Read Alladian Zhan 12 Bible Online

Zhan 12 - Alladian bible

Zhan 12

¹Rɔ́ ɛbi-ɛwole yɛ lɛ nyanmán abutùkumɛ́n-kɔ́ koran bì lɔ, kɩ Zhezü hɔ́n Betani anmàn, ɛyri léyi Lazarɛ̀n ndù; Lazarɛ̀n dú ɔwrɔn léyi nɛ̀n frɔ́ nɔn.

²Nanvrɛn lɔ yɛ tán nɛ̀n ɛci, kɩ Martɛ̀n de kɛ nyan ɛci-zî ankà lɔ nɔn. Lazarɛ̀n mán dú yɔ mɛ̀n tɛbrɛ̀ wú ɛci-zîemɛ̀n yɔ mán Zhezü mɛhi.

³Mari bɩ́ anhàn shishi shi-bán bɔdɛ̀ cá, ku Zhezü annan wú, zɛtɛn bɩ́ ɛnkruẅie wɔrɛn. Ɛnshi-ban dɔ̀, bɩ́ ɔwɔ́n mumù lɔ fɛn.

⁴Zhezü sɛnkɛn-bɔ̀ lɔ ɔtɔ̀n, Zhüda Iskariɔtɛ̀n, nɛ́n de nɛ lɛ hɛ́ Zhezü nɔn; zɛtɛn nɛ dɔ̀ le:

⁵“Cɛci kruhú kɛ ye sɩ̀ hɛ̀ ɛnshi-bán ndɔ lɔ angbɛ́n ɛkoẅi-ɛvà-ɛnrì, ô ye bɩ́ ɔkùa lɔ yɛ tán ɛmian-bɔ̀a?”

⁶Kè sɩ̀ dù ɛmian-bɔ̀ kruhú de nɛ dɔ́ ankà ndɔ lɔ nɔn, tɛ́n ɔmuhi nɛ̀n dú ɛci-yerɛ-wrɔn nɔn; ɔkùa léyi yɛ tán nɛ̀n nɛ̀n hɛ́n nɔn, ne bɩ́ srɔ nɛ tɛn.

⁷Tɛ́n Zhezü kɛ dɔ̀ le: “Teze nɛ̀n sɔhɔ! Nɛ̀n hán eci ndɔ lɔ kè dù tán ɛnvra léyi yɛ lɛ wá mɛ̀n ezhe nanmàn mɛ̀n nɔn.

⁸Nyɛ lɛ ẅɛn ɛmian-bɔ̀ ke le dú nyɛ̀n ɛmɛ̀n ɛnvra lɔ fɛn, tɛ́n mɛ tɛn, mɛ́n sɩ̀ dú nyɛ̀n ɛmɛ̀n ɛnvra lɔ fɛn.”

⁹Zhüifɛ̀n-bɔ̀ fɛcüè bobrebe yá le Zhezü dú Betani anmàn. Kɩ yɔ hɔ́n nanvrɛn anmàn, tɛ́n kè sɩ̀ dù Zhezü zri kruhú; Lazarɛ̀n léyi Zhezü hán dú owúemɛ̀n frɔ́ nɔn, de yɔ hɔ̀n yɔ nyan nɔn.

¹⁰Ɔwɔ-cice-bɔ̀ cüìcüì hɔ̀n wá le ye wri Lazarɛ̀n mán,

¹¹ɔmuhi n'ɛkruhú Zhüifɛ̀n-bɔ̀ bobrebe cɔhɔ́ yɔ fɛcüè lɔ mɛ̀n kɩ ke bú Zhezü ankà kɛ tán ankaẅì nɔn.

¹²Ɛcɛ̀n cüe, fɛcüè bobrebe léyi vá abutùkumɛ́n-kɔ́ nyanmán-bì koran lɔ mɛ̀n nɔn, yá le Zhezü kɛ vá Zherüzalɛmɛ̀n anmàn.

¹³Anwrɔn bɩ́ ɛnnangbàn kɔrɛ̀ kɩ srɔ ɛntrɛ hɔ́n Zhezü ɛsù; Yɔ dí bobo yɔ dɔ̀ le: “Eci-zrɔ kè dú Ɔwɔ tɛn! Ɔwɔ kè fú ɔwrɔn léyi kɛ và nɔn ɛnshi ɛẅɛnwrɔn bɩmɛ̀n! Ɔwɔ kè fú Izraɛlɛ̀n nɛncüì lɔ ɛnshi!”

