Read Alladian Markɛ̀n 14 Bible Online

Markɛ̀n 14 - Alladian bible

Markɛ̀n 14

¹Wɔrɔ ɛbi-anhyrɛ̀ kɛ lɛ cɔ́ Ɛẅɛnwrɔn-bemɛ̀n-cì mán abùtùkumɛ́n-kɔ́ nyànmán-bì lɔ. Ɔwɔ cice-bɔ̀ cüìcüì mán ɛnyànmàn-gbànvri-ankà-yé-bɔ̀ ke ji ɛyri ô kɛ̀ ẅɛn Zhezü ɛbán mɛ̀n ô kè wri nɛ̀n.

²Yɔ dɔ́ y'edomɛ̀n le: “Ke sɩ́ ji le bɔ̀ ẅɛn nɛ̀n ɛnyànmánbì vra lɔ, ke dú kɛ bɔ́ hán ɔmu lɔ hô, fɛcüè ke le sɩ́ n'edomɛ̀n ɛwú.”

³Zhezü dú Betani anmàn, Simɔn, kokove-wrɔn nanvrɛn ɛbemɛ̀n; ɛnvra léyi nɛ̀n yɛ́ nɛ vá ɛci-zî-yri nɔn, ɛnnyɔnwrɔn tɔ̀n bru anwɔn mɛ̀n; anhàn shishi shi-bán dú nɛ̀n antamɛ̀n. Kɩ nɛ̀n vɔ́n ɛnshi-bán lɔ ɔmùan nɛ̀n ku Zhezü ɛnkruemɛ̀n.

⁴Anwrɔn hɔ̀n léyi dú nanvrɛn nɔn, ke bɩ́ ɛmɛ̀nhyì kɩ kɛ dɔ́ y'edomɛ̀n le: “Ɛnshi-bán jrɛ́ kɛ?

⁵Ɛnshi-bán ndɔ lɔ yɛ lɛ hɛ́ nɛ̀n koprɛ̀ ɛkoẅi-ɛvà-ɛnrì, ô ye bɩ́ n'ɔkùa lɔ yɛ tán ɛmian-bɔ̀!” Kɩ yɔ lɔ fɛn yɛ dɔ́ ankà gbàngbàn ku ɛnnyɔnwrɔn lɔ ɛwú.

⁶Tɛ́n Zhezü kɛ dɔ̀ le: “Nyɛ́n teze nɛ̀n. Cɛci kruhú kɛ nye di nɛ̀n ejüɛ? Eci léyi nɛ̀n hán nɛ̀n tán mɛ̀n nɔn zrɔ.

⁷Ɔmuhi ɛnvra lɔ fɛn nyɛ lɛ cɔ́ ɛmian-bɔ̀, ô nyɛ́n hán yɔ anvrɛn ɛnvra totɔtɔ̀n léyi nye ji nɔn; mɛ tɛn, mɛ́n sɩ̀ dú nyɛ̀n ɛmɛ̀n ɛnvra lɔ fɛn.

⁸Ɛnnyɔnwrɔn lɔ hán eci léyi n'ɛkɔrɛ̀ ncɔ̀ nɔn; nɛ̀n ku mɛ̀n ɛnshi-bán edomɛ̀n ô m'edùwrú lɔ kè nyrì dɛ́ ezhe-nànmàn mɛ̀n.

⁹Mɛ dɔ́ nyɛ̀n annànwɔrɛ mɛ̀n le: Ɛyri lɔ fɛn léyi yɛ lɛ dɔ́ Ɛmɛẅi ankà ankrànkràn lɔ ɛnhibù wú nɔn, ɛnnyɔnwrɔn ndɔ lɔ yɛ lɛ dɔ́ eci léyi nɛ̀n hán nɔn hɩ ankà.”

¹⁰Zɛtɛn Zhüda Iskariɔtɛ̀n, nɛ̀n dú Zhezü sɛ̀nkɛn-bɔ̀ ɛvà-anhyrɛ̀ lɔ ɔtɔ̀n; nɛ́n hɔ̀n nɛ́n dɔ́ Ɔwɔ-cice-bɔ̀ cüìcüì hɔ̀n lɔ le: “Mɛ lɛ ẅɛn Zhezü mɛ̀n tán nyɛ̀n.”

