Read Alladian Zhan 16 Bible Online

Zhan 16 - Alladian bible

Zhan 16

¹“Mɛ dɔ́ nyɛ̀n ankà ndɔ lɔ, ô nyɛ́n bɩ́ teze ankaẅì-bùtan.

²Yɛ lɛ wrɔ́ nyɛ̀n Ɔwɔ-sɛ́n-wɔn hɔ̀n lɔ mɛ̀n. Kɩ ɔmu lɔ, ɛnvra kɛ lɛ và, zɛtɛn anwrɔn hɔ̀n léyi ke le wri nyɛ̀n nɔn, ke le tro le Ɔwɔ kɔhɔ̀n de yɔ hán ɔmu lɔ nɔn.

³Yɔ lɛ hán ɔmu lɔ ɔmuhi yɔ sɩ̀ nyrì Dade mán, kɩ yɔ sɩ̀ nyri mɛ̀n mán nɔn.

⁴Tɛ́n mɛ dɔ́ nyɛ̀n ankà ndɔ lɔ, ô ɛnvra léyi ɛnbì lɔ kɛ lɛ cɔ̀, ô yɔ hán eci ɔmu lɔ nɔn, ke bru nyɛ̀n le mɛ̀n dɔ́ nyɛ̀n ankà lɔ.” “Ɛnkrubɔmɛ̀n lɔ, mɛ̀n sɩ̀ dɔ́ nyɛ̀n ankà ndɔ lɔ, ɔmuhi mɛ̀n dú nyɛ̀n ɛmɛ̀n nɔn.

⁵Zɛtɛ̀ lɔ, mɛ hɔ́n ɔwrɔn léyi wá mɛ̀n ɔkɔhɔ̀n nɔn n'ɛtɛsɛ̀n kɩ, ny'ɛmɛ̀n lɔ, ɔwrɔn zriɛmɛ́n ke sɩ́ yrɛ mɛ̀n le: ‘Tɛyri ɛ hɔ̀n hàn?’

⁶Tɛ́n ɛnhyɔ̀bɔ̀ cɔ́ ny'ɛnbɔrɛ lɔ, ɔmuhi mɛ̀n dɔ́ nyɛ̀n ɔmu lɔ nɔn.

⁷Ɔmu tɛ̀kɩ, mɛ̀n dɔ́ nyɛ̀n ankà annanwɔrɛ: zrɔ tán ɔmu le nyɛ kruhú mɛ̀n hɔ̀n, ɔmuhi, ke dú kɛ mɛ̀n sɩ̀ hɔ̀n hàn hô, ɔwrɔn léyi kɛ lɛ wá nyɛ̀n ɛkɔrɛ̀ nɔn, ke sɩ̀ vá nyɛ̀n ɛtɛsɛ̀n. Tɛ́n, ke dú kɛ mɛ hɔ̀n hô, me le yüre nyɛ̀n nɛ́n.

⁸Kɩ ɛnvra léyi nɛ lɛ và nɔn, nɛ lɛ hán tán ɛnhibù kè nyrì le, yɔ zɛ́n ɛgbàn-ankà wú, ɛnyrɔnnan-ankà wú mán Ɔwɔ mrɛ̀n-cì-ankà wú.

⁹Yɔ zɛ́n ɛgbàn-ankà wú, ɔmuhi yɔ sɩ́ bú m'ankà yɔ tán ankaẅì;

¹⁰yɔ zɛ́n ɛnyrɔnnan-ankà wú, ɔmuhi mɛ hɔ́n Dade tɛsɛ̀n, kɩ nyɛ́n sɩ̀ vru kán mɛ̀n hàn;

¹¹yɔ zɛ́n ɛmrɛ̀n-cì-ankà wú, ɔmuhi yɔ gɔ́ ci ɛnhibù wú nɛ̀ncüì lɔ ɛmrɛ̀n hàn nɔn.”

¹²“Mɛ̀n vru mɛ̀n ẅɛn ankà bobrebe mɛ lɛ dɔ́ nyɛ̀n, tɛ́n nyɛ́n sɩ̀ ẅɛn ɛnbɔrɛ nyɛ́n hɛ́n rɔ́ zɛtɛ̀ lɔ.

