Read Alladian Ɔkɔ̀hɔ̀n-wá-bɔ̀ kɔ̀hɔ̀n hán 2 Bible Online

Ɔkɔ̀hɔ̀n-wá-bɔ̀ kɔ̀hɔ̀n hán 2 - Alladian bible

Ɔkɔ̀hɔ̀n-wá-bɔ̀ kɔ̀hɔ̀n hán 2

¹Ɛnvra léyi Pantekɔtɛ̀n bì lɔ cɔ̀ nɔn, ankaẅì-bùtan-ẅɛn-bɔ̀ lɔ fɛn borɛkru ɛyri zri.

²Kpatakpata lɔ, nkù-dì tɔ̀n dú anhobɩ́ và, cá ecüì dɔ̀nwrɔ̀n tɔ̀n léyi kɛ cüɛ̀n, kɩ yɩ́ ɔwɔn mumù lɔ fɛn léyi yɔ dú ɛmɛ̀n nɔn.

³Zɛtɛn, yɔ kán ɛnhyà wɔɛ̀n bobrebe srɔ; yɔ gbɛ́ angranmɛ̀n ɔmùan kɩ ɛnzri zri hɔ́n nyɔn ɔwrɔn wrɔn ɛnkru wanzi.

⁴Yɔ lɔ fɛn yɔ cɔ́ Ɛnhɛ́n Prɔnprɔn kɩ yɔ bukru yɔ dɔ́ ankà ɛnbrɛ̀ nyàntɛn mɛ̀n, hán hɩ le Ɛnhɛ́n Prɔnprɔn wá tán yɔ, yɔ dɔ̀ nɔn.

⁵Zherüzalɛmɛ̀n anmàn lɔ, Zhüifɛ̀n-bɔ̀ léyi ke bɩ́ Ɔwɔ ankà nɔn, yɔ dú ɛnhi wú anmàn lɔ fɛn yɔ vá.

⁶Ɛnvra léyi yɔ yá nkù-dì lɔ nɔn, yɔ borɛkru fɛcüèmɛ̀n. Yɔ lɔ fɛn yɔ dú ekpùsú vriemɛ̀n, ɔmuhi ɔwrɔnwrɔn kɛ yá ankaẅì-bùtan-ẅɛn-bɔ̀ lɔ kɛ dɔ́ ankà y'anmàn-brɛ̀ mɛ̀n nɔn.

⁷Yɔ lɔ fɛn yɔ dú anvɛmɛ̀n-frɛ́n mɛ̀n mán pɔpüɛ̀ mɛ̀n kɩ yɔ dɔ̀ le: “Anwrɔn ndɔ hɔ̀n lɔ, hɩ kɛ dɔ́ ankà nɔn, yɔ lɔ fɛn yɔ sɩ̀ dù Galile anmàn-bɔ̀a?

⁸Zɛtɛn, anhɔntan de kɛ hán ke cì kɛ ɔwrɔnwrɔn kɛ yá yɔ, yɔ dɔ́ ankà yɔ muan hɔ̀n anmàn-brɛ̀ mɛ̀n nɛ́n?

⁹Bɔ ɛmɛ̀n lɔ, ndɔ hɔ̀n dú Partɛ̀n, Medi mán Elamɛ̀n ɛnhi wú anmàn nvà. Mezopotami, Zhüde mán Kapadɔsɛ̀n, Pɔn mán Azi kpɔsɔ wú;

¹⁰Frizhi mán Panfili, Ezhiptɛ̀n mán Sirɛnɛ̀n kpɔsɔ wú, dú Libi ɛnhi wú anmàn nvà; ndɔ hɔ̀n dú Rɔmɛ̀n,

¹¹Krɛtɛ̀n mán Arabi ɛnhi wú anmàn nvà; ndɔ hɔ̀n dú Zhüifɛ̀n-bɔ̀, kɩ ɛnjanbɔ̀ kɛ sɛ́n Zhüifɛ̀n-bɔ̀ Wɔ lɔ. Ɔmu tɛ̀kɩ bɔ́ yá yɔ, yɔ dɔ́ Ɔwɔ kɔrɛ̀-ci hɔ̀n lɔ yi ankà bɔ́ ɛnbrɛ̀ mɛ̀ntɛ mɛ̀ntɛ hɔ̀n lɔ mɛ̀n!”

