Read Alladian Ɔkɔ̀hɔ̀n-wá-bɔ̀ kɔ̀hɔ̀n hán 11 Bible Online

Ɔkɔ̀hɔ̀n-wá-bɔ̀ kɔ̀hɔ̀n hán 11 - Alladian bible

Ɔkɔ̀hɔ̀n-wá-bɔ̀ kɔ̀hɔ̀n hán 11

¹Ɔkɔ̀hɔ̀n-wá-bɔ̀ mán anwrɔn-nɛ́n-muan-ẅì hɔ̀n léyi dú Zhüde kpɔsɔ wú nɔn, yá le anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn mán cɔ́ Ɔwɔ ankà-dɔ̀.

²Ɛnvra léyi Piɛrɛ̀n vru ɛmɛẅi vá Zherüzalɛmɛ̀n anmàn nɔn, Krisì sɛ̀nkɛn-bɔ̀ léyi dú Zhüifɛ̀n-bɔ̀ nɔn, kɛ hán nɛ̀n ɛnhyürɛ̀

³kɩ yɔ dɔ̀ le: “È bru anwrɔn hɔ̀n léyi ye sɩ̀ ẅì wúcɔ̀-domɛ̀n nɔn ɛbemɛ̀n kɩ ɛ̀ cɔ́ yɔ mɛhi nyɛ́n zî ɛci!”

⁴Zɛtɛn Piɛrɛ̀n dɔ́ yɔ cɛcɛ ɛci hɔ̀n lɔ fɛn léyi wɔ̀ɛn nɔn. Zɛtɛn nɛ dɔ́ yɔ le:

⁵“Mɛ̀n dú Zhafa anmàn, Ɔwɔ-sɛ́n mɛ̀n kɩ mɛ̀n cɔ́ Ɔwɔ-mɛ̀n-yri-kàn tɔ̀n. Mɛ̀n kán eci tɔ̀n dú ɛwú kɛ kakɛ vá mɛ̀n ɛtɛsɛ̀n: eci tɔ̀n ndù hán tɛbrɛ̀ wú càsa vri tɔ̀n léyi yɛ ẅɛn ɛnkru d'anzɔ̀ lɔ, kɩ dú anhobɩ́ kɛ vá ɛnhi, kɩ vá mɛ̀n ɛtɛ̀sɛ̀n kpɛtɛ̂.

⁶Mɛ̀n nyan esùva-wá mɛ̀n, eci lɔ mɛ̀n kɩ mɛ̀n kán annan-anzɔ̀-nɔ̀n, ɛnhibɩ́-wore-nɔ̀n mán annrɛn.

⁷Mɛ̀n yá esùva tɔ̀n kɛ dɔ́ mɛ̀n le: ‘Tɔhú, Piɛrɛ̀n, è wrì, ô è zî ɛci!’

⁸Tɛ́n mɛ̀n mrɛ́n ɔmùan le: ‘Hɔ̂! Ɛẅɛnwrɔn, ɔmuhi ɛnbì zriɛmɛ́n ɛnbrá mɛ̀n ci kɛ vá bru m'ɔmùan lɔ mɛ̀n mrìmrì nɔn.’

⁹Esùva lɔ vru dú anhobɩ́ kɛ dɔ́ mɛ̀n le: ‘E bɩ́ krɛ́ ɛnbramɛ̀n-ci eci léyi Ɔwɔ hán fì nɔn.’

¹⁰Ndɔ lɔ wɔɛn andɛ̀n-anhɔ̀n, zɛtɛn eci lɔ fɛn vru hɔ́n anhobɩ́.

¹¹Tɛ́n ɛnvra zri lɔ mɛ̀n, anwrɔn anhɔ̀n vá bru ɛbemɛ̀n ɛyri léyi bɔ́ dù nɔn: ye dú Sezare anmàn yɛ wá yɔ ɔkɔhɔ̀n me yri.

