Read Alladian Markɛ̀n 1 Bible Online

Markɛ̀n 1 - Alladian bible

Markɛ̀n 1

¹Ɛnu lɔ de Ɛmɛẅi ankà Ankrànkràn léyi kɛ dɔ́ Ɔwɔ ẅì Zhezü Krisì ankà nɔn, dú n'ɛnkrubɔmɛ̀n.

²Ɔwɔ-mùanwú-ankà-dɔ́-wrɔn Ezàhi wrú lɔ mɛ̀n, ye merɛ́n le: “Ɔwɔ kɛ dɔ̀ le, mɛ lɛ hán m'ɔkɔ̀hɔ̀n-wá-wrɔn, kè ci mɛ́n ezìwú, ô kɛ̀ mrɛ́n mɛ́n ɛnlevri.

³Ɔwrɔnẅì tɔ̀n sùva de dú ɛnnùwì ke di nkù nɔn: Nyɛ́n mrɛ́n ɛẅɛnwrɔn levri lɔ, nyɛ́n hán n'ɛnlevri hɔ̀n lɔ kɛ̀ nyrɔn!”

⁴Ɔmu lɔ de Zhan srɔ ɛnnùwì; nɛ wá anwrɔn ɛnshi ɛnkru; ne sɩ́ ɔmùan ɛwú kɩ nɛ dɔ̀ le: “Nyɛ́n crɔn ny'eci-hán-ci; nyɛ́n hán yɛ wá nyɛ̀n ɛnshi ɛnkru kɩ Ɔwɔ ke le bɩ́ ny'ɛgbàn hɔ̀n lɔ kè ce nyɛ̀n.”

⁵Kɩ Zhüde kpɔsɔ wú mán Zherüzalɛmɛ̀n anmàn bɔ̀ kɛ vá cɔ́ nɛ̀n; yɔ krɛ́ yɔ ɛgbàn anwrɔn lɔ fɛn zìwú, kɩ Zhan kɛ wá yɔ ɛnshi ɛnkru Zhurdɛn màncüè lɔ mɛ̀n.

⁶Zhan cɔ́ *ɔnɔ̀n-tù ceci kɩ nɛ̀n mú ɔnɔ̀n-wrú pɛtɛ̀n ɛẅìe; n'ɛci-zî dú cɛncecreva mán anjɔ.

⁷Zhan kɛ dɔ́ fɛcüè le: “Ɔwrɔn léyi dú mɛ̀n ɛmɛẅi kɛ lɛ và nɔn ɛkɔrɛ̀ srɔ́n nɛ̀n vrán mɛ̀n; mɛ̀n sɩ̀ zeze mɛ̀n zrɔa hɩ m'á sɩ́ m'edomɛ̀n ɛnhi, ô mɛ̀n gbrɔ n'annanwrú hɛ́ lɔ nɔn.

⁸Mɛ tɛ́n, ɛnshi de mɛ́n bɩ mɛ̀n wá nyɛ̀n ɛnkru nɔn, nɛ tɛ́n, Ɛnhɛ́n Prɔnprɔn mɛ̀n de nɛ lɛ wá nyɛ̀n ɛnshi ɛnkru nɔn.”

⁹Zɛtɛn Zhezü dú Nazarɛtɛ̀n, Galile kpɔsɔ wú, nvà, kɩ Zhan wá nɛ̀n ɛnshi ɛnkru Zhurdɛn shi lɔ mɛ̀n.

¹⁰Ɛnvra léyi Zhezü dú ɛnshiemɛ̀n srɔ nɔn, nɛ̀n kán anhobɩ́ gbɛ́ ɔmùan kɩ, Ɛnhɛ́n Prɔnprɔn bɩ́ brɛndre dùwrú kakɛ nɛ̀n ɛwúɛ.

¹¹Yɛ yá esùva tɔ̀n dú anhobɩ́ kɛ dɔ̀ le: “È dú m'ɛcüɛn ẅì; me bɩ́ mɛ́n pɔ̀püɛ̀ lɔ fɛn mɛ wá mɛ́n ɛmɛ̀n.”

