Read Alladian Ɔkɔ̀hɔ̀n-wá-bɔ̀ kɔ̀hɔ̀n hán 5 Bible Online

Ɔkɔ̀hɔ̀n-wá-bɔ̀ kɔ̀hɔ̀n hán 5 - Alladian bible

Ɔkɔ̀hɔ̀n-wá-bɔ̀ kɔ̀hɔ̀n hán 5

¹Tɛ́n ɔwrɔn tɔ̀n léyi ye bi Ananiasɛ̀n, hɩ nɛ́n hi dú Safira, yɔ anwrɔn anyhrɛ̀ lɔ, ɔmùan krɔn yɔ, yɔ hɛ́ yɔ ɛnhi tɔ̀n.

²Ananiasɛ̀n bɩ́ ɔkùa cá hɛ́n kɩ bɩ́ ɛcá ndɔ lɔ hɔ́n sɩ́ ɔkɔ̀hɔ̀n-wá-bɔ̀ lɔ, nɛ́n hi mɛhi ɔmùan krɔn yɔ.

³Zɛtɛn Piɛrɛ̀n kɛ dɔ́ nɛ̀n le: “Ananiasɛ̀n, cɛci kruhú kɛ anwa-wrɔn cɔ́ ɛyri di v'ɛnbɔrɛ lɔ ɛkɔrɛ̀ ɛwúɛ? Ɛ̀ ẅɛn ɔyɔ̀n ɛ̀ tán Ɛhɛ́n Prɔnprɔn kɩ ɛkɛ̀tɛ̀ kùa lɔ è bɩ́ ɛcá ɛ̀ hɛ́n.

⁴Ɛnvra léyi ɛ vá hɛ́ ɛkɛ̀tɛ̀ lɔ nɔn, ɛkɛ̀tɛ̀ lɔ dú vɛ tɛn; kɩ ɛnvra léyi ɛ̀ hɛ́ nɛ̀n nɔn, ɔkùa lɔ dú vɛ tɛn, kè sɩ̀ dù ɔmu hɛ́n? Kɛ̂ anwɔntan hán cì, ɛ hán eci vɛ́n ndɔ lɔa? Kè sɩ̀ dù anwrɔnẅì de ɛ̀ ẅɛ̀n ɛyɔ̀n ɛ̀ tán nɔn, tɛ́n Ɔwɔ de ɛ̀ ẅɛn ɛyɔ̀n ɛ̀ tán nɔn.”

⁵Ɛnvra léyi Ananiasɛ̀n yá ankà ndɔ lɔ nɔn, nɛ̀n bore, kɩ nɛ́n wù. Kɩ anwrɔn hɔ̀n léyi yá ankà lɔ nɔn, ɛnjansù vri tɔ̀n bru yɔ edù.

⁶Sùgban-bɔ̀ nvà, vá n'edùru lɔ eci, zɛtɛn bɩ́ nɛ̀n hɔ́n wá ɛnhibɩ́.

⁷Wacɛ̀n anhɔ̀n vacì, Ananiasɛ̀n hi lɔ bru ɛbemɛ̀n, kɩ kè sɩ̀ nyrì eci léyi wɔɛ̀n nɔn.

⁸Piɛrɛ̀n ke yrɛ Ananiasɛ̀n hi lɔ le: “Ɛ dɔ́ mɛ̀n, nyɛ́n hɛ́ ny'ɛnhi lɔ ɔkùa ɔmu lɔa?” Ɛnnyɔnwrɔn lɔ mrɛ́n ɔmùan le: “Hɛ̀ɛ̀, ɔkùa ɔmu lɔ.”

⁹Zɛtɛn Piɛrɛ̀n kɛ dɔ́ nɛ̀n le: “Anwɔntan hán cì kɛ̂, ɔmùan kɛ krɔn nyɛ̀n, nyɛ́n anwrɔn anyhrɛ̀ lɔ, nyɛ frɛ́n Ɛẅɛnwrɔn Hɛ́n hán? E die nukùɛ, anwrɔn hɔ̀n léyi bɩ́ ecüì nɔn, nyɔn angbàtà-mùan, kɩ vɛ́n mán yɔ le bɩ́ mɛ́n yɔ hɔ̀n bɩ.”

¹⁰Ɛnvra zri lɔ ɛnnyɔnwrɔn lɔ bore Piɛrɛ̀n nan tɛsɛ̀n kɩ nwù. Sùgban-bɔ̀ lɔ bru ɛbemɛ̀n kɩ cɔ́ nɛ̀n, nɛ́n wù; yɔ bɩ́ nɛ̀n yɔ hɔ́n bɩ́ nɛ́n cüì tɛsɛ̀n.

