Read Alladian Zhan 4 Bible Online

Zhan 4 - Alladian bible

Zhan 4

¹Ɛnyanmàn-sùva-wá-bɔ̀ yá yɛ dɔ̀ le Zhezü kɛ hán yɛ wá anwrɔn ɛnshi ɛnkru kɩ nɛ́n mán nɛ wá anwrɔn ɛnshi ɛnkru kɛ vrán Zhan. (Annanwɔrɛmɛ̀n lɔ, Zhezü dùku ke sɩ́ wá anwrɔn ɛnshi ɛnkru, tɛ́n n'ɛsɛ̀nkɛn-bɔ̀ de kɛ wá anwrɔn ɛnshi ɛnkru nɔn.) Ɛnvra léyi Zhezü yá ankà léyi anwrɔn kɛ dɔ̀ nɔn, nɛ̀n cɔhɔ́ Zhüde kpɔsɔ wú kɩ nɛ̀n vru ɛmɛẅi nɛ̀n hɔ́n Galile kpɔsɔ wú.

⁴Ɛhɔ́nmɛ̀n lɔ, ke ji le nɛ̀n ci Samari kpɔsɔ wú.

⁵Nɛ̀n cɔ́ anmàn tɔ̀n dú Samari tɛsɛ̀n, ye bi Sisharɛ̀n, kɩ Sisharɛ̀n dú Zhakɔbɛ̀n kɛ̀tɛ̀ léyi tán n'ɛnẅì Zhozɛfɛ̀n nɔn ɛtɛsɛ̀n.

⁶Nanvrɛn de Zhakɔbɛ̀n mrɛ́n ovrú nɔn. Zhezü nán esù, edù kà, kɩ yɛ́ ovrú mùan. Ncɔ́ ɛnbri shɛ́n mùan mɛ̀n.

⁷Samari anmàn nyɔnwrɔn tɔ̀n vá ɛnshi woɛ-yri kɩ Zhezü kɛ dɔ́ nɛ̀n le: “Tán mɛ̀n ɛnshi mɛ̀n mì.”

⁸(N'ɛsɛnkɛn-bɔ̀ hɔ́n dú anmàn ɛci-wɔ́-yri.)

⁹Samari anmàn nyɔnwrɔn lɔ kɛ dɔ́ Zhezü le: “Zhüifɛ̀n-wrɔn dú mɛ́n! Anhɔntan kɛ̂ ɛ sɔ́n ɛkɔrɛ̀ angbàn ɛ dɔ́ mɛ̀n le, mɛ̀n tán mɛ́n ɛnshi è mì, mɛ̀n léyi mɛ̀n dú Samari anmàn nyɔnwrɔn nɛ́n?” (Annanwɔrɛ mɛ̀n lɔ, Zhüifɛ̀n-bɔ̀ mán Samari anmàn-bɔ̀ mɛhi ke sɩ́ hán eci zri).

¹⁰Zhezü mrɛ́n nɛ̀n ɔmùan le: “Ke dú kɛ è nyri eci léyi Ɔwɔ kɛ tán nɔn, kɩ è nyri ɔwrɔn léyi kɛ sán mɛ́n ɛnshi kè mì nɔn, vɛ́n de ɛ lɛ gɔ̀ sán nɛ̀n ɛnshi kɩ nɛ lɛ tán mɛ́n ɔkɔrɛ shi.”

¹¹Ɛnnyɔnwrɔn lɔ kɛ dɔ́ nɛ̀n le: “Ankà-yé-wrɔn, è sɩ̀ ẅɛ̀n sonu, kɩ ovru lɔ mán vrɛ́n. Anwɔntan de ɛ lɛ hán, ô ɛ̀ cɔ́ ɔkɔrɛ shi nɛ́n?

¹²Bɔ́ nancüì Zhakɔbɛ̀n tán bɔ̀ ovrú ndɔ lɔ; nɛ́n dùku mán nɛ̀n mi ovrú lɔ n'ɛmɛ̀n shi, n'ɛẅì hɔ̀n mán, n'annɔ̀n mán mi ɛnshi lɔ. E tro le vɛ́n de è sevri ɛ̀ vrán Zhakɔbɛ̀n nɛ́n?”

