Read Alladian Ɔkɔ̀hɔ̀n-wá-bɔ̀ kɔ̀hɔ̀n hán 10 Bible Online

Ɔkɔ̀hɔ̀n-wá-bɔ̀ kɔ̀hɔ̀n hán 10 - Alladian bible

Ɔkɔ̀hɔ̀n-wá-bɔ̀ kɔ̀hɔ̀n hán 10

¹Ɔwrɔn tɔ̀n ye bi Kɔrnɛyì, dú Sezare anmàn, nɛ̀n dú ɛfrá-wrɔn Rɔmɛ̀n anhà-kɔ́n-fɛcüè tɔ̀n mɛ̀n, kɩ anhà-kɔ́n-fɛcüè ndɔ lɔ ye bi nɛ̀n “Itali anhà-kɔ́n-fɛcüè”.

²Kɔrnɛyì dú ankaẅì-bùtan-wrɔn léyi kɛ sɛ́n Ɔwɔ ɛnvra lɔ fɛn, nɛ́n mán n'ɛmɛ̀n-bɔ̀ mɛhi, kɩ nɛ̀n dú Ɔwɔ-sɛ́n-kɔ̀hɔ̀n-hán mɛ̀n. Kɔrnɛyì kɛ wá ɛmian-bɔ̀ léyi dú Zhuifɛ̀n fɛcüè lɔ mɛ̀n nɔn ɛkɔrɛ̀ bobrebe kɩ nɛ sɛ́n Ɔwɔ ɛnvra lɔ fɛn.

³Ɛnbì tɔ̀n ɔwɔɛmɛ̀n wacɛ̀n anhɔ̀n, Kɔrnɛyì cɔ́ Ɔwɔ-mɛ̀n-yri-kàn tɔ̀n: nɛ̀n kán Ɔwɔ-kùyüre-wrɔn tɔ̀n kpete bru nɛ̀n ɛbemɛ̀n kɩ kɛ dɔ́ nɛ̀n le: “Kɔrnɛyì!”

⁴Nɛ̀n nyan Ɔwɔ-kùyüre-wrɔn lɔ ɛnjansuemɛ̀n kɩ nɛ dɔ̀ le: “Ɛẅɛnwrɔn, ankà tán?” Ɔwɔ-kùyüre-wrɔn lɔ mrɛ́n nɛ̀n ɔmùan le: “Ɔwɔ yá v'Ɔwɔ-sɛ̀n lɔ kɩ kán ɛkɔrɛ̀ léyi ɛ wá ɛmian-bɔ̀ nɔn, kɩ v'ankà ke sɩ̀ yuru nɛ̀n esùva.

⁵Zɛtɛ lɔ, ɛ̀ wá anwrɔn ɔkɔ̀hɔ̀n kɛ̀ hɔ́n Zhafa anmàn ke bɩ́ ɔwrɔn tɔ̀n léyi ye bi Simɔn, hɩ n'anhyrɛmɛ̀n bɩ́ dú Piɛrɛ̀n nɔn kɛ̀ và.

⁶Nɛ̀n sɔ́n ebɩ́ ɔnɔn-wrú kɔ̀hɔ̀n-hán-wrɔn tɔ̀n léyi ye bi Simɔn, hɩ n'ɔwɔn dú ecüe gbàtà-mùan nɔn nanvrɛn ɛbemɛ̀n.”

⁷Ɛnvra léyi Ɔwɔ-kùyüre-wrɔn dɔ́ nɛ̀n ankà, hɩ hɔ̀n nɔn, Kɔrnɛyì bi n'eci-bɩtan-bɔ̀ lɔ anwrɔn anhyrɛ̀ mán gɔliɛ-wrɔn tɔ̀n léyi dú n'eci-bɩtan-kɔ̀hɔ́n mɛ̀n, hɩ dú Ɔwɔ-sɛ́n mɛ̀n ɛnvra lɔ fɛn nɔn, nvà.

⁸Nɛ̀n dɔ́ yɔ ankà lɔ fɛn léyi wɔ̀ɛn nɔn, zɛtɛn nɛ̀n hán yɔ hɔ́n Zhafa anmàn.

