Read Alladian Markɛ̀n 15 Bible Online

Markɛ̀n 15 - Alladian bible

Markɛ̀n 15

¹Ɔsɔ̀wrɔ̀ fùtàn lɔ, Ɔwɔ-cice-bɔ̀ cüìcüì hɔ̀n, ɛcüìcüì-bɔ̀, ɛnyànmàn-gbànvri-ankà-yé-bɔ̀ mán ankà-dɔ̀-trɔ-bɔ̀ bɔrɛkru, ô yɔ ẅɛn ɔmùankrɔn. Yɔ kora Zhezü ankɔrɛ̀, kɩ yɔ bɩ́ nɛ̀n yɔ hɔ́n sɩ́ Pilatɛ̀n.

²Pilatɛ̀n ke yrɛ Zhezü ankà: “E dú Zhüifɛ̀n-bɔ̀ nɛ̀ncüì hɛ̀?” Zhezü mrɛ́n ɔmùan le: “Hɩ de ɛ dɔ̀ nɔn.”

³Ɔwɔ-cice-bɔ̀ cüìcüì hɔ̀n ẅɛn ankà bobrebe ke ku Zhezü ɛwú.

⁴Zɛtɛn Pilatɛ̀n vru ke yrɛ Zhezü ankà: “E sɩ́ dɔ́ ankà zriɛmɛ́n? Ɛ yá ankà bobrebe léyi yɛ dɔ́ ku mɛ́n ɛwú nɔn!”

⁵Tɛ́n, Zhezü ke sɩ́ vru dɔ́ ankà zriɛmɛ́n, hán tán kɩ kɛ frɛ́n Pilatɛ̀n anvɛmɛ̀n.

⁶Ɛnnànwàn lɔ fɛn abùtùkumɛ́n-kɔ́ nyànmán-bì lɔ, Pilatɛ̀n kɛ tán ɛkɔrɛ̀levri kɩ ye teze anwɔn-mɛ̀n-wá-wrɔn léyi fɛcüè ke ji nɔn.

⁷Tɛ́n ɔwrɔn tɔ̀n léyi ye bi Barabasɛ̀n, dú anwɔn-mɛ̀n-wá-wɔn mɛ̀n, nɛ́n mán anwrɔn gbàngbàn hɔ̀n léyi wri ɔwrɔn tɔ̀n ɛdrɛ̀ hán mɛ̀n nɔn.

⁸Fɛcüè hɔ́n Pilatɛ̀n nanvrɛn kɩ anwrɔn bukru kɛ sán nɛ̀n eci léyi ɛnnànwàn lɔ fɛn nɛ hán tán yɔ nɔn.

⁹Pilatɛ̀n mrɛ́n y'ɔmùan le: “Nye ji le mɛ̀n teze Zhüifɛ̀n-bɔ̀ nɛ̀ncüì lɔ mɛ̀n tán nyɛ̀n hàn?”

¹⁰Pilatɛ̀n nyri ɔmu le Ɔwɔ-cice-bɔ̀ cüìcüì hɔ̀n lɔ ẅɛn Zhezü ankà gbàngbàn ɛ̀mɛ̀ntɛ̀ mɛ̀n, hɩ le kruhú de yɔ ẅɛn nɛ̀n yɔ vá sɩ́ nɛ̀n nɔn.

¹¹Tɛ́n Ɔwɔ-cice-bɔ̀ cüìcüì hɔ̀n, kɛ wá fɛcüè ankà ô Pilatɛ̀n kè teze Barabasɛ̀n.

¹²Pilatɛ̀n vru ke yrɛ fɛcüè le: “Ecitan de nye ji mɛ̀n hán ɔwrɔn léyi nye bi Zhüifɛ̀n-bɔ̀ nɛ̀ncüì nɛ́n?”

¹³Fɛcüè ke di bobo kɛ dɔ̀ le: “Gɔ́n nɛ̀n brɛ́ *ɛgbàn-hán-tɛ̀ tɔ̀n domɛ̀n!”

