmu lɔ!

³⁸Zɛtɛn ny'ɔwɔn lɔ, ye le teze, nɛ lɛ dɛ́ oworoɛ.

³⁹Annànwɔrɛ mɛ̀n, mɛ dɔ́ nyɛ̀n le: bukru zɛtɛ̀ lɔ nyɛ́n sɩ̀ vru kán mɛ̀n hàn kɩ nyɛ lɛ dɔ̀ le: ‘Ɔwɔ ke fú ɔwrɔn léyi kɛ và nɔn ɛnshi Ɛẅɛnwrɔn bɩ́mɛ̀n!’ ”