¹¹Ɔwɔ fɛcüè-bɔ̀ mán anwrɔn hɔ̀n léyi yá ankà ndɔ lɔ nɔn dú ɛnjansù vri tɔ̀n mɛ̀n.

¹²Anvɛmɛ̀n-frɛ́n-ci bobrebe mán eci-woroan-ci hɔ̀n dú eci léyi ɔkɔ̀hɔ̀n-wá-bɔ̀ lɔ kɛ hán fɛcüè wanzi nɔn. Ankaẅì-bùtan-ẅɛn-bɔ̀ lɔ kɛ nyɔn ɛyri zri, ɔwɔn-bù-nan tɛ̀sɛ̀n, ɛyri léyi ye bi Salomɔn levri nɔn.

¹³Ɔwrɔnẅì zriɛmɛ́n ke sɩ́ ji kè bru yɔ ɛmɛ̀n, kɩ ɔmu tɛ̀kɩ, fɛcüè ẅɛn y'ɛcüɛ̀n bobrebe.

¹⁴Anwrɔn fɛcüè brobebe, wúcɔ̀ mán wúyɔ̀ ẅɛn ankaẅì-bùtan Ɛẅɛnwrɔn mɛ̀n, kɩ kɛ vá cɔ́ y'ɔkpɔsɔ lɔ.

¹⁵Kɩ ye bukru ye sɩ́ ɛnlɔẅiɛ-bɔ̀ ɛnlevri: yɛ hɛ́n yɔ sofà mán ɛnkpà wú, ô ɛnvra léyi Piɛrɛ̀n ke le cì nɔn, n'ɔwɔ̀n kè murɛn yɔ ɛwú.

¹⁶Anwrɔn fɛcüè mán ke dú anmàn hɔ̀n léyi dú Zherüzalɛmɛ̀n tɛsɛ̀n nɔn kɛ và; yɔ sɩ́ ɛnlɔẅiɛ-bɔ̀ mán anwrɔn hɔ̀n léyi anhɛ́n gbàngbàn ke di ejüe nɔn, kɩ yɔ lɛ fɛn lɔ yɔ kɔrɛ̀.

¹⁷Zɛtɛn Ɔwɔ-cice-wrɔn cüìcüì mán anwrɔn hɔ̀n léyi dú nɛ̀n ɛtɛ̀sɛ̀n, hɩ dú y'ɛmɛ̀n bɔ̀ ke sɩ́ bú owúemɛ̀n-dùfrɔ́ ankà kɛ tán ankaẅì nɔn, ẅɛn ecüì-hi-kɔ̀n ɔkɔ̀hɔ̀n-wá-bɔ̀ tɛ̀sɛ̀n; yɔ wá le yɔ hán eci.

¹⁸Yɔ hán yɔ ẅɛn yɔ ye ku anmàn wɔn-mɛ̀n-wá-wɔn mɛ̀n.

¹⁹Tɛ́n ɛnnyran mɛ̀n, Ɛẅɛnwrɔn kùyüre-wrɔn tɔ̀n srú anwɔn-mɛ̀n-wá-wɔn mɛ̀n sù hɔ̀n lɔ, hán ɔkɔ̀hɔ̀n-wá-bɔ̀ lɔ srɔ ɛntrɛ, kɩ kɛ dɔ́ yɔ le:

²⁰“Nyɛ́n hɔ́n Ɔwɔ-cice-wɔn lɔ mɛ̀n, ô nyɛ́n dɔ́ fɛcüè ankà lɔ fɛn léyi dú ɛwúvà wrú lɔ mɛ̀n nɔn.”

²¹Ɔkɔ̀hɔ̀n-wá-bɔ̀ die ankà lɔ nukùɛ: ɔsɔ̀wrɔ̀ fùtàn, yɔ hɔ́n Ɔwɔ-cice-wɔn lɔ mɛ̀n kɩ yɔ bukru yɔ yé ankà. Ɔwɔ-cice-wrɔn cüìcüì mán anwrɔn hɔ̀n léyi dú nɛ̀n ɛtɛ̀sɛ̀n nɔn, borɛ Zhüifɛ̀n fɛcüè cüìcüì-bɔ̀ ɛkru, ô yɔ cì ɛmrɛ̀n ankà-dɔ̀-trɔ-bɔ̀ zìwú. Zɛtɛn yɔ hán yɛ hɔ́n bɩ́ ɔkɔ̀hɔ̀n-wá-bɔ̀ anwɔn-mɛ̀n-wá-wɔn mɛ̀n.