⁹Ɛcɛ̀n cüe ɛnvra léyi yɔ dú ɛnlevri yɔ hɔ̀n, hɩ yɔ sɔnbá Zhafa anmàn tɛ̀sɛ̀n nɔn, Piɛrɛ̀n ká ɔwɔn hɔ́n ɛwú, ɛnbri shɛ́n mùan mɛ̀n kɛ sɛ́n Ɔwɔ.

¹⁰Ɔmùanwù ẅɛn nɛ̀n kɩ ne ji ɛci nɛ̀n zî. Ɛnvra léyi ye dù yɛ gbrɛ́ n'ɛci-zî lɔ nɔn, nɛ̀n cɔ́ Ɔwɔ-mɛ̀n-yri-kàn tɔ̀n.

¹¹Nɛ̀n kán anhobɩ́ gbɛ́ ɔmùan kɩ eci tɔ̀n dú nɛ̀n ɛmɛ̀n kakɛ: ndù cá tɛbrɛ̀ wú càsa vri tɔ̀n léyi yɛ ẅɛn ɛnkru d'anzɔ̀ lɔ, hɩ kɛ vá ɛnhi nɔn.

¹²Kɩ n'ɛmɛ̀n lɔ, annan-anzɔ̀-nɔ̀n mɛ̀ntɛ-mɛntɛ̀ lɔ fɛn mán ɛnhibɩ́-wore-nɔ̀n mán annrɛ́n mɛ̀ntɛ-mɛntɛ̀ lɔ fɛn ndù.

¹³Esùva tɔ̀n kɛ dɔ́ nɛ̀n le: “Tɔhú, Piɛrɛ̀n, è wrì, ô è zî ɛci!”

¹⁴Tɛ́n Piɛrɛ̀n mrɛ́n ɔmùan le: “Hɔ̂, Ɛẅɛnwrɔn, ɔmuhi mɛ vá gɔ̀ zî ɛci hɔ̀n léyi ye sî, hɩ kɛ wá ɔwrɔn ɛnbrá edomɛ̀n nɔn.”

¹⁵Piɛrɛ̀n vru yá esùva lɔ kɛ dɔ́ nɛ̀n le: “E bɩ́ krɛ́ ɛnbramɛ̀n-ci eci léyi Ɔwɔ hán nfi nɔn.”

¹⁶Ndɔ lɔ hán andɛ̀n-anhɔ̀n, kɩ ɛnvra zri lɔ, eci lɔ vru hɔ́n anhobɩ́.

¹⁷Piɛrɛ̀n ke yrɛ n'edomɛ̀n le Ɔwɔ-mɛ̀n-yri-kàn ndɔ lɔ hɩ nɛ́n cɔ̀ nɔn, n'ɛmɛ̀n dú tɛ́ tán? Tɛ́n ɛnvra ndɔ lɔ mɛ̀n, anwrɔn léyi Kɔrnɛyì wá ɔkɔhɔ̀n nɔn ndú Simɔn wɔn lɔ n'eji yri, kɩ zɛtɛn yɔ nyɔn ebɩ́ gbàtà-mùan.

¹⁸Yɔ bi, kɩ yɔ yrɛ le: “Kɛ̂ ɔnu de Simɔn léyi ye bi Piɛrɛ̀n nɔn ndù nɛ́n?”

¹⁹Piɛrɛ̀n dú ankà-tro mɛ̀n, Ɔwɔ-mɛ̀n-yri-kàn léyi nɛ́n cɔ̀ nɔn hɩ wú, ɛnvra léyi Ɛnhɛ́n Prɔnprɔn dɔ́ nɛ̀n le: “E die nukùɛ, ɛnu lɔ anwrɔn anhɔ̀n ndù ke ji mɛ́n.

²⁰Tɔhú, kakɛ̀, hɔ̀n cɔ́ yɔ nyɛ́n hɔ̀n, e bɩ́ wá nyɔn hán, ɔmuhi mɛ̀n de mɛ̀n wá yɔ ɔkɔ̀hɔ̀n nɔn.”