¹²Yɔ lɔ fɛn, yɔ dú anvɛmɛn-frɛ́n mɛ̀n kɩ yɔ sɩ́ nyri ankà léyi yɔ le tro nɔn; yɔ dɔ́ y'edomɛ̀n le: “Ndɔ lɔ n'ɛmɛ̀n dú tɛtan?”

¹³Tɛ́n anwrɔn ndɔ hɔ̀n kɛ hán ankaẅì-bùtan-ẅɛn-bɔ̀ lɔ ɛnhyürɛ̀ kɩ kɛ dɔ̀ le: “Yɔ dú ɛntàn-kɔ́n mɛ̀n!”

¹⁴Zɛtɛn Piɛrɛ̀n tɔhú nɛ́n mán ɔkɔ̀hɔ̀n-wá-bɔ̀ ɛvà-ɔtɔ̀n hɔ̀n lɔ mɛhi; kɩ esùva cüìcüiemɛ̀n nɛ dɔ́ fɛcüè le: “Nyɛ́n, Zhüifɛ̀n-bɔ̀, mán nyɛ́n lɛ fɛn léyi nyɛ́n dú Zherüzalɛmɛ̀n anmàn nɔn, nyɛ́n die m'ankà-dɔ̀ lɔ nukù anvrɛnvrɛn, ô nyɛ́n nyri eci léyi kɛ wɔɛ̀n nɔn.

¹⁵Anwrɔn ndɔ hɔ̀n lɔ, ɛntàn ke sɩ́ kɔ́n yɔ, hán ɔmu le nye tro nɔn hɔ́, ɔmuhi yakɛ cɔ́ ɛsɔ̀wrɔ̀ wacɛ̀n ɔmɔrɔ̀ nɔn.

¹⁶Tɛ́n zɛtɛ̀ lɔ, ankà léyi Ɔwɔ-mùanwú-ankà-dɔ́-wrɔn Zhoɛlɛ̀n ndɔ nɔn de kɛ sá nmù nɔn:

¹⁷‘Ɔwɔ kɛ dɔ̀ le, nyàn eci léyi kɛ lɛ wɔɛ́n ɛmɛẅi trɔ vra hɔ̀n lɔ nɔn: Mɛ lɛ hán m'Ɛnhɛ́n kè bonyi anwrɔnẅì lɔ fɛn wú; ny'ɛẅì hɔ̀n wúcɔ̀ mán wúyɔ̀ kɛ lɛ srɔ Ɔwɔ-mùanwú-ankà-dɔ́-bɔ̀, mɛ lɛ dɔ́ nyɛ́n sùgban-bɔ̀ lɔ ankà Ɔwɔ-mɛ̀n-yri-kàn mɛ̀n, kɩ ny'anwrɔn cüìcüì hɔ̀n lɔ mɛ lɛ dɔ́ yɔ ankà ndà mɛ̀n.

¹⁸Hɛ̀ɛ̀, me le bonyi m'Ɛnhɛ́n ku m'eci-bɩ̀tan-bɔ̀ wúcɔ̀ mán wúyɔ ɛwú ɛnbì hɔ̀n lɔ mɛ̀n, kɩ yɔ lɛ srɔ Ɔwɔ-mùanwú-ankà-dɔ́-bɔ̀.

¹⁹Mɛ lɛ hán eci-woroan-ci vɛ́n ɛwú anhobɩ́ kɩ mɛ lɛ hán anvɛmɛ̀n-frɛ́n-ci ɛnu ɛnhi: ɛnkrɛ̀, ɛnhyà mán ɛnwì yàbri ke le dù,

²⁰ɛnbri kɛ lɛ tɛ̀wá, kɩ okù kɛ lɛ wɔ́n kɛ lɛ hán ɛnkrɛ̀ hɔ́, yakɛ Ɛẅɛnwrɔn bì lɔ kɛ lɛ và, eci-zrɔ bì vri ndɔ lɔ.

