Read Alladian Lükɛ̀n 2 Bible Online

Lükɛ̀n 2 - Alladian bible

Lükɛ̀n 2

¹Hɩ vra lɔ, Romɛ̀n ɛnhi wú govràn léyi dú Sezarɛ̀n Ogüsɛ̀n nɔn wá tán le, Romɛ̀n ɛnhi wú bɔ̀ lɔ fɛn, kɛ̀ hɔ́n y'anmàn kɛ̀ wá ebɩ́ owrúemɛ̀n.

²Ebɩ́-owrúemèn-wá ndɔ lɔ dú kpàkpà tɛ́n, ɛnvra léyi Kirinihüsɛ̀n dú Siri kpɔsɔ wú govran nɔn.

³Anwrɔn lɔ fɛn, ɔwrɔn wrɔn kɛ̀ hɔ́n y'anmàn, ô yɔ wá ebí owruemɛ̀n.

⁴Zhozɛfɛ̀n mán dú Nazarɛtɛ̀n anmàn Galile Kpɔsɔ wú kɛ hɔ́n Zhüde anmàn léyi ye bi Bɛtlehɛmɛ̀n, ɛyri léyi ye bî ɛnnɛncüì Davidɛ̀n; annànwɔrɛ mɛ̀n nɛ́n mán nɛ̀n dú Davidɛ̀n mɛẅi-wrɔn tɔ̀n.

⁵Nɛ̀n hɔ́n nanvrɛn, ô nɛ̀n wá ebi owrúemɛ̀n nɛ́n mán n'ɔmùan-sɔ́n nyɔnwrɔn Mari mɛhi. Mari dú ɛnẅì-bî vrá mɛ̀n.

⁶Kɩ ɛnvra léyi ye dú Bɛtlehɛmɛ̀n nɔn, Mari ẅì-bî vra cɔ̀.

⁷Mari bî ɛncɔnwrɔn-ẅì dú n'ɛnvrakpà ẅì. Nɛ̀n murɛn yi ɛci wosu, kɩ nɛ̀n drɛ́ yi annɔ̀n ci-zî bɔ̀hɔ́ mɛ̀n, ɔmuhi yɔ sɩ̀ cɔ̀ ɛyri nɛ̀nnyàn-bɔ̀ wɔn lɔ mɛ̀n nɔn.

⁸Ɔkpɔsɔ ndɔ lɔ wú, annɔ̀n-kua-bɔ̀ dú ankɛ̀tɛmɛ̀n ɛnnyran, kɛ nán annɔ̀n.

⁹Ɛẅɛnwrɔn kùyüre-wrɔn tɔ̀n srɔ y'ezìwú kɩ Ɛẅɛnwrɔn ci-zrɔ yri-kàn gbrɛ́nkɛ́n yɔ ɔmùan. Ɛnjansù vri tɔ̀n bru yɔ edù.

¹⁰Tɛ́n Ɔwɔ-kùyüre-wrɔn lɔ kɛ dɔ́ yɔ le: “Ɛnjansù ke bɩ́ ẅɛn nyɛ̀n, ɔmuhi mɛ và mɛ̀n sɩ́ nyɛ̀n ɛmɛẅi ankà ankrànkràn léyi kɛ lɛ brá fɛcüè pɔpüɛ̀ brobebe nɔn:

¹¹Ɛnyɔncì nyran lɔ, Davidɛ̀n anmàn lɔ, ye bî ny'ebɩ̀die-wrɔn tɔ̀n, nɛ́n de nɛ̀n dú Krisì, Ɛẅɛnwrɔn lɔ nɔn.

¹²Kɩ nyàn eci-woroan-ci léyi nye le bɩ ô nyɛ́n nyri nɛ̀n nɔn: nyɛ lɛ cɔ́ ɛnẅì cɛ tɔ̀n, ye murɛ́n eci wosu dɛ́ annɔ̀n ci-zî bɔ̀hɔ́ mɛ̀n.”

¹³Ɛnvra zri lɔ, ɔwɔ-kùyüre-bɔ̀ bobrebe ndɔ hɔ̀n dú anhobɩ́ nvà, kɩ kɛ mrɛ́n Ɔwɔ, kɛ dɔ̀ le:

¹⁴“Eci-zrɔ dú ɛwú anhobɩ́ Wɔ tɛn, kɩ n'anwɔwɔ dú ɛnu ɛnhi anwrɔn hɔ̀n léyi nɛ cüɛ̀n nɔn tɛn!”

