Read Alladian Lükɛ̀n 1 Bible Online

Lükɛ̀n 1 - Alladian bible

Lükɛ̀n 1

¹Brɛ̀su Teofilɛ̀n, Anwrɔn bobrebe de ji ɛyri ô kè merɛ́n ɛci hɔ̀n léyi vá bɔ̀ ɛmɛ̀n nɔn y'owrú.

²Ye merɛ́n ankà zri léyi anwrɔn dɔ̀, hɩ kán n'ɛnkrubɔmɛ̀n, kɩ yɛ tán ɛkɔrɛ̀-levri kɛ dɔ́ Ɔwɔ ankà nɔn.

³Brɛ̀su Teofilɛ̀n, hɩ le kruhú de mɛ̀n mán mɛ̀n yrɛ anvrɛnvrɛn, ɔmu le ɛci hɔ̀n lɔ hán bukru, kɩ mɛ̀n tro le zrɔ tán le, Brɛ̀su Teofilɛ̀n, mɛ̀n merɛ́n ankà hɔ̀n lɔ cɛcɛ mɛ̀n tán mɛ́n.

⁴Mɛ̀n hán ɔmu lɔ, ô è nyri anká annànwɔrɛ léyi ɛ̀ cɔ́ ankà-yé hɔ̀n lɔ mɛ̀n nɔn.

⁵Ɛnvra léyi Herɔdɛ̀n dú Zhüde nɛ̀ncüì nɔn, Ɔwɔ-cice-wrɔn tɔ̀n, ye bi nɛ̀n Zakari, nɛ̀n dú Ɔwɔ-cice-wrɔn cüìcüì léyi dú Abia nɔn, nɛ́n fɛcüè mɛ̀n wrɔn. Nɛ́n hi ye bi Elizabɛtɛ̀n, kɩ Elizabɛtɛ̀n dú ecice-wrɔn cüìcüì Aarɔn, mɛẅi ẅì.

⁶Zakari mán nɛ́n hi dú ɛnyrɔnnanmɛ̀n Ɔwɔ Zìwú, kɩ yɛ wá Ɛẅɛnwrɔn nyanmàn lɔ fɛn esùva anvrɛnvrɛn.

⁷Tɛ́n ye sɩ̀ bî ɛnẅì, ɔmuhi Elizabɛtɛ̀n ke sɩ̀ bî ɛnẅì rɔ́ nɔn, kɩ yɔ anwrɔn anhyrɛ̀ lɔ mán, yɔ srɔ ɛcüìcüì nɔn.

⁸Ɛnbi tɔ̀n Zakari kɛ hán n'ecice-kɔ̀hɔ̀n Ɔwɔ Zìwú, ɔmuhi dú n'ecice-kɔ̀hɔ̀n-hán vra nɔn.

⁹Ɔwɔ-cice-bɔ̀-kɔhɔ̀n lɔ mɛ̀n, nɛ́n de yɛ mrɛ́n nɛ̀n ô nɛ̀n bru Ɔwɔ-mìrɛ̀n-wɔn lɔ mɛ̀n, ô nɛ̀n biɛ anjɔsàn.

¹⁰Fɛcüè lɔ fɛn nyɔn ɛntrɛ kɛ sɛ́n Ɔwɔ, ɛnvra léyi ye dù yɛ biɛ anjɔsàn nɔn.

¹¹Ɔwɔ-kùyüre-wrɔn tɔ̀n srɔ Zakari zìwú: nɛ̀n nyɔn ecice tɛbrɛ̀ zì-kɔrɛ̀a.

¹²Ɛnvra léyi Zakari kán nɛ̀n nɔn, gbɔ̀gbɔ̀ bru nɛ̀n edù kɩ ɛnjansù kɛ ẅɛn nɛ̀n.

¹³Tɛ́n Ɔwɔ-kùyüre-wrɔn lɔ kɛ dɔ́ nɛ̀n le: “Ɛnjansù ke bɩ́ ẅɛn mɛ́n, ɔmuhi Ɔwɔ yá v'Ɔwɔ-sɛ̀n lɔ nɔn; e hi Elizabɛtɛ̀n kɛ lɛ tán mɛ́n ɛncɔnwrɔnẅì tɔ̀n, n'ebɩ́ dú Zhan.