¹³Ɛnvra léyi annanwɔrɛ Hɛ́n kɛ lɛ và nɔn, nɛ lɛ nyrɔn nyɛ̀n annanwɔrɛ lɔ fɛn mɛ̀n. Nɛ́n sɩ̀ dɔ́ ankà nɛ́n zri n'ɛkɔrɛ̀-levriemɛ̀n, tɛ́n nɛ lɛ dɔ́ ankà lɔ fɛn léyi nɛ̀n yá nɔn, kɩ nɛ lɛ dɔ́ nyɛ̀n eci léyi kɛ lɛ wɔ̀ɛn nɔn yi ankà.

¹⁴Ne le yé m'eci-zrɔ lɔ, ɔmuhi nɛ lɛ cɔ́ eci léyi dú mɛ tɛn kɩ nɛ lɛ dɔ́ nyɛ̀n yi ankà.

¹⁵Eci lɔ fɛn léyi Dade ẅɛ̀n nɔn, dú mɛ tɛn mán. Hɩ le kruhú de mɛ́n dɔ̀ le, Ɛnhɛ́n kɛ lɛ cɔ́ eci léyi dú mɛ tɛ́n nɔn kɩ nɛ lɛ dɔ́ nyɛ̀n yi ankà nɔn.”

¹⁶“Ɛnvra cá mɛ̀n nyɛ́n sɩ̀ vru kán mɛ̀n, kɩ ɛnvra cá kɛ lɛ vàcì, kɩ nyɛ lɛ kán mɛ̀n.”

¹⁷Zhezü sɛnkɛn-bɔ̀ jan zɛtɛn ke yrɛ y'edomɛ̀n le: “Ndɔ lɔ n'ɛmɛ̀n dú tɛtan? Nɛ dɔ́ bɔ̀ le: ‘Ɛnvra cá mɛ̀n nyɛ́n sɩ̀ vru kán mɛ̀n, kɩ ɛnvra cá kɛ lɛ vàcì, kɩ nyɛ lɛ kán mɛ̀n’, ne vru nɛ dɔ̀ le: ‘Ɔmuhi mɛ hɔ́n Dade tɛsɛ̀n nɔn’.

¹⁸‘Ɛnvra cá’ ndɔ léyi nɛ dɔ́ yi ankà nɔn, n'ɛmɛ̀n kɛ dɔ̀ le anwɔntan? Bɔ́ sɩ́ yá ankà léyi ne ji nɛ̀n dɔ̀ nɔn.”

¹⁹Zhezü nyri ɔmu le yɔ ji yɔ yrɛ nɛ̀n ankà kɩ zɛtɛn nɛ dɔ́ yɔ le: “Mɛ̀n dɔ́ nyɛ̀n le: ‘Ɛnvra cá mɛ̀n nyɛ́n sɩ̀ vru kán mɛ̀n, kɩ ɛnvra cá kɛ lɛ vàcì, kɩ nyɛ lɛ kán mɛ̀n’. Ndɔ lɔ kruhú de nye yrɛ ny'edomɛ̀n ankà nɛ́n?

²⁰Mɛ dɔ́ nyɛ̀n annánwɔrɛ mɛ̀n le: nyɛ́n le wú eyú kɩ nye le di ejüe, tɛ́n ɛnhibù ke le dú pɔpƐɛ̀-brá mɛ̀n; tɛ́n ny'ejüedì lɔ kɛ lɛ srɔ pɔpüɛ̀.

²¹Ɛnvra léyi ɛnnyɔnwrɔn kɛ vá ɛnẅì bî yri nɔn, ne ku ɛnkrɛ̀ta ɔmuhi n'ɛgbànkán vra ncɔ̀a nɔn; tɛ́n ɛnvra léyi ne bî ɛnẅì nɔn, n'ɛgbàn-kàn lɔ ke yuru nɛ̀n esùva, ɔmuhi nɛ̀n dú pɔpüɛ̀ mɛ̀n, ɔwrɔnẅì léyi vá ɛnhibù wú nɔn hɩ kruhú.

²²Ɔmu zri lɔ nyɛ́n dú obòto mɛ̀n nyɛ́n mán zɛtɛ̀ lɔ; tɛ́n me le vru mɛ̀n kán nyɛ̀n kɩ ny'ɛnbɔrɛ kɛ lɛ brá pɔpüɛ̀ kɩ ɔwrɔn zriɛmɛ́n ke sɩ̀ ẅɛn nyɛ́n pɔpüɛ̀-brà lɔ kɛ̀ sɔhɔ́ rɔ́.”

