Read Alladian Ɔkɔ̀hɔ̀n-wá-bɔ̀ kɔ̀hɔ̀n hán 22 Bible Online

Ɔkɔ̀hɔ̀n-wá-bɔ̀ kɔ̀hɔ̀n hán 22 - Alladian bible

Ɔkɔ̀hɔ̀n-wá-bɔ̀ kɔ̀hɔ̀n hán 22

¹“Anwrɔn-nɛ́n-muan-ẅì hɔ̀n mán Dade hɔ̀n, nyɛ́n die nukù ankà léyi mɛ̀n ẅɛn zɛtɛ̀ lɔ, hɩ me ji mɛ̀n dɔ̀ tán m'edomɛ̀n nɔn.”

²Ɛnvra léyi yɔ yá ankà léyi nɛ dɔ́ yɔ aramehɛ́n mɛ̀n nɔn, yɔ lɔ fɛn yɔ nyɔn tîhɛ̀n. Zɛtɛn Pɔlɛ̀n kɛ dɔ̀ le:

³“Mɛ̀n dú Zhüifɛ̀n-wrɔn, ye bî mɛ̀n Tarsɛ̀n anmàn Silisi kpɔsɔ wú; tɛ́n ɛnu Zherüzalɛmɛ̀n anmàn de yɛ wá mɛ̀n kɩ m'ankà-yé-wrɔn dú Gamaliɛlɛ̀n, nɛ́n de nɛ̀n hán mɛ̀n nyri, bɔ́ nancüì hɔ̀n nyànmàn lɔ nɔn. Me yɩ́ edù Ɔwɔ kɔ̀hɔ̀n-hán mɛ̀n, hán ɔmu le nyɛ́n lɛ fɛn nyɛ́n dú ɛnyɔnci lɔ nɔn.

⁴Anwrɔn hɔ̀n léyi ke bɩ́ Ɛẅɛnwrɔn levri nɔn, mɛ̀n kɔ́n yɔ anhà, hàn mán owúemɛ̀n. Mɛ̀n hán yɔ ẅɛn wúcɔ̀ mán wúyɔ̀ ye di anwɔn-mɛ̀n-wá-wɔn mɛ̀n.

⁵Ɔwɔ-cice-wrɔn cüìcüì mán ɛcüìcüì-bɔ̀ hɔ̀n fɛcüè ke le di mɛ̀n dalɛfuɛ le, mɛ dɔ́ ankà annanwɔrɛ. Mɛ̀n cɔ́ y'antamɛ̀n wrú léyi ke ji le, mɛ̀n bɩ tán nmàn-ẅì hɔ̀n léyi dú Damasɛ̀n anmàn, kɩ mɛ̀n hɔ́n anmàn ndɔ lɔ: me ji mɛ̀n ẅɛn ankaẅì-bùtan-ẅɛn-bɔ̀ léyi dú nanvrɛn lɔ, mɛ̀n sɩ́ yɔ Zherüzalɛmɛ̀n anmàn, ô yɛ hán yɔ ɛgbàn.”

⁶“Mɛ̀n dú ɛnlevri mɛ hɔ̀n kɩ mɛ bá Damasɛ̀n anmàn tɛsɛ̀n, kɩ kpatakpata lɔ, ɛnbrishɛn-mùan mɛ̀n, ɛyrikàn vri tɔ̀n dú anhobɩ́ nvà gbrɛ́n kɛ́n mɛ̀n ɔmùan.

⁷Mɛ̀n bore ɛnhibɩ́ kɩ mɛ̀n yá esùva tɔ̀n kɛ dɔ́ mɛ̀n le: ‘Solɛ̀n, Solɛ̀n, cɛci kruhú kɛ ɛ kɔ́n mɛ̀n anhà?’

⁸Mɛ̀n yrɛ le: ‘Antɔn dú mɛ́n Ɛẅɛnwrɔn?’ Esùva lɔ mrɛ́n ɔmùan le: ‘Mɛ̀n dú Nazàrɛtɛ̀n-wrɔn Zhezü léyi ɛ kɔ́n anhà nɔn.’

⁹Anwrɔn hɔ̀n léyi dú m'ɛtɛ̀sɛ̀n nɔn kán ɛyri-kàn lɔ, tɛ́n yɔ sɩ̀ yá ɔwrɔn léyi kɛ dɔ́ mɛ̀n ankà nɔn, n'esùva.

¹⁰Zɛtɛn mɛ̀n yrɛ le: ‘Ɛẅɛnwrɔn ecitan de ke ji le mɛ̀n hán nɛ́n?’ Kɩ Ɛẅɛnwrɔn dɔ́ mɛ̀n le: ‘Tɔhú, hɔ̀n Damasɛ̀n anmàn, kɩ nanvrɛn lɔ yɛ lɛ dɔ́ mɛ́n eci lɔ fɛn léyi Ɔwɔ kɛ wá tán mɛ́n ɛ̀ hán nɔn.’