¹⁴Zhezü cɔ́ frimu tɔ̀n kɩ yɛ́ ɛwuɛ hán ɔmu le Owrú Prɔnprɔn ndɔ̀ nɔn hɔ́:

¹⁵“Ɛnjansù ke bɩ́ ẅɛn mɛ́n Siɔn fɛcüè (Zherüzalɛmɛ̀n fɛcüè)! Crɛ̀ nyan, v'ɛnnɛncüì lɔ kɛ và, nɛ̀n yɛ́ frimu ẅì wúɛ.”

¹⁶Zhezü sɛnkɛn-bɔ̀ lɔ ke sɩ́ nyrí eci léyi kɛ wɔɛ̀n nɔn hɩ mɛ̀n; tɛ́n ɛnvra léyi ye sɩ́ Zhezü ɛwú ɛci-zrɔ mɛ̀n nɔn, bru yɔ le Owrú Prɔnprɔn dɔ́ ankà ndɔ lɔ n'ɛwú, kɩ ankà léyi yɛ dɔ́ n'ɛwú nɔn sá nmù.

¹⁷Anwrɔn hɔ̀n léyi dú Zhezü ɛtɛsɛ̀n ɛnvra léyi nɛ̀n hán Lazarɛ̀n dú owú-bɔ̀ mɛ̀n vá ɔkɔrɛ-bɔ̀ mɛ̀n nɔn, kɛ dɔ́ eci léyi yɔ kàn nɔn yi ankà.

¹⁸Hɩ le kruhú de fɛcüè hɔ́n nɛ̀n ɛsù: anwrɔn yá le nɛ̀n hán anvɛmɛ̀n-frɛ́n-ci ndɔ lɔ.

¹⁹Ɔwɔ-nyanmàn-sùva-wá-bɔ̀ zɛtɛn kɛ dɔ́ y'edomɛ̀n le: “Nyɛ kán ɔmu le nyɛ́n sɩ̀ hán eci zriɛmɛ́n rɔ́; anwrɔn lɔ fɛn dú nɛ̀n ɛmɛẅi!”

²⁰Grɛkɛ̀n-bɔ̀ jan dú anwrɔn hɔ̀n léyi vá Zherüzalɛmɛ̀n anmàn Ɔwɔ-sɛ́n-yri, ɔkoran bì lɔ mɛ̀n nɔn.

²¹Yɔ sɔnba Filipɛ̀n ɛtɛsɛ̀n, (nɛ́n léyi nɛ̀n dú Bɛtsahida, Galile kpɔsɔ wú anmàn wrɔn nɔn), kɩ yɔ dɔ́ nɛ̀n le: “Brɛ̀su, bɔ́ ji bɔ̀ kán Zhezü.”

²²Filipɛ̀n hɔ́n dɔ́ andre, kɩ yɔ, anwrɔn anhyrɛ̀ lɔ yɔ hɔ́n dɔ́ Zhezü.

²³Zhezü mrɛ́n yɔ ɔmùan le: “Zɛtɛ̀ lɔ ɛnvra cɔ̀a; ɔwrɔnẅì Ẅì ke le bru n'eci-zrɔ lɔ mɛ̀n.

²⁴Mɛ dɔ́ nyɛ̀n annanwɔrɛ mɛ̀n le: dùdu ẅì ke le dú dùdu ẅì zri, ke dú kɛ ye sɩ̀ wá nɛ̀n ɛnhibɩ́ nɛ̀n wùɛ. Tɛ́n, ɛnvra léyi ne dì nɔn, ne shi ɛẅì bobrebe.

²⁵Ɔwrɔn léyi kɛ cüɛn n'ɛnhibù wú wúvà lɔ nɔn, kɛ lɛ zrɛ́n nɛ̀n, tɛ́n ɔwrɔn léyi kɛ kɔrɔ ɛnu ɛnhibù wú ci-gbrɛ́n-ci hɔ̀n lɔ nɔn, nɛ lɛ cɔ́ anhɔbɩ́ wúvà léyi ke sɩ́ trɔa nɔn.

²⁶Ke dú kɛ ɔwrɔn tɔ̀n ke ji kɛ̀ srɔ m'eci-bɩ̀tan-wrɔn hô, ke ji le nɛ̀n kɛ́n mɛ̀n ɛsɛ̀n; ɔmu lɔ de m'eci-bɩ̀tan-wrɔn ke le dú ɛyri léyi mɛ́n dù nɔn mán. Dade kɛ lɛ cüɛ́n ɔwrɔn léyi dú m'eci-bɩ̀tan-wrɔn nɔn.”

²⁷“Zɛtɛ̀ lɔ m'ɛnborɛ dú gbɔ̀gbɔ̀ mɛ̀n. Kɩ ankà tán de mɛ lɛ dɔ́ nɛ́n? Mɛ lɛ dɔ̀ le: Dade ɛ̀ mrɛ́n mɛ̀n wacɛ̀n ndɔ lɔ granmɛ̀n gbànkàn lɔ mɛ̀n ɛ̀ sɔhɔ́a? Tɛ́n hɩ le kruhú de mɛ́n và, ô mɛ̀n dú ɛgbànkán mɛ̀n wacɛ̀n ndɔ lɔ granmɛ̀n.

