Read Alladian Ɔkɔ̀hɔ̀n-wá-bɔ̀ kɔ̀hɔ̀n hán 18 Bible Online

Ɔkɔ̀hɔ̀n-wá-bɔ̀ kɔ̀hɔ̀n hán 18 - Alladian bible

Ɔkɔ̀hɔ̀n-wá-bɔ̀ kɔ̀hɔ̀n hán 18

¹Ɛnvra vacì, Pɔlɛ̀n dú Atɛnɛ̀n anmàn hɔ́n Korɛntɛ̀n anmàn.

²Nɛ̀n cɔ́ Zhüifɛ̀n-wrɔn tɔ̀n ye bi Akilasɛ̀n, kɩ ye bî nɛ̀n Pɔn kpɔsɔ wú: nɛ́n mán nɛ́n hi Prisilɛ̀n mɛhi yɔ dú Itali ɛnhi-nan wú yɔ và, ɔmuhi ɛnnɛ̀ncüì Klodɛ̀n wá tán Zhüifɛ̀n-bɔ̀ lɔ fɛn kɛ cɔhɔ́ Rɔmɛ̀n anmàn nɔn. Pɔlɛ̀n hɔ́n cɔ́ yɔ

³kɩ, ɔmuhi nɛ́n mán Yɔ mɛhi yɔ ẅɛn ɔkɔhɔ̀n zri lɔ nɔn (yɔ hán ɛcàsa-wɔn), nɛ̀n yɛ́ y'ebɩ́ lɔ mɛ̀n, ô nɛ̀n hán ɔkɔhɔ̀n nanvrɛn.

⁴Ɛnyanmán-bì lɔ fɛn Pɔlɛ̀n ke bɩ́ ankà-dɔ̀ Ɔwɔ-sɛ́n-wɔn lɔ mɛ̀n kɩ ke ji ɛyri ô nɛ̀n hán Zhüifɛ̀n-bɔ̀ mán Grɛkɛ̀n-bɔ̀ kɛ̀ crɔn ɛnkru.

⁵Ɛnvra léyi Silasɛ̀n mán Timote dú Maseduhanɛ̀n kpɔsɔ wú nvà nɔn, Pɔlɛ̀n dú ɛnvra lɔ fɛn Ɔwɔ-ankà-dɔ́ mɛ̀n; nɛ dɔ́ Zhüifɛ̀n-bɔ̀ zìwú le Zhezü dú Ebɩ̀die-wrɔn.

⁶Tɛ́n Zhüifɛ̀n-bɔ̀ lɔ kɛ kɛ́n nɛ̀n ezì kɩ kɛ wora nɛ̀n; zɛtɛn nɛ̀n korɛ n'ɛceci wɔ̀n lɔ nɛ̀n ku yɔ ɛwú kɩ nɛ dɔ́ yɔ le: “Ke dú kɛ nyɛ zrɛ́n hô, nyɛ́n dùku de nyɛ́n hán nɔn. Ke sɩ̀ dù m'ankà. Zɛtɛ̀ lɔ mɛ lɛ hɔ́n anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn y'edúyri.”

⁷Zɛtɛn Pɔlɛ̀n cɔhɔ́ nanvrɛn kɩ hɔ́n cɔ́ ɔwrɔn tɔ̀n ye bi Titihüsɛ̀n Zhüstüsɛ̀n. Nɛ sɛ́n Ɔwɔ kɩ n'ɔwɔn lɔ dú Ɔwɔ-sɛ́n-wɔn lɔ ɛtɛ̀sɛ̀n.

⁸Kripüsɛ̀n léyi dú Ɔwɔ-sɛ́n-wɔn lɔ n'ɔwrɔn cüìcüì nɔn mán n'ɛmɛ̀n-bɔ̀ lɔ fɛn ẅɛn ankaẅì-bùtan Ɛẅɛnwrɔn wú. Korɛntɛ̀n anmàn-bɔ̀ bobrebe léyi ke die Pɔlɛ̀n nukùɛ nɔn mán ẅɛn ankaẅì-bùtan kɩ yɛ wá yɔ ɛnshi ɛnkru.