¹⁴E le dú ɛnbɔrɛ bruemɛ̀n, kɩ anwrɔn bobrebe ke le dú pɔpüɛ̀-bra mɛ̀n, ɛnẅì léyi ye le bî nɔn kruhú.

¹⁵Ɔmuhi ɛnẅì lɔ kɛ le dú ɔwrɔn vri Ɛẅɛnwrɔn zìwú nɔn. Nɛ́n sɩ̀ mi ɛntàn wɔnsɛ́n, mán ɛntàn shishi zriɛmɛ́n. Ɛnhɛ́n Prɔnprɔn kɛ le dú nɛ̀n edomɛ̀n nɛ́n muan mɛ̀ntɛ̀ mɛ̀n hán hɛ́n.

¹⁶Ne le bɩ́ Izraɛlɛ̀n ẅì hɔ̀n bobrebe nɛ lɛ và sɩ́ Ɛẅɛnwrɔn y'Ɔwɔ.

¹⁷Nɛ lɛ và kɛ lɛ hán Ɔwɔ-kɔ̀hɔ̀n-hán-wrɔn hɔ́, ne le bɩ́ Ɔwɔ-mùanwú-ankà-dɔ́-wrɔn Eli hɛ́n mán n'ecüì, nɛ̀n hɔ́n Ɔwɔ zìwú, ô nɛ̀n wɔ́ ɛẅì-nɛ́n-zi hɔ̀n mán y'ɛẅì hɔ̀n angranmɛ̀n, ô nɛ̀n bɩ́ nukù-fɔn-bɔ̀ nɛ̀n và di ɛnyrɔnnan-bɔ̀ mɛ̀n, ô nɛ̀n srɔ yɔ Ɛẅɛnwrɔn fɛcüè-bɔ̀.”

¹⁸Tɛ́n Zakari kɛ dɔ́ Ɔwɔ-kùyüre-wrɔn lɔ le: “Anwɔntan de mɛ lɛ hán ô mɛ̀n nyrì le, ankà lɔ dú annànwɔrɛ nɛ́n? Ɔmuhi mɛ̀n mán ɛhi mɛhi, bɔ̀ srɔ ɛcüìcüìɛ.”

¹⁹Ɔwɔ-kùyüre-wrɔn lɔ mrɛ́n nɛ̀n ɔmùan kɩ kɛ dɔ́ nɛ̀n le: “Mɛ̀n dú Gabriɛlɛ̀n, mɛ nyɔn Ɔwɔ zìwú, mɛ̀n dú n'eci-bɩ̀tan-wrɔn; nɛ̀n wá mɛ̀n ɔkɔhɔ̀n mɛ̀n và dɔ́ mɛ̀n ankà, ô mɛ̀n bɩ́ ankà ankrànkràn ndɔ lɔ mɛ̀n và sɩ́ mɛ́n.

²⁰Tɛ́n, è sɩ̀ bú m'ankà-dɔ̀ lɔ ɛ̀ tàn ankàẅì; eci lɔ kɛ lɛ hàn ɛnvra léyi n'ɛnvra kɛ lɛ cɔ̀ nɔn; hi le kruhú de, ɔmuàn kɛ lɛ kɛ́n mɛ́n, e sɩ̀ cɔ́ ankà-dɔ́-yri, hàn mán kɛ lɛ cɔ́ ɛnvra léyi ɛci hɔ̀n lɔ kɛ lɛ wɔɛ̀n nɔn.”

²¹Hɩ vra lɔ mɛ̀n, anwrɔn nyɔn ɛntrɛ kɛ vrá Zakari, ki ye dú anvɛmɛ̀n-frɛ́n mɛ̀n, ɔmuhi nɛ̀n dú Ɔwɔ-mìrɛ̀n-wɔn lɔ mɛ̀n nmɔɛ̀n nɔn.

²²Tɛ́n ɛnvra léyi nɛ̀n srɔ ɛntrɛ nɔn, nɛ́n sɩ́ cɔ́ ankà-dɔ́-yri, kɩ anwrɔn nyri ɔmu le nɛ̀n cɔ́ Ɔwɔ-mɛ̀n-yri-kàn tɔ̀n. Nɛ hán yɔ ɛkɔrɛ̀, kɩ nɛ̀n dú ɔmùan-kɛ́n mɛ̀n.

