Read Alladian Matie 24 Bible Online

Matie 24 - Alladian bible

Matie 24

¹Zhezü dú Ɔwɔ-cice-wɔn lɔ mɛ̀n srɔ ɛntrɛ kɩ, n'ɛhɔ́n mɛ̀n lɔ, n'ɛsɛ̀nkɛn-bɔ̀ sɔnba nɛ̀n ɛtɛ̀sɛ̀n ô kɛ̀ hán nɛ̀n nɛ̀n nyan ɔmu le yɛ hán yɔ ku Ɔwɔ-cice-wɔn lɔ nɔn.

²Zɛtɛn Zhezü bɩ́ ankà-dɔ̀ kɩ kɛ dɔ́ yɔ le: “Nyɛ kán ɛci ndɔ lɔ fɛn lɔa? Mɛ dɔ́ nyɛ̀n annànwɔrɛ mɛ̀n le: ɛnu lɔ obù zriɛmɛ́n ke sɩ̀ hɛ́n nɛ́n nyran obù wúɛ; fɛn lɔ kɛ lɛ *gbɔ̀ngbɔ̀.”

³Zhezü yɛ́ ɛẅì-shi-tɛ̀ kɛ̀tɛ̀ léyi dú ɛnkpò cɛ tɔ̀n wú nɔn mɛ̀n. N'ɛsɛ̀nkɛn-bɔ̀ sɔnba nɛ̀n ɛtɛ̀sɛ̀n, zɛtɛn bi nɛ̀n ɔhɔnán kɩ ke yrɛ nɛ̀n le: “Ɛ dɔ́ bɔ̀ ɛnvra tán mɛ̀n de ɛci hɔ̀n lɔ kɛ lɛ hán, eci-woroan-ci tán de ke le yé v'ɛvà mán ɛnhibù trɔ vra lɔ.”

⁴Zhezü mrɛ́n yɔ ɔmùan le: “Nyɛ́n wá esùva, ô ɔwrɔn zriɛmɛ́n ke bɩ́ frɛ́n nyɛ̀n.

⁵Ɔmuhi anwrɔn bobrebe kɛ lɛ và ke le bɩ́ m'ebɩ́ kɩ kɛ lɛ dɔ̀ le: ‘Mɛ̀n dú Ebɩdie-wrɔn!’ Kɩ yɔ lɛ frɛ́n anwrɔn bobrebe.

⁶Nyɛ lɛ yá anhà-kɔ́n bobo ɛtɛ̀sɛ̀n mán esù-she anhà-kɔ̀n mɛẅi ankà; nyɛ́n bɩ́ tán ɛnjansù kɛ ẅɛn nyɛ̀n: ke ji le ndɔ lɔ kɛ hán, tɛ́n ke sɩ̀ dù ɛnhibù trɔ vra.

⁷Ɛnhibù wú fɛcüè tɔ̀n kɛ lɛ kɔ́n fɛcüè nyàntɛn tɔ̀n anhà, kɩ ɛnhibù wú nɛ̀ncüì anmàn tɔ̀n kɛ lɛ kɛ́n ɛnnɛ̀ncüì anmàn nyàntɛn tɔ̀n ezì; ebrè kɛ lɛ kɛ́ kɩ ɛnhibù kɛ lɛ jɔ̀kɔ́ ɔpkɔsɔ nyàntɛn hɔ̀n wú.

⁸Ɛci ndɔ hɔ̀n lɔ fɛn ke le dù kɛ lɛ hán ɛnvrakpà ẅì-bî gbànkàn hɔ́.

⁹Zɛtɛn anwrɔn ke le bɩ́ nyɛ̀n kɛ tán yɔ, ô yɛ hán nyɛ̀n nyɛ́n di ejüe kɩ ye le di nyɛ̀n owúemɛ̀n. Fɛcüè lɔ fɛn ke le gbri nyɛ̀n m'ɛkruhú.

¹⁰Hɩ vra lɔ, bobrebe ke le tecüe y'ankàẅì-bùtan lɔ; yɔ le ku y'edomɛ̀n ankà ɛwú kɩ yɔ le gbri y'edomɛ̀n.

¹¹Ɛyɔ̀n Wɔ-mùanwú-ankà-dɔ́-bɔ̀ bobrebe kɛ lɛ srɔ kɩ kɛ lɛ frɛ́n anwrɔn bobrebe.

¹²Ɛgbàn ke le bɩ́ ɛyri, kɛ lɛ hán ɛcüɛ̀n kɛ lɛ trɔ anwrɔn bobrebe ɛnbɔrɛ mɛ̀n.