¹⁴Pilatɛ̀n ke yrɛ yɔ le: “Eci gbàngbàn tán de nɛ̀n hán nɛ́n?” Tɛ́n yɔ vru yɔ sán di bobo ecüìemɛ̀n: “Gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n!”

¹⁵Pilatɛ̀n ke ji kɛ̀ wɔ́ fɛcüè ɛnbɔrɛ kɩ nɛ́n teze Barabasɛ̀n; zɛtɛn nɛ̀n hán ye gorɛ Zhezü, kɩ nɛ̀n bɩ́ yi nɛ̀n tán yɔ ô yɔ gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n.

¹⁶Gɔliɛ-bɔ̀ bɩ́ Zhezü hɔ́n ebɩ́ vriemɛ̀n (govràn nanvrɛn ɛbemɛ̀n) kɩ yɔ bi gɔliɛ-bɔ̀ lɔ fɛn.

¹⁷Yɔ bɩ́ ɛceci she wɔnsɛ́n tɔ̀n, yɔ cɔ́ Zhezü, yɔ bɩ́ antɛ̀-da wi yɔ dú ɛnkru-sɔn-ci yɔ wá nɛ̀n ɛnkru.

¹⁸Zɛtɛn yɔ bukru ye bi nɛ̀n nyan: “Bɔ́ bi mɛ́n nyan, Zhüifɛ̀n-bɔ̀ nɛ̀ncüì!”

¹⁹Kɩ yɔ bɩ́ ɛfisè wi yɔ cran nɛ̀n ɛnkru, yɔ fɛ́ nɛ̀n andà kɩ yɔ shɛ́n nɛ̀n annankru ezìwú yɔ sɩ́ y'edomɛ̀n ɛnhi yɛ tán nɛ̀n ɛnkru.

²⁰Ɛnvra léyi yɔ hán nɛ̀n ɛnhyürɛ̀ trɔ nɔn, yɔ mrɛ́n ɛceci she wɔnsɛ́n léyi yɔ cɔ́ nɛ̀n nɔn yɛ sɔhɔ́ kɩ yɔ vru yɔ bɩ́ n'ɛceci lɔ yɔ cɔ́ nɛ̀n. Zɛtɛn yɔ bɩ́ nɛ̀n yɔ hɔ́n ɛntrɛ ô yɔ gɔ́n nɛ̀n brɛ́ *ɛgbàn-hán-tɛ̀ tɔ̀n domɛ̀n.

²¹Sirɛnɛ̀n anmàn wrɔn tɔ̀n, ye bi nɛ̀n Simɔn, nɛ̀n dú Alɛksandrɛ̀n mán Rüfüsɛ̀n nɛ́n zi, nɛ̀n dú ovomɛ̀n nɛ và, kɩ nɛ̀n ci nanvrɛn. Gɔliɛ-bɔ̀ ẅɛn nɛ̀n ecüìemɛ̀n ô nɛ̀n wɔrɔ Zhezü gbàn-hán-tɛ̀ lɔ.

²²Yɔ bɩ́ Zhezü yɔ hɔ́n ɛyri léyi ye bi Golgota nɔn, hɩ mɛ̀n kɛ dɔ̀ le *“Lokrozì”.

²³Yɔ ji yɔ tán Zhezü ɛntàn-drɔ léyi ye ku anháẅi (léyi ke sɩ́ ɛgbànkàn ɛnhi nɔn) ɛmɛ̀n, tɛ́n Zhezü krɔ ke sɩ̀ mì hɛ́n.

²⁴Zɛtɛn yɔ gɔ́n nɛ̀n brɛ́ *ɛgbàn-hán-tɛ̀ domɛ̀n, kɩ yɔ wá ɛnsànsè, yɔ dɛ́ n'ɛceci lɔ yɔ bɩ.

²⁵Ɔsɔ̀wrɔ̀ wacɛ̀n ɔmrɔ̀ vra de yɔ gɔ́n Zhezü brɛ́ ɛgbàn-hán-tɛ̀ domɛ̀n nɔn.