²¹Zɛtɛn, ɔwrɔn totɔtɔ̀n léyi ke le bi Ɛẅɛnwrɔn nɔn, nɛ lɛ cɔ́ ebɩ̀die.’

²²Izraɛlɛ̀n-bɔ̀, nyɛ́n die ankà léyi mɛ lɛ dɔ́ nyɛ̀n nɔn nukùɛ: Nazàrɛtɛ̀n-wrɔn Zhezü dú ɔwrɔn léyi Ɔwɔ hán tán nyɛ̀n, nyɛ́n kán n'ɛkɔrɛ̀-srɔn, n'anvɛmɛ̀n-frɛ́n-ci mɛ̀ntɛ mɛ̀ntɛ hɔ̀n mán eci-woroan-ci vɛ́nvɛ́n hɔ̀n léyi nɛ̀n hán ny'anwanzi, hán ɔmu le nyɛ́n dùku mán nyɛ́n nyrì nɔn hɔ́.

²³Ɔwrɔn ndɔ lɔ ye bɩ́ nɛ̀n yɛ tán nyɛ̀n hán ɔmu le Ɔwɔ wá tán n'ankɔnda ci-hán lɔ mɛ̀n hɩ gɔ́ tro hɛ́n nɔn. Nyɛ́n hán anwrɔn hɔ̀n léyi ke sɩ́ di ɔmùan-zri nɔn, gɔ́n nɛ̀n brɛ́ ɛgbàn-han-tɛ̀ tɔ̀n domɛ̀n, nɛ́n wù.

²⁴Tɛ́n Ɔwɔ frɔ́ nɛ̀n, mrɛ́n nɛ̀n sɔhɔ́ owù gbànkan mɛ̀n, ɔmuhi ke sɩ̀ wá tán le owù kɛ̀ ẅɛn nɛ̀n kɛ̀ hɛ́n n'ɛkɔrɛ̀srɔn lɔ mɛ̀n nɔn.

²⁵Annànwɔrɛ mɛ̀n lɔ Davidɛ̀n dɔ́ n'ɛwú le: ‘Mɛ kán ɛnvra lɔ fɛn Ɛẅɛnwrɔn kɛ nyɔn m'ezìwúɛ, nɛ̀n dú mɛ̀n ɛtɛsɛ̀n ô gbɔ̀gbɔ̀ ke bɩ́ bru mɛ̀n edù.

²⁶Hɩ le kruhú de m'ɛnbɔrɛ dú ɛnbɔrɛbruemɛ̀n kɩ pɔpüɛ̀ yɩ́ m'ankà-dɔ̀ hɔ̀n lɔ mɛ̀n; m'edùwru dùku mán kɛ lɛ wrɔncüe esɛ́ mɛ̀n,

²⁷ɔmuhi Ɛẅɛnwrɔn, e sɩ̀ teze mɛ̀n owú-bɔ̀ hibù wú, e sɩ̀ shrì ɛ̀ tán ɛkorɛ̀levri, mɛ̀n, v'ɔmùan-zri-di-wrɔn, mɛ̀n srɔ ɛnhiwɔ̀n owù nanmàn mɛ̀n nɔn.

²⁸È yé mɛ̀n ɛnlevri hɔ̀n léyi ke sɩ́ ɔkɔrɛ mɛ̀n nɔn, ɛ lɛ hán pɔpüɛ̀ ke yɩ́ m'ɛnbɔrɛ lɔ v'ezìwú.’

²⁹Anwrɔn-nɛ́n-muan-ẅì hɔ̀n, kɛ wá tán mɛ̀n le, mɛ̀n dɔ́ nyɛ̀n kpete mɛ̀n, bɔ́ nancüì Davidɛ̀n ankà: nɛ̀n wù, ye bɩ́ nɛ̀n kɩ n'ezhe-nànmàn lɔ vru dú bɔ́ yri ɛnyɔncì lɔ.

