Read Alladian Markɛ̀n 13 Bible Online

Markɛ̀n 13 - Alladian bible

Markɛ̀n 13

¹Ɛnvra léyi Zhezü dú Ɔwɔ-cice-wɔn lɔ mɛ̀n srɔ ɛntrɛ nɔn, n'ɛsɛ̀nkɛn-bɔ̀ lɔ, ɔtɔ̀n kɛ dɔ́ nɛ̀n le: “Ankà-yé-wrɔn, crɛ̀nyàn ɛbù ankrànkràn kɛ́! Anwɔn ɛvrivri hɔ̀n kɛ́!”

²Zhezü mrɛ́n nɛ̀n ɔmùan le: “Anwɔn ɛvrivri ndɔ hɔ̀n léyi ɛ kán nɔn, obù zriɛmɛ́n ke sɩ̀ hɛ́n nɛ́n nyran obù nyàntɛn wúɛ; fɛn lɔ kɛ lɛ gbɔ̀ngbɔ̀.”

³Zhezü yɛ́ ɛnkpò cɛ tɔ̀n wúɛ, ɛyri léyi yɛ tɛ́ ɛẅì-shi-tɛ̀ hɔ̀n léyi ye bi olivie nɔn, crɛ ezì kɛ́n Ɔwɔ-cice-wɔn lɔ. Piɛrɛ̀n, Zhakɛ̀n, Zhan mán Andre, yɔ zri léyi yɔ dú nɛ̀n ɛtɛ̀sɛ̀n nɔn, yɔ yrɛ nɛ̀n le:

⁴“Ɛ̀ dɔ́ bɔ̀, ɛnvra tán mɛ̀n mán eci-woroan-ci tán mɛ̀n de ɛci ndɔ hɔ̀n lɔ fɛn kɛ lɛ hán nɛ́n?”

⁵Zɛtɛn, Zhezü bukru kɛ dɔ́ yɔ le: “Nyɛ́n wá esùva, ô ɔwrɔn zriɛmɛ́n ke bɩ́ frɛ́n nyɛ̀n.

⁶Anwrɔn bobrebe kɛ lɛ và ke le bɩ́ m'ebɩ́ kɩ kɛ lɛ dɔ̀ le: ‘Mɛ̀n dú ebɩdie-wrɔn!’ Kɩ yɛ lɛ frɛ́n anwrɔn bobrebe.

⁷Ɛnvra léyi nyɛ lɛ yá anhà bobo, yɔ hɔ̀n léyi dú ɛtɛ̀sɛ̀n mán yɔ hɔ̀n léyi dú esùshe nɔn, ɛnkrɛ̀ta ke bɩ́ ku nyɛ̀n; ke ji le ɛci hɔ̀n lɔ yɔ vra kɛ̀ cɔ̀, tɛ́n ke sɩ̀ dú ɛnhibù trɔ vra.

⁸Fɛcüè tɔ̀n kɛ lɛ kɔ́n fɛcüè nyàntɛn tɔ̀n anhà, kɩ ɛnhi wú anmàn tɔ̀n, kɛ lɛ kɔ́n nɛ́n nyran ɛnhi wú anmàn anhà; ɛnhi kɛ lɛ jɔ̀kɔ́ ɛyri bobrebe; kɩ ebrè kɛ lɛ kɛ́. Ke le dù kɛ lɛ hán ɛnvrapkà ẅì-bî gbànkàn hɔ́.

⁹Tɛ́n ke ji le nyɛ́n wá nyɛ́n dùku ny'edomɛ̀n esùva. Ɔmuhi anwrɔn ke le sɩ́ nyɛ̀n ɛmrɛ̀nci-bɔ̀ zìwú nɔn; ye le gorɛ nyɛ̀n Ɔwɔ-sɛ́n-wɔn hɔ̀n lɔ mɛ̀n. Nyɛ lɛ srɔ anwrɔn cüìcüì hɔ̀n mán ɛnnɛ̀ncüì hɔ̀n zìwú m'ɛkruhú, ô nyɛ́n srɔ mɛ́n dalɛfuɛ-di-bɔ̀ y'ezìwú.

¹⁰Ɛnvrakpà ci léyi ke ji le nyɛ́n hán nɔn, ke ji le ɛnhibù múmù lɔ fɛn kɛ̀ cɔ́ Ɛmɛẅi ankà Ankrànkràn lɔ kɛ̀ yá.

¹¹Kɩ ɛnvra léyi yɛ lɛ ẅɛn nyɛ̀n ye sɩ́ ɛmrɛ̀nci-bɔ̀ zìwú nɔn, ɛnkrɛ̀ta ke bɩ́ ku nyɛ̀n ny'ankà-dɔ́-mɛ̀n, tɛ́n ɛnvra lɔ mɛ̀n, ny'ankà-dɔ̀ lɔ ke le dú Ɛnhɛ́n Prɔnprɔn bɩ́mɛ̀n kɛ̀ lɛ và cɔ́ nyɛ̀n.

