Read Alladian Lükɛ̀n 16 Bible Online

Lükɛ̀n 16 - Alladian bible

Lükɛ̀n 16

¹Zhezü kɛ dɔ́ n'ɛsɛnkɛn-bɔ̀ le: “Ɛnnɛ̀ncüì tɔ̀n ẅɛn ɛci-krɛ́-wrɔn tɔ̀n, kɩ yɛ vá dɔ́ nɛ̀n le, ɛci-krɛ́-wrɔn lɔ ke yerɛ nɛ̀n ɛci.

²Ɛnnɛ̀ncüì lɔ bi nɛ̀n kɩ kɛ dɔ́ nɛ̀n le: ‘Ankà tán de mɛ yá ye dɔ́ v'ɛwú nɛ́n? Ɛ̀ krɛ́ ɛci ɛ̀ tán mɛ̀n, ɔmuhi e sɩ̀ vru dú m'ɛci-krɛ́-wrɔn hàn nɔn.’

³Ɛci-krɛ́-wrɔn lɔ kɛ dɔ́ n'edomɛ̀n le: ‘M'ankà-yé-wrɔn ke le bɩ́ mɛ̀n ɛci antamɛ̀n kɛ̀ sɔhɔ́. Ecitan de mɛ lɛ hán nɛ́n? Ecüì bádá mɛ̀n edomɛ̀n hɩ m'á hán ovú kɔ̀hɔ̀n, kɩ anvɛvrà kɛ lɛ ẅɛn mɛ̀n ɛci-sán-kɔ̀hɔ̀n-hán mɛ̀n.

⁴Mɛ̀n nyri eci léyi mɛ lɛ hán nɔn! Kɩ ɛnvra léyi m'ɔkɔhɔ̀n lɔ kɛ lɛ zrɛ́n nɔn, anwrɔn ke le bɩ́ mɛ̀n ke sɩ́ ɛbemɛ̀n!’

⁵Anwrɔn hɔ̀n léyi ẅɛn ɛnnɛ̀ncüì lɔ ɔwɔɛ̀n nɔn, nɛ̀n hán yɔ yɛ vá nzri zri. Nɛ dɔ́ kpàkpà wrɔn lɔ le: ‘Ɔwɔɛ̀n ɛbɛ de ɛ̀ ẅɛn m'ankà-yé-wrɔn lɔ nɛ́n?’

⁶‘Ɛnzhì balo ɛkoẅi-ɛnrì wɔɛ̀n de mɛ́n ẅɛ̀n nɔn’. Ɛci-krɛ́-wrɔn lɔ kɛ dɔ́ nɛ̀n le: ‘Nyàn v'ɔwɔɛ̀n; kpràkprà, ɛ̀ yɛ́, ô è merɛ́n ɛkoẅì-anhyrɛ̀ mán ɛẅì ɛvà.’

⁷Zɛtɛn nɛ dɔ́ ɔwrɔn nyàntɛn: ‘Vɛ tɛn, ɔwɔɛ̀n ɛ̀bɛ ɛ ẅɛ̀n hàn?’ ‘Ɛci-sɔ́n bagɛ̀n ɛkoẅi-ɛẅìa-ɛnrì’, ɔmu lɔ de ɔwrɔn lɔ kɛ dɔ́ nɛ̀n nɔn. Ɛci-krɛ́-wrɔn lɔ kɛ dɔ́ nɛ̀n le: ‘Nyàn v'ɔwɔɛ̀n; è merɛ́n ɛkoẅi-ɛẅia.’

⁸Ankà-yé-wrɔn lɔ kɛ mrɛ́n ɛci-krɛ́-wrɔn gbàngbàn lɔ, ɔmuhi nɛ̀n ẅɛn anvɛmɛ̀n nɔn. Ɔmuhi anwrɔn hɔ̀n léyi dú ɛnu ɛnhi nɔn, ẅɛn anvɛmɛ̀n anhàn-zhrɛ́ mɛ̀n yɔ mán yɔ nyrán hɔ̀n mɛhi vrán yɔ hɔ̀n léyi dú ɛyri-kán mɛ̀n nɔn.”

⁹Zhezü vru kɛ dɔ̀ le: “Kɩ mɛ tɛn, mɛ dɔ́ nyɛ̀n le: nyɛ́n bɩ́ ɛnhibù wú nɛ̀ncüì-dì-ci lɔ, nyɛ́n ji ny'ɛcüɛn-bɔ̀ ô ɛnbi léyi ny'ɛnnɛ̀ncüì-dì-ci lɔ kɛ lɛ trɔ nɔn, ye bɩ́ nyɛ̀n anhobɩ́ dúyri léyi ke sɩ̀ trɔa nɔn.

