Read Alladian Lükɛ̀n 7 Bible Online

Lükɛ̀n 7 - Alladian bible

Lükɛ̀n 7

¹Ɛnvra léyi Zhezü dɔ́ fɛcüè léyi gbrɛnkɛ́n nɛ̀n ɔmùan, ankà ndɔ lɔ trɔ nɔn, nɛ́n hɔ́n Kapɛrnahümɛ̀n anmàn.

²Nanvrɛn lɔ gɔliɛ-wrɔn cüìcüì tɔ̀n, ẅɛn n'eci-bɩ̀tan-wrɔn léyi yi ankà kɛ yɔ nɛ̀n edú nɔn. Eci-bɩ̀tan-wrɔn ndɔ lɔ, ɛnlɔwiɛ dà ke ji kè wù.

³Ɛnvra léyi gɔliɛ-wrɔn cüìcüì lɔ yá Zhezü ɔmùan nɔn, nɛ̀n wá Zhuifɛ̀n-bɔ̀ cüìcüì hɔ̀n ɔkɔhɔ̀n kɛ̀ kán Zhezü kɛ̀ và kɛ̀ kɔrɛ̀ n'eci-bɩ̀tan-wrɔn lɔ.

⁴Yɔ vá cɔ́ Zhezü kɩ yɔ sɛ́n nɛ̀n edùyiemɛ̀n, yɔ dɔ́ nɛ̀n le: “Ɔwrɔn ndɔ lɔ, zrɔ tán le, ɛ̀ và wá nɛ̀n ɛkɔrɛ̀.

⁵Nɛ cüɛ́n bɔ́ fɛcüè lɔ, nɛ́n de nɛ̀n ku bɔ́ Ɔwɔ-sɛ́n-wɔn lɔ nɔn.”

⁶Zɛtɛn Zhezü tɔhú kɛ́n yɔ ɛsɛ̀n yɔ hɔ̀n. Yɔ vá n'ɔwɔn lɔ ɛtɛsɛ̀n cɔ́ yri kɩ gɔliɛ-wrɔn lɔ wá nɛ́n nyran hɔ̀n ɔkɔhɔ̀n kɛ và dɔ́ Zhezü le: “Ankà-yé-wrɔn, e bɩ́ di v'edomɛ̀n ejüe. Mɛn sɩ̀ krɔ̀n ɔmu le á bru m'ebɩ lɔ mɛ̀n nɔn;

⁷hɩ le kruhú de mɛ́n dùku mɛ́n sɩ̀ jì mɛ́n mɛ̀n và nɔn. Tɛ́n ɛ̀ wá tán, kɩ m'eci-bɩ̀tan-wrɔn lɔ kɛ lɛ kɔrɛ̀.

⁸Mɛ́n dùku mán, mɛ̀n ẅɛn m'anwrɔn cüìcüì hɔ̀n ndù, kɩ mɛ̀n ẅɛn gɔliɛ-bɔ̀ dú m'ɛnyanmàn wú. Mɛ dɔ́ ɔtɔ̀n le: ‘Hɔ̀n!’ kɩ nɛ hɔ̀n. Mɛ dɔ́ ɛnyantɛn ‘Và!’ kɩ nɛ và, kɩ mɛ dɔ́ m'eci-bɩ̀tan-wrɔn: ‘Ɛ̀ hán eci ɛndɔ lɔ!’ kɩ nɛ hán.”

⁹Ɛnvra léyi Zhezü yá gɔliɛ-wrɔn cüìcüì ankà-dɔ̀ lɔ nɔn, zrɔ nɛ̀n, kɩ nɛ́n crɛ̀, nɛ dɔ́ fɛcüè léyi kɛ kɛ́n nɛ̀n ɛsɛ̀n nɔn le: “Mɛ dɔ́ nyɛ̀n le: mɛ vá cɔ́, ankàẅì-bùtan ndɔ lɔ ɛyri zriɛmɛ́n, Izraɛlɛ̀n ɛnhiwú dùku mán.”

¹⁰Ɔkɔhɔ̀n wá bɔ̀ vru ɛmɛẅi hɔ́n gɔliɛ-wrɔn cüìcüì nanvrɛn ɛbemɛ̀n kɩ, cɔ́ eci-bɩtan-wrɔn lɔ, edùsɔ mɛ̀n.