¹²Anwrɔn ke le bɩ́ yɔ muan-ẅì hɔ̀n kɛ̀ tán yɔ ye di owúemɛ̀n, kɩ ɛẅì-nɛ́n-zi hɔ̀n mán kɛ lɛ hán eci zri lɔ y'ɛẅì hɔ̀n tɛ̀sɛ̀n; ɛẅì hɔ̀n kɛ lɛ crɛ ezì kɛ́n yɔ zi hɔ̀n, kɛ lɛ hán ye wri yɔ.

¹³Anwrɔn lɔ fɛn ke le gbri nyɛ̀n m'ɛkruhú. Tɛ́n ɔwrɔn léyi kɛ lɛ ẅɛn nɛ̀n ɛshishiemɛ̀n hàn kɩ kɛ̀ cɔ́ ɛmɛẅitrɔ vra lɔ nɔn, nɛ lɛ cɔ́ ebɩdie.”

¹⁴“Nyɛ lɛ kán ɔwrɔn léyi ye bi *‘Eci-jrɛ́-wrɔn vri’ nɛ lɛ nyɔn ɛyri léyi ke sɩ̀ dù n'ɛnyɔn-yri nɔn. (Ke ji le ɔwrɔn léyi kɛ krɛ́ eci nɔn kɛ yá ankà lɔ anvrɛnvrɛn!) Zɛtɛn anwrɔn hɔ̀n léyi yɛ́ anmàn nɔn ke ji le yɛ srɛ́ yɔ hɔ́n ovomɛ̀n ɛnkpò wú;

¹⁵ɔwrɔn léyi ke le dú n'ɔwɔn wú angbàtà zìwú nɔn, ke sɩ́ ji le nɛ̀n kakɛ ô nɛ̀n hɔ̀n bɩ́ n'ɛci anwɔn mɛ̀n;

¹⁶kɩ ɔwrɔn léyi ke le dú n'ankɛ̀tɛ̀ mɛ̀n nɔn, ke bɩ́ vru ɛmɛẅi kɛ vá bɩ́ n'ɛceci-she ɛbemɛ̀n.

¹⁷Muzhie tán ke le dù tán ɛnbi ndɔ hɔ̀n lɔ, ɛmɛ̀nsî-wúyɔ̀ mán ɛbî-wúyɔ̀ léyi kɛ tán ɛẅì hɔ̀n ɛnyàn nɔn!

¹⁸Nyɛ́n sɛ́n Ɔwɔ ô ankà ndɔ hɔ̀n lɔ ke bɩ́ vá ɛnvra gbàngbàn!

¹⁹Ɔmuhi hɩ vra lɔ, ɛgbànkàn ke le sevri kɛ lɛ vrán ɛgbànkàn hɔ̀n lɔ fɛn léyi bɔ́ gɔ̀ hɛ́ ezì bɔ́ kàn, ɛnvra léyi Ɔwɔ hán ɛnhibù hàn kɩ cɔ́ zɛtɛ̀ lɔ, kɩ ɛgbànkàn zriɛmɛ́n ke sɩ̀ vru dù kɛ̀ krɔn nɛ̀n mrìmrì.

²⁰Ke dú kɛ Ɛẅɛnwrɔn kè sɩ̀ vɔ̀n ɛgbànkàn bì ndɔ hɔ̀n lɔ eburi hô, ɔwrɔnẅì zriɛmɛ́n ke sɩ̀ dú ɛnhibù wú. Tɛ́n nɛ̀n voyan ɛnvra cá nɛ̀n cüe, anwrɔn hɔ̀n léyi nɛ́n bɩ kè dú nɛ tɛ́n nɔn y'ɛkruhú.

²¹Ke dú kɛ ɔwrɔn tɔ̀n kɛ dɔ́ nyɛ̀n le: ‘Nyɛ́n nyan, Ebɩdie-wrɔn dú ɛnu lɔ!’ kɩ ne vru nɛ dɔ́ nyɛ̀n le: ‘Nyàn, nɛ́n dú ɛnu lɔ!’ nyɛ́n bɩ́ bútan ankàẅì.

²²Ɔmuhi ɛyɔ̀n bɩdie-bɔ̀ mán ɛyɔ̀n Wɔ-mùanwú-ankà-dɔ́-bɔ̀ kɛ lɛ srɔ; yɔ lɛ hán anvɛmɛ̀n-frɛ́n-ci bobrebe yɔ frɛ́n anwrɔn; nyɛ́n sɩ̀ wá esùva hô, yɔ hɔ̀n léyi Ɔwɔ mrɛ́n bɩ nɔn mán ke le dú ɛmɛ̀n.