¹¹Ɔmuhi ɛyri-kàn ndɔ lɔ boyɛ mɛ̀n anvɛ̀ nɔn, anwrɔn hɔ̀n léyi dú mɛ̀n ɛtɛ̀sɛ̀n nɔn ẅɛn mɛ̀n ɛkɔrɛ̀ kɩ bɩ́ mɛ̀n hɔ́n Damasɛ̀n anmàn.

¹²Nanvrɛn lɔ ɔwrɔn tɔ̀n ndù ye bi nɛ̀n Ananiasɛ̀n, nɛ̀n dú ɔwrɔn léyi ke bɩ́ Ɔwɔ ankà kɩ ne di ɔmùan zri bɔ́ ɛnyanmàn-ankà wú, kɩ Zhüifɛ̀n-bɔ̀ lɔ fɛn léyi dú Damasɛ̀n anmàn nɔn, kɛ cüɛn n'ankà.

¹³Nɛ́n và cɔ́ mɛ̀n, nɛ̀n nyɔn mɛ̀n ɛtɛsɛ̀n kɩ nɛ̀n dɔ́ mɛ̀n le: ‘Solɛ̀n, nmàn-ẅì, ke ji le ɛyri-kàn kɛ và cɔ́ mɛ́n!’ Ɛnvra zri lɔ, m'ɛyri-kàn vru và kɩ mɛ̀n kán nɛ̀n.

¹⁴Nɛ̀n vru nɛ dɔ́ mɛ̀n le: ‘Bɔ́ nancüì hɔ̀n Wɔ gɔ́ mrɛ́n mɛ́n bɩ, ô è nyri n'ɛkɔrɛ̀-zì-ci, ô ɛ̀ kán ɛnyrɔnnan-wrɔn zri lɔ, ô ɛ̀ yá nɛ́n dùku n'esùva.

¹⁵Ɔmuhi ke ji le è dú nɛ́n dalɛfuɛ-di-wrɔn, ô ɛ̀ dɔ́ anwrɔnẅì lɔ fɛn zìwú, eci léyi ɛ kàn mán hɩ léyi ɛ̀ yá nɔn.

¹⁶Kɩ zɛtɛ̀ lɔ, cɛci kruhú kɛ è vru ɛ vrá? Tɔhú, è bɩ́ n'ebɩ lɔ, ɛ lɛ cɔ́ ɛnshi-kruwá, kɩ v'ɛgbàn hɔ̀n lɔ ke le juru sɔhɔ́ mɛ́n edomɛ̀n.’ ”

¹⁷“Mɛ̀n vru ɛmɛẅi mɛ̀n hɔ́n Zherüzalɛmɛ̀n anmàn, kɩ zɛtɛn mɛ sɛ́n Ɔwɔ, Ɔwɔ-sɛ́n-wɔn lɔ mɛ̀n, kɩ mɛ̀n cɔ́ Ɔwɔ-mɛ̀n-yri-kàn tɔ̀n.

¹⁸Mɛ̀n kán Ɛẅɛnwrɔn kɩ nɛ̀n dɔ́ mɛ̀n le: ‘Ɛ̀ kpramàn ɛ̀ cɔhɔ́ Zherüzalɛmɛ̀n anmàn, ɔmuhi nanvrɛn anmàn-bɔ̀ ke sɩ̀ bɩ́ vɛ́n dalɛfuɛ-di ankà lɔ m'ɛkruhú nɔn.’

¹⁹Mɛ̀n mrɛ́n ɔmùan le: ‘Ɛẅɛnwrɔn, yɔ nyri ɔmu le mɛ hɔ́n Ɔwɔ-sɛ́n-wɔn hɔ̀n lɔ mɛ̀n, me ku anwrɔn anwɔn-mɛ̀n-wá-wɔn mɛ̀n, kɩ mɛ hán ye gorɛ yɔ hɔ̀n léyi ke bú v'ankà kɛ tán ankaẅì nɔn.

²⁰Kɩ ɛnvra léyi ye wri Etiɛnɛ̀n, vɛ́n dalɛfuɛ-di-wrɔn lɔ nɔn, mɛ̀n mán mɛ̀n dú nanvrɛn lɔ. Anwrɔn hɔ̀n léyi ke wri nɛ̀n nɔn, mɛ̀n dú y'ɛmɛẅi kɩ mɛ̀n bɩ́ y'ɛceci hɔ̀n lɔ mɛ̀n hɛ́n.’