¹³Zhezü mrɛ́n nɛ̀n ɔmùan le: “Ɔwrɔn totɔtɔ̀n léyi ke le mi ɛnshi ndɔ lɔ nɔn, ɛnshi mùanwù ke le vru kɛ lɛ ẅɛn nɛ̀n,

¹⁴tɛ́n ɔwrɔn léyi ke le mi ɛnshi léyi mɛ lɛ tán nɛ̀n nɔn, ɛnshi mùanwù ke sɩ̀ vru ẅɛn nɛ̀n mrìmrì. Ɔmuhi, ɛnshi léyi mɛ lɛ tán nɛ̀n nɔn, kɛ lɛ srɔ ɛnshi-bɛ léyi ɛwúvà léyi ke sɩ̀ trɔa nɔn ke le dú nɛ̀n ɛmɛ̀n kɛ̀ gbɛ́ nɔn.”

¹⁵Ɛnnyɔnwrɔn lɔ kɛ dɔ́ nɛ̀n le: “Ankà-yé-wrɔn, tán mɛ̀n ɛnshi ndɔ lɔ, ô ɛnshi mùanwù ke bɩ́ vru ẅɛn mɛ̀n hàn, ô mɛ́n vru mɛ́n vá ɛnshi wúyɛ-yri ɛnu lɔ.”

¹⁶Zhezü kɛ dɔ́ nɛ̀n le: “Ɛ̀ hɔ̀n bi ecüì, ô è vru ɛ̀ vá ɛnu lɔ.”

¹⁷Ɛnnyɔnwrɔn lɔ mrɛ́n nɛ̀n ɔmùan le: “Mɛ̀n sɩ̀ ẅɛ̀n ɛncɔnwrɔn.” Kɩ Zhezü kɛ dɔ́ nɛ̀n le: “V'ankà zrɔ, ɔmuhi ɛ dɔ̀ le è sɩ̀ ẅɛ̀n ɛnconwrɔn nɔn;

¹⁸ɔmuhi ɛ gɔ̀ ẅɛn wucɔ̀ ɛnrì, kɩ ɛncɔnwrɔn léyi nɛ́n mɛhi nyɛ́n dú zɛtɛ̀ lɔ nɔn, kè sɩ̀ dù ecüì. Ɛ̀ dɔ́ mɛ̀n ankà annanwɔrɛ.”

¹⁹Zɛtɛn, ɛnnyɔnwrɔn lɔ kɛ dɔ́ nɛ̀n le: “Ankà-yé-wrɔn, mɛ kán ɔmu le è dú Ɔwɔ-mùanwú-ankà-dɔ́-wrɔn tɔ̀n.

²⁰Bɔ́ nancüì hɔ̀n Samari-bɔ̀ sɛ́n Ɔwɔ ɛnkpò ndɔ lɔ wú, kɩ nyɛ́n Zhüifɛ̀n-bɔ̀ nyɛ dɔ̀ le, ɛyri léyi ke ji le yɛ sɛ́n Ɔwɔ nɔn dú Zherüzalɛmɛ̀n anmàn.”

²¹Zhezü mrɛ́n nɛ̀n ɔmùan le: “È Bú m'ankà ɛ̀ tán ankaẅì, ɛnvra kɛ lɛ và, nyɛ́n sɩ̀ vru sɛ́n Ɔwɔ ɛnkpò ndɔ lɔ wú mán Zherüzalɛmɛ̀n anmàn.

²²Nyɛ́n Samari-bɔ̀, nyɛ́n sɩ̀ nyrì eci léyi nyɛ sɛ̀n nɔn; bɔ́, Zhüifɛ̀n-bɔ̀, bɔ̀ nyri eci léyi bɔ́ sɛ̀n nɔn, ɔmuhi ɛnkrukɔrɛ̀ dú Zhüifɛ̀n-bɔ̀ yri và nɔn.

