Read Alladian Ɔkɔ̀hɔ̀n-wá-bɔ̀ kɔ̀hɔ̀n hán 24 Bible Online

Ɔkɔ̀hɔ̀n-wá-bɔ̀ kɔ̀hɔ̀n hán 24 - Alladian bible

Ɔkɔ̀hɔ̀n-wá-bɔ̀ kɔ̀hɔ̀n hán 24

¹Ɛbi ɛnrì vacì, kɩ Ɔwɔ-cice-wrɔn cüìcüì Ananiasɛ̀n bru Sezare anmàn nɛ́n mán ɛcüìcüì-bɔ̀ janbɔ̀ mán ankà-dɔ́-wrɔn tɔ̀n léyi ye bi Tɛrtülüsɛ̀n nɔn. Yɔ hɔ́n govràn Feliksɛ̀n zìwú yɔ vrá anẅìɛ̀ yɔ tán Pɔlɛ̀n.

²Ye bi Pɔlɛ̀n, kɩ ankà-dɔ́-wrɔn Tertülüsɛ̀n, bukru kɛ dɔ́ ankà ku nɛ̀n ɛwú, kɩ nɛ dɔ̀ le: “Ɛẅɛnwrɔn, nyɛ́n dùkùa de nyɛ́n hán bɔ́ dú anwɔwɔ mɛ̀n, kɩ ny'ankà-nyrì kɔhɔ̀n ankrankran hán, de hán tán, bɔ̀ cɔ́ ɛci anvrɛnvrɛn ɛnhi wú anmàn ndɔ lɔ wú nɔn.

³Ɛci hɔ̀n lɔ fɛn léyi bɔ́ cɔ́ ɛnvra lɔ fɛn mán ɛyri lɔ fɛn nɔn, bɔ̀ dú ny'ɔkùɛn tán mɛ̀n.

⁴Tɛ́n mɛ́n sɩ́ ji mɛ̀n jrɛ́ nyɛ̀n ɛnvra, hɩ le kruhú de mɛ sɛ́n nyɛ̀n nyɛ́n bɩ́ ɛnbɔrɛ-wɔ̀, ô nyɛ́n die mɛ̀n nukù ɛnvra jan.

⁵Bɔ́ cɔ̀ bɔ́ nyrì le ɔwrɔn ndɔ lɔ zeze krɛgbàn: ɔmuhi nɛ̀n dú Nazarehɛ́n-bɔ̀ fɛcüè wrɔn cüìcüì nɔn, nɛ wá ɛdrɛ̀ Zhüifɛ̀n-bɔ̀ lɔ fɛn léyi dú ɛnhibù wú nɔn y'angranmɛ̀n.

⁶Nɛ́n ji ɛyri ô nɛ̀n wá Ɔwɔ-cice-wɔn prɔnprɔn lɔ ɛnbrá edomɛ̀n, kɩ zɛtɛn bɔ̀ ẅɛn nɛ̀n. [Bɔ́ ji bɔ́ ci nɛ̀n ɛmrɛ̀n bɔ́ anmàn nyànmàn wú,

⁷tɛ́n gɔliɛ-bɔ̀ wrɔn cüìcüì Liziasɛ̀n bru angranmɛ̀n, bɩ́ nɛ̀n sɔhɔ́ ecüìemɛ̀n b'antamɛ̀n.

⁸Zɛtɛn Liziasɛ̀n wá tán le n'ezìkɛ́n-bɔ̀ kɛ srɔ ny'ezìwú.] Ke dú kɛ nye yrɛ ɔwrɔn ndɔ lɔ ankà, nyɛ́n dùku nyɛ lɛ kán ɔmu le ankà hɔ̀n lɔ fɛn léyi bɔ́ dɔ́ ku nɛ̀n ɛwú nɔn, dú annanwɔrɛ.”

⁹Zhüifɛ̀n-bɔ̀ shri tán le ankà léyi yɛ dɔ̀ nɔn, dú annanwɔrɛ.