³⁰Tɛ́n nɛ̀n dú Ɔwɔ-muanwú-ankà-dɔ́-wrɔn kɩ nɛ̀n nyri ɔmu le, Ɔwɔ wá nɛ̀n ɔmùan le, nɛ́n nan-ẅì hɔ̀n lɔ ɔtɔ̀n ke le dú ɛnnɛ̀ncüì kè bɩ́ n'ɛyɛ́-yri lɔ.

³¹Davidɛ̀n gɔ́ kán eci léyi kɛ lɛ wɔɛ̀n nɔn; nɛ̀n dɔ́ Ebɩ̀die-wrɔn wúemɛ̀n-dùfrɔ́ ankà ɛnvra léyi nɛ́n dɔ̀ le: ‘Ye sɩ̀ teze nɛ̀n owú-bɔ̀ hibù wú, kɩ n'edùwru lɔ ke sɩ̀ srɔ ɛnhiwɔ̀n owù nanmàn mɛ̀n.’

³²Zhezü ndɔ léyi mɛ dɔ́ n'ankà nɔn, Ɔwɔ frɔ́ nɛ̀n kɩ bɔ́ lɔ fɛn bɔ́ dú nɛ́n dalɛfuɛ-di-bɔ̀.

³³Ye sɩ́ nɛ̀n ɛwú, nɛ̀n yɛ́ Ɔwɔ zì-kɔrɛ̀ kɔrɛ̀a, kɩ nɛ̀n cɔ́ Ɔwɔ tamɛ̀n Ɛnhɛ́n Prɔnprɔn léyi yɛ wá ɔmùan nɔn; nɛ́n bonyi Ɛnhɛ́n Prɔnprɔn ndɔ lɔ bɔ́ ɛwú, kɩ hɩ de dú eci léyi nyɛ kàn kɩ nyɛ yá zɛtɛ̀ lɔ nɔn.

³⁴Ɔmuhi Davidɛ̀n dùku mán ke sɩ̀ tɔhú kɛ hɔ́n anhobɩ́, tɛ́n nɛ́n dɔ̀ le: ‘Ɛẅɛnwrɔn Ɔwɔ dɔ́ m'Ɛẅɛnwrɔn le: và yɛ́ mɛ̀n ezì-kɔrɛ̀ kɔrɛ̀a,

³⁵me ji mɛ̀n hán v'egbri-bɔ̀ kè srɔ v'ɛnan-wú-hɛ́n-ci.’

³⁶Ke ji le Izraɛlɛ̀n fɛcüè lɔ fɛn kè nyri annanwɔrɛ mɛ̀n le: Zhezü ndɔ léyi nyɛ́n gɔ̀n brɛ́ ɛgbàn-hán-tɛ̀ domɛ̀n nɔn, nɛ́n de Ɔwɔ srɔ nɛ̀n Ɛẅɛnwrɔn mán Ebɩ̀die-wrɔn nɔn!”

³⁷Piɛrɛ̀n ankà-dɔ̀ ndɔ lɔ jɔ̀kɔ anwrɔn hɔ̀n léyi ke die nɛ̀n nukùɛ nɔn. Yɔ yrɛ Piɛrɛ̀n mán ɔkɔ̀hɔ̀n-wá-bɔ̀ nyàntɛn hɔ̀n lɔ le: “Awrɔn-nɛ́n-muan-ẅì hɔ̀n, ecitan de ke ji le bɔ̀ hán nɛ́n?”

³⁸Piɛrɛ̀n mrɛ́n yɔ ɔmùan le: “Nyɛ́n crɔn ny'eci-hán-ci, ô ɔwrɔnwrɔn kɛ̀ hán yɛ wá nɛ̀n ɛnshi ɛnkru Zhezü Krisì bɩmɛ̀n, ô ny'ɛgbàn hɔ̀n lɔ kè bɩ ce nyɛ̀n. Zɛtɛn nyɛ lɛ cɔ́ Ɔwɔ cice-ci lɔ, Ɛnhɛ́n Prɔnprɔn.