²³Ɛnvra léyi Zakari, hán n'Ɔwɔ-cice-kɔhɔ̀n lɔ trɔ nɔn, nɛ̀n vru ɛmɛẅi nɛ̀n vá ɛbemɛ̀n.

²⁴Ɛnvra cá vacì, Zakari nɛ́n hi Elizabɛtɛ̀n sɩ́ ɛmɛ̀ntɛ̀, kɩ bán ɛmɛ̀ntɛ̀ lɔ okù ɛnrì. Nɛ dɔ́ n'edomɛ̀n le:

²⁵“Nyàn eci léyi Ɛẅɛnwrɔn hán tán mɛ̀n nɔn: nɛ́n shrì nɛ̀n mrɛ́n mɛ̀n anvɛvrà ezìwú anwrɔnẅìemɛ̀n nɛ̀n sɔhɔ́.”

²⁶Ɔkù ɔwule vácì, ki Ɔwɔ wá n'ɛkùyüre-wrɔn Gabriɛlɛ̀n ɔkɔhɔ̀n galile anmàn tɔ̀n ye bi Nazarɛtɛ̀n,

²⁷sùgban nyɔnwrɔnẅì tɔ̀n yri; ɛnnyɔnwrɔn-ẅì léyi yɛ sɔ́n ɔmuàn yɛ tán ɛncɔnwrɔn tɔ̀n leyi ye bi Zhozɛfɛ̀n, hɩ dú Davidɛ̀n mɛẅi wrɔn, ɛnnyɔnwrɔnẅì lɔ n'ebɩ́ dú Mari.

²⁸Ɔwɔ-kùyüre-wrɔn lɔ bru nɛ̀n ebemɛ̀n kɩ kɛ dɔ́ nɛ̀n le: “Pɔpüɛ̀ kɛ̀ brá mɛ́n, Ɛẅɛnwrɔn tán mɛ́n ɛnshifù vri, nɛ́n mɛhi nyɛ́n dù.”

²⁹Ankà-dɔ̀ ndɔ lɔ, wá Mari gbɔ̀gbɔ̀ edomɛ̀n, kɩ ne yrɛ n'edomɛ̀n le, ebinyan ndɔ lɔ, n'ɛmɛ̀n dú tɛ́ tán.

³⁰Kɩ Ɔwɔ-kùyüre-wrɔn lɔ kɛ dɔ́ nɛ̀n le: “Ɛnjansù ke bɩ́ ẅɛn mɛ́n, ɔmuhi Ɔwɔ ẅɛn v'ɛcüɛ̀n nɔn.

³¹E le sɩ́ ɛmɛ̀ntɛ̀, kɩ e le bî ɛncɔnwrɔn-ẅì tɔ̀n, n'ebɩ́ dú Zhezü.

³²Nɛ lɛ srɔ ɔwrɔn vri, kɩ ye le bi nɛ̀n Ɔwɔ léyi dù ɛwú nɔn n'Ɛnẅì. Ɛẅɛnwrɔn Ɔwɔ kɛ lɛ srɔ nɛ̀n Ɛnnɛ̀ncüì kɛ lɛ hán Davidɛ̀n léyi dú nɛ́n nancüì nɔn hɔ́.

³³Kɩ nɛ lɛ ẅɛn Izraɛlɛ̀n fɛcüè ɛnvra lɔ fɛn, kɩ n'ɛyri-ẅɛ̀n lɔ ke sɩ̀ trɔ mrìmrì.”

³⁴Kɩ, Mari ke yrɛ Ɔwɔ-kùyüre-wrɔn lɔ le: “Anwɔntan de eci ɔmu lɔ kɛ lɛ hán, ɔmuhi mɛ̀n sɩ̀ nyrì ɛncɔnwrɔn ankà nɛ́n?”

³⁵Ɔwɔ-kùyüre-wrɔn lɔ mrɛ̀n nɛ̀n ɔmuàn kɩ kɛ dɔ́ nɛ̀n le: “Ɛnhɛ́n Prɔnprɔn kɛ lɛ và cɔ́ mɛ́n, kɩ Ɔwɔ léyi dú ɛwú nɔn, n'ɛkɔrɛ̀srɔn kɛ lɛ vá mɛ́n ɛwú kɛ lɛ hán ɛnẅì-gbú hɔ́. Hɩ le kruhú de Ɛnẅì Prɔnprɔn léyi ye le bî nɔn, ye le bi nɛ̀n Ɔwɔ-ẅì.