²³Nyɛ tɛn, nyɛ́n wá esùva! Mɛ́n gɔ̀ dɔ́ nyɛ̀n ankà lɔ fɛn.”

²⁴“Tɛ́n ɛnvra hɔ̀n lɔ mɛ̀n, ɛgbànkàn vri lɔ n'ɔtrɔmɛ̀n, ɛnbri ke sɩ̀ vru dìɛ, okù ke sɩ̀ vru wóɛ,

²⁵okùcankro hɔ̀n ke le dú anhobɩ́ ke le cüe, anhobɩ́ cüì hɔ̀n lɔ fɛn kɛ lɛ jɔ̀kɔ̀.

²⁶Zɛtɛn yɛ lɛ kán ɔwrɔnẅì Ẅì, ke le dú ɛwì-gbú wanzi kɛ lɛ và, nɛ́n mán n'ɔkɔrɛ̀srɔn bobrebe mán n'eci-zrɔ lɔ fɛn mɛhi.

²⁷Nɛ lɛ wá Ɔwɔ-kùyüre-bɔ̀ ɔkɔ̀hɔ̀n ɛnhibù kpɔsɔ d'anzɔ̀ lɔ wú kɛ̀ hɔ̀n kɛ̀ bɔrɛ anwrɔn hɔ̀n léyi nɛ̀n mrɛ́n nɛ́n bɩ nɔn ɛkru.”

²⁸“Nyɛ́n yá ankà-yé léyi eẅrùtɛ̀ kɛ tán bɔ̀ nɔn: Ɛnvra léyi n'anda hɔ̀n lɔ kɛ gbrɔ, hɩ ke di ɛẅi wrù nɔn, ye nyri ɔmu le ɛnvra ankrànkràn kɛ vá ɛcɔ́-yri.

²⁹Hɩ zri lɔ, ke dú kɛ nyɛ kán ɛci ndɔ hɔ̀n lɔ kɛ hán hô, nyɛ́n nyrì le ɛnvra lɔ cɔ́a, ɛci hɔ̀n lɔ kɛ lɛ hán.

³⁰Mɛ dɔ́ nyɛ̀n annànwɔrɛ mɛ̀n le: Anwrɔn hɔ̀n léyi dú ɛnhibù wú nɔn, yɔ lɔ fɛn yɔ sɩ̀ wù, kɩ ɛci ndɔ hɔ̀n lɔ kɛ lɛ hán.”

³¹Anhobɩ́ mán ɛnhibù kɛ lɛ vàcì, tɛ́n m'ɔmùan ankà-dɔ̀ ke sɩ̀ vàcí mrìmrì.

³²“Ɛci hɔ̀n léyi kɛ lɛ wɔɛ̀n nɔn, ɔwrɔn zriɛmɛ́n kè sɩ̀ nyrì n'ɛnbì mán nɛ́n wacɛ̀n. Ɔwɔ-kùyüre-bɔ̀ léyi dú anhobɩ́ mán, ɔwrɔnẅì Ẅì mán, tɛ́n Ɔwɔ Zi zri kɩ nyri ɛnbì lɔ.

³³Nyɛ́n wá esùva ndà ke bɩ́ wri nyɛ̀n, ɔmuhi nyɛ́n sɩ̀ nyrì ɛnvra léyi ɛnbì lɔ kɛ lɛ cɔ̀ nɔn.

³⁴Ke le dù kɛ lɛ hán ɔwrɔn léyi kɛ hɔ́n ɛyri: Ne bɩ́ n'ɔwɔn lɔ nɛ wá n'ɛci-bɩtan-bɔ̀ antamɛ̀n, kɩ nɛ tán ɔwrɔn zri zri ɔkɔ̀hɔ̀n kɛ̀ hán, kɩ nɛ dɔ́ ɛyri-nan-wrɔn ke bɩ́ di ndà;

³⁵Ɛvɛ̀ ke kpri nyɛ̀n ɔmuhi nyɛ́n sɩ̀ nyrì ɛnvra léyi ebɩ́-nɛ́n-zi ke le vru ɛmɛẅi kɛ và nɔn: Ke dú ɔwɔɛmɛ̀n hô, ke dú ɛnnyran wanzi hô, ke dú ɔkɔ̀sɔ̀ kù di mùan mɛ̀n hô, ɔsɔ̀wrɔ̀ hô,

³⁶ke dú kɛ nɛ vá kprú hô, ke sɩ̀ ji le nɛ̀n cɔ́ nyɛ̀n ndà dá mɛ̀n.

³⁷Ankà ndɔ lɔ mɛ dɔ́ nyɛ̀n nɔn, mɛ dɔ́ tán anwrɔn lɔ fɛn: Nyɛ́n kpri ɛvɛ̀!”