²¹Zɛtɛn Piɛrɛ̀n kakɛ hɔ́n anwrɔn hɔ̀n lɔ ɛtɛ̀sɛ̀n kɩ kɛ dɔ́ yɔ le: “Mɛ̀n dú ɔwrɔn léyi nye ji nɔn. Cɛci kruhú nyɛ́n vàà?”

²²Yɔ mrɛ́n ɔmùan le: “Bɔ̀ vá ɛfrá-wrɔn Kɔrnɛyì bɩmɛ̀n. Nɛ̀n dú ɛnyrɔn-nan-wrɔn léyi kɛ wá Ɔwɔ, hɩ Zhüifɛ̀n-bɔ̀ lɔ fɛn kɛ cüɛ̀n nɔn. Ɔwɔ-kùyüre-wrɔn tɔ̀n wá tán nɛ̀n le nɛ̀n hán mɛ́n ɛ̀ và cɔ́ nɛ̀n ne yri ɛbemɛ̀n, ô nɛ̀n yá ankà léyi ɛ ẅɛ̀n ɛ lɛ dɔ́ nɛ̀n nɔn.”

²³Piɛrɛ̀n hán yɔ, yɔ bru ɛbemɛ̀n kɩ tán yɔ ɛdɛ́-yri ɛnnyran lɔ. Ɛcɛ̀n cüe, Piɛrɛ̀n cɔ́ yɔ, yɔ bɩ́ ɛnlevri yɔ hɔ̀n. Zhafa nɛ́n mùan-ẅì hɔ̀n jan hɔ́n sɩ́ nɛ̀n.

²⁴Ɛnbì léyi kɛ̀n nɔn, Piɛrɛ̀n bru Sezare anmàn. Kɔrnɛyì mán n'ɛmɛ̀n-bɔ̀ mán n'ɛnnyràn anvrɛnvrɛn hɔ̀n léyi nɛ̀n bi và nɔn, dú yɔ ɛvramɛ̀n.

²⁵Ɛnvra léyi Piɛrɛ̀n kɛ vá ɛbemɛ̀n bru yri nɔn, Kɔrnɛyì vá nɛ̀n ɛsù kɩ sɩ́ n'edomɛ̀n ɛnhi n'ezìwú, ô kè bi nɛ̀n nyan ɛwá vriemɛ̀n.

²⁶Tɛ́n Piɛrɛ̀n hán nɛ̀n, nɛ̀n tɔhú kɩ kɛ dɔ́ nɛ̀n le: “Tɔhú, ɔmuhi mɛ̀n mán ɔwrɔnẅi kɩ dú mɛ̀n nɔn.”

²⁷Zɛtɛn nɛ́n mán Kɔrnɛyì mɛhi yɔ dú ankà-dɔ́ mɛ̀n kɩ nɛ̀n bru anwɔn mɛ̀n. Nanvrɛn lɔ nɛ̀n cɔ́ anwrɔn bobrebe borɛkru.

²⁸Piɛrɛ̀n kɛ dɔ́ yɔ le: “Nyɛ́n nyri ɔmu le Zhüifɛ̀n-wrɔn kè sɩ̀ ẅɛ̀n ɛkɔrɛ̀-levri, n'Ɔwɔ-wɔn lɔ mɛ̀n, nɛ̀n hɔ̀n nyan ɛmɛ̀n-nyantɛn-wrɔn, hɩ ká kɛ́n n'ɛbemɛ̀n bru, n'Ɔwɔ nyanmàn lɔ ke sɩ́ tán nɛ̀n. Tɛ́n, Ɔwɔ yé mɛ̀n le mɛ́n bɩ́ krɛ́ ɔwrɔn zriɛmɛ́n ɛnbramɛ̀n-wrɔn léyi ye sɩ̀ hɔ̀n yɛ nyan rɔ́ nɔn.

²⁹Hɩ le kruhú de, ɛnvra léyi nyɛ́n bi mɛ̀n nɔn, mɛ̀n sɩ̀ wá nyɛ̀n ejüe, mɛ́n và. Zɛtɛn me ji mɛ̀n nyri eci le kruhú léyi nyɛ́n hán mɛ̀n, mɛ́n và nɔn.”