¹⁵Ɛnvra léyi, ɔwɔ-kùyüre-bɔ̀ lɔ teze yɔ, vru ɛmɛẅi hɔ́n anhobɩ́ nɔn, annɔ̀n-kua-bɔ̀ kɛ dɔ́ y'edomɛ̀n le: Bɔ̀ hɔ́n Bɛtlehɛmɛ̀n anmàn: ke ji le bɔ̀ kán eci léyi wɔɛ̀n nɔn, eci léyi Ɛwɛnwrɔn hán bɔ̀, bɔ́ kàn nɔn.

¹⁶Annɔ̀n-kua-bɔ̀ lɔ cüi-edù nhɔ̀n, kɩ yɔ cɔ́ Mari mán Zhozɛfɛ̀n mán ɛnẅì cɛ léyi dɛ́ annɔ̀n ci-zî bɔ̀hɔ́ mɛ̀n nɔn.

¹⁷Ɛnvra léyi yɔ kán nɛ̀n nɔn, yɔ dɔ́ ankà léyi Ɔwɔ-kùyüre-wrɔn lɔ dɔ́ yɔ ɛnẅì cɛ lɔ wú nɔn.

¹⁸Anwrɔn hɔ̀n léyi ke die annɔ̀n-kua-bɔ̀ lɔ nukùɛ nɔn, dú anvɛmɛ̀n-frɛ́n mɛ̀n.

¹⁹Mari tɛn kɛ wá ankà ndɔ hɔ̀n lɔ fɛn ɛnkruemɛ̀n, kɩ ne tro ankà ɛnbɔrɛmɛ̀n.

²⁰Zɛtɛn annɔ̀n-kua-bɔ̀ lɔ, vru ɛmɛẅi hɔ̀n, yɔ brá pɔpüɛ̀ Ɛnnɛncüì Ɔwɔ vrisì lɔ wú, kɩ yɔ mrɛ́n nɛ̀n n'ɛci hɔ̀n lɔ fɛn mɛ̀n; hɩ léyi yɔ yá, hɩ yɔ kàn, ɔmuhi ɛci hɔ̀n lɔ fɛn wɔɛ̀n, hán ɔmu le Ɔwɔ-kùyüre-wrɔn lɔ dɔ́ yɔ nɔn.

²¹Ɛnbifɔn-kru zri vacì, ɛnvra léyi, ye le wí ɛnẅì cɛ lɔ wúcɔ̀ domɛ̀n nɔn, yɛ wá nɛ̀n ebɩ́ Zhezü, ebɩ́ léyi Ɔwɔ-kùyüre-wrɔn yé Mari yakɛ ye sî n'ɛmɛ̀ntɛ̀ nɔn.

²²Ɛnvra léyi Mohizì nyanmàn lɔ wá tán Zhozɛfɛ̀n mán Mari kɛ̀ hɔ̀n kè fi ɛnẅì cɛ lɔ edomɛ̀n ɔwɔ-cice-wɔn lɔ mɛ̀n nɔn, ncɔ̀a. Yɔ bɩ́ ɛnẅì cɛ lɔ yɔ hɔ́n Zherüzalɛmɛ̀n anmàn, ô yɔ sɩ́ nɛ̀n Ɛẅɛnwrɔn zìwú.

²³Ɔmuhi Ɛẅɛnwrɔn nyanmàn lɔ mɛ̀n, ye merɛ́n le: “Ɛnvra kpà cɔnwrɔn-ẅì lɔ ye bî nɔn, dú Ɛẅɛnwrɔn tɛn.”

²⁴Ecice-ci léyi ɛnyanmàn wá nɔn, ke ji le yɔ tán; dú: “Ɛnwuri anhyrɛ̀ ɛncüì mán ɛnsɛ̀n, bàdà hô, brɛndre anhyrɛ̀.”

²⁵Zɛtɛn ɔwrɔn tɔ̀n dú Zherüzalɛmɛ̀n anmàn, ye bi nɛ̀n Simeɔn. Ɔwrɔn ndɔ lɔ, dú *ɛnyrɔnnan-wrɔn; nɛ wá Ɔwɔ, kɩ nɛ vrá ɔwrɔn léyi kɛ lɛ và ke bɩ́ Izraɛlɛ̀n kè die nɔn. Ɛnhɛ́n Prɔnprɔn mɛhi yɔ dù,

²⁶kɩ hán tán nɛ̀n nɛ́n nyrì le, nɛ lɛ kán Ebɩ̀die-wrɔn léyi Ɛẅɛnwrɔn kɛ lɛ hán kɛ̀ và, yakɛ ne le wù nɔn.

