Read Alladian Zhan 21 Bible Online

Zhan 21 - Alladian bible

Zhan 21

¹Ɛnvra cá vácì, Zhezü vru bɩ́ n'edomɛ̀n yé n'ɛsɛnkɛn-bɔ̀ Tiberiadɛ̀n nɛnbà cɛ gbàtà mùan. Nyàn ɔmu le nɛ̀n bɩ́ n'edomɛ̀n nɛ̀n yé yɔ nɔn:

²Simɔn Piɛrɛ̀n, Toma (léyi ye bi ɛshre ẅì nɔn), Natanaɛlɛ̀n (léyi dú Kana, Galile Kpɔsɔ wú wrɔn nɔn), Zebede ẅì hɔ̀n, mán Zhezü sɛnkɛn-bɔ̀ anyhrɛ̀, yɔ lɔ fɛn ye dú ɛyri zri.

³Simɔn Piɛrɛ̀n kɛ dɔ́ yɔ le: “Mɛ hɔ̀n mɛ̀n hán ɛnshiemɛ̀n kɔ̀hɔ̀n.” Yɔ dɔ́ nɛ̀n le: “Bɔ mán, bɔ lɛ cɔ́ mɛ́n mɛhi bɔ̀ hɔ̀n.” Yɔ hɔ̀n kɩ yɔ ku anhàka mɛ̀n. Tɛ́n ye sɩ̀ ẅɛ̀n eci zriɛmɛ́n ɛnnyran ndɔ lɔ mɛ̀n.

⁴Ɛnvra léyi ɛcɛ̀n bukru ke cúe nɔn, Zhezü srɔ ɛnshi gbàtà mùan, tɛ́n n'ɛsɛnkɛn-bɔ̀ lɔ kè sɩ̀ nyrì ɔmu le nɛ́n.

⁵Zɛtɛn Zhezü kɛ dɔ́ yɔ le: “Kɛ̂ nyɛ́n ẅɛn ɛcàn jan m'ɛẅì hɔ̀n?” Yɔ mrɛ́n nɛ̀n ɔmùan le: “Hɔ̂!”

⁶Nɛ dɔ́ yɔ le: “Nyɛ́n ze ɛdàn lɔ anhàka zì-kɔrɛ̀ hɔnan, kɩ nyɛ lɛ ẅɛn ɛcàn.” Yɔ ze ɛdàn kɩ yɔ sɩ́ sán ɛdàn lɔ rɔa, ɔmuhi ɛcàn dú nɛ̀n ɛmɛ̀n cüɛn nɔn.

⁷Ɛsɛnkɛn-wrɔn léyi Zhezü kɛ cüɛ̀n nɔn kɛ dɔ́ Piɛrɛ̀n le: “Ɛẅɛnwrɔn de dɔ́ ankà nɔn!” Ɛnvra léyi Simɔn Piɛrɛ̀n yá ankà ndɔ lɔ nɔn: “Ɛẅɛnwrɔn de dɔ́ ankà nɔn”, nɛ̀n bɩ́ n'ɛwú ceci nɛ́n cɔ̀, ɔmuhi nɛ̀n nyɔn ɛsɛ̀n-kɔra, kɩ nɛ̀n bru ɛnshi.

⁸Ɛsɛ̀nkɛn-bɔ̀ ndɔ hɔ̀n lɔ bɩ́ anhàka nvà kɩ kɛ wán ɛdàn léyi ɛcàn yɩ ɛmɛ̀n nɔn: ye sɩ̀ dù esù she ɛnshi gbàtà mùan, anhɛ́ kɔrɛ̀ ɛkoẅi-ɛnrì kɩ.

⁹Ɛnvra léyi yɔ dú anhɛmɛ̀n yɔ kakɛ nɔn, yɔ kán nanvrɛn lɔ ɛnhyà kɩ ɛcàn mán abutùkumɛ́n dú ɛwú.

