Read Alladian Zhan 17 Bible Online

Zhan 17 - Alladian bible

Zhan 17

¹Ɛnvra léyi nɛ̀n dɔ́ ankà ɔmu lɔ trɔ nɔn, Zhezü sɩ́ anvɛ̀ ɛwú kɩ kɛ dɔ̀ le: “Dade wacɛ̀n ncɔ́a. È yé v'Ɛnẅì ci-zrɔ lɔ, ô Ɛnẅì mán ke yé v'eci-zrɔ lɔ.

²Ɔmuhi ɛ̀ tán nɛ̀n ɛkɔrɛ̀srɔn anwrɔnẅì lɔ fɛn wú, ô nɛ̀n hán anwrɔn lɔ fɛn léyi ɛ̀ tán nɛ̀n nɔn, kɛ̀ cɔ́ ɛwúvà léyi ke sɩ́ trɔa nɔn.

³Ɛwúvà léyi ke sɩ́ trɔa nɔn, dú hɩle, ke ji le ye nyri mɛ́n, vɛ́n zri léyi è dú Ɔwɔ annanwɔrɛ, ô yɔ nyri Zhezü Krisì léyi ɛ̀ wá ɔkɔhɔ̀n nɔn.

⁴Mɛ̀n yé v'eci-zrɔ lɔ ɛnhibù wú; ɔkɔhɔ̀n léyi ɛ̀ tán mɛ̀n nɔn, mɛ̀n hán trɔ.

⁵Zɛtɛ̀n zɛtɛ̀ lɔ, Dade, tán mɛ̀n v'ezìwú eci-zrɔ léyi mɛ̀n ẅɛn v'ɛtɛsɛ̀n ɛnvra léyi ɛnhibù kɛ vá dù nɔn.

⁶Anwrɔn hɔ̀n léyi ɛ̀ mrɛ́n ɛnhibù wú ɛ̀ tán mɛ̀n nɔn, mɛ̀n hán yɔ, yɔ nyri mɛ́n. Yɔ dú vɛ tɛn, ɛ̀ tán mɛ̀n yɔ, kɩ yɔ die v'ankà-dɔ̀ nukùɛ.

⁷Zɛtɛ̀ lɔ, yɔ nyri ɔmu le eci léyi ɛ̀ tán mɛ̀n nɔn v'eyri de ndù nvà nɔn,

⁸ɔmuhi mɛ̀n tán yɔ ankà-dɔ̀ hɔ̀n léyi ɛ̀ tán mɛ̀n nɔn, kɩ yɔ cɔ́ ankà-dɔ̀ hɔ̀n lɔ. Yɔ nyri annanwɔrɛ mɛ̀n le v'eyri de mɛ́n dù mɛ và nɔn, kɩ yɔ bútan ankaẅì le vɛ́n de ɛ̀ wá mɛ̀n ɔkɔhɔ̀n nɔn.”

⁹“Mɛ sɛ́n mɛ́n, tán yɔ. Mɛ́n sɩ́ sɛ́n mɛ́n tán ɛnhibù, tɛ́n mɛ sɛ́n tán anwrɔn hɔ̀n léyi ɛ̀ tán mɛ̀n nɔn, ɔmuhi yɔ dú vɛ tɛn nɔn.

¹⁰Eci lɔ fɛn léyi mɛ́n ẅɛ̀n nɔn dú vɛ tɛ́n, kɩ eci lɔ fɛn léyi ɛ ẅɛ̀n nɔn dú mɛ tɛn; kɩ m'ecizrɔ lɔ dú y'ɛmɛ̀n srɔ.

¹¹Mɛ̀n sɩ̀ vrù dù ɛnhibù wúɛ, tɛ́n yɔ tɛn yɔ dú ɛnhibù wú; mɛ̀n, mɛ hɔ́n v'eyri. Dade Prɔnprɔn, ɛ̀ nyan yɔ v'ebɩ́ kɔrɛ̀srɔn mɛ̀n, ɛkorɛ̀srɔn léyi ɛ̀ tán mɛ̀n nɔn, ô yɔ dú eci zri kɛ̀ hán vɛ́n mán mɛ̀n mɛhi léyi bɔ̀ dú eci zri nɔn hɔ́.

¹²Ɛnvra léyi yɔ mɛhi bɔ́ dù nɔn, mɛ nyan yɔ v'ebɩ́ kɔrɛ̀srɔn mɛ̀n, ɛkorɛ̀srɔn léyi ɛ̀ tán mɛ̀n nɔn. Mɛ̀n wá yɔ esùva kɩ nzri mán kè sɩ̀ zrɛ̀n hàn, ke dú kɛ kè sɩ̀ dù nzri léyi dú ɛzrɛ́n tɛn nɔn, ô Ɔwrú Prɔnprɔn ankà-dɔ̀ lɔ kɛ̀ sá nmù nɔn.