¹¹Zhezü kɛ hɔ́n anmàn tɔ̀n léyi ye bi Nahinɛ̀n nɔn. N'ɛsɛnkɛn-bɔ̀ mán fɛcüè vri tɔ̀n hɔ́n sɩ́ nɛ̀n.

¹²Ɛnvra léyi, nɛ vá anmàn sù-gbatà muàn cɔ́ yri nɔn, anwrɔn wɔrɔ ezhie kɛ hɔ́n ebɩ-yri; ɛngrɔn-hi tɔ̀n ẅì zri lɔ de nwù nɔn. Anmàn-bɔ̀ bobrebe dú ɛngrɔn-hi lɔ ɛtɛsɛ̀n.

¹³Ɛnvra léyi, Ɛẅɛnwrɔn kán nɛ̀n nɔn, ɛnhyɔ̀bɔ̀ cɔ́ nɛ̀n, kɩ nɛ dɔ́ ɛngrɔn-hi lɔ le: “E bɩ́ wú eyú.”

¹⁴Zɛtɛn, nɛ̀n nán esù nɛ̀n hɔ́n ezì, nɛ̀n tɛ́ ezhie lakà lɔ ɛkɔrɛ̀; lakà-wɔrɔ-bɔ̀ lɔ sannyɔn. Zhezü kɛ dɔ̀ le: “Sugban-ẅì mɛ wá tán mɛ́n, tɔhú!”

¹⁵Owú-wrɔn lɔ, tɔhú kɩ bukru kɛ dɔ́ ankà. Zhezü bɩ́ nɛ̀n tán nɛ́n muan.

¹⁶Yɔ lɔ fɛn, ɛnjansù bru yɔ; yɔ mrɛ́n Ɔwɔ kɩ yɔ dɔ̀ le: “Ɔwɔ-mùanwú-ankà-dɔ́-wrɔn cüìcüì tɔ̀n srɔ bɔ̀ ɛmɛ̀n! Kɩ yɔ vru yɔ dɔ̀ le: Ɔwɔ và, wá nɛ́n fɛcüè ɛkɔrɛ̀!”

¹⁷Kɩ Zhüde kpɔsɔ wú mán anmàn ndɔ hɔ̀n léyi dú ɛtɛsɛ̀n nɔn, yá Zhezü ci léyi hán nɔn.

¹⁸Zhan Batisì tɛsɛ̀n-bɔ̀ bɩ́ ankà ndɔ lɔ fɛn dɔ́ nɛ̀n. Zhan bɩ́ anwrɔn anhyrɛ̀ y'ɛmɛ̀n

¹⁹kɩ wá yɔ ɔkɔhɔ̀n Zhezü yri, ô ye yrɛ nɛ̀n le: “Kɛ̂ vɛ́n de è dú ebɩdie-wrɔn léyi bɔ́ nyrì le kɛ lɛ và nɛ́n? Kale bɔ̀ vrá ɔwrɔn nyantɛn hán?”

²⁰Ɛnvra léyi yɔ cɔ́ Zhezü ɛtɛsɛ̀n nɔn, yɔ dɔ́ nɛ̀n le: “Zhan Batisì wá bɔ̀ ɔkɔhɔ̀n, bɔ̀ và bɔ̀ yrɛ mɛ́n le: ‘Kɛ̂ vɛ́n de è dú ebɩdie-wrɔn léyi bɔ́ nyrì le kɛ lɛ và, kale, bɔ̀ vrá ɔwrɔn nyantɛn hán?’ ”

²¹Ɛnvra zri lɔ Zhezü kɔrɛ anwrɔn bobrebe léyi ɛnlowiɛ dú edomɛ̀n; nɛ wrɔ́ yɔ anhɛ́n gbangbàn edomɛ̀n sɔhɔ́, nɛ hán anvɛ̀-boyɛ-bɔ̀ bobrebe kɛ kán ɛyri.

