Read Alladian Zhan 10 Bible Online

Zhan 10 - Alladian bible

Zhan 10

¹“Mɛ dɔ́ nyɛ̀n annanwɔrɛmɛ̀n le: ɔwrɔn léyi ke sɩ́ ci annɔ̀n-kɔ̀ gbàtà, hɩ kɛ ká ɔkɔ̀ ke bru annɔ̀n-kɔ̀ mɛ̀n nɔn, ɔwrɔn ndɔ lɔ nɛ̀n dú ɛci-yerɛ-wrɔn mán ɛci-gbangbàn-hán-wrɔn.

²Tɛ́n ɔwrɔn léyi ke cí angbàtà ke bru annɔ̀n-kɔ̀ mɛ̀n nɔn, nɛ̀n dú annɔ̀n-kua-wrɔn.

³Ɛyri-nan-wrɔn ke srú nɛ̀n esù kɩ kɔ̀kɔ̀sɛ̀ hɔ̀n kɛ yá n'esùva. Ne bi nɛ́n kɔ̀kɔ̀sɛ̀ hɔ̀n lɔ nzri zri y'ebɩ́ kɩ ne sɩ́ yɔ ɛntrɛ.

⁴Ɛnvra léyi nɛ̀n sɩ́ yɔ lɔ fɛn ɛntrɛ nɔn, nɛ nán esù y'ezìwú kɩ kɔ̀kɔ̀sɛ̀ hɔ́n lɔ kɛ kɛ́n nɛ̀n ɛsɛ̀n, ɔmuhi yɔ nyrí n'esùva lɔ nɔn.

⁵Kɔ̀kɔ̀sɛ̀ hɔ̀n lɔ ke sɩ́ kɛ́n ɔwrɔn léyi yɔ sɩ̀ nyrìɛn nɔn ɛsɛ̀n; tɛ́n yɔ lɛ srɛ́ teze nɛ̀n esù she, ɔmuhi yɔ sì nyrì n'esùva nɔn.”

⁶Zhezü kɛ dɔ́ yɔ nyandrɛn ndɔ lɔ mɛ̀n ankà, tɛ́n yɔ sɩ́ yá ankà léyi nɛ dɔ́ yɔ nɔn.

⁷Zhezü vru kɛ dɔ̀ le: “Hɛ̀ɛ̀, mɛ dɔ́ nyɛ̀n annanwɔrɛ mɛ̀n le: mɛ̀n dú kɔ̀kɔ̀sɛ̀-kɔ̀ gbàtà.

⁸Anwrɔn hɔ̀n léyi hɛ́ m'ezì nɔn dú ɛci-yerɛ-bɔ̀ mán eci-gbangbàn-hán-bɔ̀; tɛ́n kɔ̀kɔ̀sɛ̀ hɔ̀n lɔ kè sɩ̀ die yɔ nukùɛ.

⁹Mɛ̀n dú esù-gbàtà. Ɔwrɔn léyi ke ci m'ɛnlevri lɔ nɔn kɛ lɛ cɔ́ ebɩ̀die; ne le bru anwɔn mɛ̀n kɩ nɛ lɛ srɔ ɛntrɛ, kɩ nɛ lɛ cɔ́ n'ɛci-zî.

¹⁰Ɛci-yerɛ-wrɔn kɛ và kè yerɛ ɛci, kè wri ɔwrɔn ô kɛ̀ jrɛ́ ɛci. Mɛ tɛn, mɛ́n và ô anwrɔnẅì kɛ̀ cɔ́ ɛwúvà-kɔrɛ̀, kɛ̀ cɔ́ nɛ̀n kɛ̀ fɔ́n yɔ.

¹¹Mɛ̀n dú annɔ̀n-kua-wrɔn ankrankran. Annɔ̀n-kua-wrɔn ankrankran lɔ, ne wú nɛ́n kɔ̀kɔ̀sɛ̀ hɔ̀n kruhú.

¹²Ɔwrɔn léyi kɛ hán ɔkùa kɔ̀hɔ̀n kɩ, hɩ kè sɩ̀ dù annɔ̀n-kua-wrɔn, kɩ annɔ̀n hɔ̀n léyi nɛ kùa nɔn, ke sɩ̀ dù nɛ tɛn, nɛ srɛ́ teze annɔ̀n hɔ̀n lɔ, ɛnvra léyi ovú-lɛ̀tù kɛ và nɔn, kɛ hán tán kɩ ovú-lɛ̀tù kɛ ẅɛn yɔ, ke bonyí yɔ.

¹³Ɔwrɔn lɔ kɛ srɛ́, ɔmuhi ɔkùa kruhú de nɛ hán ɔkɔhɔ̀n nɔn, nɛ́n sɩ́ tro kɔ̀kɔ̀sɛ̀ hɔ̀n lɔ y'ankà.