³⁶Ɔmuan-ẅì Elizabɛtɛ̀n léyi srɔ ecüìcüì, hɩ yɛ dɔ̀ le dú ɛmɛ̀n-kpo-hi nɔn, nɛ́n mán nɛ̀n sî ɛmɛ̀ntɛ̀ okú ɔwule mɛ̀n ɛndɔ.

³⁷Ɔmuhi ecizriɛmɛ́n ke sɩ̀ sɔ́ kɛ̀ kà Ɔwɔ nɔn.”

³⁸Zɛtɛn Mari kɛ dɔ̀ le: “Mɛ́n dú Ɛwɛnwrɔn ci-bɩtan-hi, n'ankà-dɔ̀ kɛ̀ hán tán mɛ̀n, hán hɩ le nɛ́n dɔ̀ nɔn hɔ́.” Kɩ, Ɔwɔ-kùyüre-wrɔn lɔ nán hɔ̀n.

³⁹Ɛnvra zri lɔ mɛ̀n, Mari bɩ́ ɛnlevri kprakpra kɛ hɔ́n ɛnkpò anmàn tɔ̀n léyi dú Zhüde kpɔsɔ wú nɔn.

⁴⁰Mari bru Zakari wɔn lɔ mɛ̀n, kɩ bi Elizabɛtɛ̀n nyán.

⁴¹Ɛnvra léyi Elizabɛtɛ̀n yá Mari mùan-bɔ̀ lɔ nɔn, ɛnẅì léyi dú nɛ̀n ɛmɛ̀ntɛ̀ mɛ̀n nɔn jɔkɔ̀. Elizabɛtɛ̀n Ɛnhɛ́n Prɔnprɔn bru edù

⁴²kɩ nɛ̀n sɩ́ esùva ɛwú nɛ dɔ̀ le: “Ɔwɔ fú mɛ́n ɛnshi vrán wúyɔ̀ lɔ fɛn, kɩ n'ɛnshifú lɔ dú ɛnẅì léyi e le bî nɔn wú.

⁴³Ecitan dú mɛ̀n kɛ̂, m'Ɛẅɛnwrɔn nɛ́n muan ke bru m'ebɩ́ lɔ mɛ̀n hàn?

⁴⁴Hán ɔmu le ɛ kàn nɔn, ɛnvra léyi mɛ̀n yá v'ebinyán lɔ nɔn, ɛnẅì léyi dú mɛ̀n ɛmɛ̀ntɛ̀ mɛ̀n nɔn jɔkɔ̀, kɩ pɔpüɛ̀ kɛ brà.

⁴⁵È dú ɛnbɔrɛ-bruemɛ̀n: ɛ̀ ẅɛn ankàẅì-bùtan, ankà léyi yɛ dɔ́ mɛ́n Ɛẅɛnwrɔn bɩ́mɛ̀n nɔn, n'ɛwú lɔ, eci lɔ kɛ lɛ hán!”

⁴⁶Zɛtɛn Mari kɛ dɔ̀ le: “M'antà-dùwru lɔ fɛn mɛ̀n, me ji mɛ̀n zrɔ Ɛẅɛnwrɔn vrisì lɔ eci,

⁴⁷Pɔpüɛ̀ yɩ́ m'ɛnbɔrɛ lɔ mɛ̀n Ɔwɔ, m'Ebɩ̀die-wrɔn kruhù;

⁴⁸ɔmuhi nɛ́n shrì, nɛ́n sɩ́ n'ezi lɔ ɛnhi nɛ̀n tán mɛ̀n, mɛ̀n léyi mɛ̀n dú n'eci-bɩ̀tan-hi nɔn. Hɛ̀ɛ̀, bukru zɛtɛ̀ lɔ nɔn, anwrɔnẅì lɔ fɛn ke le bi mɛ̀n, ɛnbɔrɛ-bru-hi,

⁴⁹Ɔmuhi ɔkɔrɛ̀-srɔn Wɔ hán eci anvrɛnvrɛn tán mɛ̀n nɔn. Nɛ̀n dú Ɔwɔ Prɔnprɔn,

⁵⁰N'ɛnyhɔ̀bɔ̀-nyrì lɔ dú ɛnvra lɔ fɛn tán anwrɔn hɔ̀n léyi kɛ ẅɛn n'ɛwá nɔn.