¹⁰Ɔwrɔn léyi ke di ɔmùan-zri eci cɛ hán mɛ̀n nɔn, eci cüìcüìemɛ̀n mán nɛ di ɔmùan-zri; ɔwrɔn léyi ke sɩ́ di ɔmùan-zri eci cɛ hán mɛ̀n nɔn, eci cüìcüìemɛ̀n mán, nɛ́n sɩ̀ di ɔmuan-zri.

¹¹Ke dú kɛ nyɛ́n sɩ̀ ẅɛ̀n ɔmuan-zri-dì, ɛnhibù wú nɛ̀ncüì-di-ci lɔ mɛ̀n, antɔn de kɛ lɛ tán nyɛ̀n ɛnnɛcüì-dì-annànwɔrɛ-ci lɔ nyɛ́n hɛ́n nɛ́n?

¹²Kɩ, ke dú kɛ nyɛ́n sɩ̀ ẅɛ̀n ɔmùan-zri-dì ɔwrɔn ci wú, antɔn de kɛ lɛ tán nyɛ̀n, eci lɛ́yi dú nyɛ tɛn nɛ́n?

¹³Eci-bɩtan-wrɔn zriɛmɛ́n kɛ sɩ̀ hán ɔkɔ̀hɔ̀n ɛnnɛ̀ncüì anhyrɛ̀ yri; nɛ lɛ gbri ɔtɔ̀n kɩ nɛ lɛ cüɛ́n ɔtɔ̀n; ne le di ɔmùan zri ɔtɔ̀n yri, kɩ nɛ́n sɩ̀ cüɛn ndɔ lɔ. Nyɛ́n sɩ̀ dú Ɔwɔ mán ɔkùa ci-bɩ̀tan-wrɔn rɔ́.”

¹⁴Ɔwɔ-nyanmàn-sùva-wá-bɔ̀ kɛ yá ankà ndɔ hɔ̀n léyi Zhezü kɛ dɔ̀ nɔn, kɩ yɔ hán nɛ̀n ɛnhyürɛ̀, ɔmuhi yɔ cüɛ́n ɔkùa nɔn.

¹⁵Zhezü kɛ dɔ́ yɔ le: “Nyɛ́n dú anwrɔn hɔ̀n léyi ke bú y'edomɛ̀n kɛ hán ɛnyrɔn-nan-bɔ̀ anwrɔnẅì zìwú, tɛ́n Ɔwɔ nyrí ny'ɛnbɔrɛ hɔ̀n lɔ. Ɔmuhi, eci léyi anwrɔnẅì ke bɩ kɛ hán eci vri nɔn, Ɔwɔ zìwú lɔ dú eci-gbri-ci.

¹⁶Mohizì nyanmàn vra lɔ mán Ɔwɔ-mùanwú-ankà-dɔ́-bɔ̀ wrú lɔ, ndù hàn kɩ cɔ́ Zhan Batisì vra. Bukru hɩ vra lɔ, Ɛmɛẅi ankà Ankrànkràn léyi dú Anhobɩ́ Nɛ̀ncüì-dúyri nvà nɔn, anwrɔn cɔ́ nɛ̀n yá kɩ ɔwrɔn wrɔn kɛ wrɔn ɛyri ô kè bru nɛ̀n ɛmɛ̀n.

¹⁷Tɛ́n anhobɩ́ mán ɛnhi mɛhí kɛ lɛ vàcì, kɛ lɛ hán eci kora hɔ́, ke le dù kɛ lɛ hán ɛnyanmàn wrú ẅì hɔ́.

¹⁸Ɔwrɔn totɔtɔ̀n léyi kɛ wrɔ́ nɛ́n hi, kɩ ke bɩ́ ɛnnyɔnwrɔn nyàntɛn nɔn, nɛ hán ɛnyɔnwrɔn-bi-gbàn, kɩ ɔwrɔn léyi ke yri ɛnnyɔnwrɔn léyi nɛ́n cüì wrɔ́ die nɔn, nɛ́n mán nɛ hán ɛnnyɔnwrɔn-bi-gbàn.”

¹⁹“Ɔwrɔn tɔ̀n ndù di ɛnnɛ̀ncüì, kɩ anhàn shishi domɛ̀n-ẅɛn-ci ankrànkràn lɔ fɛn dú n'ɛci nɛ ẅɛn edomɛ̀n ɛnbì lɔ fɛn, kɩ nɛ̀n dú ɛwúvà ankrànkràn mɛ̀n ɛci-zîemɛ̀n mán pɔpüɛ̀-brá mɛ̀n.

²⁰Ɛmian-wrɔn tɔ̀n, ye bi nɛ̀n Lazarɛ̀n, ɛci-fɔ́n bɩ́ nɛ̀n edomɛ̀n, kɩ nɛ̀n dɛ́ ɛnnɛ̀ncüì lɔ wɔn gbatà muàn.