²⁷Ɔwɔ Hɛ́n kɛ́n Simeɔn sɩ́ Ɔwɔ-cice-wɔn lɔ mɛ̀n. Ɛnvra léyi Zhezü mɛ̀n mɛ̀n-bɔ̀ bɩ́ nɛ̀n hɔ́n Ɔwɔ-cice-wɔn lɔ mɛ̀n, ô yɛ hán eci léyi ɛnyanmàn wá nɔn,

²⁸Simeɔn ẅɛn ɛnẅì lɔ antamɛ̀n kɩ kɛ tán Ɔwɔ ɔkùɛn, kɩ nɛ dɔ̀ le:

²⁹“Zɛtɛ̀ lɔ, Ɛẅɛnwrɔn v'ɔmùan-wá lɔ sá nmú: ɛkɔrɛ̀levri dù è teze v'eci-bɩ̀tan-wrɔn kɛ̀ hɔ̀n wú anwɔwɔ mɛ̀n.

³⁰Ɔmuhi m'anvɛ̀ hɔ̀n lɔ kán v'ɛnkrukɔrɛ̀, ɛnkrukɔrɛ̀ ndɔ léyi

³¹ɛ̀ hán fɛcüè lɔ fɛn zìwú nɔn:

³²hɩ de dú, ɛyri-kàn léyi, kɛ lɛ hán tán ɛnhi wú anmàn lɔ fɛn ke nyri mɛ́n, ô kè dú eci-zrɔ kɛ̀ tán Izraɛlɛ̀n vɛ́n fɛcüè.”

³³Zhezü nɛ́n zi mán nɛ́n muan dú anvɛmɛ̀n-frɛ́n mɛ̀n, ankà léyi Simeɔn kɛ dɔ́ ɛnẅì lɔ wú nɔn.

³⁴Simeɔn fú yɔ ɛnshi kɩ kɛ dɔ́ Zhezü nɛ́n muan Mari le: “Ɔwɔ mrɛ́n ɛnẅì ndɔ lɔ, ô nɛ̀n dú Izraɛlɛ̀n anmàn lɔ, anwrɔn bobrebe y'ejüezì mán ndɔ hɔ̀n y'ɛnkrukɔrɛ̀. Ne le dú Ɔwɔ-ci-woran-ci léyi, kɛ lɛ kɛ́n anwrɔn ezì,

³⁵kɩ ne le sɩ́ ɛyri-kán mɛ̀n, ɛnbɔrɛ mɛ̀n ci-bán-ci bobrebe ɛntrɛ. Vɛ tɛn, edomɛ̀n-bru ankà ke le gbìdi vɛ́n wawùyɛ lɔ, kɛ lɛ hán anhà-kɔ́n-nyan shé hɔ́.”

³⁶Ɔwɔ-mùanwú-ankà-dɔ́ nyɔwrɔn tɔ̀n ye bi Anɛ̀n, nɛ̀n dú, Penüɛlɛ̀n ẅì nyɔnwrɔn-ẅì. Nɛ́n zi dú Asɛrɛ̀n anmàn-hinan-wú wrɔn. Anɛ̀n srɔ ɛshishi. N'ɛcɛ mɛ̀n cɔnwrɔn mɛhi, yɔ yɛ́ ɛnnanwàn kru ɔbɔɛ̀n,

³⁷kɩ nɛ̀n srɔ ɛngrɔn-hi hàn kɩ cɔ́ nɛ̀n ɛnnanwàn kru ɛkoẅi-anzɔ̀ mán ɛẅì anzɔ̀. Nɛ́n sɩ́ trɔ Ɔwɔ-cice-wɔn lɔ mɛ̀n, tɛ́n nɛ̀n dú Ɔwɔ ci-bɩtan-hi, ɛnnyran mán ɛcɛ̀n: ne bɩ́ kishe kɩ nɛ sɛ́n Ɔwɔ.

³⁸Nɛ́n mán, nɛ̀n vá ɛnvra ndɔ lɔ mɛ̀n, kɩ nɛ̀n bukru nɛ tán Ɔwɔ ɔkùɛn. Kɩ nɛ dɔ́ ɛnẅì lɔ ankà tán anwrɔn hɔ̀n léyi kɛ vrá Ɔwɔ ke bɩ́ Zherüzalɛmɛ̀n ke die nɔn.