²²Zɛtɛn, nɛ dɔ́ Zhan kɔhɔ̀n-wá-bɔ̀ lɔ ankà: “Nyɛ́n hɔ̀n nyɛ́n dɔ́ Zhan, eci léyi nyɛ́n kàn mán ankà léyi nyɛ́n yá nɔn: anvɛ̀-boyɛ-bɔ̀ kɛ kán ɛyri, ɔkpɔcɔ̀-bɔ̀ kɛ nán esù, kokove-bɔ̀ cɔ́ ɔkɔrɛ̀, nukù-sɩ-bɔ̀ kɛ yá ankà, owú-bɔ̀ kɛ frɔ́, ɛmian-bɔ̀ cɔ́ Ɛmɛẅi ankà Ankrànkràn lɔ yá.

²³Ɛnbɔrɛ-bru dú tán ɔwrɔn léyi ke sɩ̀ zrɛ́n ankàẅì-bùtan léyi nɛ̀n ẅɛn m'ɛwú nɔn!”

²⁴Ɛnvra léyi Zhan kɔhɔ̀n-wá-bɔ̀ lɔ hɔ̀n nɔn, Zhezü bukru kɛ dɔ́ fɛcüè, Zhan ankà, kɩ nɛ dɔ́ yɔ le: “Ecitan de nyɛ́n hɔ́n ɛnnuwì ɛ nyan yri nɛ́n? Ɛfi-se tɔ̀n léyi ɛndɔnwrɔn kɛ cüɛ́n nɛ́n? Hɔ̂?

²⁵Zɛtɛn, ecitan de nyɛ́n hɔ́n ɛ nyan yri nɛ́n? Ɔwrɔn léyi ku ɛci fifi edù nɛ́n? Anwrɔn hɔ̀n léyi kɛ ẅɛn ɛnnɛ̀ncüì hɔ̀n ci edomɛ̀n, hɩ dú edomɛ̀n fifiemɛ̀n nɔn, ɛnnɛncüì hɔ̀n wɔn mɛ̀n de yɔ dù nɔn.

²⁶Zɛtɛn, ecitan de nyɛ́n hɔ́n ɛ nyan yri nɛ́n? Ɔwɔ-mùanwú-ankà-dɔ́-wrɔn tɔ̀n hán? Hɛ̀ɛ̀! Mɛ dɔ́ nyɛ̀n le, nɛ̀n vru nɛ̀n vrán Ɔwɔ-mùanwú-ankà-dɔ́-wrɔn tɔ̀n.

²⁷Ɔmuhi, Zhan dú ɔwrɔn léyi Owrú Prɔnprɔn kɛ dɔ̀ le: ‘Mɛ lɛ hán m'ɔkɔhɔ̀n-wá-wrɔn kɛ hɛ́ mɛ́n ezì, ô kɛ̀ mrɛ́n v'ɛnlevri lɔ.’ ”

²⁸Zhezü kɛ dɔ̀ le: “Mɛ dɔ́ nyɛ̀n, yɛ vá bî ɔwrɔn zriɛmɛ́n kè sevri kɛ̀ vrán Zhan; ɔmu tɛ̀kɩ ɔwrɔn léyi dú ɛnẅì cɛ anhobɩ́ anmàn nɔn sevri vrán nɛ̀n.

²⁹Fɛcüè lɔ fɛn mán anmàn-wɔɛ̀n-yrɛ-bɔ̀ ke die nɛ̀n nukùɛ; yɔ cɔ̀ ye nyrì le Ɔwɔ dú ɛnyrɔnnan-wrɔn, kɩ yɔ hán Zhan wá yɔ ɛnshi ɛnkru.

³⁰Tɛ́n Ɔwɔ-nyanmàn-sùva-wá-bɔ̀ mán ɛnyanmàn-gbànvri-ankà-yé-bɔ̀, krɔ ke sɩ̀ bɩ̀ eci léyi Ɔwɔ ke ji kɛ tán yɔ nɔn, kɩ ye sɩ̀ shrì tán Zhan kɛ wá yɔ ɛnshi ɛnkru.”

³¹Zhezü vru kɛ dɔ̀ le: “Antɔn de me le bɩ̀ mɛ́n krɔn ɛnvra ndɔ lɔ mɛ̀n-bɔ̀ nɛ́n? Antɔn hɔ̀n de yɛ cá nɛ́n?