¹²Ɛnhɛ́n Prɔnprɔn kɛ dɔ́ mɛ̀n le, mɛ̀n cɔ́ yɔ mɛhi bɔ̀ hɔ̀n, mɛ́n bɩ́ wá nyɔn han. Amwrɔn-nɛ́n-muan-ẅì hɔ̀n owùle léyi mɛ̀n sɩ́ ɔnu lɔ nɔn, hɔ́n sɩ́ mɛ̀n Sezare anmàn, kɩ bɔ́ lɔ fɛn bɔ́ bru Kɔrnɛyì wɔn lɔ mɛ̀n.

¹³Kɔrnɛyì dɔ́ bɔ̀ ɔmu le nɛ̀n hàn nɛ̀n kán Ɔwɔ-kùyüre-wrɔn tɔ̀n léyi nyɔn n'ɔwɔn lɔ mɛ̀n, kɩ kɛ dɔ́ nɛ̀n le: ‘Wà anwrɔn ɔkɔ̀hɔ̀n Zhafa anmàn, ô kɛ̀ hán Simɔn léyi ye bi Piɛrɛ̀n nɔn kɛ̀ và.

¹⁴Nɛ lɛ dɔ́ mɛ́n ankà léyi kɛ lɛ tán mɛ́n ɛnkrukɔrɛ̀, vɛ́n mán v'ɛmɛ̀n-bɔ̀ lɔ fɛn mɛhi.’

¹⁵Mɛ̀n bukru mɛ dɔ́ ankà ɛnvra léyi Ɛnhɛ́n Prɔnprɔn kakɛ yɔ ɛwú, hán ɔmu léyi Ɛnhɛ́n Prɔnprɔn kakɛ bɔ̀ ɛwúɛ ɛnkrubɔmɛ̀n lɔ nɔn.

¹⁶Zɛtɛn ankà léyi Ɛẅɛnwrɔn dɔ̀ nɔn, bru mɛ̀n: ‘Zhan bɩ́ ɛnshi wá anwrɔn ɛnkru, tɛ́n nyɛ tɛn, Ɛnhɛ́n Prɔnprɔn mɛ̀n de yɛ lɛ wá nyɛ̀n ɛnshi ɛnkru nɔn.’

¹⁷Ɔmu zri lɔ de Ɔwɔ ce yɔ eci zri léyi nɛ̀n tán bɔ̀, ɛnvra léyi bɔ̀ bú Ɛẅɛnwrɔn Zhezü Krisì ankà bɔ̀ tán ankaẅì nɔn: antɔnwrɔn de dú mɛ̀n, hɩ mɛ lɛ kɛ́n Ɔwɔ ezì nɛ́n?”

¹⁸Ɛnvra léyi yɔ yá ankà ndɔ hɔ̀n lɔ trɔ nɔn, yɔ sɩ́ y'edomɛ̀n ɛnhi kɩ yɔ mrɛ́n Ɔwɔ yɔ dɔ̀ le: “Dú annanwɔrɛ, Ɔwɔ tán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, mán ɛkɔrɛ̀levri kɛ̀ crɔn ɛnkru ô kɛ̀ cɔ́ ɛwúvà annanwɔrɛ.”

¹⁹Owù-gbànkàn léyi srɔ ɛnvra léyi ye wri Etiɛnɛ̀n nɔn, hán tán kɩ ankaẅì-bùtan-ẅɛn-bɔ̀ lɔ bonyì. Y'ɛmɛ̀n lɔ ɛnjanbɔ̀ hɔ́n Fenisi kpɔsɔ wú, Shiprɛ̀n mán Antiɔshɛ̀n anmàn, tɛ́n Zhüifɛ̀n-bɔ̀ kɩ yɔ dɔ́ Ɔwɔ ankà.

²⁰Ɔmu tɛ̀kɩ, ankaẅì-bùtan-ẅɛn-bɔ̀ jan léyi dú Shiprɛ̀n mán Sirɛnɛ̀n anmàn nɔn, hɔ́n Antiɔshɛ̀n anmàn kɩ kɛ dɔ́ anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, Zhezü mɛẅi Ankà Ankrankran lɔ.