³⁹Ɛnvra léyi Zhezü mɛ̀n mɛ̀n-bɔ̀ hán eci léyi Ɛẅɛnwrɔn nyanmàn wá nɔn, ye vru ɛmɛẅi yɔ mán ɛnẅì cɛ lɔ mɛhi yɔ hɔ́n y'anmàn, Galile kpɔsɔ wú, Nazarɛtɛ̀n anmàn.

⁴⁰Ɛnẅì cɛ lɔ kɛ sɔ́, kɩ ecüì kɛ vá nɛ̀n edomɛ̀n. Ankà-nyrì yɩ́ nɛ̀n ɛnkruemɛ̀n kɩ Ɔwɔ cüɛ̀n dú nɛ̀n edomɛ̀n.

⁴¹Ɛnnanwàn lɔ fɛn Zhezü nɛ́n zi mán nɛ́n muan kɛ hɔ́n Zherüzalɛmɛ̀n kɛ nyanmán abùtùkumɛ́n-kɔ́ nyanmàn-bì lɔ.

⁴²Ɛnvra léyi Zhezü ẅɛn ɛnnanwàn kru ɛvà-anhyrɛ̀ nɔn, yɔ bɩ́ nɛ̀n yɔ hɔ̀n, hán ɔmu le dú y'edù-ci nɔn hɔ́.

⁴³Ɛnvra léyi ɔkoran lɔ trɔ nɔn, yɔ vru ɛmɛẅi yɔ hɔ́n y'anmàn, kɩ Zhezü tɛn yɛ́ Zherüzalɛmɛ̀n, nɛ́n zi mán nɛ́n muan ke sɩ̀ nyrì yi ankà lɔ.

⁴⁴Yɔ tro le Zhezü dú y'ɛmɛ̀n-bɔ̀ mɛ̀n ndù kɛ hɔ́n ɛbɩ́, kɩ yɔ nán esù ɛnbì zri yɔ sɩ̀ kán nɛ̀n, kɩ yɔ bukru yɔ ji nɛ̀n y'ɛmɛ̀n-bɔ̀ mɛ̀n, mán yɔ nyran hɔ̀n mɛ̀n.

⁴⁵Zɛtɛn, yɔ sɩ́ cɔ́ nɛ̀n, kɩ yɔ vru ɛmɛẅi yɔ hɔ́n Zherüzalɛmɛ̀n ô yɔ ji nɛ̀n.

⁴⁶Ɛbi-anhɔ́nmɛ̀n bì lɔ, yɔ cɔ́ nɛ̀n Ɔwɔ-cice-wɔn lɔ mɛ̀n: nɛ̀n yɛ́ Zhüifɛ̀n ankà-yé-bɔ̀ wanzíɛ, ne die yɔ nukù kɩ ne yerɛ yɔ ankà.

⁴⁷Anwrɔn hɔ̀n léyi ke die nɛ̀n nukùɛ nɔn, n'ankà-nyrì mán n'ankà-dɔ̀, kɛ frɛ́n yɔ anvɛmɛ̀n.

⁴⁸Ɛnvra léyi nɛ́n zi mán nɛ́n muan kán nɛ̀n nɔn, yɔ dú anvɛmɛ̀n-frɛ́n mɛ̀n kɩ nɛ́n muan kɛ dɔ́ nɛ̀n le: “M'ɛnẅì, cɛci kruhú kɛ́ ɛ hán bɔ̀ eci ndɔ lɔa? Mɛ̀n mán e zi mɛhi, bɔ́ dú ɛnkrɛ̀ta-ku mɛ̀n bɔ́ ji mɛ́n.”

⁴⁹Nɛ dɔ́ yɔ le: “Cɛci kruhú kɛ nye ji mɛ̀n hàn? Nyɛ́n sì nyrìɛn ɔmu le, ke ji le mɛ̀n dú Dade wɔn lɔ mɛ̀n hàn?”

⁵⁰Kɩ yɔ sɩ́ yá ankà léyi nɛ dɔ́ yɔ nɔn.

⁵¹Zhezü vru ɛmɛẅi cɔ́ yɔ yɛ hɔ́n Nazarɛtɛ̀n. Nɛ wá yɔ. Nɛ́n muan kɛ wá ɛnkruemɛ̀n cɛcɛ ɛci hɔ̀n lɔ fɛn léyi nɛ hán nɔn.

⁵²Kɩ, Zhezü kɛ sɔ́ anẅia mɛ̀n, ankà-nyrì kɛ sán kɛ́n nɛ̀n ɛwú, kɩ Ɔwɔ mán anwrɔnẅì ẅɛn n'ɛcüɛ̀n.