¹¹Ɔwɔ-cice-bɔ̀ cüìcüì hɔ̀n yá ankà ndɔ lɔ kɩ kɛ brá pɔ̀püɛ̀; yɔ wá Zhüda ɔmùan le yɔ lɛ tán nɛ̀n ɔkùa. Kɩ Zhüda bukru ke ji ɛyri ô kɛ̀ ẅɛn Zhezü kɛ̀ tán yɔ.

¹²Ɛnbì zri bì léyi yɛ nyanmán abùtùkumɛ́n-kɔ́, hɩ ye wri kɔ̀kɔ̀sɛ̀ ẅì hɔ̀n yɛ gbrɛ́ *Ɛẅɛnwrɔn-bemɛ̀n-cì ci-zî nɔn, Zhezü sɛ̀nkɛn-bɔ̀ ke yrɛ nɛ̀n le: “Tɛyri de e ji le bɔ̀ hɔ̀n bɔ̀ gbrɛ́ Ɛẅɛnwrɔn-bemɛ̀n-cì ci-zî lɔ nɛ́n?”

¹³Zɛtɛn Zhezü wá n'ɛsɛ̀nkɛn-bɔ̀ lɔ anwrɔn anhyrɛ̀ ɔkɔ̀hɔ̀n, kɩ kɛ dɔ́ yɔ le: “Nyɛ́n hɔ́n anmàn, nyɛ́n lɛ srɔ́n ɔwrɔn tɔ̀n ɛsù, nɛ̀n wɔrɔ ɛnshi-sî. Nyɛ́n kɛ́n nɛ̀n ɛsɛ̀n nyɛ́n hɔ̀n,

¹⁴nyɛ́n bru ebɩ́ léyi ne bru ɛmɛ̀n nɔn, ô nyɛ́n dɔ́ ebɩ́-nɛ́n-zi le: ‘Ankà-yé-wrɔn ke yrɛ le: M'ɔwɔn towà, ɛyri léyi mɛ̀n mán m'ɛsɛ̀nkɛn-bɔ̀ mɛhi bɔ́ lɛ nyanmán Ɛẅɛnwrɔn-bemɛ̀n-cì ci-zî lɔ nɛ́n?’

¹⁵Kɩ ne le ye nyɛ̀n ɔwɔn léyi dú ɛwú n'ɔwɔndà vri léyi krɔn kpehɛ́n hɩ mán ɛci hɔ̀n lɔ fɛn mɛhi. Nanvrɛn lɔ de nyɛ lɛ gbrɛ́ ɛci-zî lɔ nɔn.”

¹⁶Zhezü sɛ̀nkɛn-bɔ̀ lɔ hɔ́n anmàn kɩ yɔ cɔ́ eci lɔ fɛn krɔn kpehɛ́n, hán ɔmu le Zhezü dɔ́ yɔ nɔn; kɩ yɔ gbrɛ́ Ɛẅɛnwrɔn-bemɛ̀n-cì ci-zî.

¹⁷Ɛnvra léyi ɔwɔɛmɛ̀n ncɔ̀ nɔn, Zhezü mán n'ɛsɛ̀nkɛn-bɔ̀ ɛvà-anhyrɛ̀ hɔ̀n lɔ nvà.

¹⁸Ɛnvra léyi yɔ yɛ́ tɛbrɛ̀ wú yɔ zî ɛci nɔn, Zhezü kɛ dɔ̀ le: “Annànwɔrɛ mɛ̀n mɛ dɔ́ nyɛ̀n le: ny'ɛmɛ̀n lɔ, ɔwrɔn tɔ̀n léyi nɛ́n mɛhi bɔ́ zî ɛci nɔn kɛ lɛ hɛ́ mɛ̀n.”

¹⁹Zhezü sɛ̀nkɛn-bɔ̀ lɔ ɛnhyɔ̀bɔ̀ cɔ̀, kɩ ɔwrɔn zri zri ke yrɛ nɛ̀n le: “E nyrì le kè sɩ̀ dù mɛ̀n hàn?”