³⁰Kɔrnɛyì mrɛ́n ɔmùan le: “Nyàn ɛbi anhɔ̀n ndɔ, wacɛ̀n nzri lɔ mɛ̀n, ɛnbri-dɛ́n-mùan mɛ̀n wacɛ̀n anhɔ̀n, mɛ́n dú Ɔwɔ-sɛ́n mɛ̀n m'ɛbemɛ̀n. Kpatakpata lɔ, ɔwrɔn tɔ̀n léyi ẅɛn ɛci-gbrɛ́n-ci edomɛ̀n nɔn, nyɔn mɛ̀n ezìwúɛ

³¹kɩ kɛ dɔ́ mɛ̀n le: ‘Kɔrnɛyì, Ɔwɔ yá v'Ɔwɔ-sɛ̀n lɔ, kɩ ɛkɔrɛ̀ léyi ɛ̀ wá ɛmian-bɔ̀ nɔn ke sɩ̀ yuru nɛ̀n esùva.

³²Zɛtɛn ɛ̀ wá anwrɔn ɔkɔhɔ̀n Zhafa anmàn kɛ hɔ̀n ke bi Simɔn léyi ye bi Piɛrɛ̀n nɔn kɛ̀ và. Nɛ́n dú ɔnɔ̀n-wrú-kɔ̀hɔ̀n-hán-wrɔn Simɔn wɔn léyi dú ecüe gbàtà-mùan nɔn mɛ̀n.’

³³Kpatakpata lɔ, mɛ̀n wá anwrɔn ɔkɔ̀hɔ̀n kɛ̀ hɔ̀n ke ji mɛ́n, kɩ è shri tɛ̀ ɛ và. Zɛtɛ̀ lɔ, bɔ́ lɔ fɛn bɔ́ dú ɛnu Ɔwɔ zìwú, ô bɔ́ die ankà léyi Ɛẅɛnwrɔn wá tán mɛ́n ɛ̀ dɔ̀ nɔn nukùɛ.”

³⁴Zɛtɛn Piɛrɛ̀n bɩ́ ankà-dɔ̀ kɩ dɔ̀ le: “Zɛtɛ̀ lɔ, me nyri annanwɔrɛ le Ɔwɔ ke sɩ́ hán eci kɛ vɛ́n ɔwrɔn zriɛmɛ́n tɛ̀sɛ̀n:

³⁵Ɔwrɔn totɔtɔ̀n léyi dú ɛnbrɛ̀-nyantɛn-mɛ̀n-wrɔn, hɩ kɛ ẅɛn Ɔwɔ wá, kɩ kɛ hán ɛnnyrɔnnan-ci nɔn, ɔwrɔn ndɔ lɔ, nɛ̀n dú Ɔwɔ vɛ̀-cüɛn-ci.

³⁶Nɛ̀n yüre Izraɛlɛ̀n fɛcüè Zhezü krisì mɛẅi ankà wɔwɔ, Krisì léyi dú anwrɔn lɔ fɛn Ẅɛnwrɔn nɔn.

³⁷Nyɛ́n nyri eci léyi wɔɛn Galile kpɔsɔ wú, zɛtɛn Zhüde kpɔsɔ lɔ fɛn wú, ɛnvra léyi Zhan dɔ́ Ɔwɔ ankà, hɩ wá anwrɔn ɛnshi ɛnkru nɔn.

³⁸Nyɛ́n nyri ɔmu le Ɔwɔ hán Ɛnhɛ́n Prɔnprɔn kɔrɛ̀-srɔn vá Nazàrɛtɛ̀n-wrɔn Zhezü ɛwú. Nyɛ́n vru nyɛ́n nyri ɔmu le Zhezü hán ci ɛnhi anmàn lɔ fɛn wú, hán anvrɛn, kɩ kɔrɛ anwrɔn hɔ̀n lɔ fɛn léyi dú anwa-wrɔn kɔrɛ̀-levri wú, ɔmuhi nɛ́n mán Ɔwɔ mɛhi yɔ dù nɔn.

