Read Alladian Zhan 20 Bible Online

Zhan 20 - Alladian bible

Zhan 20

¹Ɛnyanbì ɔsɔrɔ̀ futan, ɛyri kɛ vá wó, Magdala anmàn nyɔnwrɔn Mari hɔ́n ɛnnànmàn kru wú. Mari kán ɔmu le yɛ mrɛ́n obù léyi sɛ́n ɛnnanmàn lɔ ɔmùan nɔn yɛ sɔhɔ́.

²Zɛtɛn nɛ̀n srɛ́ nɛ́n hɔ̀n cɔ́ Simɔn Piɛrɛ̀n mán ɛsɛnkɛn-wrɔn léyi Zhezü kɛ cüɛ̀n nɔn, kɩ nɛ dɔ́ yɔ le: “Ye bɩ́ Ɛẅɛnwrɔn yɛ sɔhɔ́ ɛnnanmàn mɛ̀n, kɩ bɔ̀ sɩ̀ nyrì ɛyri léyi yɛ hɛ́n nɛ̀n hán nɔn.”

³Piɛrɛ̀n mán ɛsɛnkɛn-wrɔn ndɔ lɔ hɔ́n ɛnnanmàn kru wú.

⁴Tɛ́n ɛsɛ̀nkɛn-wrɔn nyàntɛn lɔ, kɛ srɛ́ vrán Piɛrɛ̀n, kɩ nɛ̀n dú ɛnvrakpà-wrɔn nɛ̀n cɔ́ ɛnnànmàn kru wú.

⁵Nɛ̀n sɩ́ ɛnkru ɛnhi kɩ nɛ̀n kán ɛcàsa wosu léyi ye bɩ yɛ kora Zhezü nɔn, dɛ́ ɛnhibɩ́ɛ, kɩ nɛ̀n sɩ̀ bru ɛnnanmàn lɔ mɛ̀n.

⁶Zɛtɛn Simɔn Piɛrɛ̀n trɔ ɛmɛẅi nvà kɩ bru ɛnnanmàn mɛ̀n. Simɔn Piɛrɛ̀n kán ɛcàsa wie hɔ̀n léyi cüe ɛnhibɩ́

⁷mán ɛcàsa léyi yɛ kora Zhezü ɛnkru nɔn; ɛcàsa wie ndɔ lɔ mán dú ɔhɔnan, tɛ́n yɛ serɛ nɛ̀n yɛ hɛ́n ɛyri nyantɛn.

⁸Zɛtɛn ɛsɛnkɛn-wrɔn ndɔ léyi dú ɛnvrapkà wrɔn cɔ́ ɛnnamàn kru wú nɔn, mán bru ɛnnanmàn mɛ̀n. Nɛ́n kàn, kɩ nɛ́n bùtan ankàẅì.

⁹(Annanwɔrɛ mɛ̀n lɔ, Zhezü sɛnkɛn-bɔ̀ lɔ kɛ vá yá Owrú Prɔnprɔn ankà-dɔ̀ léyi kɛ dɔ̀ le, Zhezü ke le dú owú-bɔ̀ mɛ̀n kè vru kɛ vá ɔkɔrɛ̀-bɔ̀ mɛ̀n.)

¹⁰Zɛtɛn Zhezü sɛnkɛn-bɔ̀ anhyrɛ̀ lɔ vru ɛmɛẅi hɔ́n ɛbemɛ̀n.

¹¹Mari nyɔn ɛnnanmàn tɛsɛ̀n, ɛntrɛ, kɩ ke wú eyú. Eyú wúemɛ̀n lɔ Mari sɩ́ ɛnkru ɛnhi kɛ nyan ezhe nanmàn mɛ̀n;

¹²kɩ nɛ̀n kán Ɔwɔ-kùyüre-bɔ̀ anhyrɛ̀ cɔ́ ɛci wosu yɛ́ ɛyri léyi yɛ hɛ́n Zhezü dùwrú lɔ, ɔtɔ̀n nyɔn ɛnkruemɛ̀n yri lɔ kɩ ndɔ lɔ nyɔn annantrɛmɛ̀n yri lɔ.