²⁰Zhezü mrɛ́n yɔ ɔmùan le: “Ny'ɛmɛ̀n lɔ ɔwrɔn tɔ̀n, nyɛ́n, anwrɔn ɛvà-anhyrɛ̀ lɔ, ɔwrɔn léyi nɛ́n mán mɛ̀n mɛhi bɔ́ wá abùtùkumɛ́n ɛyri zri nɔn.

²¹Ankàẅì, Ɔwrɔnẅì Ẅì ke le wù hán ɔmu le Ɛwrú Prɔnprɔn hɔ̀n merɛ́n n'ɛwú nɔn; tɛ́n muzhie dú tán ɔwrɔn léyi ke lɛ hɛ́ Ɔwrɔnẅì Ẅì nɔn! Zrɔ tán le nɛ́n ɔwrɔn ndɔ lɔ ye bɩ́ bî nɛ̀n!”

²²Ɛci-zî vra lɔ, Zhezü bɩ́ abùtùkumɛ́n, kɩ ɛnvra léyi nɛ̀n tán Ɔwɔ ɔkùɛn nɔn, nɛ̀n voyan abùtùkumɛ́n lɔ nɛ̀n tán n'ɛsɛ̀nkɛn-bɔ̀ kɩ nɛ dɔ́ yɔ le: “Nyɛ́n bɩ nyɛ́n rá, ndɔ lɔ dú m'edùwrú.”

²³Nɛ̀n vru nɛ̀n bɩ́ ɛntàn grashɛ̀n kɩ ɛnvra léyi nɛ̀n tán Ɔwɔ ɔkuɛn nɔn, nɛ̀n tán n'ɛsɛ̀nkɛn-bɔ̀, kɩ yɔ lɔ fɛn yɔ mì.

²⁴Zhezü kɛ dɔ́ yɔ le: “Ndɔ lɔ dú m'ɛnkrɛ̀, ɛnkrɛ̀ léyi dú mìrɛ̀n wrù krɛ̀, hɩ ke le cüe anwrɔn bobrebe kruhú nɔn.

²⁵Mɛ dɔ́ nyɛ̀n annànwɔrɛ mɛ̀n le: Mɛ́n sɩ̀ vru mi ɛntàn ndɔ lɔ mrìmrì hàn kɩ kɛ lɛ cɔ́ ɛnvra léyi mɛ lɛ vru mɛ̀n mi ɛntàn wrù Anhobɩ́ Nɛ̀ncüì-dúyri nɔn.”

²⁶Yɔ lɔ fɛn yɔ krɛ́ ɔkoran cɔ̀, kɩ yɔ hɔ́n ɛẅì-shi-tɛ̀ kɛ̀tɛ̀ léyi ye bi Olivie hɩ dú ɛnkpò wú nɔn n'ɛkɛ̀tɛ lɔ mɛ̀n.

²⁷Zhezü kɛ dɔ́ n'ɛsɛ̀nkɛn-bɔ̀ le: “Nyɛ lɔ fɛn lɔ nyɛ lɛ srɛ́ nye le teze mɛ̀n; ɔmuhi Ɛwrú Prɔnprɔn hɔ̀n merɛ́n dɔ̀ le: ‘Mɛ lɛ wri kɔ̀kɔ̀sɛ̀ kua-wrɔn lɔ kɩ kɔ̀kɔ̀sɛ̀ hɔ̀n lɔ fɛn kɛ lɛ bonyì.’

²⁸Tɛ́n Zhezü vru kɛ dɔ̀ le: Ɛnvra léyi me le dú owúemɛ̀n mɛ̀n frɔ́ nɔn, mɛ lɛ hɔ́n Galile kpɔsɔ wú mɛ̀n vrá nyɛ̀n.”

²⁹Piɛrɛ̀n kɛ dɔ́ nɛ̀n le: “Ke dú kɛ anwrɔn lɔ fɛn kɛ srɛ́ ke teze mɛ́n hô, mɛ tɛn mɛ́n sɩ̀ teze mɛ́n.”

