Read Alladian Zhan 13 Bible Online

Zhan 13 - Alladian bible

Zhan 13

¹Ye dú ɛnyanmán-bì vra bì mɛ̀n, ô yɛ koran abutùkumɛ́n-kɔ́ nyanmán-bì. Zhezü nyri ɔmu le ɛnvra léyi ne le bɩ nɛ̀n hɔ̀n cɔ́ nɛ́n zi Ɔwɔ nɔn ncɔa. Nɛ̀n cüɛn n'anwrɔn hɔ̀n léyi dú ɛnhibù wú nɔn kɩ nɛ̀n cüɛn yɔ ɛnvra lɔ fɛn, kɩ nɛ̀n dú yɔ ɛcƐɛn mɛ̀n hàn kɩ ɔtrɔmɛ̀n.

²Zhezü mán n'ɛsɛnkɛn-bɔ̀ mɛhi ke zî ɔwɔɛ ci. Anwa-wrɔn gɔ́ ci Zhüda, Simɔn Iskariɔtɛ̀n ẅì, ɛnbɔrɛmɛ̀n ô kɛ̀ hɛ́ Zhezü.

³Zhezü dùkú mán nyri ɔmu le Ɔwɔ yri de nɛ́n dù nɛ và nɔn, kɩ ne le vru nɛ̀n hɔ́n Ɔwɔ yri, kɩ Ɔwɔ wá ɛci lɔ fɛn n'ɛkɔrɛ̀srɔn wú.

⁴Zhezü dú ɛci-zî tɛbrɛ̀ wú tɔhú, mrɛ́n n'ɛwú ceci lɔ sɔhɔ́ kɩ bɩ́ ɛcàsa mú ɛẅiè.

⁵Zɛtɛn nɛ̀n kú ɛnshi *cɛnzɛ̀n mɛ̀n kɩ nɛ̀n bukru ne jru n'ɛsɛ̀nkɛn-bɔ̀ annan, kɩ ne bɩ́ ɛcàsa léyi nɛ̀n mú ɛẅiè nɔn ne wurɛn yɔ annan.

⁶Annan-jru kɛ́n Simɔn Piɛrɛ̀n, kɩ Piɛrɛ̀n kɛ dɔ́ nɛ̀n le: “Ɛẅɛmwrɔn, vɛ́n de e le jru mɛ̀n annan nɛ́n?”

⁷Zhezü mrɛ́n nɛ̀n ɔmùan le: “E sɩ̀ nyrì eci léyi mɛ hán zɛtɛ̀ lɔ nɔn, tɛ́n ɛnvra dú ezì kɛ và e le nyrì.”

⁸Piɛrɛ̀n kɛ dɔ́ nɛ̀n le: “Mɛ̀n krɔ, e sì jru mɛ̀n annan mrìmrì!” Zhezü mrɛ́n nɛ̀n ɔmùan le: “Ke dú kɛ mɛ̀n sɩ̀ jrù mɛ́n annan, e sɩ̀ vru cɔ́ eci zriɛmɛ́n m'antamɛ̀n.”

⁹Simɔn Piɛrɛ̀n kɛ dɔ́ nɛ̀n le: “Ke dú ɔmu lɔ hô, Ɛẅɛnwrɔn, e bɩ́ jru mɛ̀n annan tɛ̀kɩ, tɛ́n è jru mɛ̀n ankorɛ̀ mán ɛnkru!”

¹⁰Zhezü kɛ dɔ́ nɛ̀n le: “Ɔwrɔn léyi jrɔ́ ɛnshi nɔn, ke sɩ̀ vru jrɔ́ ɛnshiɛ, tɛ́n annan tɛ̀kɩ, ɔmuhi edomɛ̀n fi nɛ̀n ɛyri lɔ fɛn nɔn. Edomɛ̀n fi nyɛ̀n, tɛ́n ke sɩ̀ dù nyɛ lɛ fɛn.”

¹¹Zhezü nyri ɔwrɔn léyi kɛ lɛ hɛ́ nɛ̀n nɔn; hɩ le kruhú de nɛ dɔ̀ le: “Kè sì dù nyɛ lɛ fɛn lɔ de edomɛ̀n kè fi nyɛ̀n nɔn.”

¹²Ɛnvra léyi Zhezü jru yɔ annan trɔ nɔn, nɛ̀n bɩ́ ɛceci nɛ́n cɔ̀ kɩ nɛ̀n vru nɛ́n và yɛ́ ɛci-zî tɛbrɛ̀ wú kɩ nɛ dɔ́ yɔ le: “Eci léyi mɛ̀n hán nyɛ̀n nɔn, nyɛ́n nyrí n'ɛmɛ̀n hàn?

¹³Nye bi mɛ̀n “Ankà-yé-wrɔn” mán “Ɛẅɛnwrɔn” kɩ ny'ankà zrɔ, ɔmuhi mɛ̀n dú Ankà-yé-wrɔn mán Ɛẅɛnwrɔn nɔn.