¹⁰Zɛtɛn govràn tán Pɔlɛ̀n ɛkɔrɛ̀-levri kɛ̀ dɔ́ ankà, kɩ Pɔlɛ̀n kɛ dɔ̀ le: “Mɛ̀n nyri ɔmu le ɛ hán ɛnyrɔnnan kɔhɔ̀n ɛnnànwàn bobrebe bɔ́ ɛnhinan lɔ wú; zɛtɛn esɛ́ mɛ̀n de me bɩ́ m'ebɩdie ankà die mɛ́n ezìwú nɔn.

¹¹Hán ɔmu le vɛ́n dùku mán ɛ kàn nɔn, kɛ vá cɔ́ ɛbi ɛvà-anhyrɛ̀ de mɛ́n và dú Zherüzalɛmɛ̀n ô mɛ̀n cüe Ɔwɔ ankɔrɛ̀ ezìwúɛ.

¹²Ɔwrɔnẅì zriɛmɛ́n kɛ vá cɔ́ mɛ̀n Ɔwɔ-cice-wɔn lɔ mɛ̀n, mɛ̀n mán ɔwrɔn mɛhi bɔ̀ dú ecüìwrɔn mɛ̀n, hɩ ká dú fɛcüè léyi mɛ wá ɛdrɛ̀ angranmɛ̀n, kɩ ndɔ lɔ mán, mɛ̀n sɩ̀ hàn nɛ̀n Ɔwɔ-wɔn nyantɛn mɛ̀n, hɩ ká dú anmàn ɛyri nyàntɛn nɔn.

¹³Anwrɔn ndɔ hɔ̀n lɔ ke sɩ̀ dɔ́ mɛ́n eci léyi dú eci gbangbàn hɩ mɛ̀n hán zɛtɛ̀ lɔ nɔn rɔ́.

¹⁴Tɛ́n, v'ezìwú lɔ, me nyrì le: mɛ̀n wá ɔmùan, esùnàn ɛnlevri wrù nyantɛn wú léyi yɔ tro le dú ɛzɛ́n levri nɔn. Tɛ́n mɛ̀n dú bɔ́ nancüì hɔ̀n Wɔ-ci-bɩtan-wrɔn kɩ me bú ankà hɔ̀n lɔ fɛn léyi ye merɛ́n ɛnyànmàn wrú hɔ̀n lɔ mɛ̀n mán Ɔwɔ-mùanwú-ankà-dɔ́-bɔ̀ tɛn lɔ mɛ̀n, tán ankaẅì.

¹⁵Mɛ̀n ẅɛn esɛ́ Ɔwɔ mɛ̀n, esɛ́ ndɔ léyi yɔ mumù mán yɔ ẅɛ̀n le, anwrɔn ankrànkràn mán angbàngbàn, yɔ lɔ fɛn, yɔ le dú owúemɛ̀n yɔ frɔ́.

¹⁶Hɩ le kruhú de mɛ hán kekremɛ̀n, ô mɛ̀n ẅɛn wàwúyɛ fifi Ɔwɔ zìwú mán anwrɔnẅì zìwú nɔn.

¹⁷Ɛnànwàn bobrebe hɔ̀n vacì, mɛ̀n vru ɛmɛẅì mɛ̀n vá Zherüzalɛmɛ̀n, ô mɛ̀n bɩ́ ɛkɔrɛ̀-wá mɛ̀n vá sɩ́ mɛ́n fɛcüè, ô mɛ̀n ce Ɔwɔ eci.

¹⁸Nyàn eci léyi mɛ́n dù ɛ hán mɛ̀n ɛnvra léyi yɔ cɔ́ mɛ̀n Ɔwɔ-cice-wɔn lɔ mɛ̀n nɔn: mɛ̀n bru edomɛ̀n fi-ci-hán lɔ mɛ̀n, fɛcüè zriɛmɛ́n mán ɛdrɛ̀-ci-hán bada mɛ̀n ɛtɛ̀sɛ̀n.

¹⁹Tɛ́n Zhüifɛ̀n-bɔ̀ zrizri léyi dú Azi kpɔsɔ-wú-bɔ̀ nɔn, nyɔn nanvrɛn, kɩ yɔ de ke ji le yɔ vá v'ezìwú, ô yɔ vrá anẅiɛ̀ ke dú kɛ yɔ ẅɛn m'ankà-tro gbangbàn.