³⁰Zɛtɛn Zhezü mrɛ́n Piɛrɛ̀n ɔmùan le: “Mɛ dɔ́ mɛ́n annànwɔrɛ mɛ̀n le: ɛnyɔncì lɔ, ɛnnyran ndɔ lɔ mɛ̀n, ɔkɔ̀sɔ̀ ke sɩ̀ di nkù andɛ̀n-anhyrɛ̀ kɩ ɛ lɛ crɔn ɔmùan andɛ̀n-anhɔ̀n le è sɩ̀ nyri mɛ̀n.”

³¹Tɛ́n Piɛrɛ̀n vru mrɛ́n ɔmùan ecüìemɛ̀n le: “Mɛ́n sɩ̀ crɔn ɔmùan mrìmrì le mɛ̀n sɩ̀ nyrì mɛ́n; ke dú kɛ owù dú ɛmɛ̀n hô, mɛ̀n mán vɛ́n mɛhi bɔ́ le wù.” Kɩ n'ɛsɛ̀nkɛn-bɔ̀ lɔ fɛn kɛ dɔ́ ankà zri lɔ.

³²Zhezü mán n'ɛsɛ̀nkɛn-bɔ̀ cɔ́ ɛyri léyi ye bi “Gɛtsemane”, kɩ Zhezü kɛ dɔ́ n'ɛsɛ̀nkɛn-bɔ̀ le: “Nyɛ́n yɛ́ ɛnu lɔ, mɛ hɔ̀n mɛ̀n sɛ́n Ɔwɔ.”

³³Zɛtɛn Zhezü bɩ́ Piɛrɛ̀n, Zhakɛ̀n mán Zhan hɔ́n Ɔwɔ-sɛ́n-yri. Ɛnjansù mán gbɔ̀gbɔ̀ ku nɛ̀n edù,

³⁴kɩ nɛ dɔ́ yɔ le: “M'ɛnbɔrɛ lɔ ɛnhyɔ̀bɔ̀ cɔ̀ hàn mán owúemɛ̀n; nyɛ́n yɛ́ ɛnu lɔ, ô nyɛ́n kpri ɛvɛ̀.”

³⁵Zhezü sɔnba ɔhɔnán esùshe, bore ɛnhibɩ́ kɩ nɛ sɛ̀n, ô ke dú kɛ ɛkɔrɛ̀levri ke le dù hô, wacɛ̀n ndɔ lɔ n'ɛgbànkàn kɛ̀ vɔ́n nɛ̀n ɛwú.

³⁶Kɩ nɛ dɔ̀ le: “Ô mɛ́n Dade, ɛ̀ ẅɛn eci lɔ fɛn kɔrɛ̀levri; ɛ̀ hán ejüezì gbànkàn grashɛ̀n ndɔ lɔ kɛ̀ cɔhɔ́ mɛ̀n ezìwú. Ɛnvra lɔ fɛn kè sɩ̀ dù hɩ le me ji nɔn, tɛ́n hɩ le e ji nɔn.”

³⁷Zhezü vru ɛmɛẅi vá cɔ́ n'ɛsɛ̀nkɛn-bɔ̀ anhɔ̀n lɔ dú ndà dá mɛ̀n. Nɛ dɔ́ Piɛrɛ̀n le: “Simɔn, ndà ɛ dà? È sɩ̀ kprì ɛvɛ̀ rɔa wacɛ̀n zri mán hán?

³⁸Nyɛ́n kpri ɛvɛ̀, nyɛ́n sɛ́n Ɔwɔ, ô nyɛ́n bɩ́ bore ɔwɔɛ̀nnyan mɛ̀n. Ɔwrɔnẅì hɛ́n ẅɛn biakpá, tɛ́n n'edùwrú ẅɛn ɛjɛ̀.”

³⁹Zhezü vru sɔnba ɔhɔnán kɩ kɛ sɛ́n Ɔwɔ-sɛ̀n zri lɔ.

⁴⁰Zɛtɛn nɛ̀n vru ɛmɛẅi nɛ́n và cɔ́ n'ɛsɛ̀nkɛn-bɔ̀ cüe kɛ di ndà, yɔ sɩ́ gbɛ́ anvɛ̀ rɔ́a. Kɩ yɔ sɩ́ nyri ankà léyi yɛ lɛ dɔ́ nɛ̀n nɔn.