¹⁴Ke dú kɛ mɛ̀n, Ɛẅɛnwrɔn mán Ankà-yé-wrɔn, mɛ̀n jru nyɛ̀n annan hô, ke ji le nyɛ́n mán nyɛ́n jru ny'edomɛ̀n annan. (Me bɩ́ ɛgbàn me ce nyɛ̀n, ke ji le nyɛ́n mán nyɛ́n bɩ́ ɛgbàn nyɛ́n ce ny'edomɛ̀n.)

¹⁵Mɛ̀n tán nyɛ̀n sɛnpò tɔ̀n, ô nyɛ́n mán nyɛ́n hán eci léyi mɛ̀n hán nyɛ̀n nɔn.

¹⁶Mɛ dɔ́ nyɛ̀n annanwɔrɛ mɛ̀n le: eci-bɩ̀tan-wrɔn zriɛmɛ́n ke sɩ̀ sevri kɛ̀ vrán n'ɛẅɛnwrɔn, kɩ ɔkɔhɔ̀n-wá-wrɔn zriɛmɛ́n ke sɩ̀ vrán ɔwrɔn léyi wá nɛ̀n ɔkɔhɔ̀n nɔn.

¹⁷Zɛtɛ̀ lɔ, nyɛ́n nyri ndɔ lɔ; nyɛ́n dú ɛnbɔrɛ-bruemɛ̀n ke dú kɛ nyɛ ẅɛn nɛ̀n nyɛ hɛ́n.

¹⁸Mɛ́n sɩ́ dɔ́ nyɛ lɔ fɛn lɔ ny'ankà; mɛ̀n nyri anwrɔn hɔ̀n léyi mɛ̀n mrɛ́n mɛ́n bɩ nɔn. Tɛ́n ke ji le Owrú Prɔnprɔn mùan ankà lɔ kɛ̀ sá nmù: ‘Ɔwrɔn léyi nɛ́n mɛhi bɔ́ dɛ́ ɛci nɔn, crɛ ezì gbangbàn kɛ́n mɛ̀n’.

¹⁹Mɛ dɔ́ nyɛ̀n zɛtɛ̀ lɔ, ô ɛnvra léyi eci lɔ kɛ lɛ hán nɔn, nyɛ́n cɔ̀ nyɛ́n nyrì le ‘Mɛ̀n dú ɔwrɔn léyi dú mɛ̀n nɔn’.

²⁰Mɛ dɔ́ nyɛ̀n annanwɔrɛ mɛ̀n le: ɔwrɔn léyi ke bɩ́ m'ɔkɔhɔ̀n-wá-wrɔn, ne bɩ́ mɛ̀n mán; kɩ ɔwrɔn léyi ke bɩ́ mɛ̀n nɔn, ne bɩ́ ɔwrɔn léyi wá mɛ̀n ɔkɔhɔ̀n nɔn.”

²¹Ɛnvra léyi Zhezü dɔ́ ankà ndɔ hɔ̀n lɔ trɔ nɔn, gbɔ̀gbɔ̀ bru nɛ̀n edu kɩ nɛ dɔ̀ le: “Mɛ dɔ́ nyɛ̀n annanwɔrɛ mɛ̀n le: ny'ɛmɛ̀n lɔ, ɔwrɔn tɔ̀n kɛ lɛ hɛ́ mɛ̀n.”

²²N'ɛsɛnkɛn-bɔ̀ lɔ kɛ crɛ nyan y'edomɛ̀n kɩ ke sɩ́ nyri ɔwrɔn léyi Zhezü kɛ dɔ́ n'ankà nɔn.

²³N'ɛsɛnkɛn-bɔ̀ lɔ ɔtɔ̀n, nɛ́n léyi Zhezü kɛ cüɛn nɛ̀n nɔn, yɛ́ Zhezü ɛtɛ̀sɛ̀n hán.

²⁴Simɔn Piɛrɛ̀n kɛ hán nɛ̀n ɛkɔrɛ̀, ô nɛ̀n yrɛ Zhezü ɔwrɔn léyi nɛ dɔ́ yi ankà nɔn.

²⁵Ɛnẅì léyi Zhezü cüɛ̀n nɔn, bɩ́ ɛnkru bá nɛ̀n ɛtɛ̀sɛ̀n kɩ ke yrɛ nɛ̀n le: “Ɛẅɛnwrɔn, antɔnwrɔn hàn?”

²⁶Zhezü mrɛ́n ɔmùan le: “Me le bɩ́ abutùkumɛ́n buri mɛ lɛ wá ɛcivrɛ lɔ mɛ̀n: ɔwrɔn léyi mɛ lɛ tán nɔn, nɛ́n.” Zhezü bɩ́ abutùkumɛ́n buri wá ɛcivrɛ kɩ bɩ́ tán Zhüda, Simɔn Iskariɔtɛ̀n ẅì.