¹³Tɛ́n ɔwrɔn léyi kɛ lɛ ẅɛn nɛ̀n ɛshishiemɛ̀n hàn kɩ kɛ̀ cɔ́ ɛnvra trɔ mùan lɔ nɔn, nɛ lɛ cɔ́ ebɩdie.

¹⁴Anhobɩ́ Nɛ̀ncüì-dúyri mɛẅi ankà ankrànkràn ndɔ lɔ ke le bonyí ɛnhibù mumù lɔ wú, ô fɛcüè lɔ fɛn kè di nɛ́n dalɛfuɛ. Kɩ zɛtɛn ɛnhibù trɔ vra kɛ lɛ cɔ̀.”

¹⁵“Nyɛ lɛ kán ɔwrɔn léyi ye bi ‘Eci-jrɛ́-wrɔn vri’ nɛ́n léyi Ɔwɔ-mùanwú-ankà-dɔ́-wrɔn Daniɛlɛ̀n dɔ́ n'ankà; Yɛ lɛ hɛ́n nɛ̀n ɛyri prɔnprɔn. (Ke ji le Owrú-krɛ́-wrɔn kɛ yá ankà ndɔ lɔ anvrɛnvrɛn!)

¹⁶Zɛtɛn, yɔ hɔ̀n léyi ke le dú Zhüde kpɔsɔ wú nɔn, yɔ srɛ́ yɔ hɔ́n ɛnpkò wú;

¹⁷Ɔwrɔn léyi nyɔn ɔwɔn gbàtà mùan zìwú nɔn, ke sɩ́ ji le nɛ̀n bru anwɔn mɛ̀n nɛ̀n bɩ́ n'ɛci;

¹⁸kɩ ɔwrɔn léyi ke le dú ankɛ̀tɛmɛ̀n nɔn, ke sɩ́ ji le nɛ̀n vru ɛmɛẅi nɛ̀n vá ɛbemɛ̀n nɛ̀n bɩ́ n'ɛwú ceci.

¹⁹Muzhie ke le dù tán ɛnbi ndɔ hɔ̀n lɔ mɛ̀n, wúyɔ̀ léyi sî ɛmɛ̀ntɛ̀ mán yɔ hɔ̀n léyi kɛ tán ɛẅì hɔ̀n ɛnyàn nɔn!

²⁰Nyɛ́n sɛ́n Ɔwɔ, ô nyɛ́n bɩ́ dú ɛsrɛ́ mɛ̀n ɛnvra gbàngbàn lɔ mɛ̀n, annànnàn le ke bɩ́ dú ɛnyànmán-bì vra!

²¹Ɔmuhi, hɩ vra lɔ, muzhie gbànkàn ke le dù ke le sevri kɛ lɛ vrán yɔ hɔ̀n léyi yɛ kán ɛnhibù krubɔmɛ̀n hàn kɩ cɔ́ zɛtɛ̀, kɩ ɛnyàntɛn ke sɩ̀ vru krɔn nɛ̀n mrìmrì.

²²Ke dú kɛ Ɔwɔ ke sɩ̀ vɔ̀n ɛgbànkàn ndɔ lɔ eburi, ɔwrɔnẅì zriɛmɛ́n ke sɩ̀ vru dú ɛnhibù wúɛ. Tɛ́n nɛ̀n vɔ́n ɛnbì ndɔ lɔ eburi, anwrɔn hɔ̀n léyi nɛ̀n mrɛ́n nɛ́n bɩ nɔn yɔ kruhú.

²³Ke dú kɛ ɔwrɔn kɛ dɔ́ nyɛ̀n le, zɛtɛn: ‘Nyɛ́n Nyan, Ebɩdie-wrɔn lɔ dú ɛnu!’ kɩ ne vru nɛ dɔ̀ le: ‘Nɛ̀n dú ɛnu lɔ!’ nyɛ́n bɩ́ bútan ankàẅì.

²⁴Ɔmuhi ɛyɔ̀n bɩdie-bɔ̀ mán ɛyɔ̀n Wɔ-mùanwú-ankà-dɔ́-bɔ̀ kɛ lɛ srɔ; yɔ lɛ hán anvɛmɛ̀n-frɛ́n-ci ɛvrivri hɔ̀n mán eci-woroan-ci, ô yɔ frɛ́n anwrɔn, bɔ̀ sɩ̀ wá esùva hô, yɔ hɔ̀n léyi Ɔwɔ mrɛ́n bɩ nɔn mán ke le bore.

²⁵Nyɛ́n die nukùɛ! Mɛ́n gɔ̀ dɔ́ nyɛ̀n ankà ndɔ lɔ.

