Read Alladian Matie 6 Bible Online

Matie 6 - Alladian bible

Matie 6

¹“Nyɛ́n wá esùva, ke sɩ́ ji le nyɛ́n sɛ́n Ɔwɔ fɛcüè zìwú nyɛ́n tán anwrɔn kɛ̀ kàn. Ke dú kɛ nyɛ hán ɔmu lɔ hô, nyɛ́n sɩ̀ cɔ́ anjakpà nyɛ́n Zi léyi dú anhobɩ́ nɔn yri.

²Ɛnvra léyi ɛ tán ɛmian-bɔ̀ eci nɔn, e bɩ́ hán tán anwrɔn ke nyriɛn, kɛ hán anmùan-anhyrɛ̀-di-bɔ̀ ci léyi kɛ hán Ɔwɔ-sɛ́n-wɔn mɛ̀n mán ɛntrɛ: yɔ hán ɔmu lɔ, ô yɛ cɔ́ ɛmrɛ́n anwrɔnẅì yri. Mɛ dɔ́ nyɛ̀n annànwɔrɛ mɛ̀n le: yɔ cɔ́ y'anjakpà lɔa.

³Tɛ́n vɛ́n, ɛnvra léyi ɛ tán ɛmian-bɔ̀ eci nɔn, ɛ̀ hán tán ɔwrɔn zriɛmɛ́n ke bɩ́ nyriɛn, annànnàn le ɛnyran léyi dú mɛ́n ɛtɛ̀sɛ̀n nɔn,

⁴ô eci léyi ɛ̀ tán nɔn, kè dú ɛbán mɛ̀n; kɩ Ɔwɔ, léyi dú e Zi kɛ kán eci léyi ɛ̀ hán ɛbán mɛ̀n nɔn, ke le bó mɛ́n anjakpà.”

⁵“Ɛnvra léyi nyɛ sɛ́n Ɔwɔ nɔn, nyɛ́n bɩ́ dú kɛ hán anmùan-anhyrɛ̀-di-bɔ̀ hɔ́: yɔ cüɛn ɛwú léyi yɛ nyɔn yɛ sɛ́n Ɔwɔ Ɔwɔ-sɛ́n-wɔn mɛ̀n mán andrɛn-kru, yɔ hán ɔmu lɔ, ô anwrɔnẅì kɛ mrɛ́n yɔ. Mɛ dɔ́ nyɛ̀n annànwɔrɛ mɛ̀n le yɔ cɔ́ y'anjakpà lɔa.

⁶Tɛ́n vɛ́n, ɛnvra léyi e ji ɛ̀ sɛ̀n nɔn, è bru anwɔn mɛ̀n, ɛ̀ vá esù, ô ɛ̀ sɛ́n e Zi léyi dú v'ɛbán-yri lɔ nɔn; kɩ e Zi léyi kɛ kán eci léyi ɛ hán ɛbán mɛ̀n nɔn, ke le bo mɛ́n anjakpà.

⁷Ɛnvra léyi nyɛ sɛ́n Ɔwɔ nɔn, nyɛ́n bɩ́ dɔ́ ankà bobrebe kɛ hán anwrɔn léyi kè sɩ̀ nyrì Ɔwɔ nɔn: yɔ tro le ke dú kɛ yɔ dɔ́ ankà bobrebe hô, Ɔwɔ ke le die yɔ nukùɛ.

⁸Nyɛ́n bɩ́ hán eci kɛ cá yɔ, ɔmuhi, nyɛ́n Zi Ɔwɔ nyri eci léyi nye ji yakɛ nyɛ́n bukru nyɛ sán nɛ̀n nɔn.

⁹Nyàn ɔmu le ke ji le nyɛ́n sɛ̀n nɔn: ‘Bo Zi léyi dú anhobɩ́ nɔn, ke ji le v'ebɩ́ lɔ kè dú prɔnprɔn,

¹⁰v'ɛyri-ẅɛ̀n lɔ kɛ̀ và; eci léyi ɛ cüɛ̀n nɔn kè dú ɛnhi wú kɛ̀ hán ɔmu le dú anhobɩ́ nɔn hɔ́.

¹¹Ɛ̀ tán bɔ̀ ɛnyɔncì lɔ n'ɛci-zî.

