Read Alladian Matie 4 Bible Online

Matie 4 - Alladian bible

Matie 4

¹Zɛtɛn Ɔwɔ Hɛ́n kɛ́n Zhezü sɩ́ ɛnnùwì ô nɛ̀n dú ɔwɔɛ̀nnyan mɛ̀n anwa-wrɔn tamɛ̀n.

²Ɛnvra léyi Zhezü bɩ́ kìshe trɔ ɛbi ɛkoẅi-anhyrɛ̀, ɛnnyran mán ɛcɛ̀n nɛ̀n sɩ̀ zî ɛci, ɔmùanwù kɛ ẅɛn nɛ̀n.

³Anwa-wrɔn sɔnba nɛ̀n ɛtɛ̀sɛ̀n kɩ kɛ dɔ́ nɛ̀n le: “Ke dú kɛ è dú Ɔwɔ Ẅì hô, ɛ̀ wá tán ɛbù ndɔ hɔ̀n lɔ kɛ̀ srɔ ɛci-zî.”

⁴Zhezü mrɛ́n ɔmùan le: “Owrú Prɔnprɔn kɛ dɔ̀ le: ‘Kè sɩ̀ dù ɛci-zî zri kɩ kè dù ɔwrɔnẅì wúvà lɔ mɛ̀n, tɛ́n Ɔwɔ mùan-ankà-dɔ̀ totɔtɔ̀n mán dú ɔwrɔnẅì ci-zî.’ ”

⁵Zɛtɛn anwa-wrɔn bɩ́ nɛ̀n hɔ́n Zherüzalɛmɛ̀n anmàn prɔnprɔn, nɛ̀n hɛ́n yi Ɔwɔ-cice-wɔn lɔ wú

⁶kɩ nɛ dɔ́ yi le: “Ke dú kɛ è dú Ɔwɔ Ẅì hô, dù ɔwɔn lɔ wú trɛ̀n shɛ́n; ɔmuhi Owrú Prɔnprɔn ndɔ̀ le: ‘Ɔwɔ kɛ lɛ wá tán n'ɛkùyüre-bɔ̀ kɛ wá mɛ́n esùva, kɩ yɔ lɛ vɛ́ mɛ́n antamɛ̀n ô, ɛnan ke bɩ́ sɔ́n mɛ́n obù.’ ”

⁷Zhezü mrɛ́n nɛ̀n ɔmùan le: “Owrú Prɔnprɔn vru dɔ̀ le: ‘E bɩ́ wɔɛ́n Ɛẅɛnwrɔn v'Ɔwɔ ɛ nyan.’ ”

⁸Anwa-wrɔn vru bɩ́ nɛ̀n hɔ́n ɛnkpò vri tɔ̀n wú, yé nɛ̀n ɛnhibù wú nɛ̀ncüì-di-ci hɔ̀n lɔ fɛn mán y'ɛgbrɛ́n,

⁹kɩ kɛ dɔ́ nɛ̀n le: “Mɛ lɛ tán mɛ́n ɛci ndɔ hɔ̀n lɔ fɛn, ke dú kɛ ɛ shɛ́n mɛ̀n ezìwú annankruemɛ̀n e cüe mɛ̀n ankɔ̀rɛ̀ ezìwúɛ.”

¹⁰Zɛtɛn Zhezü kɛ dɔ́ nɛ̀n le: “Sɔ̀n hɔ́n ɛmɛẅi, Anwa-wrɔn! Ɔmuhi Owrú Prɔnprɔn kɛ dɔ̀ le: ‘È cüe Ɛẅɛnwrɔn v'Ɔwɔ ankɔ̀rɛ̀ ezìwúɛ, ô ɛ̀ sɛ́n nɛ́n zri kɩ.’ ”

¹¹Ɛnvra zri ndɔ lɔ mɛ̀n, anwa-wrɔn teze nɛ̀n. Zɛtɛn Ɔwɔ-kùyüre-bɔ̀ vá Zhezü ɛtɛ̀sɛ̀n kɩ wá nɛ̀n esùva.

¹²Ɛnvra léyi Zhezü yá le yɛ wá Zhan anwɔn mɛ̀n nɔn, nɛ̀n hɔ́n Galile kpɔsɔ wú.

¹³Nɛ̀n sɩ̀ yɛ̀ Nazarɛtɛ̀n anmàn, tɛ́n nɛ́n hɔ̀n yɛ́ Kapɛrnahümɛ̀n, anmàn léyi dú Galile nɛnbà gbàtà mùan, Zabülɔn mán Neftali kpɔsɔ wú.