²³Tɛ́n ɛnvra kɛ và, kɩ ɛnvra lɔ mán cɔ̀a, kɩ Ɔwɔ-sɛ́n-bɔ̀ annanwɔrɛ hɔ̀n lɔ, kɛ lɛ sɛ́n Ɔwɔ Zi ɛnhɛ́n mɛ̀n mán annanwɔrɛ mɛ̀n; ɔmuhi Ɔwɔ ke ji le Ɔwɔ-sɛ́n-bɔ̀ kè cüe nɛ̀n ankɔrɛ̀ ezìwú ɔmu lɔ nɔn.

²⁴Ɔwɔ dú ɛnhɛ́n, kɩ yɔ hɔ̀n léyi kɛ sɛ́n nɛ̀n nɔn, ke ji le kɛ̀ sɛ́n nɛ̀n ɛnhɛ́n mɛ̀n mán annanwɔrɛ mɛ̀n.”

²⁵Ɛnnyɔnwrɔn lɔ kɛ dɔ́ Zhezü le: “Mɛ̀n nyri ɔmu le Ebɩ̀die-wrɔn (Krisì) kɛ lɛ và. Ɛnvra léyi nɛ lɛ và nɔn, nɛ lɛ dɔ́ bɔ̀ ankà lɔ fɛn.”

²⁶Zhezü mrɛ́n nɛ̀n ɔmùan le: “Mɛ̀n dú Ebɩ̀die-wrɔn, mɛ̀n léyi mɛ dɔ́ mɛ́n ankà nɔn.”

²⁷Hɩ vra lɔ, Zhezü sɛ̀nkɛn-bɔ̀ lɔ vru ɛmɛẅi và; kɩ yɔ dú anvɛmɛ̀n-frɛ́n-mɛ̀n, ɛnvra léyi yɔ kán nɛ̀n, ɛnnyɔnwrɔn mɛhi yɔ dɔ́ ankà nɔn. Kɩ ɔwrɔn zriɛmɛ́n y'ɛmɛ̀n lɔ ke sɩ́ ẅɛn ɔmùan ke yrɛ nɛ̀n le: “Ecitan e ji n'eyriɛ?” kàle “Ecitan kruhú kɛ vɛ́n mán nɛ́n mɛhi nyɛ dɔ́ ankà?”

²⁸Zɛtɛn, ɛnnyɔnwrɔn lɔ tezɛ n'ɛnshi sî lɔ ovru tɛ̀sɛ̀n, kɩ vru ɛmɛẅi hɔ́n anmàn, kɛ dɔ́ anwrɔn le:

²⁹“Nyɛ́n và nyɛ́n nyan ɔwrɔn tɔ̀n léyi dɔ́ mɛ̀n m'eci lɔ fɛn léyi mɛ̀n hán nɔn. Nɛ́n de ne le dú Ebɩdie-wrɔn lɔ nɛ́n?”

³⁰Zɛtɛn yɔ dú anmàn yɔ srɔ ɛntrɛ, kɩ yɔ vá cɔ́ Zhezü.

³¹Hɩ vra lɔ mɛ̀n Zhezü sɛnkɛn-bɔ̀ kɛ sɛ́n nɛ̀n, nɛ̀n zî ɛci: “Ankà-yé-wrɔn, e zî ɛciɛ!”

³²Tɛ́n Zhezü mrɛ́n yɔ ɔmùan le: “Ɛci-zî dú mɛ̀n, kɩ nyɛ́n sɩ̀ nyrì ɛci léyi me le zî nɔn.”

³³N'ɛsɛnkɛn-bɔ̀ lɔ ke yrɛ y'edomɛ̀n le: “Ɔwrɔn tɔ̀n vá sɩ́ nɛ̀n ɛciɛ?”

³⁴Zhezü kɛ dɔ́ yɔ le: “M'ɛci-zî dú hɩ le mɛ lɛ hán ɔwrɔn léyi wá mɛ̀n ɔkɔhɔ̀n nɔn n'ɛkɔrɛzì-ci, ô ɔkɔhɔ̀n léyi nɛ̀n tán mɛ̀n nɔn, mɛ̀n trɔ n'ɛhán.