⁴¹Ɛnvra léyi Zhezü vru vá andɛ̀n-anhɔnmɛ̀n nɔn, nɛ dɔ́ yɔ le: “Nyɛ́n vru nyɛ di ndà kɩ nyɛ wrɔncüe hɛ̀? Kɛ hán vrán! Wacɛ̀n cɔ̀a. Nyɛ́n nyan, ye le bɩ́ Ɔwrɔnẅì Ẅì yɛ wá ɛgbàn-hán-bɔ̀ antamɛ̀n.

⁴²Nyɛ́n tɔhú, bɔ̀ hɔ́n nyɛ̀n! Nyɛ́n nyan, ɔwrɔn léyi kɛ hɛ́ mɛ̀n nɔn dú ɛnu lɔ!”

⁴³Zhezü dú ankà-dɔ́ mɛ̀n kɩ Zhüda srɔ; nɛ̀n dú Zhezü sɛ̀nkɛn-bɔ̀ lɔ ɔtɔ̀n. Fɛcüè tɔ̀n dú nɛ̀n ɛtɛ̀sɛ̀n anhà-kɔ́n-nyan mán antɛ̀ dú yɔ antamɛ̀n. Ɔwɔ-cice-bɔ̀ cüìcüì hɔ̀n, ɛnyànmàn-gbànvri-ankà-yé-bɔ̀, mán ɛcüìcüì-bɔ̀ de wá yɔ ɔkɔ̀hɔ̀n nɔn.

⁴⁴Zhüda léyi kɛ lɛ ẅɛn Zhezü kɛ̀ tán yɔ nɔn, dɔ́ yɔ ɔmu le nɛ lɛ hán nɔn, kɩ nɛ dɔ́ yɔ le: “Ɔwrɔn léyi mɛ lɛ wá angbàmɛ̀n nɔn, nɛ́n de nye ji nɛ̀n nɔn. Nyɛ́n ẅɛn nɛ̀n ô nyɛ́n wá nɛ̀n esùva anvrɛnvrɛn.”

⁴⁵Ɛnvra léyi Zhüda và nɔn, nɛ́n sɔnba Zhezü ɛtɛ̀sɛ̀n kɩ nɛ dɔ́ yi le: “Ankà-yé-wrɔn!” Zɛtɛn nɛ̀n wá yi angbàmɛ̀n.

⁴⁶Anwrɔn ndɔ hɔ̀n ku nɛ̀n ankɔrɛ̀ ɛwú kɩ yɔ ẅɛn nɛ̀n.

⁴⁷Tɛ́n Zhezü sɛ̀nkɛn-bɔ̀ lɔ ɔtɔ̀n bɩ́ anhà-kɔ́n-nyan wí ecice-wrɔn cüìcüì ci-bɩtan-wrɔn lɔ nukù.

⁴⁸Zhezü kɛ dɔ́ yɔ le: “Anhà-kɔ́n-nyan mán antɛ̀ de nyɛ́n bɩ nyɛ vá mɛ̀n ɛẅɛn-yri, hán le ɛci-gbàngbàn-hán-wrɔn tɔ̀n de dú mɛ̀n nɔn nɛ́n?

⁴⁹Ɛnbì lɔ fɛn, mɛ̀n dú nyɛ̀n ɛmɛ̀n, me yé nyɛ̀n ankà Ɔwɔ-cice-wɔn lɔ mɛ̀n, kɩ nyɛ́n sɩ̀ ẅɛn mɛ̀n. Tɛ́n eci léyi Ɛwrú Prɔnprɔn hɔ̀n merɛ́n dɔ̀ nɔn, ke ji le kɛ̀ kɛ̀ sá nmù.”

⁵⁰Zɛtɛn n'ɛsɛ̀nkɛn-bɔ̀ lɔ fɛn srɛ́ teze nɛ̀n.