³²Yɔ cá ɛẅì hɔ̀n léyi, yɛ́ angbàtà vri ɛntrɛ, hɩ ndɔ hɔ̀n ke di ɛnkù dɔ́ yɔ nyran hɔ̀n le: ‘Bɔ́ krɛ́ ɛnmràn bri cɔ̀ kètè wú tán nyɛ̀n, kɩ nyɛ́n sɩ́ brɩ́ ɛmràn! Bɔ́ krɛ́ eyú cɔ̀ tán nyɛ̀n kɩ nyɛ́n sɩ́ wú eyú!’

³³Ɔmuhi Zhan Batisì nvà, nɛ́n sɩ́ rá abùtùkumɛ́n, nɛ́n sɩ́ mí ɛntàn wɔnsɛ́n, kɩ nyɛ dɔ̀ le: ‘Ɛnhɛ́n gbangbàn dú nɛ̀n edomɛ̀n!’

³⁴Ɔwrɔnẅì Ẅì nvà, ne zî ɛci, ne mí ɛntàn, kɩ nyɛ dɔ̀ le: ‘Nyɛ́n nyan ɔwrɔn ndɔ lɔ, hɩ ɛci-zî mán ɛntàn mi ankà kɩ ke tro, kɩ vru dú anmàn-wɔɛ̀n-yrɛ-bɔ̀ mán eci-gbangbàn-hàn-bɔ̀ nɛ́n nyran hɔ̀n!’

³⁵Tɛ́n, Ɔwɔ ankà-nyrì dú ɛnyrɔnnan tán anwrɔn hɔ̀n léyi shri bɩ́ nɛ̀n nɔn.”

³⁶Ɔwɔ-nyanmàn-sùva-wá-wrɔn tɔ̀n léyi ye bi Simɔn nɔn, bi Zhezü ɛci. Zhezü hɔ́n Simɔn nanvrɛn ɛbemɛ̀n kɩ, yɛ́ ɛci-zî tɛbrɛ̀ wúɛ.

³⁷Anmàn lɔ, ebɩ́dì-gbangbàn nyɔnwrɔn tɔ̀n dú nanvrɛn. Ɛnvra léyi, ɛnnyɔnwrɔn lɔ yá le, Zhezü dú ɛci-zîemɛ̀n Simɔn nanvrɛn ɛbemɛ̀n nɔn, nɛ̀n bɩ́ anhàn shishi shibán,

³⁸nɛ́n hɔ̀n nyɔn Zhezü ɛmɛẅi, ɛnan tɛsɛ̀n. Ɛnnyɔnwrɔn lɔ ke wú eyú kɩ kɛ gbɛ́ anvɛshi ku Zhezü annan wú; kɩ ne bɩ́ n'ɛnkruẅie lɔ ne wurɛn yi annan wú, nɛ sɔ́n yi annan ɔmuàn, kɩ ne ku yi ɛnshi bánbán lɔ annan.

³⁹Ɛnvra léyi Ɔwɔ-nyanmàn-súva-wá-wrɔn léyi, bi Zhezü ɛci, kán eci léyi wɔɛ̀n nɔn, nɛ dɔ́ n'edomɛ̀n le: “Ke dú kɛ ɔwrɔn ndɔ lɔ kè dú Ɔwɔ-mùanwú-ankà-dɔ́-wrɔn annànwɔrɛ dùku hô, ne le nyri eci léyi dú ɛnnyɔnwrɔn ndɔ léyi kɛ tɛ́ nɛ̀n ɛkɔrɛ̀ nɔn: ebɩ́dì-gbangbàn nyɔnwrɔn tɔ̀n.”

⁴⁰Zɛtɛn Zhezü bɩ́ ankà dɔ̀, kɩ kɛ dɔ́ Ɔwɔ-nyanmàn-súva-wá-wrɔn lɔ le: “Simɔn, mɛ́n ẅɛn ankà me ji mɛ̀n dɔ́ mɛ́n.” Simɔn mrɛ́n ɔmùan le: “Ankà-yé-wrɔn dɔ̀ mɛ̀n nɔn.”