²¹Nɛ cüɛ́n ɔmu le ɛci léyi ɛnnɛ̀ncüì ke zî cüe tɛbrɛ̀ krugbɛ̀n nɔn, ke dú n'ɛci-zî-ci. Kɩ ɛnlɛtù hɔ̀n mán kɛ vá zrɔn n'ɛci-fɔ́n hɔ̀n lɔ.

²²Ɛmian-wrɔn lɔ nwù, kɩ Ɔwɔ-kùyüre-bɔ̀ bɩ́ nɛ̀n sɩ́ Abrahamɛ̀n tɛ̀sɛ̀n. Ɛnnɛ̀ncüì lɔ mán nwù, kɩ yɛ wá nɛ̀n ɛnhibɩ́.

²³Ɛnnɛ̀ncüì lɔ kɛ kán ɛgbàn bobrebe owú-bɔ̀ anmàn; nɛ̀n sɩ́ anvɛ̀ ɛwú, kɩ nɛ̀n kán Abrahamɛ̀n esù she, kɩ Lazarɛ̀n nyɔn nɛ̀n ɛtɛsɛ̀n hán.

²⁴Zɛtɛn ɛnnɛ̀ncüì lɔ ke di bobo kɛ dɔ̀ le: ‘Dade Abrahamɛ̀n, è nyri mɛ̀n ɛnhyɔ̀bɔ̀; ô ɛ̀ wá Lazarɛ̀n ɔkɔhɔ̀n kè bɩ́ ɛnshì antieẅì mùan kɛ̀ và di mɛ̀n ɔwɔɛ̀n wú, ɔmuhi mɛ kán ɛgbàn bobrebe ɛnhyà ndɔ lɔ mɛ̀n nɔn.’

²⁵Tɛ́n Abrahamɛ̀n kɛ dɔ̀ le: ‘M'ɛnẅì kè bru mɛ́n le, ɛ̀ cɔ́ ɛci bobrebe ɛnvra léyi è dú ɛnu ɛnhi, tɛ́n Lazarɛ̀n dú ɛgbàn-kàn brobebe mɛ̀n. Zɛtɛ̀ lɔ, ɛnu lɔ nɛ cɔ́ n'ɛnbɔrɛ-bi-wá, vɛ tɛn è dú ɛgbàn-kán mɛ̀n.

²⁶Zɛtɛn, bɔ́ mán nyɛ́n mɛhi lɔ, ɛnnànmàn vri tɔ̀n dú bɔ̀ angranmɛ̀n; ɔmu lɔ anwrɔn hɔ̀n léyi ke jí kè dú bɔ́ yri lɔ kɛ̀ hɔ́n ny'ɛyri lɔ nɔn, ke sɩ̀ cɔ́ hɩ kɔrɛ̀levri lɔ rɔ́.’

²⁷Ɛnnɛ̀ncüì lɔ kɛ dɔ̀ le: ‘Zɛtɛn mɛ sɛ́n mɛ́n Dade, ɛ̀ hán Lazarɛ̀n kɛ̀ hɔ́n nde nanvrɛn ɛbemɛ̀n,

²⁸nmàn-ẅì hɔ̀n ɛnrì dú nanvrɛn. Nɛ̀n hɔ̀n nɛ̀n dɔ́ yɔ, ô yɔ mán ye bɩ́ vá ɛgbàn-kán yri ndɔ lɔ mɛ̀n.’

²⁹Abrahamɛ̀n mrɛ́n nɛ̀n ɔmùan le: ‘Ɔmuan-ẅì hɔ̀n ẅɛn Mohizì mán Ɔwɔ-mùanwú-ankà-dɔ́-bɔ̀ dú nanvrɛn ke bi dɔ́ yɔ, yɔ die yɔ nukùɛ!’

³⁰Ɛnnɛ̀ncüì lɔ vru kɛ dɔ̀ le: ‘Ndɔ lɔ ke sɩ̀ cüɛ̀n hàn, Dade Abrahamɛ̀n. Tɛ́n ke dú kɛ ɔwrɔn tɔ̀n ke dú owú-bɔ̀ anmàn kɛ vá cɔ́ yɔ hô, hɩ lɔ yɔ lɛ crɔn ɛnkru.’

³¹Tɛ́n Abrahamɛ̀n kɛ dɔ́ nɛ̀n le: ‘Ke dú kɛ yɔ sɩ́ ji yɔ die Mohizì mán Ɔwɔ-mùanwú-ankà-dɔ́-bɔ̀ nukùɛ hô, yɔ sɩ̀ teze y'edomɛ̀n yɔ tán owú-bɔ̀ ke dú kɛ nzri mán ke dú owú-bɔ̀ mɛ̀n kɛ wɔrɔ̀ vá ɛkɔrɛ-bɔ̀ mɛ̀n.’ ”