Read Alladian Ɔkɔ̀hɔ̀n-wá-bɔ̀ kɔ̀hɔ̀n hán 15 Bible Online

Ɔkɔ̀hɔ̀n-wá-bɔ̀ kɔ̀hɔ̀n hán 15 - Alladian bible

Ɔkɔ̀hɔ̀n-wá-bɔ̀ kɔ̀hɔ̀n hán 15

¹Anwrɔn jan dú Zhüde kpɔsɔ wú vá Antiɔshɛ̀n anmàn kɩ bukru ke yé yɔ muan-ẅì hɔ̀n ankà-yé ndɔ lɔ: “Nyɛ́n sɩ̀ cɔ́ ɛnkru-kɔrɛ̀ ke dú kɛ ye sɩ̀ wì nyɛ̀n wúcɔ̀-domɛ̀n hán ɔmu le Mohizì nyanmàn wá tán nɔn.”

²Pɔlɛ̀n mán Barnabasɛ̀n mɛhi kè sɩ̀ shrìɛ kè bɩ̀ ankà ndɔ lɔ kɩ ɛcüìwrɔn vri tɔ̀n bru yɔ angranmɛ̀n ankà ndɔ lɔ kruhú. Zɛtɛn yɛ wá le Pɔlɛ̀n, Barnabasɛ̀n mán Antiɔshɛ̀n anmàn-bɔ̀ jan kɛ lɛ hɔ́n Zherüzalɛmɛ̀n anmàn, ô yɔ cɔ́ ɔkɔ̀hɔ̀n-wá-bɔ̀ mán ɛcüìcüì-bɔ̀ yɔ dɔ́ ankà ndɔ lɔ.

³Ɔwɔ-fɛcüè-bɔ̀ wá yɔ ɛkɔrɛ̀ yɔ nɛ̀nnyanmàn hɔ̀n lɔ mɛ̀n. Yɔ ci Fenisi mán Samari kpɔsɔ wú, yɔ dɔ́ ɔmu le anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, crɛ ezì kɛ́n Ɛẅɛnwrɔn nɔn: ɛmɛẅi ankà ndɔ lɔ tán anwrɔn-nɛ́n-muan-ẅì hɔ̀n lɔ, pɔ̀püɛ̀-brà vri.

⁴Ɛnvra léyi yɔ bru Zherüzalɛmɛ̀n anmàn nɔn, Ɔwɔ-fɛcüè-bɔ̀ ɔkɔ̀hɔ̀n-wa-bɔ̀ mán ɛcüìcüì-bɔ̀ ẅɛn yɔ anvrɛnvrɛn, kɩ yɔ dɔ́ yɔ eci léyi Ɔwɔ cí y'ɛmɛ̀n hán nɔn.

⁵Tɛ́n Ɔwɔ-nyanmàn-sùva-wá-bɔ̀ jan léyi srɔ ankaẅì-bùtan-ẅɛn-bɔ̀ nɔn, bɩ́ ankà kɩ kɛ dɔ̀ le: “Ke ji le ankaẅì-bùtan-ẅɛn-bɔ̀ léyi kè sɩ̀ dù Zhüifɛ̀n-bɔ̀ nɔn, kè wí wúcɔ̀-domɛ̀n, ô yɔ wá Mohizì nyanmàn lɔ.”

⁶Ɔkɔ̀hɔ̀n-wá-bɔ̀ mán ɛcüìcüì-bɔ̀ borɛkru, ô kɛ̀ crɛ́n ankà ndɔ lɔ mɛ̀n.

⁷Ɛnvra léyi yɔ wrɔ́n ecüì sheshe trɔ nɔn, Piɛrɛ̀n bɩ́ ankà-dɔ̀ kɩ kɛ dɔ̀ le: “Anwrɔn-nɛ́n-muan-ẅì hɔ̀n, nyɛ́n nyri ɔmu le ɛnvra sheshemɛ̀n de ny'ɛmɛ̀n lɔ, Ɔwɔ mrɛ́n mɛ̀n bɩ, ô mɛ̀n dɔ́ anwrɔn hɔ̀n léyi ke sɩ̀ dù Zhüifɛ̀n-bɔ̀ nɔn, Ɛmɛẅi ankà Ankrankran lɔ, ô yɔ cɔ̀ yɔ yá, ô yɔ ẅɛn ankaẅì-bùtan.