¹⁰Zhezü kɛ dɔ́ yɔ le: “Ɛcàn hɔ̀n léyi nyɛ́n ẅɛn nɔn, nyɛ̀n bɩ́ jan nyɛ́n và.”

¹¹Simɔn Piɛrɛ̀n bru anhàka mɛ̀n kɩ wán ɛdàn léyi ɛcàn ɛvrivri dú ɛmɛ̀n nɔn cüe ɛnhiɛ: ɛcàn ɛkoẅi-ɔbɔ̀ɛn mán ɛẅì ɛvà-anhɔ̀n de dú ɛdàn lɔ mɛ̀n nɔn. Ɛcàn cüɛn, ɔmu tɛ̀kɩ ɛdàn lɔ kè sɩ̀ shà.

¹²Zhezü kɛ dɔ́ yɔ le: “Nyɛ́n và nyɛ́n zi ɛci.” Ɛsɛ̀nkɛn-wrɔn zriɛmɛ́n ke sɩ́ ẅɛn ɔmùan ká yrɛ nɛ̀n le: “Antɔnwrɔn dú mɛ́n hán?” Ɔmuhi yɔ nyri ɔmu le Ɛẅɛnwrɔn nɔn.

¹³Zhezü sɔ́nbá ɛtɛ̀sɛ̀n, bɩ́ abùtùkumɛ́n kɩ dɛ́ yɔ; nɛ̀n tán yɔ ɛcàn mán.

¹⁴Kɛ hán andɛ̀n anhɔnmɛ̀n de Zhezü bɩ́ n'edomɛ̀n yé n'ɛsɛnkɛn-bɔ̀ nɔn, bukru ɛnvra léyi nɛ̀n dú owúemɛ̀n nɛ̀n frɔ́ nɔn.

¹⁵Ɛnvra léyi yɔ zî ɛci trɔ nɔn, Zhezü ke yrɛ Simɔn Piɛrɛ̀n le: “Simɔn, Zhan ẅì, ɛ cüɛn mɛ̀n kɛ vrán ɛnyran hɔ̀n ndɔ lɔa?” Piɛrɛ̀n mrɛ́n nɛ̀n ɔmùan le: “Hɛ̀ɛ̀ Ɛẅɛnwrɔn, è nyri ɔmu le mɛ cüɛn mɛ́n.” Zhezü kɛ dɔ́ nɛ̀n le: “Ɛ̀ wá mɛ́n kɔ̀kɔ̀sɛ̀-ẅì hɔ̀n lɔ esùva.”

¹⁶Zɛtɛn Zhezü ke yrɛ nɛ̀n andɛ̀n anhyrɛmɛ̀n le: “Simɔn, Zhan ẅì, ɛ cüɛn mɛ̀n hàn?” Piɛrɛn mrɛ́n nɛ̀n ɔmùan le: “Hɛ̀ɛ̀ Ɛẅɛnwrɔn, è nyri ɔmu le mɛ cüɛn mɛ́n.” Zhezü kɛ dɔ́ nɛ̀n le: “Ɛ̀ wá mɛ́n kɔ̀kɔ̀sɛ̀ hɔ̀n lɔ esùva.”

¹⁷Zɛtɛn nɛ dɔ́ yi andɛ̀n anhɔnmɛ̀n le: “Simɔn, Zhan ẅì, ɛ cüɛn mɛ̀n hàn?” Kɛ hán Piɛrɛ̀n ejüedì, ɔmuhi Zhezü ke yrɛ nɛ̀n andɛ̀n anhɔnmɛ̀n le: “Ɛ cüɛn mɛ̀n hàn?” Kɩ nɛ̀n mrɛ́n yi ɔmùan le: “Ɛẅɛnwrɔn, è nyri eci lɔ fɛn; è nyri ɔmu le mɛ cüɛn mɛ́n.” Zhezü kɛ dɔ́ nɛ̀n le: “Ɛ wá mɛ́n kɔ̀kɔ̀sɛ̀ hɔ̀n lɔ esùva.