²²Tɛ́n ɛnvra léyi gɔliɛ-bɔ̀ lɔ nvà nɔn, yɔ sɩ̀ cɔ̀ yɔ anwɔn-mɛ̀n-wá-wɔn mɛ̀n. Yɔ vru ɛmɛẅi yɔ hɔ́n ankà-dɔ̀-trɔ-bɔ̀ mrɛ̀ncì zìwú kɩ yɔ dɔ́ ɛmɛẅi ankà

²³ndɔ lɔ: “Bɔ̀ cɔ́ anwɔn-mɛ̀n-wá-wɔn lɔ, yɛ sɛ́n ɛsù hɔ̀n lɔ anvrɛnvrɛn kɩ ɛyri-nan-bɔ̀ lɔ mán nyɔn angbàta-mùan. Tɛ́n ɛnvra léyi bɔ̀ srú ɛsù hɔ̀n lɔ nɔn, bɔ́ sɩ̀ cɔ̀ ɔwrɔn zriɛmɛ́n anwɔn mɛ̀n.”

²⁴Ɛnvra léyi Ɔwɔ-cice-wɔn yri-nan-bɔ̀-wrɔn cüìcüì mán Ɔwɔ-cice-bɔ̀ cüìcüì hɔ̀n yá ankà ndɔ lɔ nɔn, yɔ sɩ́ nyri ankà léyi yɔ le tro nɔn, kɩ yɔ yrɛ y'edomɛ̀n eci léyi wɔ́ɛn ɔkɔ̀hɔ̀n-wà-bɔ̀ lɔ nɔn.

²⁵Zɛtɛn ɔwrɔn tɔ̀n srɔ kɩ kɛ dɔ́ yɔ le: “Nyɛ́n die nukùɛ! Anwrɔn hɔ̀n léyi nyɛ́n wá anwɔn mɛ̀n nɔn dú Ɔwɔ-cice-wɔn lɔ mɛ̀n ke yé fɛcüè ankà.”

²⁶Zɛtɛn ɛyri-nan-bɔ̀-wrɔn cüìcüì bɩ́ anwrɔn kɛ̀ hɔ̀n kɛ̀ ẅɛn ɔkɔ̀hɔ̀n-wá-bɔ̀ lɔ kɛ và. Tɛ́n yɔ sɩ̀ ẅɛ̀n yɔ ecüìemɛ̀n, ɔmuhi ɛnjansù mán dú yɔ ɛnbɔrɛ mɛ̀n, kɩ yɔ tro le fɛcüè kɛ lɛ sroan yɔ ɛbù.

²⁷Ɛnvra léyi ye bɩ́ yɔ yɛ và nɔn, yɔ sɩ́ yɔ ankà-dɔ̀ trɔ-bɔ̀ mrɛ̀ncì zìwú kɩ Ɔwɔ-cice-wrɔn cüìcüì lɔ bukru ke ku yɔ ankà ɛwú.

²⁸Nɛ dɔ́ yɔ le: “Bɔ̀ sî ɛshishiemɛ̀n bɔ̀ tán nyɛ̀n le, nyɛ́n bɩ́ bɩ́ ɔwrɔn ndɔ lɔ bɩ́ nyɛ́n yé anwrɔn ankà. Zɛtɛn cɛci de nyɛ́n hán nɛ́n? Nyɛ́n bonyi ny'ankà-yé lɔ Zherüzalɛmɛ̀n anmàn mumù lɔ wú, kɩ nye ji nyɛ́n bɩ́ n'owù gbàn lɔ nyɛ́n kú bɔ̀ ɛwúɛ!”

²⁹Piɛrɛ̀n mán ɔkɔ̀hɔ̀n-wá-bɔ̀ ndɔ hɔ̀n lɔ mrɛ́n ɔmùan le: “Ke ji le ye die Ɔwɔ nukù kɛ̀ vrán anwrɔnẅì.

³⁰Bɔ́ nancüì hɔ̀n Wɔ, frɔ́ Zhezü ndɔ lɔ, hɩ nyɛ́n hán wú ɛgbàn-hán-tɛ̀ domɛ̀n nɔn.

³¹Ɔwɔ bɩ́ nɛ̀n hɛ́n n'ezì-kɔrɛ̀ kɔrɛ̀a kɩ wá nɛ̀n ecüìcüì mán Ebɩ̀die-wrɔn, ô kɛ̀ tán Izraɛlɛ̀n fɛcüè kɛ̀ crɔn y'eci-hán-ci, ô kɛ̀ cɔ́ ɛgbàn-bɩce.

³²Bɔ̀ dú eci-woroan-ci ndɔ hɔ̀n lɔ, yɔ dalɛfuