Read Alladian Zhan 3 Bible Online

Zhan 3 - Alladian bible

Zhan 3

¹Ɔwrɔn tɔ̀n ndù ye bi nɛ̀n Nikodɛmɛ̀n, nɛ́n mán ɛnyanmàn-sùva-wá-bɔ̀ mɛhi yɔ hán eci zri kɩ nɛ̀n dú Zhüifɛ̀n-bɔ̀ fra-wrɔn tɔ̀n.

²Nɛ́n và cɔ́ Zhezü ɛnnyran tɔ̀n mɛ̀n kɩ nɛ dɔ́ yi le: “Ankà-yé-wrɔn, bɔ́ nyrí ɔmu le, Ɔwɔ de wá mɛ́n ɔkɔhɔ̀n ɛ̀ và yé bɔ̀ ankà nɔn; ɔmuhi ɔwrɔn zriɛmɛ́n ke sɩ̀ hán anvɛmɛ̀n-frɛ́n-ci kɛ̀ hán ɔmu le ɛ hán nɔn, ke dú kɛ Ɔwɔ mɛhi yɔ sɩ̀ dùɛ.”

³Zhezü mrɛ́n nɛ̀n ɔmùan le: “Hɛ̀ɛ̀, mɛ dɔ́ mɛ́n annanwɔrɛ mɛ̀n le: ɔwrɔnẅì zriɛmɛ́n ke sɩ̀ kán Anhobɩ́ Nɛ̀ncüì-dúyri lɔ ke dú kɛ ye sɩ̀ sàn bî nɛ̀n.”

⁴Nikodɛmɛ̀n ke yrɛ nɛ̀n le: “Anhɔntan de ɔwrɔn léyi srɔ ecüìcüì nɔn, ye le vru yɛ sàn bî nɛ̀n nɛ́n? Nɛ́n sɩ̀ vru ɛmɛẅi nɛ̀n hɔ́n nɛ́n muan mɛntɛ̀ mɛ̀n, ô ye bî nɛ̀n andɛ̀n anhyrɛmɛ̀n?”

⁵Zhezü mrɛ́n ɔmùan le: “Hɛ̀ɛ̀, mɛ dɔ́ mɛ́n annanwɔrɛ mɛ̀n le: ɔwrɔn zriɛmɛ́n ke sɩ̀ bru Anhobɩ́ Nɛ̀ncüì-dúyri ke dú kɛ ye sɩ̀ sàn bî nɛ̀n ɛnshiemɛ̀n mán Ɛnhɛ́n Prɔnprɔn mɛ̀n.

⁶Eci léyi antà-dùwru ke bî nɔn, dú ɔwrɔnẅì; eci léyi Ɔwɔ Hɛ́n Prɔnprɔn ke bî nɔn, dú ɛnhɛ́n.

⁷Ke bɩ́ frɛ́n mɛ́n anvɛmɛ̀n ɔmuhi mɛ̀n dɔ́ mɛ́n le: ‘Nyɛ́n lɔ fɛn ke ji le yɛ sàn bî nyɛ̀n owrù.’

⁸Ɛndɔnwrɔ̀n kɛ cüɛ́n ɛyri léyi ne ji nɔn; ɛ yá n'ɛcüɛ́n mùan, tɛ́n e sɩ́ nyri ɛyri léyi nɛ́n dù nɛ và, mán ɛyri léyi nɛ hɔ̀n nɔn. Nyàn eci léyi kɛ wɔɛ́n tán ɔwrɔn totɔtɔ̀n léyi ye bî Ɔwɔ Hɛ́n mɛ̀n nɔn.”

⁹Zɛtɛn Nikodɛmɛ̀n kɛ dɔ́ nɛ̀n le: “Anwɔntan de eci-hán ndɔ lɔ kɛ lɛ hán tɛ̀ nɛ́n?”

¹⁰Zhezü mrɛ́n nɛ̀n ɔmùan le: “È dú ankà-yé-wrɔn vri Izraɛlɛ̀n anmàn, kɩ è sɩ̀ nyrì ɛci ndɔ hɔ̀n lɔa?

¹¹Annanwɔrɛ mɛ̀n mɛ dɔ́ mɛ́n le: bɔ́ dɔ́ ɛci hɔ̀n léyi bɔ́ nyrì nɔn y'ankà, kɩ bɔ́ di dalɛfuɛ eci léyi bɔ́ kàn nɔn wú, tɛ́n nyɛ́n sɩ́ ji nyɛ́n bɩ́ bɔ́ dalɛfuɛ-di-ankà lɔ.

¹²Nyɛ́n sɩ́ bú m'ankà nyɛ́n tán ankaẅì ɛnvra léyi mɛ dɔ́ nyɛ̀n ɛnhibù ẅú ci hɔ̀n ankà; zɛtɛn anhɔntan de nye le bù m'ankà nyɛ́n tán ankaẅì, ke dú kɛ mɛ dɔ́ nyɛ̀n anhobɩ́ ci hɔ̀n ankà nɛ́n?

¹³Ɔwrɔn zriɛmɛ́n kɛ vá hɔ́n anhobɩ́ mrìmrì, ke dú kɛ kè sì dù ɔwrɔnẅì Ẅì léyi dú anhobɩ kakɛ nɔn!

¹⁴Ɔmu zri léyi Mohizì bɩ́ ɛtɛ̀ she kɛ́n pritù lɛbrì ɛwú ɛnnuwì nɔn, ɔmu zri lɔ de ke ji le, yɛ kɛ́n ɔwrɔnẅì Ẅì mán ɛwú nɔn,

¹⁵ô ɔwrɔn totɔtɔ̀n léyi ke bú n'ankà kɛ tán ankaẅì nɔn, kɛ̀ cɔ́ ɛwúvà léyi ke sɩ́ trɔa nɔn.

¹⁶Ɔmuhi Ɔwɔ zeze cüɛ́n ɛnhibù-wú-bɔ̀ kɩ nɛ̀n tán yɔ n'Ɛnẅì zri lɔ, ô ɔwrɔn totɔtɔ̀n léyi kɛ ẅɛn n'ankaẅì-bùtan nɔn ke bɩ́ wúɛ, tɛ́n nɛ̀n cɔ́ ɛwúvà léyi ke sɩ́ trɔa nɔn.

¹⁷Ɔwɔ kè sɩ̀ wá n'Ɛnẅì ɔkɔhɔ̀n ɛnhibù wú, ô nɛ̀n bɔ̀ ɛnhibù nwù, tɛ́n ne ji le ɛnhibù kɛ cɔ́ ebɩ̀die n'eyri.

¹⁸Ɔwrɔn léyi ke bú Ɛnẅì lɔ ankà kɛ tán ankàẅì nɔn, ye sɩ̀ bɔ́ nɛ̀n nwù; tɛ́n, ɔwrɔn léyi ké sɩ́ bútan ankàẅì nɔn, yɛ gɔ́ bɔ́ nɛ̀n nwùɛ, ɔmuhi nɛ̀n sɩ̀ bù Ɔwɔ Ẅì zri lɔ ankà nɛ̀n tàn ankaẅì nɔn.

¹⁹Nyàn ɛyri léyi nwù bɔ̀ lɔ ke cì kɛ và nɔn: ɛyri-kàn vá ɛnhibù wú, kɩ anwrɔnẅì kɛ cüɛ́n ɛyri-yɔwɔ vrán ɛyri-kàn, ɔmuhi yɔ hán eci gbangbàn nɔn.

²⁰Ɔwrɔn totɔtɔ̀n léyi kɛ hán eci gbangbàn nɔn, nɛ́n sɩ́ cüɛ́n ɛyri-kàn, kɩ nɛ́n sɩ́ vá ɛyri-kán mɛ̀n, ɔmuhi ɛnjansù kɛ ẅɛn nɛ̀n kɩ nɛ́n sɩ́ ji le ɛci gbangbàn hɔ̀n léyi nɛ hán nɔn, kɛ̀ srɔ ɛwú.

²¹Tɛ́n ɔwrɔn léyi kɛ hán eci léyi dú annanwɔrɛ nɔn, nɛ vá ɛyri-kán mɛ̀n, ô yɛ kán anvrɛnvrɛn mɛ̀n le, n'eci-hán-ci hɔ̀n lɔ fɛn ke dú Ɔwɔ wá mɛ̀n.”

²²Ndɔ lɔ n'ɛmɛẅi lɔ, Zhezü mán n'ɛsɛ̀nkɛn-bɔ̀ mɛhi hɔ́n Zhüde kpɔsɔ wú. Yɔ dú nanvrɛn lɔ ɛnvra jan, kɩ Zhezü kɛ wá anwrɔn ɛnshi ɛnkru.

²³Zhan mán kɛ wá yɔ ɛnshi ɛnkru Enɔn anmàn, Salimɛ̀n tɛ̀sɛ̀n, ɔmuhi nanvrɛn lɔ ɛnshi bobrebe dù nɔn. Anwrɔn ke ji nɛ̀n kɛ và kɩ nɛ wá yɔ ɛnshi ɛnkru.