⁸Kɩ Ɔwɔ léyi nyri anwrɔnẅì ɛnbɔrɛ mɛ̀n ankà-tro nɔn, yé le nɛ̀n bɩ́ yɔ kɩ nɛ̀n tán yɔ Ɛnhɛ́n Prɔnprɔn hán ɔmu le nɛ̀n tán bɔ́ mán nɔn.

⁹Nɛ̀n sɩ̀ mrɛ́n ɔwrɔn zriɛmɛ́n nɛ̀n tèze hɛ̀: nɛ̀n fi y'ɛnbɔrɛ lɔ, ɔmuhi yɔ ẅɛn ankaẅì-bùtan nɔn.

¹⁰Zɛtɛn zɛtɛ lɔ, ecitan kruhú kɛ nyɛ wɔɛn Ɔwɔ nyɛ nyan, kɩ nye ji nyɛ́n wɔrɔ ankaẅì-bùtan-ẅɛn-bɔ̀ léyi kè sɩ̀ dù Zhüifɛ̀n-bɔ̀ nɔn, ɛnlowru léyi nyɛ́n nancüì hɔ̀n mán nyɛ́n mumù nyɛ́n sɩ̀ wɔrɔ rɔ́ nɛ́n?

¹¹Tɛ́n bɔ́ nyri ɔmu le, Ɛẅɛnwrɔn Zhezü boafɔ̀n mɛ̀n de bɔ̀ cɔ́ ebɩdie zri lɔ hán yɔ hɔ́ nɔn.”

¹²Zɛtɛn, fɛcüè lɔ fɛn kɛ́n ɔmùan hɛ́n kɩ ye die Barnabasɛ̀n mán Pɔlɛ̀n nukùɛ kɛ dɔ́ anvɛmɛ̀n-frɛ́n-ci mán eci-woroan-ci hɔ̀n lɔ fɛn léyi Ɔwɔ ci y'ɛmɛ̀n hán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn.

¹³Ɛnvra léyi yɔ dɔ́ ankà trɔ nɔn, Zhakɛ̀n bɩ́ ankà-dɔ̀ kɩ kɛ dɔ̀ le: “Anwrɔn-nɛ́n-muan-ẅì hɔ̀n, nyɛ́n die mɛ̀n nukùɛ!

¹⁴Simɔn dɔ́ ɔmu le, ɛnkrubɔmɛ̀n lɔ, Ɔwɔ wá anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn esùvá, ô nɛ̀n mrɛ́n y'ɛmɛ̀n lɔ, fɛcüè tɔ̀n léyi ke le dú nɛ tɛn nɔn nɛ̀n bɩ.

¹⁵Kɩ Ɔwɔ-mùanwú-ankà-dɔ́-bɔ̀ ankà-dɔ̀ hɔ̀n lɔ, kè dú nzri, hɩ mán ankà ndɔ lɔ mɛhi, ɔmuhi Owrú Prɔnprɔn kɛ dɔ̀ le:

¹⁶‘Ɛẅɛnwrɔn kɛ dɔ̀ le, hɩ mɛẅi lɔ, me le vru mɛ̀n và, ô mɛ̀n sàn ku Davidɛ̀n wɔn léyi gbe nɔn, me le bɩ́ n'ɛci hɔ̀n léyi jrɛ́ cüe nɔn kɩ mɛ lɛ sàn nyrɔn ɔwɔn lɔ.

¹⁷Zɛtɛn anwrɔnẅì lɔ fɛn kɛ lɛ ji Ɛẅɛnwrɔn, hɛ̀ɛ̀, ɛnhi wú anmàn lɔ fɛn léyi mɛ́n bɩ, ô kè dú mɛ tɛn nɔn. Nyàn ankà léyi Ɛẅɛnwrɔn kɛ dɔ̀,

¹⁸nɛ́n léyi nɛ̀n hán ye nyri n'ankà-tro ci-hán ɛnvra sheshemɛ̀n nɔn.’

¹⁹Zhakɛ̀n vru kɛ dɔ̀ le, hɩ le kruhú de mɛ cüɛ̀n le, ye bɩ́ di anwrɔn hɔ̀n léyi kè sɩ̀ dù Zhüifɛ̀n-bɔ̀, hɩ kɛ kɛ́n Ɔwɔ ɛsɛ̀n nɔn ejüe.