²⁶Ɛgbàn-hán-tɛ̀ wú lɔ ye merɛ́n eci léyi nɛ̀n hán hɩ ke sɩ́ nɛ̀n owúemɛ̀n nɔn: “Zhüifɛ̀n-bɔ̀ nɛ̀ncüì.”

²⁷Zhezü tɛ̀sɛ̀n lɔ yɔ vru yɔ gɔ́n anwrɔn gbàngbàn anhyrɛ̀ brɛ́ ɛgbàn-hán-tɛ̀ domɛ̀n; ɔtɔ̀n dú nɛ̀n ezì kɔrɛ̀ kɩ anhyrɛmɛ̀n wrɔn lɔ dú nɛ̀n ebriemɛ̀n. [

²⁸Ɔmu lɔ de, Owrú Prɔnprɔn ankà dɔ̀ lɔ sá nmù nɔn, ye merɛ́n le: “Yɛ krɛ́ nɛ̀n wá eci-gbàngbàn-hán-bɔ̀ mɛ̀n.”]

²⁹Anwrɔn hɔ̀n léyi ke ci nanvrɛn nɔn, kɛ cáka ɛnkru kɩ kɛ wɔra nɛ̀n; yɔ dɔ̀ nɛ̀n le: “Vɛ́n léyi e ji è gbe Ɔwɔ-cice-wɔn lɔ, ô è ku ɛnyàntɛn ɛbi-anhɔ̀n granmɛ̀n nɔn,

³⁰è bɩ́ v'edomɛ̀n è die, ô è dú ɛgbàn-hán-tɛ̀ wú ɛ̀ kakɛ!”

³¹Ɔmu zri lɔ de Ɔwɔ-cice-bɔ̀ cüìcüì hɔ̀n mán ɛnyànmàn-gbànvri-ankà-yé-bɔ̀ kɛ hán nɛ̀n ɛnhyürɛ̀ kɩ yɔ dɔ́ y'edomɛ̀n le: “Nɛ̀n bɩ́ anwrɔn bobrebe nɛ̀n die tɛ́n nɛ́n sɩ́ bɩ́ n'edomɛ̀n nɛ́n die rɔ́a!

³²Zɛtɛn ke ji le Ebɩdie-wrɔn, Izraɛlɛ̀n nɛ̀ncüì kè dú ɛgbàn-hán-tɛ̀ wú kɛ̀ kàkɛ! Ke dú kɛ bɔ́ kán ndɔ lɔ hô, zɛtɛn bɔ́ le bú n'ankà bɔ̀ tán ankàẅì.” Anwrɔn hɔ̀n léyi yɛ hán ɛgbàn hɩ dú nɛ̀n ɛtɛ̀sɛ̀n nɔn, yɔ mán yɔ wɔra nɛ̀n.

³³Ɛnvra léyi ɛnbri shɛ́n nɔn, ɛyri wá sɛ́n anmàn múmù lɔ fɛn hàn kɩ cɔ́ ɔwɔɛmɛ̀n wacɛ̀n anhɔ̀n.

³⁴Kɩ wacɛ̀n anhɔ̀n vra lɔ Zhezü di ɛnkù vri zri: “M'Ɔwɔ, m'Ɔwɔ, cɛci kruhú kɛ e teze mɛ̀n hán nɛ̀n?”

³⁵Anwrɔn hɔ̀n léyi nyɔn nanvrɛn nɔn, ndɔ hɔ̀n yá nɛ́n ɛnkù-di-mùan kɩ kɛ dɔ̀ le: “Nyɛ́n die nukùɛ, ne bi Eli!”

³⁶Y'ɛmɛ̀n lɔ, ɔwrɔn tɔ̀n srɛ́ hɔ́n bɩ́ ɛnbrà wá ɛntàn-drɔ mɛ̀n, kɩ bɩ́ ɛnbrà lɔ mú ɛfi-sè mùan kɛ̀ tán Zhezü kè mì kɩ nɛ dɔ̀ le: “Nyɛ́n vra, bɔ̀ nyan ke dú kɛ Eli kɛ lɛ và kɛ ẅɛn nɛ̀n *ɛgbàn-hán-tɛ̀ wú kè sɩ́ ɛnhi!”