²⁷Ɛnvra lɔ tɛ̀ léyi, Zhüda bɩ́ abùtùkumɛ́n buri lɔ nɔn, anwa-wrɔn bru nɛ̀n ɛnborɛmɛ̀n. Zhezü kɛ dɔ́ nɛ̀n le: “Eci léyi ke ji le ɛ̀ hán nɔn, ɛ̀ hán nɛ̀n kprakpra!”

²⁸Anwrɔn hɔ̀n léyi yɔ mɛhi yɔ dú ɛci-zî tɛbrɛ̀ wú nɔn, nzriɛmɛ́n kè sɩ̀ nyrì eci le kruhú léyi nɛ dɔ́ yi ankà ndɔ lɔ nɔn.

²⁹Ɔmuhi Zhüda kɛ hɛ́n ɔkùa nɔn, anwrɔn bobrebe tro le Zhezü kɛ dɔ́ nɛ̀n, nɛ̀n hɔ̀n nɛ̀n wɔ́ ɔkoran-ci léyi ke ji nɔn kɩ. Ndɔ hɔ̀n tro le nɛ dɔ́ yi kɛ̀ hɔ̀n kɛ̀ tán ɛmian-bɔ̀ ɛci.

³⁰Zhüda bɩ́ abutùkumɛ́n buri lɔ, kɩ srɔ ɛntrɛ ɛnvra zri lɔ. Ɛnnyran gɔ̀n hán.

³¹Ɛnvra léyi Zhüda srɔ ɛntrɛ nɔn, Zhezü kɛ dɔ̀ le: “Zɛtɛ̀ lɔ ɔwrɔnẅì Ẅì ci-zrɔ lɔ ke le yé n'edomɛ̀n kɩ Ɔwɔ ci-zrɔ dú nɛ̀n edomɛ̀n. [

³²Kɩ ke dú kɛ Ɔwɔ ci-zrɔ ke yé n'edomɛ̀n ɛnẅì lɔ mɛ̀n hô, Ɔwɔ mán kɛ lɛ hán n'Ɛnẅì ci-zrɔ ke le dú nɛ̀n edomɛ̀n kɛ̀ srɔ́, kɩ nɛ lɛ hán yi ɛnvra buriemɛ̀n.]

³³M'ɛẅì hɔ̀n, mɛ̀n dú nyɛ̀n ɛmɛ̀n ɛnvra cá mɛ̀n tɛ̀kɩ. Nyɛ́n le ji mɛ̀n, tɛ́n mɛ dɔ́ nyɛ̀n zɛtɛ̀ lɔ ankà léyi mɛ̀n dɔ́ Zhüifɛ̀n-bɔ̀ nɔn: nyɛ́n sɩ̀ hɔ́n ɛyri léyi mɛ hɔ̀n nɔn rɔ́.

³⁴Mɛ tán nyɛ̀n ɛnyanmàn wrù tɔ̀n: nyɛ́n cüɛn ny'edomɛ̀n. Ke ji le nyɛ́n cüɛn ny'edomɛ̀n hán ɔmu le mɛ cüɛn nyɛ̀n nɔn.

³⁵Ke dú kɛ nyɛ cüɛn ny'edomɛ̀n hô, zɛtɛn anwrɔn lɔ fɛn ke le nyrí ɔmu le nyɛ́n dú m'ɛsɛ̀nkɛn-bɔ̀.”

³⁶Simɔn Piɛrɛ̀n ke yrɛ Zhezü le: “Ɛẅɛnwrɔn, tɛyri ɛ hɔ̀n hàn?” Zhezü mrɛ́n nɛ̀n ɔmùan le: “E sɩ̀ kɛ́n mɛ̀n ɛsɛ̀n zɛtɛ̀ lɔ ɛyri léyi mɛ hɔ̀n nɔn rɔ́, tɛ́n ke le bɩ́ ɛnvra, yakɛ ɛ lɛ kɛ́n mɛ̀n ɛsɛ̀n.”

³⁷Piɛrɛ̀n kɛ dɔ́ nɛ̀n le: “Ɛẅɛnwrɔn, cɛci kruhú kɛ mɛ́n sɩ̀ kɛ̀n mɛ́n ɛsɛ̀n rɔ́ zɛtɛ̀ lɔa? Mɛ̀n krɔn kpehɛ́n me le wú v'ɛkruhú!”

³⁸Zhezü mrɛ́n ɔmùan le: “Annanwɔrɛ mɛ̀n, ɛ̀ krɔn kpehɛ́n e le wú m'ɛkruhúɛ? Annanwɔrɛ mɛ̀n mɛ dɔ́ mɛ́n le: ɛkɔ̀sɔ̀-cüì ke sɩ̀ di ɛnkù, kɩ ɛ lɛ dɔ́ andɛ̀n anhɔ̀n le, è sɩ̀ nyri mɛ̀n.”