²⁶Zɛtɛn ke dú kɛ yɛ dɔ́ nyɛ̀n le: ‘Nyɛ́n nyan, nɛ̀n dú ɛnnùwì!’ nyɛ́n bɩ́ hɔ́n hán. Kɩ ye vru yɛ dɔ́ nyɛ̀n le: ‘Nyɛ́n nyan, n'ɛban-yri dú ɛnu lɔ!’ nyɛ́n bɩ́ bútan ankàẅì.

²⁷Ɔmu zri léyi ɛwú kɛ gbrɛ́n anhobɩ́ hɩ ke dú ezì ke ci ɛmɛẅiemɛ̀n nɔn, ɔmu lɔ de ɔwrɔnẅì Ẅì mán kɛ lɛ và nɔn.

²⁸Ɛyri totɔtɔ̀n léyi ezhe kɛ dɛ́ nɔn, nanvrɛn de *apɛ̀tɛ̀ hɔ̀n kɛ lɛ borɛkru nɔn.”

²⁹“Ɛnvra zri léyi ɛci ndɔ lɔ y'ɛgbànkàn kɛ lɛ trɔ nɔn, ɛnbri ke sɩ̀ vru dìɛ, okù ke sɩ̀ vru wòɛ, okùcànkrò hɔ̀n ke le dú anhobɩ́ ke le cüe ɛnhibù wúɛ kɩ anhobɩ́ cüì hɔ̀n lɔ fɛn kɛ lɛ jɔ̀kɔ̀.

³⁰Zɛtɛn, ɔwrɔnẅì Ẅì vá vra ci-woroan-ci kɛ lɛ srɔ anhobɩ́; zɛtɛn, ɛnhibù wú fɛcüè lɔ fɛn ke le dú obòto mɛ̀n, yɔ lɛ kán ɔwrɔnẅì Ẅì ke le dú ɛwì-gbú mɛ̀n anhobɩ́ kɛ̀ và, nɛ́n mán ɛkɔrɛ̀srɔn bobrebe mán eci-zrɔ mɛhi.

³¹Ɛbrɛ̀n vri lɔ ke le di nkù kɩ nɛ lɛ wá n'ɛkùyüre-bɔ̀ ɔkɔ̀hɔ̀n ɛnhibù kpɔsɔ d'anzɔ̀ lɔ wú; yɔ lɛ borɛ anwrɔn hɔ̀n léyi nɛ̀n mrɛ́n nɛ́n bɩ, ezì mán ɛmɛẅi nɔn ɛkru.”

³²“Nyɛ́n yá ankà-yé léyi ɛẅì-shi-tɛ̀ tɔ̀n kɛ tán nɔn: ɛnvra léyi ɛnkrɛ̀ kɛ nán esù antɛ̀-da hɔ̀n lɔ mɛ̀n nɔn, ɛẅi wrù ke di nɛ̀n kɩ, nye nyri ɔmu le ɛnvra ankrànkràn kɛ́n eburi.

³³Ɔmu zri lɔ, ke dú kɛ nyɛ kán ɛci ndɔ hɔ̀n lɔ fɛn kɛ hán, nyɛ́n nyrì le ɛnvra lɔ, esù kè sɩ̀ vrù gbɔ́ nɛ̀n hàn, eci lɔ kɛ lɛ hán.

³⁴Mɛ dɔ́ nyɛ̀n annànwɔrɛ mɛ̀n le: Zɛtɛ̀ vra bɔ̀ lɔ ke sɩ̀ wù kɛ̀ trɔ, kɩ eci lɔ kɛ lɛ wɔɛ̀n.

³⁵Anhobɩ́ mán ɛnhibù kɛ lɛ vàcì, tɛ́n m'ɔmùan ankà-dɔ̀ ke sɩ̀ vàcí mrìmrì.”

³⁶“Ɔmu tɛ̀kɩ ɔwrɔn zriɛmɛ́n ke sɩ̀ nyrì ɛnvra-trɔ bì lɔ, nɛ́n bì mán nɛ́n wacɛ̀n, Ɔwɔ-kùyüre-bɔ̀ léyi dú anhobɩ́ mán, ɔwrɔnẅì Ẅì dùku mán; Ɔwɔ-Zi zri kɩ nyrì.

³⁷Eci léyi wɔɛ́n Noe vra lɔ nɔn, eci zri lɔ de kɛ lɛ wɔɛ̀n, ɛnvra léyi ɔwrɔnẅì Ẅì kɛ lɛ và nɔn.