¹²Ɛnvra zri lɔ mɛ̀n, Ɔwɔ hɛ́n kɛ́n nɛ̀n sɩ́ ɛnnùwì.

¹³Zhezü yɛ́ ɛnnùwì ɛbi ɛkoẅi-anhyrɛ̀ kɩ anwa-wrɔn wɔɛ́n nɛ̀n nyan. Nɛ̀n dú ovomɛ̀n nɔ̀n wanzi kɩ Ɔwɔ-kùyüre-bɔ̀ kɛ wá nɛ̀n esùva.

¹⁴Ɛnvra léyi Zhan dú anwɔn-mɛ̀n-wá-wɔn mɛ̀n nɔn, Zhezü hɔ́n Galile kpɔsɔ wú kɛ dɔ́ anwrɔn Ɔwɔ mɛẅi ankà ankrànkràn lɔ.

¹⁵Zhezü kɛ dɔ̀ le: “Ɛnvra léyi yɛ wá nɔn ncɔa, ɔmuhi Anhobɩ́-Nɛ̀ncüì-dúyri lɔ bá ɛtɛ̀sɛ̀n nɔn! Nyɛ́n crɔn ɛnkru ô nyɛ́n bú Ɔwɔ Mɛẅi ankà Ankrànkràn lɔ nyɛ́n tán ankàẅì!”

¹⁶Zhezü kɛ nán esù Galile cüe gbàtà mùan kɩ nɛ̀n kán ɛnshiemɛ̀n kɔ̀hɔ̀n-hán-bɔ̀ anhyrɛ̀: Simɔn mán nɛ́n muan-ẅì Andre, ke bri ɔkɔ̀jàn.

¹⁷Zhezü kɛ dɔ́ yɔ le: “Nyɛ́n kɛ́n mɛ̀n ɛsɛ̀n ô mɛ̀n srɔ nyɛ̀n anwrɔnẅì-ẅɛnbɔ̀, kɛ̀ hán ɔmu le yɛ ẅɛn ɛcàn nɔn.”

¹⁸Ɛnvra zri lɔ, yɔ tecüe y'ɔkɔ̀jàn hɔ̀n lɔ kɩ yɔ kɛ́n nɛ̀n ɛsɛ̀n.

¹⁹Zhezü hɔ́n ezì jan kɩ kán Zhakɛ̀n mán nɛ́n muan-ẅì Zhan, Zebede ẅì hɔ̀n. Yɔ dú y'anhàka lɔ mɛ̀n kɩ yɔ brɛ́ y'ɔkɔ̀jàn hɔ̀n lɔ.

²⁰Ɛnvra zri lɔ Zhezü bi yɔ; yɔ teze yɔ zi Zebede mán n'ɔkɔ̀hɔ̀n-hán-bɔ̀ anhɛmɛ̀n kɩ yɔ cɔ́ Zhezü mɛhi yɔ hɔ̀n.

²¹Zhezü mán n'ɛsɛ̀nkɛn-bɔ̀ hɔ́n Kapɛrnahümɛ̀n anmàn. Ɛnyànmán-bì lɔ, Zhezü bru Ɔwɔ-sɛ́n-wɔn lɔ mɛ̀n kɩ ne yé yɔ Ɔwɔ ankà.

²²Zhezü ci-yé lɔ kɛ frɛ́n anwrɔn hɔ̀n léyi ke die nɛ̀n nukùɛ nɔn anvɛmɛ̀n; ɔmuhi n'eci-yé mɛ̀n lɔ, nɛ́n sɩ́ hán eci kɛ cá ɛnyànmàn wrú-merɛ́n-bɔ̀, tɛ́n ne yé eci ɛkɔrɛ̀levri mɛ̀n.