³⁹Ɔmuhi Ɔwɔ-mùan-wá lɔ dú tán nyɛ́n mán ny'ɛẅì hɔ̀n mɛhi, ɔmu zri lɔ de dú tán anwrɔn hɔ̀n léyi dú esù she nɔn, anwrɔn hɔ̀n léyi Ɛẅɛnwrɔn b'Ɔwɔ ke le bi nɔn.”

⁴⁰Piɛrɛ̀n vru dɔ́ yɔ ankà brobebe nyàntɛn hɔ̀n ô kɛ̀ tán yɔ ɛsɛ́ mán edùyì, kɩ nɛ dɔ̀ le: “Nyɛ́n shri ɛnkru-kɔrɛ̀ nyɛ́n bɩ, ô nyɛ́n bɩ́ dú kɛ hán ɛzrɛ́n-bɔ̀ ndɔ lɔ hɔ́!”

⁴¹Bobrebe y'ɛmɛ̀n lɔ shri Piɛrɛ̀n ankà-dɔ̀ lɔ bɩ kɩ yɛ wá yɔ ɛnshi ɛnkru. Ɛnbì ndɔ lɔ, anwrɔn tɛ̀bru kru anhɔ̀n de ku ankaẅì-bùtan-ẅɛn-bɔ̀ fɛcüè lɔ mɛ̀n nɔn.

⁴²Yɔ lɔ fɛn yɔ dú ɔmùan-zri-diemɛ̀n kɩ yɔ die ankà-yé léyi ɔkɔ̀hɔ̀n-wá-bɔ̀ kɛ tán nɔn nukùɛ, yɔ dú ɔbɔ̀sɔ mɛ̀n anwrɔn-nɛ́n-muan-ẅì hɔ̀n diemɛ̀n, yɔ zî ɛci ɛyri zri kɩ yɔ dú Ɔwɔ-sɛ́n mɛ̀n.

⁴³Ɔwrɔnwrɔn kɛ ẅɛn ɛnjansù, ɔmuhi Ɔwɔ kɛ hán eci-woroan-ci bobrebe mán anvɛmɛ̀n-frɛ́n-ci ɔkɔhɔ̀n-wá-bɔ̀ bɩmɛ̀n nɔn.

⁴⁴Ankaẅì-bùtan-ẅɛn-bɔ̀ lɔ fɛn dú ɔbɔ̀sɔ mɛ̀n kɩ yɔ dɛ́ y'edomɛ̀n ɛci hɔ̀n léyi yɔ ẅɛ̀n nɔn.

⁴⁵Yɔ hɛ́ yɔ ɛci hɔ̀n léyi yɔ ẅɛ̀n nɔn, mán yɔ ankɛ̀tɛ̀ hɔ̀n lɔ, kɩ yɔ dɛ́ ɔkùa léyi yɔ cɔ̀ nɔn, yɔ tán ɔwrɔnwrɔn hɩ́ le kɛ lɛ krɔn nɛ̀n nɔn.

⁴⁶Ɛnbì lɔ fɛn, ɛnvra zri lɔ mɛ̀n, yɔ borɛkru Ɔwɔ-cice-wɔn lɔ mɛ̀n, yɔ zî ɛci ɛyri zri y'anwɔn hɔ̀n lɔ mɛ̀n, kɩ y'ɛci-zî lɔ ke dú pɔpüɛ mɛ̀n mán ɛnbɔrɛ cɛ mɛ̀n.

⁴⁷Yɔ mrɛ́n Ɔwɔ, kɩ anwrɔn lɔ fɛn ẅɛn y'ɛcüɛ̀n. Kɩ ɛnbì lɔ fɛn, Ɛẅɛnwrɔn kɛ tán yɔ fɛcüè lɔ, anwrɔn hɔ̀n léyi ne sɩ́ ɛnkru-kɔrɛ̀ mɛ̀n nɔn.