³⁸Annànwɔrɛ mɛ̀n, Noe vra lɔ, ɛnshi kɛ vá yì ke bɩ́ ɛyri kɩ anwrɔn dú ɛci-zî mán ɛnshi miemɛ̀n, yɔ yri wúyɔ̀, ɛnvra tɔ̀n yɔ tán wúyɔ̀-ẅì hɔ̀n wúcɔ̀ kè yrì, hàn kɩ cɔ́ ɛnvra léyi Noe bru ebɩdie hɛ̀ lɔ mɛ̀n;

³⁹ɔwrɔnẅì zriɛmɛ́n ke sɩ̀ nyrì eci léyi kɛ lɛ wɔɛ̀n nɔn, hàn kɩ krɔn ɛnvra léyi ɛnshi yɩ̀ bɩ́ anwrɔn lɔ fɛn nɔn. Ɔmu lɔ de ke le dù ɛnvra léyi ɔwrɔnẅì Ẅì kɛ lɛ và nɔn.

⁴⁰Zɛtɛn, anwrɔn anhyrɛ̀ ke le dú ankɛ̀tɛmɛ̀n, ye le bɩ́ ɔtɔ̀n kɩ, ye le teze ndɔ lɔ.

⁴¹Wúyɔ̀ anhyrɛ̀ ke le dú bɛ̀dɛ̀ kɔ̀hɔ̀n hán mɛ̀n, ye le bɩ́ ɛnzri kɩ ye le teze ɔtɔ̀n.

⁴²Nyɛ́n kpri ɛvɛ̀, ɔmuhi nyɛ́n sɩ̀ nyrì ny'Ɛẅɛnwrɔn vá bì lɔ nɔn.

⁴³Nyɛ́n yá ankà ndɔ lɔ anvrɛnvrɛn: ke dú kɛ ebɩ́-nɛ́n-zi ke nyri ɛnnyran mɛ̀n, ɛnvra léyi ɛci-yerɛ-wrɔn kɛ lɛ vá nɔn, nɛ lɛ yɛ́ nɛ̀n kpri ɛvɛ̀, kɩ nɛ́n sɩ̀ teze ɔwrɔn zriɛmɛ́n ke bru anwɔn mɛ̀n.

⁴⁴Hɩ le kruhú de ke ji le, nyɛ́n krɔn kpehɛ́n, nyɛ́n mán, ɔmuhi ɔwrɔnẅì Ẅì kɛ lɛ vá ɛnvra léyi nyɛ́n sɩ̀ troɛ̀ nɔn.”

⁴⁵“Antɔn de dú ɔmùan zri dì mán ɛnkruemɛ̀n ẅɛ̀n ci-bɩtan-wrɔn nɛ́n? Nɛ̀n dú ɔwrɔn tɔ̀n léyi n'ankà-yé-wrɔn wá antamɛ̀n, ɛci-bɩtan-bɔ̀ nyàntɛn, ô nɛ̀n wá yɔ esùva ɛci-zîemɛ̀n ɛnvra léyi nɛ̀n wá nɔn.

⁴⁶Ɛnbɔrɛbru dú eci-bɩtan-wrɔn ndɔ lɔ tɛn, ke dú kɛ n'ankà-yé-wrɔn kɛ cɔ́ nɛ̀n ɔkɔ̀hɔ̀n lɔ mɛ̀n, ɛnvra léyi ne le dú ɛyri nɛ̀n và bru n'ebɩ́ lɔ mɛ̀n nɔn!

⁴⁷Mɛ dɔ́ nyɛ̀n annànwɔrɛ mɛ̀n le: n'ankà-yé-wrɔn ke le bɩ́ n'ɛci hɔ̀n lɔ fɛn kɛ wá nɛ̀n antamɛ̀n.

⁴⁸Tɛ́n ke dú kɛ ɔwrɔn ndɔ lɔ dú eci-bɩtan-wrɔn gbàngbàn, nɛ lɛ dɔ̀ le: ‘Ankà-yé-wrɔn ke sɩ̀ vá zɛtɛ̀ lɔ’,

⁴⁹kɩ ne le bukru nɛ̀n kɔ́n ɛci-bɩtan-bɔ̀ nyàntɛn hɔ̀n léyi yɛ wá nɛ̀n antamɛ̀n nɔn ejì, ne le zî ɛci kɩ ne le mi ɛntàn, nɛ́n mán ɛntàn-kɔ́n-bɔ̀ mɛhi.

⁵⁰Zɛtɛn, ankà-yé-wrɔn kɛ lɛ vá ɛnbì tɔ̀n, wacɛ̀n wú léyi eci-bɩtan-wrɔn ndɔ lɔ kè sɩ̀ nyrìɛn le nɛ lɛ và nɔn;

⁵¹nɛ lɛ wrɔ́ eci-bɩtan-wrɔn lɔ, kɩ nɛ lɛ hán yi ke le di anmùan-anhyrɛ̀-bɔ̀ gbàn wɔɛ̀n, ɛyri léyi eyú-wù mán ɛhnyî rá dù nɔn.”