²³Ɛnvra zri lɔ mɛ̀n, ɔwrɔn tɔ̀n léyi ɛnhɛ́n gbàngbàn tɔ̀n ke di ejüe nɔn, srɔ Ɔwɔ-sɛ́n-wɔn lɔ mɛ̀n. Nɛ̀n di nkù, nɛ dɔ̀ le:

²⁴“Zhezü Nazarɛtɛ̀n anmàn wrɔn, ecitan e ji ɛ̀ hán bɔ̀a? Bɔ́ ɛjrɛ́-yri ɛ vàà? Mɛ̀n nyri anvrɛnvrɛn mɛ̀n ɔwrɔn léyi dú mɛ́n nɔn: è dú ɔwrɔn prɔnprɔn léyi Ɔwɔ yüre nɔn!”

²⁵Zhezü dɔ́ ɛnhɛ́n gbàngbàn lɔ ankà ɛshishiemɛ̀n, kɩ wá tán nɛ̀n le: “Kɛ́n ɔmùan hɛ́n, ô è dú ɔwrɔn ndɔ lɔ edomɛ̀n ɛ̀ srɔ ɛntrɛ!”

²⁶N'ɛntrɛ srɔ mɛ̀n lɔ, ɛnhɛ́n gbàngbàn jɔ́kɔ́ ɔwrɔn lɔ ecüìemɛ̀n kɩ nɛ̀n di nkù vri tɔ̀n.

²⁷Hán tán kɩ anwrɔn lɔ fɛn dú anvɛmɛ̀n frɛ́n vriemɛ̀n, kɩ yɔ yrɛ y'edomɛ̀n le: “Ecitan dú ndɔ lɔa? Ankà-yé wrù tɔ̀n yɛ tán ɛkɔrɛ̀levriemɛ̀n! Ɔwrɔn ndɔ lɔ kɛ wá ɛnyànmàn tán anhɛ́n gbàngbàn hɔ̀n kɩ yɔ die nɛ̀n nukùɛ!”

²⁸Kɩ ɛnvra bruemɛ̀n, yɛ yá yɛ dɔ́ Zhezü ankà Galile kpɔsɔ wú lɔ fɛn.

²⁹Ɛnvra zri lɔ mɛ̀n, yɔ dú Ɔwɔ-sɛ́n-wɔn lɔ mɛ̀n yɔ srɔ ɛntrɛ, yɔ hɔ́n Simɔn mán Andre wɔn lɔ mɛ̀n; yɔ mán Zhakɛ̀n mán Zhan mɛhi.

³⁰Simɔn nɛ́n nɛ́nhi dɛ́, ɔmuhi ɔwrɔ̀ dú nɛ̀n edomɛ̀n nɔn. Ɛnvra léyi Zhezü và nɔn, yɔ dɔ́ nɛ̀n ɛnlɔẅiɛ-hi lɔ ankà.

³¹Zhezü sɔnba nɛ̀n ɛtɛ̀sɛ̀n, ẅɛn nɛ̀n ɛkɔrɛ̀ kɩ hán nɛ̀n nɛ̀n tɔhú. Ɛnvra zri lɔ ɔwrɔ̀ cɔhɔ́ nɛ̀n edomɛ̀n kɩ nɛ̀n bukru nɛ hán ɛci tán yɔ yɔ zî.

³²Ɛnvra léyi ɔwɔɛmɛ̀n cɔ̀, ɛnbri bore mùan mɛ̀n lɔ, anwrɔn bɩ́ ɛnlɔẅiɛ-bɔ̀ lɔ fɛn mán yɔ hɔ̀n léyi anhɛ́n gbàngbàn dú edomɛ̀n nɔn ji Zhezü và.

³³Anmàn-bɔ̀ lɔ fɛn borɛkru ɔwɔn gbàtà mùan.

³⁴Zhezü kɔrɛ ɛnlɔẅiɛ mɛ̀ntɛ mɛ̀ntɛ bɔ̀ kɩ nɛ̀n vru nɛ̀n kɛ́n anhɛ́n gbàngbàn bobrebe ɛsɛ̀n. Nɛ̀n sɩ̀ tán anhɛ́n gbàngbàn hɔ̀n lɔ ankà dɔ́ yri ɔmuhi yɔ tɛn yɔ nyri ɔwrɔn léyi dú nɛ̀n nɔn.