¹³Ɔwɔ-kùyüre-bɔ̀ lɔ ke yrɛ nɛ̀n le: “Cɛci kruhú kɛ e wú eyúɛ?” Nɛ̀n mrɛ́n yɔ ɔmùan le: “Ye bɩ́ m'Ɛẅɛnwrɔn yɛ sɔhɔ́ kɩ mɛ̀n sɩ̀ nyrì ɛyri léyi yɛ hɛ́n nɛ̀n hàn nɔn.”

¹⁴Ɛnvra léyi nɛ̀n dɔ́ ankà ndɔ hɔ̀n lɔ trɔ nɔn, nɛ̀n crɛ ɛmɛẅi kɩ nɛ̀n kán Zhezü nyɔn nanvrɛn lɔ, tɛ́n nɛ̀n sɩ̀ nyrì ɔmu le Zhezü de nyɔn nɔn.

¹⁵Zhezü ke yrɛ nɛ̀n le: “Cɛci kruhú kɛ e wú eyúɛ? Antɔ̀n e jiɛ?” Mari ke tro le ɛkɛ̀tɛ̀ cɛ kɔ̀hɔ̀n-hán-wrɔn tɔ̀n, hán tán kɩ nɛ dɔ́ yi le: “Ke dú kɛ vɛ́n de è bɩ́ nɛ̀n ɛ̀ sɔhɔ́ nɔn hô, ɛ̀ dɔ́ mɛ̀n ɛyri léyi è bɩ́ nɛ̀n ɛ̀ hɛ́n, kɩ mɛ lɛ hɔ̀n mɛ̀n bɩ́ nɛ̀n.”

¹⁶Zhezü kɛ dɔ́ nɛ̀n le: “Mari!” Mari crɛ ezì kɛ́n nɛ̀n kɩ kɛ dɔ́ nɛ̀n ebre mɛ̀n le: “Rabuni!” (hɩ mɛ̀n kɛ dɔ̀ le “Ankà-yé-wrɔn”).

¹⁷Zhezü kɛ dɔ́ nɛ̀n le: “E bɩ ẅɛn mɛ̀n ɛ hɛ́n hàn, ɔmuhi mɛ vá hɔ́n Dade yri nɔn. Tɛ́n ɛ̀ hɔ̀n dɔ́ nmàn ẅì hɔ̀n le mɛ hɔ́n Dade yri, nɛ́n léyi nɛ̀n dú nyɛ́n zi mán nɔn, mɛ hɔ́n Ɔwɔ yri nɛ́n léyi nɛ̀n dú ny'Ɔwɔ mán nɔn.”

¹⁸Zɛtɛn, Mari Magdala anmàn nyɔnwrɔn lɔ hɔ̀n kɛ dɔ́ Zhezü sɛ̀nkɛn-bɔ̀ lɔ le: “Mɛ̀n kán Ɛẅɛnwrɔn!” Kɩ nɛ̀n dɔ́ yɔ ankà léyi Zhezü dɔ́ nɛ̀n nɔn.

¹⁹Ɛnyanbì nzri ndɔ lɔ n'ɔwoɛmɛ̀n, Zhezü sɛnkɛn-bɔ̀ lɔ borɛkru ɔwɔ́n tɔ̀n mɛ̀n kɩ yɔ sɛ́n ɛsù hɔ̀n lɔ safɛ̀ mɛ̀n, ɔmuhi yɔ sú Zhüifɛ̀n-bɔ̀ cüìcüì hɔ̀n lɔ nɔn. Zhezü và nyɔn yɔ anwanzi kɩ kɛ dɔ́ yɔ le: “Anwɔwɔ kè dú nyɛ tɛn!”

²⁰Ɛnvra léyi nɛ̀n dɔ́ yɔ ankà ndɔ hɔ̀n lɔ trɔ nɔn, nɛ̀n yé yɔ n'ɛmàn mán n'ɛgbroẅiè. Ɛsɛnkɛn-bɔ̀ lɔ dú pɔpüɛ̀ mɛ̀n ɛnvra léyi yɔ kán Ɛẅɛnwrɔn nɔn.

²¹Zhezü vru kɛ dɔ́ yɔ le: “Anwɔwɔ kè dú nyɛ tɛn! Ɔmu zri léyi Dade wá mɛ̀n ɔkɔhɔ̀n nɔn, mɛ̀n mán mɛ wá nyɛ̀n ɔkɔhɔ̀n.”