²¹Ɛẅɛnwrɔn kɔrɛ̀-srɔn dú yɔ ɛmɛ̀n kɩ anwrɔn bobrebe bú Ɛẅɛnwrɔn ankà tán ankaẅì, kɩ yɔ crɔn ɛnkru.

²²Zherüzalɛmɛ̀n anmàn Wɔ-fɛcüè-bɔ̀ yá ɛmɛẅi ankà ndɔ lɔ. Zɛtɛn yɔ wá Barnabasɛ̀n ɔkɔ̀hɔ̀n hɔ́n antiɔshɛ̀n anmàn.

²³Ɛnvra léyi nɛ̀n cɔ́ nanvrɛn, hɩ nɛ̀n kán ɔmu le Ɔwɔ fú ankaẅì-bùtan-ẅɛn-bɔ̀ lɔ ɛnshi nɔn, nɛ̀n dú pɔpüɛ̀ mɛ̀n kɩ ne yɩ́ yɔ lɔ fɛn edù, ô yɔ di ɔmùan zri Ɛẅɛnwrɔn tɛ̀sɛ̀n.

²⁴Annànwɔrɛ mɛ̀n lɔ Barnabasɛ̀n dú ɔwrɔn anvrɛnvrɛn léyi Ɛnhɛ́n Prɔnprɔn yɩ́ edomɛ̀n, hɩ ẅɛn ankaẅì-bùtan nɔn. Anwrɔn bobrebe shri bɩ́ Ɛẅɛnwrɔn ankà lɔ.

²⁵Zɛtɛn, Barnabasɛ̀n hɔ́n Tarsɛ̀n anmàn, ô kè ji Sɔlɛ̀n.

²⁶Ɛnvra léyi nɛ̀n cɔ́ yi nɔn, nɛ̀n sɩ́ yi Antiɔshɛ̀n anmàn. Yɔ, anwrɔn anhyrɛ̀ lɔ, yɔ di ɛnnànwàn kru zri Antiɔshɛ̀n Wɔ-fɛcüè-wɔn lɔ mɛ̀n, kɩ yɔ yé anwrɔn bobrebe ankà, ankaẅì-bùtan mɛ̀n. Antiɔshɛ̀n anmàn de, ɛnvrakpà yɛ wá ɛsɛ̀nkɛn-bɔ̀ ebɩ́, Krisì-sɛ̀nkɛn-bɔ̀ nɔn.

²⁷Hɩ vra lɔ, Ɔwɔ-mùanwú-ankà-dɔ́-bɔ̀ dú Zherüzalɛmɛ̀n hɔ́n Antiɔshɛ̀n anmàn.

²⁸Y'ɛmɛ̀n lɔ ɔwrɔn tɔ̀n ye bi Agabüsɛ̀n, tɔhú kɩ, Ɛnhɛ́n Prɔnprɔn bɩmɛ̀n kɛ dɔ̀ le, ɛnvra cá mɛ̀n ebrè vri tɔ̀n kɛ lɛ kɛ́ ɛnhibù mùmù lɔ fɛn wú. Ebrè ndɔ lɔ kɛ́ ɛnvra léyi ɛnnɛ̀ncüì Klodɛ̀n ẅɛn ɛyri nɔn.

²⁹Ɛsɛ̀nkɛn-bɔ̀ zɛtɛn wá le, ɔwrɔn wrɔn kɛ̀ tán eci léyi nɛ́n ẅɛ̀n nɔn, ô ye bɩ yɛ wá anwrɔn-nɛ́n-muan-ẅì hɔ̀n léyi dú Zhude kpɔsɔ wú nɔn ɛkɔrɛ̀.

³⁰Eci ndɔ lɔ de yɔ hán nɔn, kɩ yɔ bɩ́ ɛcice-ci ndɔ hɔ̀n lɔ yɛ tán Barnabasɛ̀n mán Sɔlɛ̀n kɛ̀ hɔ̀n sɩ́ Ɔwɔ-fɛcüè-cüìcüì-bɔ̀ léyi dú Zhüde kpɔsɔ wú nɔn.