Read Alladian Lükɛ̀n 11 Bible Online

Lükɛ̀n 11 - Alladian bible

Lükɛ̀n 11

¹Ɛnbì tɔ̀n, Zhezü kɛ sɛ́n Ɔwɔ ɛyri tɔ̀n. Ɛnvra léyi nɛ̀n sɛ́n Ɔwɔ trɔ nɔn, n'ɛsɛnkɛn-wrɔn tɔ̀n kɛ dɔ́ nɛ̀n le: “Ɛẅɛnwrɔn, è yé bɔ̀ Ɔwɔ-sɛ̀n kɛ hán ɔmu le Zhan yé n'ɛsɛnkɛn-bɔ̀ nɔn hɔ́.”

²Zhezü kɛ dɔ́ yɔ le: “Ɛnvra léyi nyɛ sɛ́n-ɔwɔ nɔn, nyɛ́n dɔ̀ le: ‘Dade, v'ebi lɔ fɩ̀; v'ɛyri-ẅɛ̀n lɔ kɛ̀ vá ɛnu ɛnhi.

³Ɛ̀ tán bɔ̀ ɛnbì ɛnbì ci-zî.

⁴È bɩ́ bɔ́ ɛgbàn hɔ̀n lɔ è ce bɔ̀, ɔmuhi bɔ́ mán bɔ́ bɩ́ ɛgbàn ce anwrɔn hɔ̀n léyi kɛ hán bɔ̀ ɛgbàn nɔn. E bɩ́ teze bɔ̀, bɔ́ bore ɔwɔɛ̀n-nyan mɛ̀n.’ ”

⁵Zhezü vru kɛ dɔ́ yɔ le: “Bɔ̀ crɛ̀ nyan ankà ndɔ lɔ: ny'ɛmɛ̀n lɔ ɔwrɔn tɔ̀n ẅɛn nɛ́n nyrán, nɛ́n hɔ̀n nɛ̀n cɔ́ yi ɛnnyrán wanzi kɩ nɛ dɔ́ yi le: ‘M'annyrán, vɛ́n mɛ̀n abùtùkumɛ́n anhɔ̀n.

⁶Annyrán tɔ̀n dú nɛ̀nnyànmàn vá dú mɛ̀n ɛbemɛ̀n, mɛ̀n sɩ̀ ẅɛ̀n ɛci m'á tán nɛ̀n nɔn.’

⁷Bɔ̀ vru bɔ̀ crɛ̀ nyan, ke dú kɛ nɛ́n nyrán léyi sɛ́n esù dú anwɔn mɛ̀n nɔn, kɛ dɔ́ nɛ̀n le: ‘Teze mɛ̀n, mɛ̀n yɛ́ sɔ̀hɔ̀! Mɛ̀n sɛ́n esùɛ, mɛ̀n mán m'ɛẅì hɔ̀n mɛhi bɔ̀ dɛ́a; mɛ́n sɩ̀ tɔhú rɔ́ ô mɛ̀n tán mɛ́n abùtùkumɛ́n lɔ.’

⁸Zɛtɛn mɛ dɔ́ nyɛ̀n annànwɔrɛ mɛ̀n le: ke dú kɛ ɔwrɔn-nɛnnyran-cüɛ̀n kruhú nɛ́n sɩ̀ tɔhú, nɛ̀n tán yi eci léyi yi ke ji nɔn, tɛ́n ne le tɔhú nɛ̀n tán yi eci lɔ fɛn léyi yi kɛ sán nɔn, ɔmuhi nɛ́n nyrán lɔ kɛ gɔ́n esù ɛkɔrɛ̀ ke sɩ́ kɛ́n hɛ́n hán nɔn.

⁹Tɛ́n mɛ dɔ́ nyɛ̀n le: nyɛ́n sán, kɩ yɛ lɛ tán nyɛ̀n, nyɛ́n ji, kɩ nyɛ lɛ cɔ̀; nyɛ́n gɔ́n esù ɛkɔrɛ̀, kɩ ye le srú nyɛ̀n esù.