⁵¹Nɛ̀n hán ɛkɔrɛ̀-srɔn-ci, n'ecüì kɔrɛ̀-levriemɛ̀n: nɛ́n bonyí anwrɔn hɔ̀n léyi tùtre yɩ́ ɛnbɔrɛ mɛ̀n nɔn,

⁵²Nɛ̀n wrɔ́ ɛnnɛ̀ncüì hɔ̀n y'ɛgbú-tobù wú nɛ́n sɔhɔ́, kɩ nɛ̀n hɛ́n anwrɔn wɔwɔ ɛwúɛ.

⁵³Nɛ̀n tán ɔmuanwú-bɔ̀ eci bobrebe, kɩ nɛ̀n srɔ ɛnnɛ̀ncüì hɔ̀n ɛmian-bɔ̀.

⁵⁴Nɛ̀n wá Izraɛlɛ̀n n'eci-bɩ̀tan-wrɔn ɛkɔrɛ̀: esùva kè sɩ̀ yuru nɛ̀n kɩ nɛ̀n yé n'ɛnbɔrɛ-wɔ̀ lɔ

⁵⁵ɛnvra lɔ fɛn nɛ̀n tán Abraham mán n'ɛmɛẅi-bɔ̀, hán ɔmu le nɛ̀n wá bɔ́ nancüì hɔ̀n ɔmuàn nɔn.”

⁵⁶Mari cɔ́ Elizabɛtɛ̀n mɛhi yɔ yɛ́ okù anhɔ̀n, yakɛ vru ɛmɛẅi vá ɛbemɛ̀n.

⁵⁷Ɛnvra léyi Elizabɛtɛ̀n ke le bî ɛnẅì nɔn ncɔ̀a, ki nɛ̀n bî ɛncɔnwrɔnẅì.

⁵⁸Elizabɛtɛ̀n nɛ́n nyran hɔ̀n, mán n'ɛmɛ̀n bɔ̀ yá le Ɛẅɛnwrɔn wá nɛ̀n ɛkɔrɛ̀, kɩ yɔ lɔ fɛn ye dú pɔpüɛ̀-brá mɛ̀n.

⁵⁹Ɛnvra léyi, ɛnẅì lɔ di ɛnbi-fɔ́n-kru zri nɔn, yɛ và yɛ hán ye ẅí nɛ̀n wucɔ̀ domɛ̀n, kɩ ye ji yɔ wá nɛ̀n nɛ́n zi bɩ́, Zakari.

⁶⁰Nɛ́n muan krɔ, kɩ kɛ dɔ́ yɔ le: “N'ebɩ́ dú Zhan.”

⁶¹N'ɛmɛ̀n-bɔ̀ kɛ dɔ́ nɛ̀n le: “Ɔwrɔnẅì zriɛmɛ́n bádà ny'ɛmɛ̀n lɔ mɛ̀n ye bí Zhan.”

⁶²Yɛ hán ɛkɔrɛ̀, ye yrɛ nɛ́n zi ankà, ô kè yé yɔ ɛnẅì lɔ n'ebɩ́.

⁶³Zakari hán yɛ tán nɛ̀n ɔbɔ̀hɔ́ trɛtrɛ, kɩ nɛ̀n merɛ́n ɔbɔ̀hɔ́ lɔ wú le: “Zhan dú n'ebi.” Kɩ kɛ frɛ́n yɔ lɔ fɛn anvɛmɛ̀n.

⁶⁴Ɛnvra zri lɔ, Zakari ɔmùan vrú kɩ bukru kɛ dɔ́ ankà: nɛ mrɛ́n Ɔwɔ esùva cüìcüìemɛ̀n.

⁶⁵N'ɛtɛsɛn-bɔ̀ lɔ fɛn dú ɛnjansuemɛ̀n, kɩ Zhüde kpɔsɔ anmàn wú lɔ, yɛ dɔ́ y'edomɛ̀n eci-wɔran-ci ndɔ lɔ n'ankà.

⁶⁶Anwrɔn lɔ fɛn léyi, kɛ yá ankà ndɔ lɔ nɔn, dú ankà tro mɛ̀n, kɩ ke yrɛ y'edomɛ̀n le: “Ecitan de ɛnẅì ndɔ lɔ kɛ lɛ srɔ nɛ́n?” Ɛẅɛnwrɔn kɔrɛ̀srɔn mɛhi yɔ dú annànwɔrɛ mɛ̀n.