⁵¹Sugban-ẅì tɔ̀n murɛ́n ɛwú-dɛ́-ci dú Zhezü ɛmɛẅi. Kɩ ye ji yɛ ẅɛn nɛ̀n,

⁵²tɛ́n nɛ́n tɛ̀kɛ́n yɔ ɛwú-dɛ́-ci lɔ, nɛ̀n srɛ́ ɛsɛ̀n kora.

⁵³Ye bɩ́ Zhezü yɔ hɔ́n ecice-bɔ̀ wrɔn cüìcüì yri; nanvrɛn lɔ ɛcice-bɔ̀ cüìcüì, ɛcüìcüì-bɔ̀ mán ɛnyànmàn-gbànvri-ankà-yé-bɔ̀ bɔrɛkru.

⁵⁴Piɛrɛ̀n dú Zhezü ɛmɛẅi esù she mɛ̀n, kɩ nɛ̀n bru ecice-wrɔn cüìcüì yri ɛbemɛ̀n. Nanvrɛn lɔ nɛ̀n yɛ́ gɔliɛ-bɔ̀ ɛtɛ̀sɛ̀n nɛ yɩ́ ɛnhyà.

⁵⁵Ɛcice-bɔ̀ cüìcüì mán ankà-dɔ̀-trɔ-bɔ̀ ke ji ɛyri ô ye di Zhezü owúemɛ̀n, tɛ́n yɔ sɩ́ cɔ́ ɛgbàn léyi nɛ̀n hán nɔn.

⁵⁶Anwrɔn bobrebe kɛ ẅɛn ɔyɔ̀n ke ku Zhezü ɛwú, tɛ́n yɔ lɔ fɛn ɔmùan ke sɩ́ krɔn yɔ.

⁵⁷Ndɔ hɔ̀n tɔhú kɛ ẅɛn ɔyɔ̀n vri tɔ̀n kɩ kɛ dɔ̀ le:

⁵⁸“Bɔ̀ yá nɛ̀n ɔmùan nɛ dɔ̀ le: ‘Me le gbé ɔwɔ-cice-wɔn léyi anwrɔnẅì nkù nɔn, kɩ ɛbi-anhɔ̀n granmɛ̀n me le ku ɛnyàntɛn léyi ke sɩ̀ dú ɔwrɔnẅì kɔrɛ̀-ci nɔn.’ ”

⁵⁹Tɛ́n ɔyɔ̀n ankà-dɔ̀ ndɔ lɔ wú, hɩ mán ɔmùan ke sɩ́ krɔn yɔ.

⁶⁰Ɔwɔ-cice-bɔ̀ wrɔn cüìcüì lɔ tɔhú anwrɔn lɔ fɛn zìwú kɩ ke yrɛ Zhezü ankà: “E sɩ́ dɔ́ ankà zriɛmɛ́n? Ankà léyi anwrɔn kɛ dɔ́ ku mɛ́n ɛwú nɛ́n?”

⁶¹Tɛ́n Zhezü kɛ́n ɔmùan hɛ́n kɩ ke sɩ́ mrɛ́n ankà zriɛmɛ́n ɔmùan. Ecice-bɔ̀ wrɔn cüìcüì lɔ vru ke yrɛ nɛ̀n ankà: “Vɛ́n de e dú Ebɩdie-wrɔn, Ɔwɔ Ẅì, Ɔwɔ léyi bɔ́ mrɛ́n nɛ́n?”

⁶²Zhezü mrɛ́n ɔmùan le: “Hɛ̀ɛ̀, mɛ̀n dú Ɔwɔ ẅì, kɩ nyɛ́n lɔ fɛn nyɛ lɛ kán ɔwrɔnẅì Ẅì kɛ lɛ yɛ́ ɛkɔrɛ̀srɔn Wɔ ezì-kɔrɛ̀a; nyɛ́n le vru nyɛ́n kán nɛ̀n anhobɩ́ wì-gbuemɛ̀n nɛ̀n và.”

⁶³Zɛtɛn Ɔwɔ-cice-bɔ̀ wrɔn cüìcüì lɔ shá n'ɛceci hɔ̀n lɔ kɩ kɛ dɔ̀ le: “Bɔ́ sɩ́ vru ji dalɛfuɛ-di-wrɔn zriɛmɛ́n.