¹⁰Ɔmuhi, ɔwrɔn totɔtɔ̀n léyi kɛ lɛ sán ɛci nɔn, yɛ lɛ tán nɛ̀n, nɛ́n léyi ne ji nɔn, nɛ lɛ cɔ̀, kɩ nɛ́n léyi nɛ gɔ́n esù ɛkɔrɛ̀ nɔn, ye le srú nɛ̀n esù.

¹¹Ke dú kɛ ny'ɛmɛ̀n lɔ ɔwrɔn ke dú ɛnẅì-nɛ́n-zi, kɩ n'ɛnẅì ke ji ɛcàn, nɛ lɛ tán yi ɛnlɛbriɛ̀?

¹²Kale nɛ lɛ tán yi ɛkra, ke dú kɛ ɛnẅì lɔ ke ji ɔkɔ̀sɔ̀-wole hɛ̀?

¹³Anwrɔn gbangbàn hɔ̀n léyi dú nyɛ̀n nɔn, nye nyri tán ny'ɛẅì hɔ̀n ɛci ankrànkràn. Andɛ̀n ɛbɛ de bɔ́ Zi léyi dú anhobɩ́ nɔn, ke sɩ̀ tán n'Ɛnhɛ́n Prɔnprɔn lɔ, anwrɔn hɔ̀n léyi kɛ sán nɛ̀n nɔn!”

¹⁴Zhezü dù kɛ wrɔ́ ɛnhɛ́n gbangban tɔ̀n léyi kɛ hán ɔwrɔn tɔ̀n ke sɩ́ cɔ́ ankà-dɔ́-yri nɔn. Ɛnvra léyi ɛnhɛ́n gbangban lɔ srɔ ɛntrɛ nɔn, ɔwrɔn lɔ bukru kɛ dɔ́ ankà, kɩ fɛcüè dú anvɛmɛ̀n-frɛ́n mɛ̀n.

¹⁵Tɛ́n anwrɔn janbɔ̀ kɛ dɔ̀ le: “Bɛlzebülɛ̀n, anhɛ́n gbangbàn hɔ̀n wrɔn cüìcüì lɔ de kɛ tán nɛ̀n ɛkɔrɛ̀-srɔn, ô nɛ̀n wrɔ́ anhɛ́n ndɔ hɔ̀n lɔ nɔn!”

¹⁶Anwrɔn ndɔ hɔ̀n ke ji nɛ̀n antanwrɔn-krɔn-yri kɩ kɛ dɔ́ nɛ̀n, nɛ̀n hán anvɛmɛ̀n-frɛ́n-ci nɛ̀n tán yɔ, ô yɔ nyrì le, n'ɛkɔrɛ̀-srɔn lɔ dú Ɔwɔ yri và.

¹⁷Tɛ́n Zhezü nyri y'ankà-tro; nɛ dɔ́ yɔ le: “Ɛnhibù wú nɛ̀ncüì anmàn léyi n'anwrɔn hɔ̀n kɛ kɔ́n y'edomɛ̀n anhà nɔn, anmàn ndɔ lɔ ne le mútù; n'anwɔn hɔ̀n lɔ, ke le gbe ku y'edomɛ̀n ɛwú.

¹⁸Ke dú kɛ anwa-wrɔn kɛ kɔ́n n'edomɛ̀n anhà hô, anhɔntan de n'ɛnnɛ̀ncüì yri-ẅɛ̀n lɔ kɛ lɛ hán kɛ̀ nyɔn ɛwúɛ nɛ́n? Nyɛ dɔ̀ le Bɛlzebülɛ̀n de kɛ tán mɛ̀n ɛkɔrɛ̀-srɔn mɛ wrɔ́ anhɛ́n gbangbàn hɔ̀n nɔn.