³⁵Nyɛ tɛn nyɛ dɔ̀ le: ‘Okù anzɔ̀ kɩ ɛci-kuɛ vra kɛ lɛ cɔ̀.’ Mɛ tɛn, mɛ dɔ́ nyɛ̀n le, nyɛ́n nyan ankɛ̀tɛmɛ̀n anvrɛnvrɛn: ɛci wɔ́n, krɔn ɛkuɛ!

³⁶Ɔwrɔn léyi kɛ kuɛ ɛci nɔn, nɛ cɔ́ n'ɔwɔɛ̀n-dì, kɩ nɛ bɔrɛ ɛci ɛkru ô ke dú ɛwúvà léyi ke sɩ́ trɔa nɔn tɛ́n; ɔmu lɔ de ɛci-tɛ́-wrɔn mán ɛci-kuɛ-wrɔn kɛ bɔ́sɔ̀ kɛ brá pɔpüɛ̀ nɔn.

³⁷Ɔmuhi annanwɔrɛ dú nyandrɛn léyi kɛ dɔ̀ le: ‘Ɔwrɔn tɔ̀n kɛ tɛ́ ɛci, kɩ ɔtɔ̀n kɛ kuɛ.’

³⁸Mɛ̀n wá nyɛ̀n ɔkɔhɔ̀n nyɛ́n hɔ̀n nyɛ́n kuɛ ɛci ɛkɛ̀tɛ̀ tɔ̀n léyi nyɛ́n sɩ̀ hàn ɔkɔhɔ̀n ɛmɛ̀n nɔn; anwrɔn nyàntɛn hán ɔkɔhɔ̀n ɛkɛ̀tɛ̀ lɔ mɛ̀n, kɩ nyɛ́n cɔ́ y'ɔkɔhɔ̀n lɔ nɛ́n vɔ̀nshɛ́.”

³⁹Samari-bɔ̀ bobrebe bú Zhezü ankà tán ankaẅì ɔmuhi ɛnnyɔnwrɔn lɔ dɔ́ yɔ le: “Nɛ̀n dɔ̀ mɛ̀n eci lɔ fɛn léyi mɛ́n hán nɔn.”

⁴⁰Hɩ le kruhú de, ɛnvra léyi Samari-bɔ̀ vá nɛ̀n ɛtɛsɛ̀n nɔn, yɔ sɛ́n nɛ̀n, ô nɛ̀n cɔ́ yɔ mɛhi yɔ yɛ́; kɩ Zhezü yɛ́ nanvrɛn lɔ di ɛbi-anhyrɛ̀.

⁴¹Yɔ dú anwrɔn bobrebe léyi bútan ankaẅì, nɛ́n dùku n'ankà léyi nɛ dɔ̀ nɔn hɩ kruhú;

⁴²kɩ yɔ dɔ́ ɛnnyɔnwrɔn lɔ le: “Zɛtɛn, bɔ́ bútan ankaẅì, ankà léyi ɛ̀ dɔ́ bɔ̀, mán hɩ léyi bɔ́ dùku bɔ̀ yá nɔn, tɛ́n, ɔmuhi bɔ́ dùku bɔ̀ yá, kɩ bɔ̀ nyri ɔmu le, ɔwrɔn lɔ dú ɛnhibù wú Bɩdie-wrɔn annanwɔrɛ nɔn.”

⁴³Ɛnvra léyi nɛ̀n di ɛbi-anhyrɛ̀ Samari-bɔ̀ anmàn nɔn, Zhezü cɔhɔ́, kɩ hɔ́n Galile kpɔsɔ wú.

⁴⁴Zhezü dùku dɔ̀ le: “Ɔwɔ-mùanwú-ankà-dɔ́-wrɔn ke sɩ̀ ẅɛ̀n ɛwá nɛ́n dùku n'anmàn.”