²³“Ɛnbì léyi ɛnvra ndɔ lɔ kɛ lɛ cɔ̀ nɔn, nyɛ́n sɩ̀ yrɛ mɛ̀n ankà, ankà zriɛmɛ́n wúɛ. Mɛ dɔ́ nyɛ̀n annànwɔrɛ mɛ̀n le: Ɔwɔ Zi kɛ lɛ tán nyɛ̀n eci lɔ fɛn léyi nyɛ lɛ sán nɛ̀n m'ebɩ́mɛ̀n nɔn.

²⁴Hàn kɩ cɔ́ zɛtɛ̀ lɔ nɔn, nyɛ vá sán eci zriɛmɛ́n m'ebɩ́mɛ̀n. Nyɛ́n sán kɩ nyɛ lɛ cɔ̀, kɩ ɔmu lɔ nyɛ́n pɔpüɛ̀-brà lɔ kɛ lɛ sá nmù.”

²⁵“Mɛ̀n dɔ́ nyɛ̀n ankà ndɔ hɔ̀n lɔ fɛn nyandrɛn mɛ̀n. Ɛnvra kɛ lɛ và kɩ mɛ́n sɩ̀ vru dɔ́ nyɛ̀n ankà nyandrɛn mɛ̀n, tɛ́n hɩ vra lɔ, mɛ lɛ dɔ́ nyɛ̀n kpete mɛ̀n Dade ankà.

²⁶Ɛnvra léyi ɛnbì ndɔ lɔ kɛ lɛ cɔ̀ nɔn, ny'eci sán lɔ kɛ̀ hɔ́n Dade yri m'ebɩmɛ̀n; kɩ mɛ́n sɩ̀ dɔ́ nyɛ̀n le mɛ lɛ sɛ́n nɛ̀n mɛ̀n tán nyɛ̀n,

²⁷ɔmuhi Dade dùku mán kɛ cüɛn nyɛ̀n nɔn. Nɛ cüɛn nyɛ̀n ɔmuhi nyɛ cüɛn mɛ̀n kɩ nye bútan le mɛ̀n dú Ɔwɔ yri mɛ́n và nɔn.

²⁸Mɛ̀n dú Dade yri mɛ́n và kɩ mɛ̀n vá ɛnhibù wú. Zɛtɛ̀ lɔ mɛ cɔhɔ́ ɛnhibù wú kɩ mɛ hɔ́n Dade tɛ̀sɛ̀n.”

²⁹Zɛtɛn n'ɛsɛ̀nkɛn-bɔ̀ kɛ dɔ́ nɛ̀n le: “Nyàn, zɛtɛ̀ lɔ ɛ dɔ́ ankà kpetemɛ̀n, e sɩ́ vru dɔ́ ankà nyandrɛn hàn.

³⁰Zɛtɛ̀ lɔ bɔ́ nyri ɔmu le, è nyri eci lɔ fɛn, kɩ e sɩ́ ji le, ye yrɛ mɛ́n ankà. Hɩ le kruhú de bɔ́ bútan le è dú Ɔwɔ yri ɛ̀ và nɔn.”

³¹Zhezü mrɛ́n yɔ ɔmùan le: “Zɛtɛ̀ lɔ nye bútan ankaẅìɛ?

³²Kɛ zrɔ, ɛnvra kɛ và, kɩ ɛnvra lɔ mán cɔ̀a, hɩ vra lɔ nyɛ́n lɔ fɛn nye le bonyì, ɔwrɔn wrɔn ke le dú n'anwɔn mɛ̀n, kɩ nye le teze mɛ́n zriɛ. Hɔ̂, annanwɔrɛ mɛ̀n, mɛ́n sɩ̀ dú mɛ́n zri, ɔmuhi Dade mɛhi bɔ́ dù nɔn.

³³Mɛ̀n dɔ́ nyɛ̀n ankà ndɔ lɔ fɛn, ô nyɛ́n cɔ́ anwɔwɔ nyɛ́n mɛhi b'ɔbɔ̀sɔ̀ lɔ mɛ̀n. Nyɛ lɛ kán ɛgbàn ɛnhibù wú. Tɛ́n edù kè yɩ́ nyɛ̀n! Mɛ́n kɔ̀n ká ɛnhibù!”