¹⁹Ke dú kɛ mɛ wrɔ́ yɔ ɔmu lɔ, antɔn de kɛ tán ny'anwrɔn hɔ̀n lɔ ɛkɔrɛ̀-srɔn kɛ wrɔ́ yɔ nɛ́n? Ny'anwrɔn hɔ̀n dùku mán ke yé tán le ny'ankà ke sɩ̀ zrɔ̀a!

²⁰Annànwɔrɛ mɛ̀n, Ɔwɔ kɔrɛ̀srɔn mɛ̀n de mɛ wrɔ́ anhɛ́n gbàngbàn, hɩ mɛ̀n kɛ dɔ̀ le, Anhobɩ́ Nɛ̀ncüì-dúyri lɔ gɔ́ vá dú nyɛ̀n ɛmɛ̀n.

²¹Ɛnvra léyi ecüì-wrɔn tɔ̀n kɛ nán n'ebɩ́ nɔn, n'ɛci lɔ fɛn, kɛ bɔsɔ̀ kɛ hɛ́n nɛ̀n hán.

²²Tɛ́n ke dú kɛ ɔwrɔn tɔ̀n kɛ ẅɛn ecüì kɛ vrán nɛ̀n, ɔwrɔn ndɔ lɔ ke le bɩ́ n'anhà-kɔ́n-ci lɔ fɛn léyi n'esɛ́ dú ɛwú nɔn, kɛ̀ dɛ anwrɔn.

²³Ɔwrɔn léyi, nɛ́n mɛhi bɔ̀ sɩ̀ dùɛ nɔn, nɛ̀n dú m'egbri-wrɔn; kɩ ɔwrɔn léyi ke sɩ́ wá mɛ̀n ɛkɔrɛ̀ bɔ́ borɛ ɛkru nɔn, ke bonyì.”

²⁴“Ɛnvra léyi ɛnhɛ́n gbàngbàn tɔ̀n ke dú ɔwrɔn tɔ̀n edomɛ̀n kɛ srɔ ɛntrɛ nɔn, nɛ và, kɩ nɛ hɔ́n ɛyri tramɛ̀n ô nɛ̀n ji ɛyɛ́-yri. Ke dú kɛ nɛ̀n sɩ̀ cɔ̀ ɛyri, zɛtɛn nɛ dɔ́ n'edomɛ̀n le: me le vru mɛ̀n hɔ́n, ɔwɔn léyi mɛ́n teze nɔn mɛ̀n.

²⁵Ne vru ɛmɛẅi nɛ và, kɩ nɛ cɔ́ ɔwɔn léyi nɛ́n teze nɔn, yɛ taka ɛyri ɛmɛ̀n nfì; yɛ sán hɛ́n ɛci ɛmɛ̀n anvrɛnvrɛn.

²⁶Zɛtɛn, ne vru ɛmɛẅi, nɛ hɔ́n bɩ́ anhɛ́n gbàngbàn hɔ̀n ɔbɔɛ̀n léyi krɛgbàn vrán nɛ̀n nɔn, ye vru yɔ và, kɩ yɔ bru anwɔn mɛ̀n, yɔ yɛ́ brɛzri. Ɔtrɔmɛ̀n lɔ, ɔwrɔn ndɔ lɔ ankà ẅɛn ɛnhyɔ̀bɔ̀ vrán kpàkpà bì lɔ.”

²⁷Zhezü ankà-dɔ̀-trɔ mɛ̀n lɔ, ɛnnyɔnwrɔn tɔ̀n dú fɛcüè wanzi kɛ dɔ́ nɛ̀n le: “Ɛnbɔrɛbru dú ɛnnyɔnwrɔn léyi sɩ́ v'ɛmɛ̀ntɛ̀, hɩ tán mɛ́n ɛnyàn ɛ bàn nɔn!”

²⁸Tɛ́n Zhezü mrɛ́n ɔmùan, kɩ kɛ dɔ̀ le: “Ɛnbɔrɛbru dú tán anwrɔn hɔ̀n léyi ke die Ɔwɔ ankà nukùɛ, hɩ kɛ hán n'ɛkɔrɛ̀zì-ci nɔn.”