¹⁸Annanwɔrɛ mɛ̀n mɛ dɔ́ mɛ́n le: Ɛnvra léyi è dú sugbàn-wrɔn nɔn, vɛ́n dùku ɛ nyɔn pɛtɛ̀n ɛẅìe kɩ ɛ hɔ́n ɛyri léyi e ji nɔn; tɛ́n ɛnvra léyi ɛ lɛ srɔ ecüìcüì nɔn, ɛ lɛ trɛ́n ɛkɔrɛ̀ kɩ ɔwrɔn nyantɛn kɛ lɛ nyɔn mɛ́n vɛ́n pɛtɛ̀n lɔ ɛẅìe kɩ ne le bɩ́ mɛ́n nɛ lɛ hɔ́n ɛyri léyi e sɩ́ ji ɛ̀ hɔ̀n nɔn.”

¹⁹(Ankà ndɔ lɔ wú lɔ, Zhezü ke yé ɔmu le Piɛrɛ̀n kɛ lɛ hán kè wù, ô kɛ̀ zrɔ Ɔwɔ eci nɔn.) Zɛtɛn Zhezü kɛ dɔ́ nɛ̀n le: “Kɛ́n mɛ̀n ɛsɛ̀n!”

²⁰Piɛrɛ̀n crɛ ɛmɛẅi kɩ kán ɛsɛnkɛn-wrɔn léyi Zhezü kɛ cüɛ̀n nɔn (nɛ́n léyi nɛ̀n bɩ́ ɛnkru nɛ̀n bá Zhezü ɛtɛsɛ̀n ɛci-zîemɛ̀n kɩ ne yrɛ yi le: “Ɛẅɛnwrɔn, antɔn dú ɔwrɔn léyi kɛ lɛ hɛ́ mɛ́n nɛ́n?”)

²¹Piɛrɛ̀n kán ɔwrɔn lɔ kɩ kɛ dɔ́ Zhezü le: “Ɔwrɔn ndɔ lɔ, Ɛẅɛnwrɔn ecitan de kɛ lɛ wɔ́ɛn nɛ̀n nɛ́n?”

²²Zhezü mrɛ́n nɛ̀n ɔmùan le: “Ke dú kɛ me ji le nɛ̀n dù hàn kɩ mɛ̀n vru mɛ̀n và hô, kɛ crɛ nyan mɛ́n hán? Vɛ tɛn ɛ̀ kɛ́n mɛ̀n ɛsɛ̀n!”

²³Ankà ndɔ lɔ, zɛtɛn bonyi anwrɔn nɛ́n muan-ẅì hɔ̀n granmɛ̀n le, ɛsɛ̀nkɛn-wrɔn léyi Zhezü kɛ cüɛ̀n nɔn ke sɩ̀ wù. Annanwɔrɛ mɛ̀n lɔ, Zhezü kè sɩ̀ dɔ̀ Piɛrɛ̀n le: “Nɛ́n sɩ̀ wù”, tɛ́n nɛ̀n dɔ̀ le: “Ke dú kɛ me ji le nɛ̀n kɔrɛ̀ nɛ̀n dù hàn kɩ mɛ̀n vru mɛ̀n và hô, kɛ crɛ nyan mɛ́n hán?”

²⁴Ɛsɛnkɛn-wrɔn ndɔ lɔ, nɛ́n de nɛ́n dɔ̀ kɩ nɛ̀n merɛ̀n ankà ndɔ hɔ̀n lɔ fɛn, kɩ bɔ̀ nyri ɔmu le ankà léyi nɛ́n dɔ̀ nɔn dú annànwɔrɛ.

²⁵Zhezü hán ɛci bobrebe ndɔ hɔ̀n. Ke dú kɛ ye merɛ́n ankà zri zri, me tro le ɛnhibù ke sɩ̀ cɔ́ ɛyri kɛ hɛ́n ɛwrú hɔ̀n lɔ fɛn.