²⁴Annànwɔrɛ mɛ̀n lɔ hɩ vra lɔ, yɛ vá wá Zhan anwɔn-mɛ̀n-wá-wɔn mɛ̀n.

²⁵Zɛtɛn Zhan sɛ̀nkɛn-bɔ̀ mán Zhüifɛ̀n-wrɔn tɔ̀n mɛhi dú ecüìwrɔn mɛ̀n y'edomɛ̀n fì ankà kruhú.

²⁶Yɔ hɔ́n Zhan ɛtɛ̀sɛ̀n kɩ yɔ dɔ́ nɛ̀n le: “Ankà-yé-wrɔn, ke bru mɛ́n hɛ́n, ɔwrɔn léyi nɛ́n mɛhi nyɛ́n nyɔn Zhurdɛn mɛẅi, hɩ ɛ dɔ́ bɔ̀ n'ankà nɛ́n? Zɛtɛn, nɛ wá anwrɔn ɛnshi ɛnkru, kɩ yɔ lɔ fɛn yɔ hɔ́n n'eyri!”

²⁷Zhan mrɛ́n yɔ ɔmùan le: “Ɔwrɔn zriɛmɛ́n ke sɩ̀ ẅɛn ɛci zriɛmɛ́n rɔ́, ke dú kɛ Ɔwɔ kè sì tán nɛ̀n.

²⁸Nyɛ́n dùku nye le di dalɛfuɛ tɛ̀ le, mɛ́n dɔ̀ le: ‘Mɛ̀n sɩ̀ dù ebɩdie-wrɔn, tɛ́n mɛ̀n dú n'ezìwú kɔ̀hɔ̀n-wá-wrɔn.’

²⁹Ɛnnyɔnwrɔn-nɛ́n-cüì lɔ, nɛ́n de eyri-hi lɔ dú nɛ tɛn nɔn; tɛ́n ɛnnyɔnwrɔn-nɛ́n-cüì nɛ́n nyran anvrɛn kɛ nyɔn nɛ̀n ɛtɛ̀sɛ̀n kɩ ke die nɛ̀n nukùɛ, kɩ ke dú pɔpüɛ̀-brá mɛ̀n ɛnvra léyi nɛ yá ɛnnyɔnwrɔn-nɛ́n-cüì sùva lɔ nɔn. Pɔpüɛ̀-brà ndɔ lɔ dú mɛ tɛn, kɩ zɛtɛ̀ lɔ nɛ̀n sá nmùɛn.

³⁰Ke ji le Zhezü bɩdì lɔ kè sevri, ô mɛ tɛn lɔ kɛ̀ cɛcɛ.”

³¹“Ɔwrɔn léyi dú anhobɩ́ và nɔn, nɛ̀n dú eci lɔ fɛn ɛwú; ɔwrɔn léyi dú ɛnhibù-wú-wrɔn nɔn, nɛ̀n dú ɛnhibù-wú-ci kɩ nɛ dɔ́ ɛnhibù wú ankà. Ɔwrɔn léyi dú anhobɩ́ và nɔn, nɛ̀n dú eci lɔ fɛn ɛwú;

³²Ne di dalɛfuɛ ɛci léyi nɛ́n kàn, mán hɩ léyi nɛ̀n yá nɔn hɩ wú, tɛ́n ɔwrɔn zriɛmɛ́n ke sɩ́ bɩ́ nɛ́n dalɛfuɛ-dì lɔ.

³³Ɔwrɔn léyi ke shri nɛ́n dalɛfuɛ-dì lɔ nɔn, ke yé tán le Ɔwɔ kɛ dɔ́ ankà annanwɔrɛ.

³⁴Ɔwrɔn léyi Ɔwɔ wá ɔkɔhɔ̀n nɔn kɛ dɔ́ Ɔwɔ-mùanwú-ankà, ɔmuhi Ɔwɔ kɛ tán nɛ̀n kokroho n'Ɛnhɛ́n lɔ nɔn.

³⁵Ɛnẅì nɛ́n zi kɛ cüɛ́n Ɛnẅì, kɩ tán nɛ̀n ɛkɔrɛ̀srɔn eci lɔ fɛn mɛ̀n.

³⁶Ɔwrɔn léyi ke bú Ɛnẅì lɔ ankà kɛ tán ankaẅì nɔn, nɛ cɔ́ ɛwúvà léyi ke sɩ́ trɔa nɔn. Ɔwrɔn léyi ke sɩ̀ die Ɛnẅì lɔ nukùɛ nɔn, ke sɩ̀ cɔ́ ɛwúvà ndɔ lɔ, tɛ́n ne le dú Ɔwɔ mɛ̀nhyì krugbɛ̀n.”