¹³Tɛ́n zɛtɛ̀ lɔ mɛ hɔ́n v'eyri. Mɛ dɔ́ ɔmu lɔ, ɔmuhi mɛ̀n vru mɛ̀n dú ɛnhibù wú nɔn, ô yɔ cɔ́ yɔ dùku y'ɛmɛ̀n lɔ mɛ́n pɔ̀püɛ̀-brà, pɔ̀püɛ̀-brà léyi sá nmù nɔn.

¹⁴Mɛ̀n tán yɔ v'ankà-dɔ̀, kɩ ɛnhibù ke gbri yɔ ɔmuhi yɔ sɩ̀ dù ɛnhibù tɛn nɔn, hán mɛ̀n léyi mɛ̀n sɩ̀ dù ɛnhibù tɛn nɔn.

¹⁵Mɛ́n sɩ́ sɛ́n mɛ́n hô, ɛ̀ ẅɛn yɔ ɛ̀ sɔhɔ́ ɛnhibù wú, tɛ́n è bɩ́ yɔ ɛ̀ sɔhɔ́ Anwa-wrɔn tamɛ̀n.

¹⁶Yɔ sɩ̀ dù ɛnhibù tɛn, hán mɛ̀n léyi mɛ̀n sɩ̀ dù ɛnhibù tɛn nɔn.

¹⁷Ɛ̀ hán yɔ, yɔ srɔ vɛ tɛn kokrohô, annànwɔrɛ kɔrɛ̀srɔn mɛ̀n; v'ankà-dɔ̀ dú annànwɔrɛ.

¹⁸Mɛ̀n wá yɔ ɔkɔhɔ̀n ɛnhibù wú hán ɔmu le ɛ̀ wá mɛ̀n ɔkɔhɔ̀n ɛnhibù wú nɔn hɔ́.

¹⁹Me bɩ́ m'edomɛ̀n mɛ tán mɛ́n kokrohô y'ɛkruhú, ô yɔ mán yɔ dú vɛ tɛn annànwɔrɛ mɛ̀n.”

²⁰“Mɛ́n sɩ́ sɛ́n tán yɔ zri kɩ, tɛ́n mɛ sɛ́n tán yɔ hɔ̀n léyi ke le bú m'ankà kɛ̀ tán ankàẅì y'Ɔwɔ ankà-dɔ̀ lɔ mɛ̀n nɔn.

²¹Mɛ sɛ̀n, ô yɔ lɔ fɛn yɔ dú nzri. Dade, yɔ cɔ́ bɔ̀ mɛhi bɔ̀ bɔ̀sɔ̀, kɛ hán ɔmu le è dú mɛ̀n ɛmɛ̀n, kɩ mɛ̀n mán mɛ̀n dú mɛ́n ɛmɛ̀n nɔn hɔ́. Yɔ dú eci zri, ô ɛnhibù kè bùtan le vɛ́n de ɛ̀ wá mɛ̀n ɔkɔhɔ̀n nɔn.

²²Mɛ̀n tán yɔ eci-zrɔ léyi ɛ̀ tán mɛ̀n nɔn, ô yɔ dú nzri kɛ̀ hán vɛ́n mán mɛ̀n mɛhi léyi bɔ́ dú nzri nɔn.

²³Mɛ̀n dú yɔ ɛmɛ̀n kɩ è dú mɛ̀n ɛmɛ̀n; ɔmu lɔ, ô yɔ srɔ eci-zri anvrɛnvrɛn mɛ̀n, ô ɛnhibù ke nyri ɔmu le vɛ́n de ɛ̀ wá mɛ̀n ɔkɔhɔ̀n nɔn, kɩ ɛ cƐɛn yɔ kɛ̀ hán ɔmu le ɛ̀ cüɛn mɛ̀n nɔn hɔ́.

²⁴Dade, ɛ̀ tán mɛ̀n yɔ, kɩ mɛ cüɛ̀n le yɔ dú mɛ̀n ɛtɛsɛ̀n ɛyri léyi me le dù nɔn, ô yɔ kán m'eci-zrɔ lɔ, eci-zrɔ léyi ɛ̀ tán mɛ̀n nɔn, ɔmuhi ɛ̀ cüɛn mɛ̀n yakɛ yɛ hán ɛnhibù nɔn.

²⁵Dade ɛnyrɔnnan-wrɔn, ɛnhibù kè sì nyrì mɛ́n, tɛ́n mɛ̀n, mɛ̀n nyri mɛ́n, kɩ yɔ ndɔ hɔ̀n lɔ yɔ nyri ɔmu le ɛ̀ wá mɛ̀n ɔkɔhɔ̀n nɔn.

²⁶Mɛ̀n hán yɔ, yɔ nyri mɛ́n, kɩ me le vru mɛ̀n hán yɔ, yɔ nyri mɛ́n, ô ɛcüɛ̀n léyi ɛ̀ ẅɛn m'ɛwú nɔn, kè dú yɔ ɛmɛ̀n, ô mɛ́n mumù mán mɛ̀n dú yɔ ɛmɛ̀n.”