⁶⁴Nyɛ́n yá ankà gbàngbàn léyi nɛ́n dɔ̀ nɛ̀n ku Ɔwɔ ɛwú nɔn. Anhɔntan nyɛ hán nye tro hɛ̀?” Anwrɔn lɔ fɛn kɛ dɔ̀ le, nɛ̀n hán ɛgbàn; ke ji le ye wri nɛ̀n.

⁶⁵Y'ɛmɛ̀n lɔ ndɔ hɔ̀n bukru ke fɛ́ Zhezü andà anvɛmɛ̀n, yɔ bɩ́ ɛcasa yɛ vá nɛ̀n ezì kɩ yɔ sroan nɛ̀n ɛnsúgru, yɔ dɔ́ nɛ̀n le: “Dɔ́ bɔ̀, antɔn de gɔ́n mɛ́n nɛ́n?” Gɔliɛ-bɔ̀ ẅɛn Zhezü kɩ kɛ cüran nɛ̀n ansa anvɛmɛ̀n.

⁶⁶Piɛrɛ̀n dú ebɩ́ vriemɛ̀n, kɩ Ɔwɔ-cice-bɔ̀ wrɔn cüìcüì ci-bɩtan-hi tɔ̀n nvà.

⁶⁷Nɛ̀n kán Piɛrɛ̀n yɛ́ kɛ yɩ́ ɛnhyà, nɛ́n nyan yi anvrɛnvrɛn kɩ nɛ dɔ́ yi le: “Vɛ́n mán, è dú Nazarɛtɛ̀n Zhezü sɛ̀nkɛn-wrɔn.”

⁶⁸Piɛrɛ̀n kɛ wrɔn-anmanta kɩ kɛ dɔ̀ le: “Mɛ́n sɩ́ nyriɛn; mɛ́n sɩ́ yá ankà léyi e ji ɛ̀ dɔ̀ nɔn.” Zɛtɛn Piɛrɛ̀n dú ebɩ́ vriemɛ̀n srɔ, hɔ́n angbàtà mùan. [Kɩ, ɛkɔ̀sɔ̀ cüì tɔ̀n di ɛnkù.]

⁶⁹Tɛ́n eci-bɩtan-hi lɔ kán nɛ̀n kɩ vru kɛ dɔ́ anwrɔn hɔ̀n léyi nyɔn nɔn le: “Ɔwrɔn ndɔ lɔ dú Zhezü tɛ̀sɛ̀n wrɔn tɔ̀n.”

⁷⁰Kɩ Piɛrɛ̀n, vru kɛ wrɔn-anmanta. Ɛnvra cá vacì, anwrɔn hɔ̀n léyi nyɔn nanvrɛn lɔ nɔn vru kɛ dɔ́ Piɛrɛ̀n le: “Vɛ́n mán è dú yɔ ɛmɛ̀n, ɔmuhi ɛ dɔ́ ankà kɛ cá Galile wrɔn hɔ́ nɔn.”

⁷¹Zɛtɛn Piɛrɛ̀n bukru kɛ dɔ̀ le: “Ɔwɔ kɛ hán mɛ̀n ɛgbàn ke dú kɛ mɛ ẅɛn ɔyɔ̀n. Mɛ tán ndayi le mɛ̀n sɩ̀ nyrì ɔwrɔn ndɔ léyi nyɛ dɔ́ n'ankà nɔn.”

⁷²Ɛnvra zri lɔ mɛ̀n ɔkɔ̀sɔ̀ cüì tɔ̀n di ɛnkù andɛ̀n-anhyrɛmɛ̀n, kɩ ankà léyi Zhezü dɔ́ Piɛrɛ̀n nɔn, bru nɛ̀n: “Ɔkɔ̀sɔ̀ cüì ke sɩ̀ di nkù andɛ̀n-anhyrɛ̀ kɩ ɛ lɛ crɔn ɔmùan andɛ̀n-anhɔ̀n le, è sɩ̀ nyri mɛ̀n.” Zɛtɛn Piɛrɛ̀n bukru ke wú eyú.