⁴⁵Ɛnvra léyi nɛ̀n bru Galile kpɔsɔ wú nɔn, nanvrɛn anmàn bɔ̀ ẅɛn nɛ̀n anvrɛnvrɛn, ɔmuhi yɔ mán yɔ hɔ́n Zherüzalɛmɛ̀n abutùkumɛ́n-kɔ́ nyanmán-bì lɔ mɛ̀n, kɩ yɔ kán eci lɔ fɛn léyi nɛ̀n hán ɔkoran ndɔ lɔ mɛ̀n nɔn.

⁴⁶Nɛ̀n vru ɛmɛẅi nɛ̀n vá Kana anmàn, Galile kpɔsɔ wú, ɛyri léyi nɛ̀n bɩ́ ɛnshi nɛ̀n crɔn ɛntàn nɔn. Nanvrɛn lɔ govran kɔhɔ̀n-hán-wrɔn cüìcüì tɔ̀n, ẅɛn n'ɛnẅì tɔ̀n ɛncɔnwrɔn-ẅì, ɛnlɔẅiɛ kɛ dà dú Kapɛrnahümɛ̀n.

⁴⁷Ɛnvra léyi nɛ̀n yá le Zhezü dú Zhüde kpɔsɔ wú vá Galile kpɔsɔ wú nɔn, nɛ́n hɔ̀n nɛ́n cɔ́ yi kɩ nɛ sɛ́n yi kɛ vá Kapɛrnahümɛ̀n, ô kɛ̀ kɔrɛ n'ɛnẅì léyi dú owúemɛ̀n nɔn.

⁴⁸Zhezü kɛ dɔ́ nɛ̀n le: “Ɛnvra lɔ fɛn nyɛ́n sɩ̀ bùtan ankàẅì ke dú kɛ nyɛ́n sɩ̀ kàn anvɛmɛ̀n-frɛ́n-ci mán eci-woran-ci!”

⁴⁹Govran kɔhɔ̀n-hán-wrɔn lɔ mrɛ́n nɛ̀n ɔmùan le: “Ankà-yé-wrɔn và m'eyri ɛbemɛ̀n yakɛ m'ɛnẅì lɔ kè wù.”

⁵⁰Zhezü kɛ dɔ́ nɛ̀n le: “Hɔ́n ɛbemɛ̀n, v'ɛnẅì lɔ dú ɔkɔrɛ mɛ̀n.” Ɔwrɔn lɔ bú Zhezü ankà tán ankaẅì kɩ hɔ̀n.

⁵¹Nɛ̀n dú ɛnlevri nɛ hɔ́n ɛbemɛ̀n kɩ n'ɛci-bɩtan-bɔ̀ wrɔ nɛ̀n nvà, kɩ kɛ dɔ́ nɛ̀n le: “V'ɛnẅì lɔ dú ɔkɔrɛ mɛ̀n!”

⁵²Ne yrɛ yɔ wacɛ̀n wú léyi ɛnẅì lɔ dú edùsɔmɛ̀n nɔn, kɩ yɔ mrɛ́n nɛ̀n ɔmùan le: “Ncɔ́ ɔwɔɛmɛ̀n wacɛ̀n zri, ɛnɛ́n lɔ, ɛnvra léyi ɔwɔrɔ̀ cɔhɔ́ nɛ̀n edomɛ̀n nɔn.”

⁵³Zɛtɛn, ɛnẅì nɛ́n zi ke nyri ɔmu le, wacɛ̀n zri lɔ wú de Zhezü dɔ́ nɛ̀n le: “V'ɛnẅì lɔ dú ɔkɔrɛ mɛ̀n”. Kɩ nɛ́n mán n'ɛmɛ̀n-bɔ̀ mɛhi yɔ bú Zhezü ankà yɔ tán ankaẅì.

⁵⁴Ndɔ lɔ dú anvɛmɛ̀n-frɛ́n-ci léyi Zhezü hán anhyrɛmɛ̀n, ɛnvra léyi nɛ̀n dú Zhüde kpɔsɔ wú nɛ̀n vá Galile kpɔsɔ wú nɔn.