²⁹Fɛcüè kɛ borɛ y'edomɛ̀n ɛkru Zhezü tɛsɛ̀n, kɩ Zhezü mrɛ́n ɔmùan kɛ dɔ̀ le: “Ɛnvra ndɔ lɔ mɛ̀n-bɔ̀ dú anwrɔn gbàngbàn; yɔ ji anvɛmɛ̀n-frɛ́n-ci tɔ̀n yɛ kàn, tɛ́n anvɛmɛ̀n-frɛ́n-ci zriɛmɛ́n ke sɩ̀ hán kɛ̀ tán yɔ, yɔ kàn, ke dú kɛ, kè sì dù Zhonasɛ̀n tɛ́n lɔ.

³⁰Tɛ́n ɔmu zri léyi Zhonasɛ̀n dú eci-wroan-ci tán Ninivɛ̀n-bɔ̀ nɔn, hɩ zri lɔ de ɔwrɔn-ẅì Ẅì mán ke le dú ɛnvra ndɔ lɔ mɛ̀n-bɔ̀ lɔ y'eci-wroanci nɔn.

³¹Ɛmrɛ̀n-ci bi lɔ, Etiopi nɛ̀ncüì-hi lɔ, dú ecüe mɛẅi và nɔn, kɛ lɛ nyɔn, ɛnvra ndɔ lɔ mɛ̀n bɔ̀ lɔ zìwú, ô kɛ̀ vra anẅìɛ kɛ̀ tán yɔ; ɔmuhi nɛ̀n dú ɛnhibù wú ɛyri sheshe nɛ́n và, ô nɛ̀n die Salomɔn ankà-nyri-ankà lɔ nukuɛ! Kɩ ɛnu lɔ, ɔwrɔn dù vrán Salomɔn!

³²Ɛmrɛ̀n-ci bì lɔ, Ninivɛ̀n anmàn-bɔ̀ kɛ lɛ nyɔn ɛnvra ndɔ lɔ mɛ̀n bɔ̀ zìwú, kɩ kɛ lɛ vra anẅìɛ tán yɔ, ɔmuhi Ninivɛ̀n-bɔ̀ crɔn ɛnkru ɛnvra léyi yɔ yá Zhonasɛ̀n Wɔ-ankà-dɔ̀ lɔ nɔn! Kɩ ɛnu lɔ, ɔwrɔn dù vrán Zhonasɛ̀n!”

³³“Ɔwrɔn zriɛmɛ́n ke sɩ́ dɔ́n kɛniɛn kɛ bán, kɛ hɛ́n nɛ̀n sonu krùgbɛ̀n; kɛniɛn lɔ, kɛniɛn-tɛ̀ wú de yɛ hɛ́n nɛ̀n, ô anwrɔn hɔ̀n léyi ke bru anwɔn mɛ̀n nɔn kɛ̀ kán ɛyri.

³⁴V'anvɛ̀ lɔ dú v'edùwrú kɛniɛn: ke dú kɛ anvɛ̀ zrɔ mɛ́n hô, v'edùwru lɔ kɛ lɛ cɔ́ ɛyri-kàn; tɛ́n ke dú kɛ anvɛ̀ kɛ̀ sɩ̀ zrɔ mɛ́n hô, è nyrì le v'edùwrú dú ɛyri-yɔwɔ mɛ̀n.

³⁵Hɩ mɛ̀n lɔ, ɛ̀ wá esùva, ô ɛyri-kàn léyi dú mɛ́n ɛmɛ̀n nɔn, ke bɩ́ srɔ ɛyri-yɔwɔ.

³⁶Ke dú kɛ v'edùwru lɔ fɛn dú ɛyri-kán mɛ̀n, kɩ n'ɛyri zriɛmɛ́n kɛ sɩ̀ dù ɛyri-yɔwɔ mɛ̀n hô, ne le dú nɛ́n mumù lɔ fɛn ɛyri-kán mɛ̀n, kɛ lɛ hán ɛnvra léyi kɛniɛn kɛ gbrɛ́n ku mɛ́n edomɛ̀n nɔn.”