¹⁴Mɛ̀n dú annɔ̀n-kua-wrɔn ankrankran. Ɔmu zri léyi Dade nyri mɛ̀n nɔn, hɩ mɛ̀n mán mɛ̀n nyri Dade nɔn, ɔmu zri lɔ mɛ̀n nyri mɛ́n kɔ̀kɔ̀sɛ̀ hɔ̀n, kɩ mɛ́n kɔ̀kɔ̀sɛ̀ hɔ̀n mán nyri mɛ̀n. Kɩ me bɩ́ m'ɛwúvà mɛ tán mɛ́n kɔ̀kɔ̀sɛ̀ hɔ̀n lɔ.

¹⁶Mɛ̀n vru mɛ̀n ẅɛn kɔ̀kɔ̀sɛ̀ ndɔ hɔ̀n ndù, ke sɩ̀ dù ɔkɔ̀ ndɔ lɔ mɛ̀n. Ke ji le yɔ mán mɛ̀n kùa yɔ; yɔ lɛ die mɛ̀n nukùɛ, kɩ yɔ lɛ srɔ kɔ̀kɔ̀sɛ̀-kà zri kɩ yɔ lɛ ẅɛn ɔnɔ̀n-kua-wrɔn zri.

¹⁷Dade Ɔwɔ kɛ cüɛn mɛ̀n, ɔmuhi mɛ tán m'ɛwúvà lɔ, ô mɛ̀n sàn cɔ́ ɛwúvà wrù nɔn.

¹⁸Ɔwrɔn zriɛmɛ́n ke sɩ̀ bɩ́ m'ɛwúvà lɔ kɛ sɔhɔ́, tɛ́n m'ɛnbɔrɛ ankrànkràn mɛ̀n de mɛ tán nɛ̀n nɔn. Mɛ̀n ẅɛn ɛkɔrɛ̀srɔn mɛ lɛ tán nɛ̀n, kɩ mɛ̀n vru mɛ̀n ẅɛn ɛkɔrɛ̀srɔn me le vru mɛ̀n sàn cɔ́ nɛ̀n ewrù. Ndɔ lɔ de Dade wá tán mɛ̀n, ô mɛ̀n hán nɔn.”

¹⁹Zhüifɛ̀n-bɔ̀ vru sán sɔ́n-vɔyan y'edomɛ̀n ankà-dɔ̀ ndɔ lɔ kruhú.

²⁰Y'ɛmɛ̀n lɔ bobrebe kɛ dɔ̀ le: “Ɛnhɛ́n gbangbàn dú nɛ̀n edomɛ̀n! Nmù kɛ hán nɛ̀n! Cɛci kruhú kɛ nye die nɛ̀n nukùɛ nɛ̀n?”

²¹Anwrɔn ndɔ hɔ̀n kɛ dɔ̀ le: “Ɔwrɔn léyi ɛnhɛ́n gbangbàn dú edomɛ̀n nɔn, ke sɩ́ dɔ́ ankà ɔmu lɔ. Ɛnhɛ́n gbangbàn kɛ lɛ hán anvɛ̀-bɔyɛ-bɔ̀ kɛ̀ kán ɛyri tɛ̀a?”

²²Ɛshɛ̀ vra Zherüzalɛmɛ̀n anmàn lɔ, yɛ koran Ɔwɔ-wɔn nyanmán-bì.

²³Zhezü kɛ nán esù, kɛ hɔ̀n, kɛ và, Salomɔn cice-Wɔ-wɔn levri léyi ẅɛn ɛnhi-nanbù nɔn mɛ̀n.

²⁴Zhüifɛ̀n-bɔ̀ borɛ y'edomɛ̀n ɛkru n'ɛtɛsɛ̀n, zɛtɛn kɛ dɔ́ nɛ̀n le: “Ɛnvra ɛbɛ de ɛ lɛ hán bɔ̀ bɔ́ dú ankà-tro anhyrɛ̀ ẅɛn mɛ̀n nɛ́n? Ke dú kɛ è dù Ebɩ̀die-wrɔn hô, ɛ̀ dɔ́ bɔ̀ kpétémɛ̀n bɔ̀ nyrì.”

²⁵Zhezü mrɛ́n yɔ ɔmùan le: “Mɛ́n gɔ̀ dɔ́ nyɛ̀n, tɛ́n nyɛ́n sɩ̀ bù m'ankà nyɛ́n tán ankaẅì. Ɛci hɔ̀n léyi mɛ hán Dade bɩmɛ̀n nɔn, ke di mɛ̀n dalɛfuɛ.

²⁶Tɛ́n nyɛ́n sɩ́ bútan ankaẅì, ɔmuhi nyɛ́n sɩ̀ dù mɛ́n kɔ̀kɔ̀sɛ̀ hɔ̀n lɔ mɛ̀n nɔn.

²⁷Mɛ́n kɔ̀kɔ̀sɛ̀ hɔ̀n lɔ ke die m'esùva lɔ nukùɛ; mɛ̀n nyri yɔ kɩ yɔ kɛ́n mɛ̀n ɛsɛ̀n.