²¹Zɛtɛn Ɛẅɛnwrɔn dɔ́ mɛ̀n le: ‘Hɔ̀n, ɔmuhi mɛ lɛ hán mɛ́n, ɛ̀ hɔ́n ɛyri she, ɛnhi anmàn nyantɛn hɔ̀n wú nɔn!’ ”

²²Fɛcüè die Pɔlɛ̀n nukù hàn kɩ nɛ̀n dɔ́ ankà trɔ; tɛ́n zɛtɛn, yɔ lɔ fɛn yɔ bukru yɔ di bobo yɔ dɔ̀ le: “Nyɛ́n hán ɔwrɔn ndɔ lɔ kɛ̀ zrɛ́n! Owù dú nɛ tɛn! Nɛ̀n sɩ̀ krɔ̀n ɔmu le ná dú ɛnhi ndɔ lɔ wú nɔn!”

²³Yɔ sán di bobo, yɔ sha y'ɛceci hɔ̀n lɔ, kɩ yɔ kɔ́n nwɔ̀n sɩ́ ɛwú.

²⁴Rɔmɛ̀n gɔliɛ-bɔ̀ wrɔn cüìcüì lɔ wá tán yɛ hán Pɔlɛ̀n ke bru anwɔn-mɛ̀n-wá-wɔn mɛ̀n, ô ye gorɛ nɛ̀n ɛngbele mɛ̀n, hàn kɩ nɛ̀n dɔ́ ankà lɔ fɛn léyi, hɩ kruhú fɛcüè ke di bobo tán nɛ̀n nɔn.

²⁵Tɛ́n ɛnvra léyi yɛ kora nɛ̀n, hɩ yɛ vá nɛ̀n egorɛ yri nɔn, Pɔlɛ̀n kɛ dɔ́ gɔliɛ-wrɔn léyi nyɔn nanvrɛn lɔ nɔn le: “Ɛ̀ ẅɛn ɛkɔrɛ̀-levri e le gorɛ rɔmɛ̀n anmàn ɛnhi wú ẅì léyi yɛ vá ci ɛmrɛ̀n nɛ́n?”

²⁶Ɛnvra léyi gɔliɛ-wrɔn lɔ yá ankà lɔ nɔn, nɛ́n hɔ̀n nɛ̀n dɔ́ n'ɔwrɔn cüìcüì lɔ le: “Ecitan de ɛ̀ vá ɛ hán yri nɛ́n? Ɔwrɔn ndɔ lɔ dú rɔmɛ̀n anmàn ɛnhi wú ẅì!”

²⁷Gɔliɛ-bɔ̀ wrɔn cüìcüì lɔ hɔ́n Pɔlɛ̀n ɛtɛ̀sɛ̀n kɩ ke yrɛ nɛ̀n le: “Ɛ̀ dɔ́ mɛ̀n, ke dú kɛ annanwɔrɛ mɛ̀n lɔ è dú rɔmɛ̀n anmàn ɛnhi wú ẅì?” Pɔlɛ̀n mrɛ́n ɔmùan le: “Hɛ̀ɛ̀.”

²⁸Zɛtɛn Gɔliɛ-bɔ̀ wrɔn cüìcüì lɔ kɛ dɔ̀ le: “Mɛ̀n tán ɔkùa vri yakɛ mɛ̀n srɔ rɔmɛ̀n anmàn ɛnhi wú ẅì.” Kɩ, Pɔlɛ̀n mrɛ́n ɔmùan le “M'ebîemɛ̀n de mɛ̀n dú rɔmɛ̀n anmàn ɛnhi wú ẅì nɔn.”

²⁹Ɛnvra zri lɔ, anwrɔn hɔ̀n léyi yɛ hán kè gorɛ nɛ̀n, ô nɛ̀n dɔ́ ankà nɔn, cɔhɔ́ nɛ̀n ɛtɛ̀sɛ̀n esù-she; gɔliɛ-bɔ̀ wrɔn cüìcüì lɔ mán ɛnjansù bru, ɛnvra léyi nɛ̀n nyri ɔmu le Pɔlɛ̀n dú rɔmɛ̀n anmàn ɛnhi wú ẅì, kɩ nɛ̀n sɩ̀ nyrìɛn, nɛ̀n hán yɛ kora Pɔlɛ̀n gbràka mɛ̀n.

³⁰Gɔliɛ-bɔ̀ wrɔn cüìcüì lɔ ke ji ke nyri ankà léyi ke dí ebɩ́, hɩ Zhüifɛ̀n-bɔ̀ kɛ kɛ́n Pɔlɛ̀n ankà; hɩ le kruhú de ɛnvra léyi ɛcɛ̀n cüe nɔn, nɛ̀n hán yɛ mrɛ́n Pɔlɛ̀n gbràka kɩ nɛ̀n borɛ Ɔwɔ-cice-bɔ̀ cüìcüì hɔ̀n mán ankà-dɔ̀-trɔ-bɔ̀ cüìcüì hɔ̀n ɛkru. Zɛtɛn nɛ̀n bɩ́ Pɔlɛ̀n nɛ̀n vá yɔ ezìwú ɛmrɛ̀nciemɛ̀n.