⁹Ɛnnyran tɔ̀n, Pɔlɛ̀n cɔ́ Ɔwɔ-mɛ̀n-yri-kàn tɔ̀n kɩ Ɛẅɛnwrɔn kɛ dɔ́ nɛ̀n le: “Ɛnjansù ke bɩ́ ẅɛn mɛ́n, tɛ́n ɛ̀ dɔ́ ankà ɛnvra lɔ fɛn, e bɩ́ kɛ́n ɔmùan ɛ hɛ́n hán,

¹⁰ɔmuhi anmàn ndɔ lɔ mɛ̀n, bobrebe dú anwrɔn hɔ̀n léyi dú mɛ tɛn nɔn.”

¹¹Pɔlɛ̀n yɛ́ ɛnnànwàn zri mán ɛcá Korɛntɛ̀n anmàn; nɛ dɔ́ anwrɔn lɔ fɛn Ɔwɔ-mùan-ankà.

¹²Ɛnvra léyi Galiɔn dú Romɛ̀n govràn Ashahi kpɔsɔ wú nɔn, Zhüifɛ̀n-bɔ̀ ẅɛn ɔmùan-krɔn, ô yɔ kɛ́n Pɔlɛ̀n ezì. Yɔ sɩ́ nɛ̀n ɛmrɛ̀nci-bɔ̀ zìwú

¹³kɩ yɔ dɔ̀ le: “Ɔwrɔn ndɔ lɔ ke ji kɛ̀ hán anwrɔn kɛ̀ sɛ́n Ɔwɔ kɛ̀ vɛ̀n, hán ɔmu le ɛnyanmàn ke sɩ̀ nɔn.”

¹⁴Pɔlɛ̀n kɛ vá ankà dɔ́ yri, kɩ Galiɔn mrɛ́n Zhüifɛ̀n-bɔ̀ ɔmùan le: “Ke dú kɛ kè dú ɔwrɔn wri ankà, mán eci-gbangbàn vri tɔ̀n hán ankà hô, me le bɩ́ ɛnvra mɛ̀n die nyɛ̀n nukùɛ, nyɛ́n Zhüifɛ̀n-bɔ̀ lɔ.

¹⁵Tɛ́n ɔmuhi dú ecüìwrɔn ankà, ankà-dɔ̀ wú, ebɩ́ wú, mán nyɛ́n dùku ny'ɛnyanmàn wú nɔn, ndɔ lɔ kɛ crɛ nyan nyɛ́n kɩ. Mɛ krɔ ankà ndɔ hɔ̀n lɔ y'ɛmrɛ̀n cì!”

¹⁶Kɩ Galiɔn wrɔ́ yɔ ɛmrɛ̀nci-wɔn lɔ mɛ̀n.

¹⁷Zɛtɛn, yɔ lɔ fɛn yɔ ẅɛn Sɔstɛnɛ̀n léyi dú Ɔwɔ-sɛ́n-wɔn lɔ n'ɔwrɔn cüìcüì nɔn, kɩ yɔ bukru yɔ gorɛ nɛ̀n ɛmrɛ̀nci-wɔn zìwú. Tɛ́n kè sɩ̀ hàn Galiɔn eci zriɛmɛ́n.

¹⁸Pɔlɛ̀n vru yɛ́ Korɛntɛ̀n anmàn nmɔɛ̀n. Zɛtɛn nɛ́n teze anwrɔn-nɛ́n-muan-ẅì hɔ̀n lɔ kɩ nɛ̀n bɩ́ ɛhɛ̀ nɛ hɔ́n Siri kpɔsɔ wú, nɛ́n mán Prisilɛ̀n mán Akilasɛ̀n mɛhi. Ɛnkrubɔmɛ̀n lɔ, nɛ̀n hán yɛ wán nɛ̀n ɛnkru Sankre anmàn ɔmuhi nɛ̀n wá ɔmùan nɔn.

¹⁹Yɔ cɔ́ Efɛzɛ̀n anmàn, nanvrɛn lɔ, nɛ́n teze Prisilɛ̀n mán Akilasɛ̀n. Nɛ̀n hɔ́n Ɔwɔ-sɛ́n-wɔn lɔ mɛ̀n kɩ nanvrɛn lɔ, nɛ́n mán Zhüifɛ̀n-bɔ̀ mɛhi yɔ wrɔ́n-ecüì.