¹²Ɛgbàn léyi bɔ̀ hán nɔn, è bɩ ce bɔ̀, kɛ̀ hán ɔmu le bo bɩ́ ce anwrɔn hɔ̀n léyi kɛ hán bɔ̀ ɛgbàn nɔn.

¹³E bɩ́ teze bɔ̀ ɔwɔɛ̀nnyan mɛ̀n, tɛ́n ɛ̀ mrɛ́n bɔ̀ ɛgbàn mɛ̀n ɛ̀ sɔhɔ́. [Ɔmuhi ɛyri-ẅɛ̀n, ɛkɔrɛ̀srɔn mán eci-zrɔ, dú vɛ tɛn ɛnvra lɔ fɛn. Ke dú ɔmu lɔ.]’

¹⁴Zɛtɛn, ke dú kɛ nye bɩ́ ɛgbàn nyɛ́n ce anwrɔn hɔ̀n léyi hán nyɛ̀n ɛgbàn nɔn, nyɛ́n Zi léyi dú anhobɩ́ nɔn mán ke le bɩ́ ɛgbàn kè ce nyɛ̀n.

¹⁵Tɛ́n ke dú kɛ nyɛ́n sɩ̀ bɩ ɛgbàn nyɛ́n cè anwrɔn hɔ̀n léyi hán nyɛ̀n ɛgbàn nɔn, nyɛ́n Zi mán ke sɩ̀ bɩ́ ny'ɛgbàn lɔ kè ce nyɛ̀n.”

¹⁶“Ɛnvra léyi nye bɩ́ kìshe nɔn, nyɛ́n bɩ́ mú ezì kɛ hán anmùan-anhyrɛ̀-bɔ̀ hɔ́: yɔ crɔ́n ezì ô kɛ̀ hán tán ye nyri ɔmu le yɔ dú kìshe bɩ́ mɛ̀n. Mɛ dɔ́ nyɛ̀n annànwɔrɛ mɛ̀n le: yɔ cɔ́ y'anjakpà lɔa.

¹⁷Tɛ́n vɛ́n, ɛnvra léyi e bɩ́ kìshe nɔn, è juru ezì, ɛ̀ ván ɛnkru,

¹⁸ô, anwrɔn ke bɩ́ nyriɛn le e bɩ́ kìshe. E Zi zri léyi dú mɛ́n ɛtɛ̀sɛ̀n nɔn, kɩ ke le nyrì, nɛ́n léyi nɛ kán eci léyi ɛ hán ɛbán mɛ̀n nɔn, ne le bó mɛ́n anjakpà.”

¹⁹“Nyɛ́n bɩ́ ji ɛnnɛ̀ncüì-di-ci ɛnhibù wú, ɛyri léyi anẅɛn mán andàgra kɛ jrɛ́ ɛci, ɛyri léyi ɛci-yerɛ-bɔ̀ kɛ jrɛ́ esù ke bɩ́ ɛci nɔn.

²⁰Nyɛ́n ji anhobɩ́ nɛ̀ncüì-di-ci, ɛyri léyi anẅɛn mán andàgra ke sɩ̀ jrɛ́ ɛci, ɛyri léyi ɛci-yerɛ-bɔ̀ ke sɩ̀ jrɛ́ esù kè bɩ́ ɛci nɔn.

²¹Ɔmuhi ɛyri léyi v'ɛnnɛ̀ncüì-di-ci hɔ̀n lɔ ndù nɔn, nanvrɛn de v'ɛnbɔrɛ lɔ mán ndù nɔn.”

²²“Anvɛ̀ ndù hán edùwrú kɛniɛn hɔ́: ke dú kɛ v'anvɛ̀ ke dú anvrɛnvrɛn mɛ̀n, v'edùwrú mumù lɔ fɛn ke dú ɛyri-kán mɛ̀n;

²³tɛ́n ke dú kɛ v'anvɛ̀ kè sɩ̀ zrɔa, v'edùwrú mumù lɔ fɛn dú ɛyri-yɔwɔ mɛ̀n. Ke dú kɛ ɛyri-kàn léyi dú mɛ́n ɛmɛ̀n dú eci yɔwɔ, ɛyri-yɔwɔ ndɔ lɔ, ke le sevri kɛ̀ ká ankɔ̀rɛ̀.”