²⁰Tɛ́n bɔ̀ merɛ́n yɔ owrú bɔ̀ dɔ́ yɔ le, yɔ bɩ́ rá ɛnbramɛ̀n nɔ̀n léyi ye ce antɛ̀-buri-Wɔ nɔn, yɔ bɩ́ kɛ́n eci gbàngbàn ci-hán ɛsɛ̀n, ô yɔ bɩ́ rá annɔ̀n hɔ̀n léyi ye sɩ̀ wì esùva hɩ ye wri antamɛ̀n nɔn, yɔ bɩ́ mi ɔnɔ̀n krɛ̀ mán.

²¹Ɔmuhi, ɛnbìɛhɛ̂n vra lɔ, anwrɔn kɛ dɔ́ Mohizì nyànmàn ankà anmàn lɔ fɛn mɛ̀n, kɩ yɛ krɛ́ ɛnyànmàn wrú lɔ ɛnyanmán-bì lɔ fɛn Ɔwɔ-sɛ́n-wɔn hɔ̀n lɔ mɛ̀n nɔn.”

²²Zɛtɛn ɔkɔ̀hɔ̀n-wá-bɔ̀ mán ɛcüìcüì-bɔ̀ mán Ɔwɔ fɛcüè-bɔ̀ lɔ fɛn wá le yɛ mrɛ́n anwrɔn janbɔ̀ y'ɛmɛ̀n lɔ, ô yɛ wá yɔ ɔkɔ̀hɔ̀n, yɔ mán Pɔlɛ̀n mán Barnabasɛ̀n yɔ hɔ́n Antiɔshɛ̀n anmàn. Yɔ mrɛ́n Zhüdɛ̀n léyi ye bi Barsabasɛ̀n mán Silasɛ̀n, yɔ anwrɔn anhyrɛ̀ lɔ, yɔ ẅɛn ɛkɔrɛ̀-levri anwrɔn-nɛ́n-muan-ẅì hɔ̀n mɛ̀n.

²³Nyàn owrú léyi yɔ merɛ́n yɔ tán yɔ, yɔ hɔ̀n nɔn: “Ɔkɔ̀hɔ̀n-wá-bɔ̀, mán ɛcüìcüì-bɔ̀, nyɛ́n muan-ẅì hɔ̀n ke bi nyɛ̀n nyan; nyɛ́n léyi nyɛ́n sɩ̀ dù Zhüifɛ̀n-bɔ̀, hɩ nyɛ́n dú Antiɔshɛ̀n anmàn, Siri mán Silisi kpɔsɔ wú nɔn.

²⁴Bɔ̀ yá le anwrɔn dú bɔ́ anmàn nvà, wá nyɛ̀n ejüe, ku nyɛ̀n ɛnkrɛ̀ta y'ankà-dɔ́ mɛ̀n. Bɔ̀ sɩ̀ tán yɔ ɛkɔrɛ̀-levri zriɛmɛ́n ankà ndɔ lɔ wú.

²⁵Hɩ le kruhú de ɔmùan-krɔn mɛ̀n lɔ, bɔ̀ mrɛ́n anwrɔn bɔ̀ yüre nyɛ̀n. Yɔ lɛ hɔ̀n sɩ́ bɔ́ nyran-anvrɛn hɔ̀n Barnabasɛ̀n mán Pɔlɛ̀n

²⁶léyi vá y'ɛwúvà zrɛ́n yri, bɔ́ Ɛẅɛnwrɔn Zhezü-krisì kɔhɔ̀n hán lɔ mɛ̀n nɔn.

²⁷Bɔ́ yüre nyɛ̀n Zhüdɛ̀n mán Silasɛ̀n léyi kɛ lɛ dɔ́ nyɛ̀n yɔ mumù ankà léyi bɔ̀ merɛ́n owrú lɔ mɛ̀n nɔn.

²⁸Annànwɔrɛ mɛ̀n lɔ bɔ́ mán Ɛnhɛ́n Prɔnprɔn mɛhi bɔ̀ wá le bɔ́ sɩ̀ tán nyɛ̀n ɛnlowru zriɛmɛ́n nyɛ́n wɔrɔ ke dú kɛ kè sɩ̀ dù eci-hán-ci hɔ̀n léyi ke ji le nyɛ̀n ẅɛ̀n nyɛ́n hɛ́n hɩ dú eci krugbɔ́ nɔn:

²⁹ye bɩ́ rá annɔ̀n léyi ye ce antɛ̀-buri-Wɔ nɔn; ye bɩ́ rá ɛnkrɛ̀; ye bɩ́ rá ɛnɔ̀n léyi ye wri antamɛ̀n nɔn; ye bɩ́ hán eci gbàngbàn. Nyɛ́n wá ny'edomɛ̀n esùvá ɛci ndɔ hɔ̀n lɔ fɛn yɔ hán tɛ̀sɛ̀n. Anwrɔn-nɛ́n-muan-ẅì hɔ̀n mɛ̀n, bo bi nyɛ̀n nyan!”