²⁰Yɔ dɔ́ Pɔlɛ̀n kɛ̀ yɛ́ nanvrɛn anmàn kɛ̀ mɔɛ̀n, tɛ́n nɛ̀n sɩ̀ shrìɛ.

²¹Nɛ́n teze yɔ kɩ nɛ́n dɔ̀ le: “Ke dú kɛ Ɔwɔ ke ji hô, me le vru mɛ̀n vá ny'anmàn.” Kɩ nɛ̀n bɩ́ ɛnhyàbri-hɛ̀ Efɛzɛ̀n anmàn nɛ́n hɔ̀n.

²²Ɛnvra léyi yɔ kakɛ Sezare anmàn nɔn, nɛ̀n hɔ́n Zherüzalɛmɛ̀n anmàn, ô nɛ̀n bi Ɔwɔ-fɛcüè-bɔ̀ lɔ nɛ̀n nyan, zɛtɛn nɛ́n hɔ́n Antiɔshɛ̀n anmàn.

²³Nanvrɛn lɔ nɛ̀n yɛ́ ɛnvra cá kɩ nɛ́n vru ɛmɛẅi nɛ́n hɔ̀n. Nɛ̀n ci Galasi mán frizhi kpɔsɔ wú, nɛ tán Krisi-sɛ̀nkɛn-bɔ̀ lɔ fɛn ecüì yɔ ankaẅì-bùtan ẅɛn mɛ̀n.

²⁴Zhüifɛ̀n-wrɔn tɔ̀n ye bi Apolɔsɛ̀n, nɛ̀n dú Alɛksandri anmàn-wrɔn, nèn vá Efɛzɛ̀n anmàn. Nɛ̀n dú ɔwrɔn léyi kɛ dɔ́ ankà anvrɛnvrɛn hɩ nyri Ɛwrú Prɔnprɔn hɔ̀n anvrɛnvrɛn nɔn.

²⁵Ɛẅɛnwrɔn levri-sù-nan wú de nɛ̀n cɔ́ ankà-nyri kɩ edùyiemɛ̀n nɛ dɔ̀ kɩ ne yé ankà Zhezü wú, annanwɔrɛ mɛ̀n. Tɛ́n Zhan ɛnshikru-wá lɔ kɩ nɛ́n nyrì.

²⁶Nɛ̀n bukru nɛ dɔ́ ankà ankaẅì-bùtan mɛ̀n Ɔwɔ-sɛ́n-wɔn lɔ mɛ̀n. Ɛnvra léyi Prisilɛ̀n mán Akilasɛ̀n yá n'ankà-dɔ̀ lɔ nɔn, yɔ bɩ́ nɛ̀n, ô yɔ yé nɛ̀n Ɔwɔ levri sùnàn anvrɛnvrɛn.

²⁷Zɛtɛn, Apolɔsɛ̀n ji Ashahi kpɔsɔ wú hɔ́n yri. Anwrɔn-nɛ́n-muan-ẅì hɔ̀n ke yɩ́ nɛ̀n edù, kɩ merɛ́n ankaẅì-bùtan-ẅɛn-bɔ̀ léyi dú ɔkpɔsɔ ndɔ lɔ wú nɔn, owrú, ô yɔ nyrì ẅɛn nɛ̀n nɛ̀nnyàn-wrɔn anvrɛnvrɛn. Ɛnvra léyi Apolɔsɛ̀n cɔ́ nanvrɛn nɔn, n'ɛkɔrɛ̀-wá hán anwrɔn hɔ̀n léyi srɔ ankaẅì-bùtan-ẅɛn-bɔ̀ Ɔwɔ cüìemɛ̀n nɔn, anvrɛn vri.

²⁸Annanwɔrɛ mɛ̀n lɔ, n'ankà-nyrì-dɔ́ mɛ̀n lɔ, nɛ kɔ́n anwrɔn lɔ fɛn zìwú, Zhüifɛ̀n-bɔ̀ ankà hɔ̀n lɔ cüe: ne yé yɔ Ɛwrú Prɔnprɔn mɛ̀n le Zhezü dú Ebɩ̀die-wrɔn.