⁴¹Kɩ Zhezü kɛ dɔ̀ le: “Anwrɔn anhyrɛ̀ ẅɛn ɔkua-vɛ́n-wrɔn ɔwɔɛ̀n. Ɔtɔ̀n ẅɛn nɛ̀n angbɛ́n ɛkoẅi-ɛnrì, kɩ ndɔ lɔ ẅɛn nɛ̀n angbɛ́n ɔkoẅi-anhyrɛ̀ mán ɛẅì ɛvà.

⁴²Ɔmuhi, anwrɔn anhyrɛ̀ lɔ, ke sɩ̀ ẅɛ̀n ɔkùa hɩ ká di ɔwɔɛ̀n nɔn, hán tán kɩ nɛ̀n bɩ́ ɔwɔɛ̀n lɔ nɛ̀n ce yɔ. Anwrɔn anhyrɛ̀ lɔ, antɔn de kɛ lɛ cüɛn nɛ̀n kɛ vrán nɛ́n nyran nɛ́n?”

⁴³Simɔn mrɛ́n ɔmùan kɩ kɛ dɔ́ nɛ̀n le: “Me tro le, ɔwrɔn léyi ẅɛn nɛ̀n ɔwɔɛ̀n cüɛn nɔn.” Zhezü kɛ dɔ́ nɛ̀n le: “V'ankà zrɔ.”

⁴⁴Zɛtɛn nɛ̀n crɛ ezi nɛ̀n kɛ́n ɛnnyɔnwrɔn lɔ kɩ nɛ dɔ́ Simɔn le: “Ɛ kán ɛnnyɔnwrɔn ndɔ lɔa? Mɛ̀n bru mɛ́n ɛbemɛ̀n è sɩ̀ tán mɛ̀n ɛnshi mɛ̀n juru annan; tɛ́n, nɛ tɛn nɛ̀n bɩ́ anvɛshi nɛ̀n juru mɛ̀n annan, kɩ nɛ̀n bɩ́ n'ɛnkruẅie nɛ̀n wurɛn mɛ̀n annan.

⁴⁵Ɛnvra léyi mɛ̀n bru mɛ́n ɛbemɛ̀n, è sɩ̀ sɔ́n mɛ̀n ɔmuàn; nɛ tɛn, nɛ̀n dú mɛ̀n annan ɔmuàn-sɔ́n mɛ̀n ɛnvra léyi mɛ̀n bru anwɔn mɛ̀n nɔn.

⁴⁶È sɩ̀ kù mɛ̀n ɛnzhì ɛnkruemɛ̀n; nɛ tɛn nɛ̀n kú mɛ̀n ɛnshibán annan wú.

⁴⁷Hɩle krukú de mɛ dɔ́ mɛ́n le: ɛcüɛ̀n vri léyi nɛ̀n ẅɛn m'ɛwú nɔn, hán tán kɩ n'ɛgbàn bobrebe hɔ̀n lɔ fɛn bɩ́ ce nɛ̀n. Tɛ́n ɔwrɔn léyi ye bɩ́ ɛgban ẅiɛ ye ce nɔn, nɛ́n mán nɛ ẅɛn ɛcüɛ̀n ẅiɛ.”

⁴⁸Zhezü kɛ dɔ́ ɛnnyɔnwrɔn lɔ le: “V'ɛgbàn hɔ̀n lɔ bɩ́ ce mɛ́n.”

⁴⁹Anwrɔn hɔ̀n léyi yɔ mɛhi yɔ yɛ́ ɛci-zî tɛbrɛ̀ wúɛ nɔn, kɛ dɔ́ y'ɛmɛ̀ntɛ̀ mɛ̀n le: “Antɔ́n dú ɔwrɔn ndɔ lɔ hɩ kɛ ẅɛn ɛgbàn-bɩ́-ce kɔrɛ̀-levri nɛ́n?”

⁵⁰Kɩ Zhezü kɛ dɔ́ ɛnnyɔnwrɔn lɔ le: “V'ankàẅì-bùtan lɔ bɩ́ mɛ́n die: ɛ̀ hɔ́n anwɔwɔ mɛ̀n.”