²²N'ankà-dɔ̀ trɔ mɛ̀n lɔ, nɛ̀n fú ɛndɔnwrɔ̀n ku yɔ ɛwú kɩ nɛ dɔ́ yɔ le: “Nyɛ́n cɔ́ Ɛnhɛ́n Prɔnprɔn!

²³Anwrɔn hɔ̀n léyi nye le bɩ́ ɛgbàn nyɛ́n ce nɔn, kɛ lɛ cɔ́ ɛgbàn-bɩ-ce; Yɔ hɔ̀n léyi nyɛ lɛ krɔ ɛgbàn-bɩ-ce nɔn, yɔ sɩ̀ cɔ́ ɛgbàn-bɩ-ce.”

²⁴Toma léyi ye bi ɛshre ẅì nɔn, hɩ dú ɛsɛ̀nkɛn-bɔ̀ ɛva-anhyrɛ̀ lɔ ɔtɔ̀n nɔn, kè sɩ̀ kàn ɛyri ɛnvra léyi Zhezü bɩ́ n'edomɛ̀n yé n'ɛsɛ̀nkɛn-bɔ̀ nɔn.

²⁵Zhezü sɛnkɛn-bɔ̀ ndɔ hɔ̀n lɔ kɛ dɔ́ nɛ̀n le: “Bɔ̀ kán Ɛẅɛnwrɔn.” Tɛ́n Toma mrɛ́n yɔ ɔmùan le: “Ke dú kɛ mɛ̀n sɩ̀ kàn ɛci-gbrɔ̀ levri n'ɛmàn hɔ̀n lɔ mɛ̀n, ke dú kɛ mɛ̀n sɩ̀ bɩ m'ɛtieẅì mɛ́n wà ɛci-gbrɔ̀ levri, kɩ ke dú kɛ mɛ̀n sɩ̀ bɩ m'ɛmàn mɛ̀n wá n'ɛgbroẅiè levri, mɛ́n sɩ̀ bùtan ankaẅì.”

²⁶Ɛbi eẅirì vácì, Zhezü sɛ̀nkɛn-bɔ̀ lɔ vru sá ɛkru ɔwɔn zri lɔ mɛ̀n, kɩ Toma mán dú yɔ ɛmɛ̀n. Yɛ sɛ́n ɛsù hɔ̀n lɔ safɛ̀ mɛ̀n, tɛ́n Zhezü và nyɔn yɔ anwanzi kɩ kɛ dɔ̀ le: “Anwɔwɔ kè dú nyɛ tɛn!”

²⁷Zɛtɛn nɛ dɔ́ Toma le: “È sɩ́ v'ɛtieẅì lɔ ɛnu, ô ɛ̀ nyan m'ɛmàn hɔ̀n lɔ; è sɩ́ v'ɛkɔrɛ̀ lɔ ezì, ô è bɩ́ nɛ̀n ɛ̀ wá m'ɛgbroẅiè lɔ mɛ̀n. E bɩ́ vru ẅɛn ankà-tro anhyrɛ̀a, è bùtan ankaẅì!”

²⁸Toma mrɛ́n nɛ̀n ɔmùan le: “M'Ɛẅɛnwrɔn mán m'Ɔwɔ!”

²⁹Zhezü kɛ dɔ́ nɛ̀n le: “Ɔmuhi ɛ̀ kán mɛ̀n nɔn, hɩ le kruhú de e bùtan ankàẅì nɛ́n? Ɛnbɔrɛbru dú tán anwrɔn hɔ̀n léyi kè sɩ̀ kán mɛ̀n kɩ bútan ankàẅì nɔn!”

³⁰Zhezü vru hán n'ɛsɛnkɛn-bɔ̀ zìwú anvɛmɛ̀n-frɛ́n-ci bobrebe ndɔ hɔ̀n, ye sɩ̀ dɔ̀ owrú ndɔ lɔ mɛ̀n.

³¹Tɛ́n ankà léyi dú nɛ̀n ɛmɛ̀n nɔn, ye merɛ́n nɛ̀n, ô nyɛ́n bùtan ankaẅì le Zhezü dú Ebɩ̀die-wrɔn, Ɔwɔ Ẅì. Kɩ ke dú kɛ nye bú n'ankà nyɛ tán ankaẅì hô, nyɛ lɛ cɔ́ ɛkɔrɛ̀ n'ebɩ́mɛ̀n.