²⁸Mɛ tán yɔ ɛwùvá léyi ke sɩ́ trɔa nɔn, yɔ sɩ̀ wú mrìmrì kɩ ɔwrɔn zriɛmɛ́n ke sɩ̀ bɩ́ yɔ m'antamɛ̀n kɛ̀ sɔhɔ́ rɔ́.

²⁹Eci léyi Dade tán mɛ̀n nɔn, sevri vrán eci lɔ fɛn kɩ ɔwrɔn zriɛmɛ́n ke sɩ̀ bɩ́ eci zriɛmɛ́n Dade tamɛ̀n kɛ sɔhɔ́ rɔ́.

³⁰Mɛ̀n mán Dade mɛhi bɔ́ dú eci zri.”

³¹Zhüifɛ̀n-bɔ̀ vru bɩ́ ɛbù ô kɛ̀ srɔan nɛ̀n.

³²Zɛtɛn Zhezü kɛ dɔ́ yɔ le: “Mɛ̀n hán ny'ezìwú ɔkɔ̀hɔ̀n ankrànkràn brobrebe Dade kɔrɛ̀srɔn mɛ̀n. Ɔkɔ̀hɔ̀n hɔ̀n léyi mɛ̀n hán nɔn, tɛtan hɔ̀n de, yɔ kruhú nye ji nyɛ́n wri mɛ̀n ɛbùemɛ̀n nɛ́n?”

³³Zhüifɛ̀n-bɔ̀ mrɛ́n nɛ̀n ɔmùan le: “Bɔ́ sɩ́ ji bɔ̀ wri mɛ́n ebùemɛ̀n ɔkɔ̀hɔ̀n ankrankran kruhú, tɛ́n ɔmuhi ɛ dɔ́ ankà gbangbàn ku Ɔwɔ ɛwú nɔn: ɔwrɔnẅì kɩ dú mɛ́n, kɩ e ji è bɩ́ v'edomɛ̀n ɛ̀ srɔ Ɔwɔ!”

³⁴Zhezü mrɛ́n ɔmùan le: “Ye merɛ́n ny'ɛnyanmàn lɔ mɛ̀n le, Ɔwɔ dɔ̀ le: ‘Nyɛ́n dú anwɔ hɔ̀n’.

³⁵Bɔ́ nyri ɔmu le ye sɩ̀ gbú ankà hɔ̀nléyi Owrú Prɔnprɔn merɛ́n nɔn yɛ sɔhɔ́ rɔ́. Anwrɔn hɔ̀n léyi Ɔwɔ ankà-dɔ̀ kɛ hɔ́n cɔ̀ nɔn, yɔ lɔ, Ɔwɔ ke bi yɔ ‘anwɔ’.

³⁶Kɩ mɛ tɛn, Ɔwɔ mrɛ́n mɛ̀n nbɩ kɩ wá mɛ̀n ɔkɔhɔ̀n ɛnhibù wú. Anwɔntan de nyɛ lɛ dɔ̀ le, mɛ dɔ́ ankà gbangbàn ku Ɔwɔ ɛwú, ɔmuhi mɛ́n dɔ̀ le, mɛ̀n dú Ɔwɔ Ẅì nɛ́n?

³⁷Ke dú kɛ mɛ́n sɩ́ hán Dade kɔhɔ̀n hô, nyɛ́n bú m'ankà nyɛ́n tán ankaẅì.

³⁸Tɛ́n ke dú kɛ mɛ hán ɔkɔhɔ̀n lɔ, ɔmu tɛ̀kɩ nyɛ́n sɩ́ bú m'ankà nyɛ́n tán ankaẅì, hɩ mán hô, m'ɔkɔ̀hɔ̀n léyi mɛ̀n hán nɔn, nyɛ́n bùtan ankaẅì, ô nyɛ́n nyrí ɛnvra lɔ fɛn le, Dade dú mɛ̀n ɛmɛ̀n kɩ mɛ̀n mán mɛ̀n dú Dade ɛmɛ̀n.”

³⁹Yɔ vru yɔ ji ɛyri ô yɔ ẅɛn nɛ̀n, kɩ nɛ̀n di yɔ anta.

⁴⁰Zhezü vru hɔ́n ɛnshi mɛẅi, Zhurdɛn shi mùan, ɛyri léyi Zhan wá anwrɔn ɛnshi ɛnkru kpàkpà mɛ̀n nɔn, kɩ nɛ̀n yɛ́ nanvrɛn lɔ.

⁴¹Anwrɔn bobrebe ji nɛ̀n nvà. Yɔ dɔ̀ le: “Zhan ke sɩ́ hán anvɛmɛ̀n-frɛ́n-ci zriɛmɛ́n, tɛ́n ankà lɔ fɛn léyi nɛ dɔ́ ɔwrɔn ndɔ lɔ wú nɔn, dú annanwɔrɛ.”

⁴²Kɩ nanvrɛn lɔ, bobrebe bú Zhezü ankà tán ankaẅì.