³⁷Ɛnvra léyi Zhezü dɔ́ ankà trɔ nɔn, Ɔwɔ-nyanmàn-sùva-wá-wrɔn tɔ̀n bi nɛ̀n ɛci-zîemɛ̀n ɛbemɛ̀n. Zhezü bru anwɔn mɛ̀n kɩ yɛ́ ɛci-zî tɛbrɛ̀ wúɛ.

³⁸Ɛnyanmàn-sùva-wá-wrɔn lɔ, ankà kɛ frɛ́n anvɛmɛ̀n ɛnvra léyi nɛ̀n nyri ɔmu le Zhezü ke sɩ̀ jùrù ankɔrɛ̀ kɩ ke zî ɛci nɔn.

³⁹Zɛtɛn Ɛẅɛnwrɔn kɛ dɔ́ nɛ̀n le: “Nyàn ɔmu de nyɛ́n hán nyɛ́n dù, nyɛ́n ɛnyanmàn-sùva-wá-bɔ̀: nye juru glashɛ̀n mán kpokpo domɛ̀n tɛ̀kɩ, tɛ́n ny'ɛnbɔrɛ̀ mɛ̀n lɔ, ɛci-yerɛ mán ɛgbàn-di-ankà yí ɛmɛ̀n.

⁴⁰Ɔbrɔsà-bɔ̀ léyi dú nyɛ̀n nɔn! Ɔwɔ léyi hán ɛntrɛ nɔn, nɛ̀n sɩ̀ hán ɛmɛ̀n mán?

⁴¹Nyɛ́n gɔ̀ tán ɛmian-bɔ̀, ɛci hɔ̀n léyi dú nyɛ̀n glashɛ̀n mɛ̀n mán kpokpo mɛ̀n, kɩ ɛci lɔ fɛn ke le fì kɛ̀ tán nyɛ̀n.

⁴²Muzhie dú nyɛ tɛn, ɛnyanmàn-sùva-wá-bɔ̀! Nyɛ tán Ɔwɔ ny'antɛ̀ẅì-banbán, mán antɛ̀ẅì léyi dú ɛci-zî-ci nɔn, n'ɛvámɛ̀n tɛn lɔ, kɩ nyɛ́n sɩ́ wá ny'ɛnyrɔnnan mán Ɔwɔ cüɛ̀n-ankà esùva: ndɔ lɔ de, ke ji le nyɛ́n hán, ô ndɔ léyi wɔrɔ dù nɔn, ke bɩ́ yuru nyɛ̀n esùva.

⁴³Muzhie dú nyɛ tɛn, ɛnyanmàn-esùva-wá-bɔ̀! Nyɛ cüɛn ɛyɛ́-yri léyi kɛ ẅɛn ɛvɛ̀ Ɔwɔ-sɛ́n-wɔn mɛ̀n kɩ nyɛ cüɛn ɛwá mán eci-zrɔ ɛyrì léyi dù ɛkrubɔrɛ-yri nɔn.

⁴⁴Muzhie dú nyɛ tɛ́n! Nyɛ́n dù nyɛ́n cá ɛzhe nanmàn hɔ̀n léyi ye sɩ́ kán, hɩ yɛ nán esù ɛwú nɔn!”

⁴⁵Ɛnyanmàn-gbànvri-ankà-yé-wrɔn tɔ̀n kɛ dɔ́ nɛ̀n le: “Ankà-yé-wrɔn, ankà ɔmu léyi ɛ dɔ̀ nɔn, bɔ̀ mán ɛ wɔra bɔ̀!”