²⁸Dade, ɛ̀ tán v'ebɩ́ lɔ eci-zrɔ!” Zɛtɛn esùva tɔ̀n dú anhobɩ́ di nkù kɛ dɔ̀ le: “Mɛ̀n gɔ̀ hɛ́ ezì mɛ̀n zrɔ nɛ̀n eci, kɩ me le vru mɛ̀n sán zrɔ nɛ̀n eci.”

²⁹Fɛcüè léyi nyɔn nanvrɛn lɔ, hɩ yá esùva lɔ nɔn, kɛ dɔ̀ le: “Ɛwú de dí nkù nɔn!” Ndɔ hɔ̀n kɛ dɔ̀ le: “Ɔwɔ-kùyüre-wrɔn tɔ̀n de dɔ́ nɛ̀n ankà nɔn!”

³⁰Tɛ́n Zhezü kɛ dɔ́ yɔ le: “Ke sɩ̀ dù m'ɛkruhú de esùva ndɔ lɔ kɛ di nkù nɔn, tɛ́n ny'ɛkruhú.

³¹Zɛtɛ̀ lɔ ɛnvra ndɔ lɔ mɛ̀n, de ye le ci ɛnhibù ɛmrɛ̀n nɔn; zɛtɛ̀ lɔ de yɛ lɛ wrɔ́ ɛnhibù ndɔ lɔ n'ɛnnɛncüì lɔ nɔn.

³²Kɩ mɛ tɛn, ɛnvra léyi ye le dú ɛnu-hi ye sɩ́ mɛ̀n ɛwú nɔn, mɛ lɛ wán anwrɔn lɔ fɛn mɛ̀n sɩ́ ɛtɛ̀sɛ̀n.”

³³Ankà-dɔ̀ ndɔ lɔ wú Zhezü ke yé yɔ ɔmu le nɛ lɛ hán nɛ̀n wù nɔn.

³⁴Fɛcüè mrɛ́n nɛ̀n ɔmùan le: “Bɔ́ ɛnyanmàn wrú lɔ mɛ̀n bɔ̀ yá yɛ dɔ̀ le, Ebɩ̀die-wrɔn ke le dú ɛwúvà mɛ̀n ɛnvra lɔ fɛn. Zɛtɛn, cɛci kruhú kɛ ɛ dɔ̀ le, ye le sɩ́ ɔwrɔnẅì Ẅì ɛwúɛ? Antɔn wrɔn dú ɔwrɔnẅì Ẅì ndɔ lɔa?”

³⁵Zhezü kɛ dɔ́ yɔ le: “Ɛyri-kàn vru dú nyɛ̀n ɛmɛ̀n, tɛ́n ne le dú ɛnvra cá mɛ̀n. Nyɛ́n nán esù, ɛnvra ɔmu lɔ, hɩ nyɛ́n dú ɛyri-kán mɛ̀n nɔn, ô ɛyri yɔwɔ ke bɩ́ ẅɛn nyɛ̀n nmù, ɔmuhi ɔwrɔn léyi kɛ nán esù ɛyri yɔwɔ mɛ̀n nɔn, nɛ́n sɩ́ nyri ɛyrí léyi nɛ hɔ̀n nɔn.

³⁶Nyɛ́n bú ɛyri-kán ankà nyɛ́n tán ankaẅì, ɛnvra ɔmu lɔ, hɩ nɛ̀n dú nyɛ̀n ɛmɛ̀n nɔn, ô nyɛ́n srɔ ɛyri-kán ẅì hɔ̀n.” Ɛnvra léyi nɛ̀n dɔ́ ankà ndɔ hɔ̀n lɔ trɔ nɔ̀n, Zhezü hɔ́n esù she bán.

³⁷Anvɛmɛ̀n-frɛ́n-ci bobrebe hɔ̀n léyi Zhezü hán y'ezìwú nɔn, ɔmu tɛ̀kɩ yɔ sɩ́ bú n'ankà yɔ tán ankaẅì.

³⁸Ɔmu lɔ de ankà léyi Ɔwɔ-mùanwú-ankà-dɔ́-wrɔn Ezahi dɔ̀ nɔn sá nmù: “Ɛẅɛnwrɔn, antɔn de bú bɔ́ ankà-dɔ̀ lɔ tán ankaẅì nɛ́n? Antɔn de Ɛẅɛmwrɔn hán tán nyri n'ankà-dɔ̀ lɔ nɛ́n?”