³⁰Zɛtɛn yɛ tán ɔkɔ̀hɔ̀n-wá-bɔ̀ léyi yɛ mrɛ́n nɔn ɛkɔrɛ̀levri bɩ́ Antiɔshɛ̀n anmàn levri nhɔ̀n. Yɔ bɔrɛ ankaẅì-bùtan-ẅɛn-bɔ̀ lɔ fɛn ɛkru kɩ yɔ tán yɔ owru léyi ye merɛ́n nɔn.

³¹Yɛ krɛ́ owrú lɔ kɩ anwrɔn lɔ fɛn dú pɔpüɛ̀ mɛ̀n, edùyi ankà léyi dú nɛ̀n ɛmɛ̀n nɔn kruhú.

³²Zhüdɛ̀n mán Silasɛ̀n mumù léyi dú Ɔwɔ-mùanwú-ankà-dɔ́-bɔ̀ nɔn dɔ́ anwrɔn-nɛ́n-muan-ẅì hɔ̀n lɔ ankà sheshe, ô kɛ̀ tán yɔ edùyi mán ecüì ankàẅì-bùtan mɛ̀n.

³³Yɔ dú nanvrɛn lɔ ɛnvra cá, zɛtɛn anwrɔn-nɛ́n-muan-ẅì hɔ̀n sán ɛnlevri wɔwɔ tán yɔ kɩ yɔ vru ɛmɛẅi yɔ hɔ́n cɔ́ anwrɔn hɔ̀n léyi wá yɔ ɔkɔ̀hɔ̀n nɔn. [

³⁴Tɛ́n Silasɛ̀n wá le nɛ lɛ yɛ́ nanvrɛn anmàn lɔ.]

³⁵Tɛ́n, pɔlɛ̀n mán Barnabasɛ̀n yɛ́ Antiɔshɛ̀n anmàn. Yɔ mán anwrɔn brobebe nyantɛn mɛhi, yɔ yé kɩ yɔ dɔ́ Ɛẅɛnwrɔn mùanwú-ankà.

³⁶Ɛnvra jan vacì Pɔlɛ̀n kɛ dɔ́ Barnabasɛ̀n le: “Bɔ̀ vru ɛmɛẅi bɔ̀ hɔ̀n bɔ̀ nyan anwrɔn-nɛ́n-muan-ẅì hɔ̀n léyi dú anmàn hɔ̀n lɔ fɛn léyi bɔ̀ dɔ́ Ɛẅɛnwrɔn ankà, ô bɔ̀ nyan ɔmu le yɔ dù nɔn.”

³⁷Barnabasɛ̀n ke ji kè bɩ́ Zhan léyi ye bi Markɛ̀n nɔn, kɛ̀ cɔ́ yɔ mɛhi yɔ hɔ̀n;

³⁸tɛ́n Pɔlɛ̀n kè sɩ̀ shrìɛ, ɔmuhi Markɛ̀n teze yɔ Panfili kpɔsɔ wú, kɩ nɛ̀n sɩ̀ vrù hɔ̀n sɩ̀ yɔ y'ɔkɔ̀hɔ̀n hán lɔ mɛ̀n nɔn.

³⁹Yɔ ẅɛn ecüìwrɔn vri tɔ̀n, hán tán kɩ yɔ gbɛ́ angranmɛ̀n ɔmùan. Barnabasɛ̀n bɩ́ Markɛ̀n, kɩ yɔ bɩ́ ɛhɛ̀ yɔ hɔ́n Shiprɛ̀n hi wú,

⁴⁰tɛ́n pɔlɛ̀n mrɛ́n Silasɛ̀n nbɩ kɩ ɛnvra léyi anwrɔn-nɛ́n-muan-ẅì hɔ̀n bɩ́ yɔ wá Ɛẅɛnwrɔn antamɛ̀n nɔn, yɔ hɔ̀n.

⁴¹Yɔ ci Siri mán Silisi hi-nan wú kɩ yɔ wá Ɔwɔ-fɛcüè-bɔ̀ ecüì edù, ô ankaẅì-bùtan kɛ̀ ẅɛn yɔ ecüì.