³⁹Bɔ́ tɛn eci lɔ fɛn léyi Zhezü hán Zhüifɛ̀n-bɔ̀ hi-wú anmàn mán Zherüzalɛmɛ̀n anmàn nɔn, bɔ́ dú nɛ́n dalɛfùɛ-di-bɔ̀. Yɔ hán nɛ̀n, nɛ̀n wú ɛgbàn-hán-tɛ̀ domɛ̀n.

⁴⁰Tɛ́n Ɔwɔ hán nɛ̀n, nɛ̀n vá ɔkɔrɛ-bɔ̀ mɛ̀n ɛbi anhɔnmɛ̀n-bì lɔ; Ɔwɔ kè sɩ̀ wá tán nɛ̀n, nɛ̀n bɩ̀ n'edomɛ̀n nɛ̀n yé

⁴¹fɛcüè lɔ fɛn, tɛ́n bɔ́ léyi Ɔwɔ gɔ́ mrɛ́n bɔ̀ nbɩ, hɩ bɔ́ dú dalɛfùɛ-di-bɔ̀ nɔn. Bɔ́ mán nɛ́n mɛhi bɔ́ zî ɛci, bɔ́ mi ɛnshi ɛnvra léyi Ɔwɔ sɩ́ nɛ̀n ɔkɔrɛ-bɔ̀ mɛ̀n nɔn.

⁴²Nɛ̀n wá tán bɔ̀, bɔ̀ dɔ́ fɛcüè Ɔwɔ ankà, ô bɔ̀ dɔ̀ le nɛ̀n dú ɔwrɔn léyi Ɔwɔ wá, ô kè ci ɔkɔrɛ-bɔ̀ mán owú-bɔ̀ ɛmrɛ̀n nɔn.

⁴³Ɔwɔ-mùanwú-ankà-dɔ́-bɔ̀ lɔ fɛn dɔ́ n'ankà le, ɔwrɔn totɔtɔ̀n léyi ke bú n'ankà kɛ tán ankaẅì nɔn, kɛ lɛ cɔ́ ɛgbàn-bɩce n'ebɩ́ kɔrɛ̀srɔn lɔ mɛ̀n.”

⁴⁴Ɛnvra léyi Piɛrɛ̀n dú ankà-dɔ́ mɛ̀n nɔn, Ɛnhɛ́n Prɔnprɔn kakɛ anwrɔn lɔ fɛn léyi ke die nɛ̀n nukùɛ nɔn ɛwú.

⁴⁵Krisì sɛ̀nkɛn-bɔ̀ léyi dú Zhüifɛ̀n-bɔ̀, hɩ cɔ́ Piɛrɛ̀n mɛhi yɔ và nɔn, dú anvɛmɛ̀n-frɛ́n mɛ̀n, ɔmuhi yɔ kán ɔmu le Ɛnhɛ́n Prɔnprɔn léyi Ɔwɔ tán nɔn bonyi anwrɔn hɔ̀n léyi ke sɩ̀ dù Zhüifɛ̀n-bɔ̀ nɔn mán ɛwú.

⁴⁶Annanwɔrɛmɛ̀n lɔ, yɔ yá yɔ, yɔ dɔ́ ankà ɛnbrɛ̀ nyàntɛn mɛ̀n, kɩ yɔ mrɛ́n Ɔwɔ vrisì lɔ. Zɛtɛn Piɛrɛ̀n kɛ dɔ̀ le:

⁴⁷“Bɔ́ lɛ ẅɛn anwrɔn ndɔ hɔ̀n lɔ y'ɛnshi-kru-wá lɔ bɔ̀ sɔhɔ́ tɛ̀a, zɛtɛ̀ léyi yɔ cɔ́ Ɛnhɛ́n Prɔnprɔn hán bɔ́ hɔ́ nɛ́n?”

⁴⁸Kɩ Piɛrɛ̀n wá tán yɔ, yɔ wá yɔ ɛnshi ɛnkru Zhezü Krisì bɩmɛ̀n. Zɛtɛn yɔ sɛ́n Piɛrɛ̀n kɛ̀ cɔ́ yɔ mɛhi yɔ yɛ́ ɛnvra jan.