¹⁴Ndú ɔmu lɔ, ô Ɔwɔ-mùanwú-ankà-dɔ́-wrɔn Ezàhi ankà léyi dɔ̀ nɔn, kɛ̀ sá nmù:

¹⁵“Zabülɔn kpɔsɔ wú, Neftali kpɔsɔ wú, ecüe gbàtà mùan, Zhurdɛn shi mɛẅi, Galile léyi anwrɔn hɔ̀n léyi kè sɩ̀ dù Zhüifɛ̀n-bɔ̀hɩ yɛ́ nɔn!

¹⁶Fɛcüè léyi dú ɛnshi-nyran mɛ̀n nɔn kɛ lɛ kán ɛyri-kàn vri tɔ̀n! Anwrɔn léyi dú owù-yri-yɔwɔ anmàn nɔn, ɛyri-kàn ke le dú yɔ tɛn!”

¹⁷Ɛnvra ndɔ lɔ mɛ̀n, Zhezü bukru ke yé Ɔwɔ ankà kɩ kɛ dɔ̀ le: “Nyɛ́n crɔn ɛnkru, ɔmuhi Anhobɩ́-Nɛ̀ncüì-dúyri bá ɛtɛ̀sɛ̀n nɔn!”

¹⁸Zhezü kɛ nán esù Galile nɛnbà cɛ gbàtà mùan kɩ nɛ̀n kán anwrɔn-nɛ́n-muan-ẅì hɔ̀n anhyrɛ̀ léyi kɛ hán ɛnshiemɛ̀n kɔ̀hɔ̀n, Simɔn (léyi ye bi Piɛrɛ̀n nɔn) mán nɛ́n muan-ẅì Andre; yɔ ze ɛdàn nɛnbà cɛ lɔ mɛ̀n.

¹⁹Zhezü kɛ dɔ́ yɔ le: “Nyɛ́n kɛ́n mɛ̀n ɛsɛ̀n ô mɛ̀n srɔ nyɛ̀n anwrɔnẅì ẅɛn-bɔ̀.”

²⁰Ɛnvra zri lɔ yɔ tecüe y'ɛdàn hɔ̀n lɔ kɩ yɔ kɛ́n nɛ̀n ɛsɛ̀n.

²¹Zhezü hɔ́n ezì esù-she kɩ kán Zhakɛ̀n mán nɛ́n muan-ẅì Zhan, yɔ dú Zebede ẅì hɔ̀n. Yɔ dú y'anhàka lɔ mɛ̀n yɔ mán yɔ zi Zebede mɛhi, kɩ yɔ brɛ́ yɔ ɛdàn lɔ. Zhezü bi yɔ;

²²ɛnvra zri lɔ, yɔ tecüe yɔ anhàka lɔ mán yɔ zi, kɩ yɔ kɛ́n nɛ̀n ɛsɛ̀n.

²³Zhezü ci Galile kpɔsɔ lɔ fɛn wú; ne yé yɔ ankà Ɔwɔ-sɛ́n-wɔn hɔ̀n lɔ fɛn léyi dú ɔkpɔsɔ lɔ wú nɔn mɛ̀n, nɛ dɔ́ Ɛmɛẅi ankà Ankrànkràn léyi dú Anhobɩ́-Nɛ̀ncüì-dúyri ankà, kɩ nɛ kɔrɛ y'ɛnlɔẅiɛ lɔ fɛn mán ɔkpɔ̀cɔ-lɔẅiɛ mɛ̀ntɛ mɛ̀ntɛ.

²⁴Yɛ yá n'ankà Siri ɛnhi wú anmàn kɩ ye bɩ́ anwrɔn hɔ̀n léyi kɛ kán ɛnlɔẅiɛ mɛ̀ntɛ mɛ̀ntɛ gbàn: yɔ hɔ̀n léyi anhɛ́n gbàngbàn dú edomɛ̀n, eci-gɔ́n-lɔẅiɛ-bɔ̀ mán ɔkpɔ̀cɔ-bɔ̀, yɛ vá sɩ́ nɛ̀n. Kɩ Zhezü kɛ kɔrɛ yɔ.

²⁵Fɛcüè bobrebe kɛ kɛ́n nɛ̀n ɛsɛ̀n; yɔ dú Galile, anmàn ɛvà kpɔsɔ wú, Zherüzalɛmɛ̀n anmàn, Zhüde kpɔsɔ wú mán ɛnhi wú anmàn léyi dú Zhurdɛn shi mɛẅi nɔn, yɔ và.