⁶⁷Zakari, ɛnẅì nɛ́n zi, Ɛnhɛ́n Prɔnprɔn bru edú kɩ bukru kɛ mrɛ́n Ɔwɔ kɛ dɔ̀ le:

⁶⁸“Ɛmrɛ́n ke dú Ɛẅɛnwrɔn Izraɛlɛ̀n fɛcüè Wɔ tɛ́n, ɔmuhi nɛ̀n ẅɛn nɛ́n fɛcüè ankà tro, kɩ nɛ̀n bɩ́ yi nɛ̀n die nɔn.

⁶⁹Nɛ̀n tán bɔ̀ ebidie kɔrɛ̀-srɔn wrɔn tɔ̀n, dú ɛnnɛ̀ncüì Davidɛ̀n n'eci-bi-tán-wrɔn, mɛẅi-bɔ̀ mɛ̀n wrɔn.

⁷⁰Ndɔ lɔ de nɛ́n wá ɔmuàn ɛnvra sheshemɛ̀n nɛ̀n tán n'ɔmùanwú-ankà-dɔ̀-bɔ̀ prɔnprɔn hɔ̀n:

⁷¹Nɛ̀n wá ɔmùan le, ne le bɩ́ bɔ̀ nɛ̀n die, bɔ́ egbri-bɔ̀ tamɛ̀n mán anvwrɔn hɔ̀n léyi ke sɩ́ cüɛn bɔ̀ nɔn.

⁷²Nɛ̀n yé bɔ̀ n'ɛcüɛ̀n bɔ́ nancüì hɔ̀n tɛsɛ̀n, kɩ nɛ̀n kore sɩ́ n'edomɛ̀n nɛ́n mìrɛ̀n prɔnprɔn mùan-wá lɔ.

⁷³Annànwɔrɛ mɛ̀n Ɔwɔ wá bɔ́ nancuì Abrahamɛ̀n ɔmùan le:

⁷⁴Nɛ lɛ mrɛ́n bɔ̀, bɔ́ egbri-bɔ̀ kɔrɛsrɔn tamɛ̀n nɛ̀n sɔhɔ́, ô bɔ̀ hán n'ɛci-bɩ-tan-kɔ̀hɔ̀n anwɔwɔ mɛ̀n,

⁷⁵ô bɔ̀ dú prɔnprɔn mán ɛnyrɔnnan mɛ̀n n'ezíwú, bɔ́ ɛwuvà lɔ fɛn mɛ̀n.

⁷⁶Zɛtɛn, m'ɛnẅì, ye le bi mɛ́n Ɔwɔ léyi dú ɛwú nɔn, n'ɔmùanwú-ankà-dɔ́-wrɔn, ɔmuhi ɛ lɛ nán esù Ɛẅɛnwrɔn zìwú, ɛ̀ mrɛ́n n'ɛnlevri

⁷⁷ô ɛ̀ hán tán nɛ́n fɛcüè ke nyrì le, ne le bɩ́ yi nɛ̀n die, ô nɛ̀n bɩ́ ɛgbàn nɛ̀n ce yi nɔn.

⁷⁸B'Ɔwɔ lɔ dú ɛnbɔrɛ-wɔ̀ Wɔ, mán ɛcüɛ̀n Wɔ: nɛ lɛ hán ɛyri-kàn tɔ̀n ke le dú ɛwú kɛ lɛ gbrɛ́n ku bɔ̀ ɛwú, ke le dù kɛ lɛ cá ɛsɔrɔ bri yri-kàn hɔ́,

⁷⁹ô kɛ̀ tán yɔ hɔ̀n léyi yɛ́ ɛyri yɔwɔmɛ̀n, mán owù-wɔ̀n mɛ̀n nɔn, ɛyri-kàn, ô kɛ̀ nyrɔn bɔ́ esùnàn anwɔwɔ levri wú.”

⁸⁰Ɛnẅì lɔ dú ɛsɔmɛ̀n, kɩ n'ɛnhɛ́n lɔ ecüì kɛ vá edomɛ̀n. Nɛ̀n dú ɛyri tramɛ̀n, hàn kɩ cɔ́ ɛnvra léyi nɛ̀n srɔ Izraɛlɛ̀n fɛcüè zìwú nɔn.