³⁷Tɛ́n Zhezü di nkù vri tɔ̀n kɩ wù.

³⁸Ɛcasa vri léyi yɛ drɛ́n Ɔwɔ-cice-wɔn lɔ mɛ̀n nɔn kɛ́n ɛwú shà hàn kɩ kakɛ anhɛ̀.

³⁹Gɔliɛ-wrɔn léyi nyɔn Zhezü ziwú nɔn kán ɔmu le nɛ̀n hán nɛ́n wù nɔn, kɩ nɛ dɔ̀ le: “Ɔwrɔn ndɔ lɔ nɛ́n dú Ɔwɔ Ẅì annànwɔrɛ!”

⁴⁰Wúyɔ̀ zri zri mán nyɔn nanvrɛn kɛ nyan yɔ esù she mɛ̀n. Y'ɛmɛ̀n lɔ, Mari, Magdala anmàn nyɔnwrɔn, mán Mari, Zhakɛ̀n mán Zhoze yɔ muan, mán Salome nyɔn.

⁴¹Wúyɔ̀ ndɔ hɔ̀n lɔ dú Zhezü ɛtɛ̀sɛ̀n ɛnvra léyi nɛ̀n dú Galile kpɔsɔ wú, kɩ yɔ dú n'eci-bɩtan-wúyɔ̀. Nanvrɛn zri lɔ yɛ cɔ́ wúyɔ̀ bobrebe hɔ̀n léyi kɛ́n nɛ̀n ɛsɛ̀n hɔ́n Zherüzalɛmɛ̀n anmàn nɔn.

⁴²Ɔwɔɛmɛ̀n cɔ̀, ɛnvra léyi Arimate anmàn wrɔn tɔ̀n ye bi Zhosɛfɛ̀n nvà;

⁴³nɛ̀n dú ɔwrɔn léyi ẅɛn ɔwá kɩ nɛ̀n dú ankà-dɔ̀-trɔ-wrɔn cüìcüì tɔ̀n, nɛ́n mán nɛ vrá Anhobɩ́ Nɛ̀ncüì-dúyri. Ɛnbì léyi dú ɛnyànmánbì vrá bì nɔn, Zhosɛfɛ̀n vá cɔ́ Pilatɛ̀n edùyiemɛ̀n ô kɛ̀ sán nɛ̀n Zhezü dùwrú lɔ.

⁴⁴Tɛ́n kɛ frɛ́n Pilatɛ̀n anvɛmɛ̀n ɔmuhi nɛ̀n sɩ̀ nyrìɛn le Zhezü wùɛ. Pilatɛ̀n hán yɔ ye bi Gɔliɛ-wrɔn cüìcüì lɔ kɩ ne yrɛ yi, ke dú kɛ hɩ le Zhezü wú nɔn, nmɔnhɛ́n hàn!

⁴⁵Ɛnvra léyi Gɔliɛ-wrɔn lɔ dɔ́ nɛ̀n Zhezü wú ankà nɔn, nɛ̀n tán Zhosɛfɛ̀n ɛkɔrɛ̀levri kè bɩ́ Zhezü dùwrú lɔ.

⁴⁶Zhosɛfɛ̀n wɔ́ ɛwú-dɛ́-ci wosu, mrɛ́n Zhezü *ɛgbàn-hán-tɛ̀ wú, kɩ nɛ́n bɔ̀sɔ yi nɛ̀n wá ɛwú-dɛ́-ci lɔ mɛ̀n, nɛ́n hɔ̀n nɛ̀n wá ɛnnànmàn léyi yɛ bɔ́ ɛbù granmɛ̀n nɔn mɛ̀n. Zɛtɛn nɛ̀n vla obù srɔnsrɔn tɔ̀n nɛ̀n sɛ́n ezhe-nànmàn lɔ.

⁴⁷Mari Magdala anmàn nyɔnwrɔn mán Mari, Zhoze nɛ́n muan kɛ nyan ɛyri léyi yɛ hɛ́n Zhezü nɔn.