³⁵Ɔsɔ̀wrɔ̀ fùtàn, ɛyri kɛ vá wó kɩ Zhezü tɔhú dú anwɔn mɛ̀n srɔ ɛntrɛ. Nɛn cɔhɔ́ anmàn, nɛ̀n hɔ́n ɛyri tramɛ̀n; nanvrɛn lɔ nɛ̀n dú Ɔwɔ sɛ́n mɛ̀n.

³⁶Simɔn mán anwrɔn hɔ̀n léyi dú nɛ̀n ɛtɛ̀sɛ̀n nɔn bukru ke ji nɛ̀n.

³⁷Ɛnvra léyi yɔ cɔ́ nɛ̀n nɔn, yɔ dɔ́ nɛ̀n le: “Anwrɔn lɔ fɛn ke ji mɛ́n.”

³⁸Zhezü kɛ dɔ́ yɔ le: “Bɔ̀ hɔ́n ɛyri-nyàntɛn, anmàn hɔ̀n léyi dú ɛtɛ̀sɛ̀n nɔn. Nanvrɛn lɔ mán ke ji le mɛ̀n yé ankà, ɔmuhi hɩ kruhú de mɛ́n và nɔn.”

³⁹Kɩ ɔmu lɔ nɛ̀n ci Galile kpɔsɔ lɔ fɛn wú; Ɔwɔ-sɛ́n-wɔn hɔ̀n lɔ mɛ̀n ne yé yɔ Ɔwɔ ankà kɩ nɛ kɛ́n anhɛ́n gbàngbàn ɛsɛ̀n.

⁴⁰Kokove lɔẅiɛ-wrɔn tɔ̀n, hɔ́n cɔ́ Zhezü, shɛ́n nɛ̀n ezìwú annankruemɛ̀n kɛ sán nɛ̀n ɛkɔrɛ̀-wá kɩ kɛ dɔ̀ le: “Ke dú kɛ e ji hô, ɛ lɛ hán mɛ̀n me le fì.”

⁴¹Zhezü nyri nɛ̀n ɛnhyɔ̀bɔ̀, tɛ́ nɛ̀n ɛkɔrɛ̀ kɩ kɛ dɔ́ nɛ̀n le: “Me ji, è fì!”

⁴²Ɛnvra zri lɔ, kokove cɔhɔ́ ɔwrɔn lɔ edomɛ̀n kɩ nɛ́n fì.

⁴³Zɛtɛn, Zhezü dɔ́ nɛ̀n ankà ɛshishiemɛ̀n kɩ hán nɛ̀n nɛ̀n hɔ́n ɛnvra zri lɔ.

⁴⁴Kɩ Zhezü bi nɛ̀n dɔ́ nɛ̀n le: “E bɩ́ dɔ́ ɔwrɔn zriɛmɛ́n ankà ndɔ lɔ. Zɛtɛn è bɩ́ v'edomɛ̀n ɛ̀ hɔ̀n yé Ɔwɔ-wrɔn ɔmu le ɛ̀ hán e dù nɔn, zɛtɛn è ce eci kɛ̀ hán ɔmu le Mohizì wá tán nɔn, ô anwrɔn lɔ fɛn kè nyrì le ɛ kɔrɛa.”

⁴⁵Tɛ́n ɔwrɔn ndɔ lɔ hɔ̀n kɩ kɛ dɔ́ yɔ ɛyri lɔ fɛn eci léyi wɔɛ́n nɛ̀n edomɛ̀n nɔn. Hɩ le kruhú de Zhezü ke sɩ́ vru srɔ anmàn ke yé n'edomɛ̀n, tɛ́n nɛ nyɔn ɔhɔnán, ɛyri kohɔ́n, kɩ anwrɔn ke dú ɛyri lɔ lɔ fɛn ke ji nɛ̀n kɛ và.