²⁴“Ɔwrɔn zriɛmɛ́n ke sɩ̀ dú ankà-yé-bɔ̀ anhyrɛ̀ ci-bɩtan-wrɔn rɔ́: ne le gbri ɔtɔ̀n kɩ nɛ lɛ cüɛn ɔtɔ̀n; ne le di ɔmùan zri tán ɔtɔ̀n kɩ ne le gbri ndɔ lɔ. Ɔwrɔn zriɛmɛ́n ke sɩ̀ dú Ɔwɔ mán ɔkùa ci-bɩtan-wrɔn rɔ́.”

²⁵“Nyàn eci le kruhú léyi mɛ dɔ́ nyɛ̀n le: ɛnkrɛ̀ta ke bɩ́ ku nyɛ̀n ny'ɛci-zî, ny'ɛnshi mi mán ny'ɛci léyi nyɛ lɛ ẅɛn edomɛ̀n nɔn, hɩ wú. Ɛwúvà vrán ɛci-zî kɩ edùwrú mán vrán eci-edùkù, kè sɩ̀ dù ɔmuhɛ́n?

²⁶Nyɛ́n nyan annrɛn hɔ̀n léyi ke tú ɔwràn mɛ̀n nɔn: yɔ sɩ́ tɛ́ ɛci, yɔ sɩ́ küɛ ɛci yɔ sɩ́ ɛbemɛ̀n, tɛ́n nyɛ́n Zi léyi dú anhobɩ́ nɔn kɛ tán yɔ ɛci-zî! Nyɛ́n sɩ̀ ẅɛ̀n vɔ̀nshɛ́ kɛ̀ vrán annrɛn hɔ̀n hán?

²⁷Ny'ɛmɛ̀n lɔ, antɔn de n'ankà tro kɛ kɛ́n n'ɛwúvà lɔ sɩ́ ezì jan nɛ́n?

²⁸Kɩ, cɛci kruhú kɛ ɛnkrɛ̀ta ke ku nyɛ̀n eci-edùkù-ankà wú hɛ́? Nyɛ́n nyan ɔmu le ovú-tɛ̀-anhyrà ke di ankɛ̀tɛmɛ̀n: yɔ sɩ́ hán ɔkɔ̀hɔ̀n kɩ yɔ sɩ́ dú ɛcàsa.

²⁹Ɔmu tɛ̀kɩ, mɛ dɔ́ nyɛ̀n le, Salomɔn dùku, nɛ́n mán n'ɛnnɛ̀ncüì-di-ci lɔ fɛn, kè sɩ̀ ẅɛ̀n ɛci kè fì kɛ̀ vràn ovú-tɛ̀-anhyrà zri hɔ́.

³⁰Ɔmu lɔ de Ɔwɔ kɛ ẅɛn ɛfi léyi dú bɔ̀ ankɛ̀tɛmɛ̀n nɔn ɛci edomɛ̀n, ɛnyɔncì lɔ, kɩ ɛnɛ́n ye le frɛ nɛ̀n ye ku ɛnhyà: nɛ́n sɩ̀ ku nyɛ̀n eci edù, nyɛ́n léyi nyɛ́n ẅɛn vɔ̀nshɛ́ nɛ́n? Nyàn ɔmuhi ankàẅì-bùtan cɛ nyɛ̀n ɛcɛ̀ nɔn!

³¹Ɛnkrɛ̀ta ke bɩ́ ku nyɛ̀n nyɛ́n dɔ́ le: ‘Ecitan bo le zî hɛ̀? Ecitan bo le mì hɛ̀n? Ecitan bo le ku edù hɛ̀?’

³²Anwrɔn hɔ̀n léyi kè sɩ̀ nyrì Ɔwɔ nɔn de ke ji ɛnvra lɔ fɛn ɛci ndɔ hɔ̀n lɔ nɔn. Tɛ́n nyɛ́n Zi léyi dú anhobɩ́ nɔn, nyri eci léyi nye ji nɔn.

³³Anhobɩ́ nɛ̀ncüì-dúyri mán ɛnyrɔnnan ankà kè dú ny'ankà shishi, kɩ Ɔwɔ kɛ lɛ tán nyɛ̀n hɩ léyi wɔrɔ nɔn.

³⁴Ɛnkrɛ̀ta ke bɩ́ ku nyɛ̀n ɛnɛ́n ankà kruhú: ɛnɛ́n dùku ke le tro n'edomɛ̀n ankà. Ɔwɔ kɛ tán ɔwrɔnwrɔn nɛ́n nbì nbì ci léyi ke ji nɔn.”