³⁹Yɔ sɩ̀ bùtan ankaẅì rɔ́, ɔmuhi Ezahi vru dɔ̀ le:

⁴⁰“Ɔwɔ bɔyɛ y'anvɛ̀ lɔ, kɩ nɛ̀n sɛ́n y'ɛnkruemɛ̀n-ẅɛ̀n lɔ esù, ô y'anvɛ̀ lɔ ke bɩ́ kán ɛyri, ô y'ɛnkruemɛ̀n-ẅɛ̀n lɔ ke bɩ́ cɔ́ nyriɛn. Kɩ nyàn eci le kruhú Ɔwɔ dɔ̀ le, yɔ bɩ́ crɛ ezì yɔ kɛ́n mɛ̀n ô mɛ́n kɔrɛ yɔ.”

⁴¹Ezahi dɔ́ ankà ndɔ lɔ, ɔmuhi nɛ́n gɔ̀ kán Zhezü ci-zrɔ lɔ, kɩ nɛ̀n dɔ́ yi ànkà.

⁴²Ɔmu tɛ̀kɩ Zhüifɛ̀n-bɔ̀ cüìcüì hɔ̀n lɔ, yɔ dùku mán, anwrɔn bobrebe bú Zhezü ankà tán ankaẅì. Tɛ́n, Ɔwɔ-nyanmàn-sùva-wá-bɔ̀ kruhú de yɔ sɩ́ dɔ́ yɔ sɩ́ ɛwú, ô ye bɩ́ wrɔ́ yɔ Ɔwɔ-sɛ́n wɔn lɔ mɛ̀n.

⁴³Yɔ cüɛn anwrɔnẅì ankà-dɔ̀ bɩ vrán hɩ le dú Ɔwɔ yri kɛ và nɔn.

⁴⁴Zhezü sɩ́ ɔmùan ɛwú kɛ dɔ̀ le: “Ɔwrɔn léyi ke bú m'ankà kɛ tán ankaẅì nɔn, annànwɔrɛ mɛ̀n lɔ, kè sɩ̀ dù mɛ́n zri kɩ nɛ́n bú m'ankà nɛ́n tán ankaẅì, tɛ́n ɔwrɔn léyi wá mɛ̀n ɔkɔhɔ̀n nɔn mán.

⁴⁵Ɔwrɔn léyi kɛ kán mɛ̀n nɔn, kɛ kán ɔwrɔn léyi wá mɛ̀n ɔkɔhɔ̀n nɔn mán.

⁴⁶Mɛ tɛn mɛ̀n vá ɛnhibù wú hán ɛyrikàn hɔ́, ô ɔwrɔn totɔtɔ̀n léyi ke bú m'ankà kɛ tán ankaẅì nɔn ke bɩ́ dú ɛyri yɔwɔ mɛ̀n.

⁴⁷Ke dú kɛ ɔwrɔn tɔ̀n kɛ yá m'ankà-dɔ̀ kɩ ke sɩ́ ẅɛn n'ɔwá, kè sɩ̀ dù mɛ̀n de mɛ́n bɔ́ nɛ̀n nwù nɔn, ɔmuhi mɛ̀n vá ɛnhibù wú anwrɔn bɩ̀die kruhú, kɩ mɛ̀n sɩ̀ vá nɛ̀n nwù-bɔ́-yri.

⁴⁸Ɔwrɔn léyi kɛ kɔ́n mɛ̀n die, hɩ ke sɩ́ ẅɛn m'ankà-dɔ̀ kɛ hɛ́n hán, kɛ cɔ́ nanvrɛn lɔ, nɛ́n nwù-bɔ̀: ankà-yé léyi mɛ̀n tán nɔn de kɛ lɛ bɔ́ nɛ̀n nwù ɛmɛẅi-trɔ bì lɔ nɔn.

⁴⁹Ɔmuhi, mɛ́n sɩ́ dɔ́ ankà mɛ́n zri m'ɛkɔrɛ̀-levriemɛ̀n, tɛ́n Dade léyi wá mɛ̀n ɔkɔhɔ̀n nɔn, wá tán mɛ̀n nɛ́n dùkù, ankà léyi ke ji le mɛ̀n dɔ̀, ô mɛ̀n yé nɔn.

⁵⁰Kɩ mɛ̀n nyrí ɔmu le eci léyi nɛ wá tán nɔn, ke shí ɛwúvà léyi ke sɩ́ trɔa nɔn. Ɔmu lɔ de ankà léyi mɛ dɔ̀ nɔn, mɛ dɔ́ nɛ̀n kɛ hán ɔmu le Dade wá tán mɛ̀n nɔn.”