²⁰Kɩ zɛtɛn, anwrɔn ndɔ hɔ̀n léyi nyɔn ɛnu lɔ nɔn, kɛ̀ dɔ́ eci gbangbàn léyi yɔ cɔ́ m'ɛwú ɛnvra léyi yɔ sɩ́ mɛ̀n y'ankà-dɔ̀-trɔ-bɔ̀ mrɛ̀ncì lɔ mɛ̀n nɔn.

²¹Ankà léyi ke di ebɩ́ nɔn, dú hɩ le, mɛ̀n nyɔn ɛwúɛ, hɩ mɛ̀n mrɛ́n ɔmùan ecüemɛ̀n, mɛ́n dɔ̀ le: ‘Ɔmuhi me bú owúemɛ̀n-dú-frɔ́ ankà mɛ tán ankaẅì nɔn, hɩ le kruhú de yɔ hɛ́n mɛ̀n ɛnyɔncì lɔ ɛmrɛ̀nciemɛ̀n ny'ezìwú nɔn!’ ”

²²Govràn Feliksɛ̀n léyi nyri Krisì-Wɔ lɔ n'ankà lɔ fɛn nɔn, wá ɛmrɛ̀ncì lɔ ɛnvra nyantɛn kɩ kɛ dɔ́ anẅiɛ̀-vra-bɔ̀ lɔ le: “Ɛnvra léyi gɔliɛ-bɔ̀ wrɔn cüìcüì Liziasɛ̀n kɛ lɛ và nɔn, me le ci ny'ankà lɔ ɛmrɛ̀n.”

²³Nɛ̀n wá tán gɔliɛ-wrɔn léyi dú nɛ̀n ɛtɛ̀sɛ̀n nɔn, kɛ hɛ́n Pɔlɛ̀n anwɔn-mɛ̀n-wá-wɔn mɛ̀n, tɛ́n nɛ̀n tán ɛkɔrɛ̀-levri, ô Pɔlɛ̀n nɛ́n nyran hɔ̀n kɛ̀ cɔ́ ɛyri kɛ̀ wá nɛ̀n esùva.

²⁴Ɛnvra jan vacì, Feliksɛ̀n mán nɛ́n hi Zhüifɛ̀n nyɔnwrɔn Drüsilɛ̀n nvà. Nɛ̀n wá y'ɔkɔ̀hɔ̀n ye bi Pɔlɛ̀n, kɩ ne die yi nukù ankà léyi nɛ dɔ́ Krisì ankaẅìbùtan ẅɛn mɛ̀n nɔn.

²⁵Tɛ́n ɛnvra léyi Pɔlɛ̀n bukru kɛ dɔ́ ɛnyrɔnnan-wúvà-ankà, ɔwrɔnẅì-domɛ̀n-nyrì-ẅɛ̀n-ankà mán Ɔwɔ mrɛ̀ncì léyi dú ezì kɛ và nɔn yi ankà, Feliksɛ̀n ɛnbɔrɛ ke di ejüe kɩ kɛ dɔ́ nɛ̀n le: “Ɛkɔrɛ̀-levri dù ɛ̀ hɔ̀n. Ɛnvra léyi ɛkɔrɛ̀ ke die mɛ̀n hán nɔn, me le bi mɛ́n.”

²⁶Nɛ̀n ẅɛn esɛ́ le Pɔlɛ̀n kɛ lɛ tán nɛ̀n ɔkùa; hɩ le kruhú de nɛ hán yi kɛ vá cɔ́ nɛ̀n frɛfrɛ yɔ dɔ́ ankà nɔn.

²⁷Ɛnnànwàn kru anhyrɛ̀ vaci ɔmu lɔ, zɛtɛn Pɔrsihüsɛ̀n Fɛtüsɛ̀n bɩ́ Feliksɛ̀n ɛyri. Ɔwrɔn wrù ndɔ lɔ, hɩ ke ji kɛ̀ hán Zhüifɛ̀n-bɔ̀ kɛ̀ cüɛn nɛ̀n nɔn, tɛhɛ́n Pɔlɛ̀n anwɔn-mɛ̀n-wá-wɔn mɛ̀n.