⁴⁶Zhezü mrɛ́n nɛ̀n ɔmùan le: “Muzhie dú nyɛ́n mán nyɛ tɛn, ɛnyanmàn-gbànvri-ankà-yé-bɔ̀! Nye bɩ́, ɛnlowru srɔnsrɔn nyɛ wá anwrɔn ejüi, kɩ nyɛ́n sɩ́ wá yɔ ɛkɔrɛ̀ ɛtie-ẅì mùan, ô yɔ wɔrɔ ɛnlowru hɔ̀n lɔ.

⁴⁷Muzhie dú nyɛ tɛn! Nye ku ɛzhe nanmàn ankrànkràn hɔ̀n nyɛ tán Ɔwɔ-mùanwú-ankà-dɔ́-bɔ̀; Ɔwɔ-mùanwú-ankà-dɔ́-bɔ̀ léyi nyɛ́n nancüì hɔ̀n wrì nɔn.

⁴⁸Nyɛ́n hán tán ô ye nyrì le, nye ci nyɛ́n nancüì hɔ́n ɛmɛẅí, ɔmuhi ye wri Ɔwɔ-mùanwú-ankà-dɔ́-bɔ̀, kɩ nyɛ tɛn, nye ku yɔ ɛzhe-nanmàn nɔn!

⁴⁹Hɩ le kruhú de Ɔwɔ, n'ankà-nyrì lɔ mɛ̀n, ndɔ̀ le: ‘Mɛ lɛ yüre yɔ Ɔwɔ-mùanwú-ankà-dɔ́-bɔ̀ mán ɔkɔhɔ̀n-wá-bɔ̀; yɔ le wri ndɔ hɔ̀n kɩ yɔ lɛ hán ɛnjanbɔ̀ ɛgbàn.’

⁵⁰Eci hán ndɔ lɔ, n'ɛkruhú, ɛnvra ndɔ lɔ mɛ̀n-bɔ̀ ke le di ɛgbàn wɔɛ̀n kɛ lɛ tán Ɔwɔ-mùanwú-ankà-dɔ́-bɔ̀ lɔ fɛn léyi yɔ wrí ɛnhibù krubɔmɛ̀n,

⁵¹bukru Abɛlɛ̀n vra, hàn mán cɔ́ Zakari léyi ye wri ɛcice-tɛbrɛ̀ wú mán Ɔwɔ-dúyri-Prɔnprɔn granmɛ̀n nɔn. Hɛ̀ɛ̀ mɛ dɔ́ nyɛ̀n annànwɔrɛ mɛ̀n le, ɛnvra ndɔ lɔ mɛ̀n-bɔ̀, ke le di ɛgbàn wɔɛ̀n tán anwrɔn hɔ̀n léyi ye wrì nɔn.

⁵²Muzhie dú nyɛ tɛ́n, ɛnyanmàn-gbànvri-ankà-yé-bɔ̀! Nyɛ́n bɩ́ safɛ̀ léyi kɛ tán ɛkɔrɛ̀levri ye srú ankà-nyri sù nɔn: nyɛ́n mumù nyɛ́n sɩ́ bru anwɔn mɛ̀n kɩ nyɛ́n sɩ́ tán anwrɔn hɔ̀n léyi ke ji ke bru anwɔn mɛ̀n nɔn ɛkɔrɛ̀levri ke bruɛ.”

⁵³Ɛnvra léyi Zhezü dú ɔwɔn ndɔ lɔ mɛ̀n srɔ ɛntrɛ nɔn, ɛnyanmàn-gbànvri-ankà-yé-bɔ̀, mán Ɔwɔ-nyanmàn-sùva-wá-bɔ̀ bukru ke bɩ́ ɛmɛ̀nhyì n'ɛtɛsɛ̀n kɩ ke yrɛ nɛ̀n ankà mɛ̀ntɛ mɛ̀ntɛ:

⁵⁴yɔ krɔn nɛ̀n antanwrɔn, ô yɔ ji ɛyri yɔ cɔ́ nɛ̀n, n'ɛyɔ̀n-ankà-dɔ́ mɛ̀n.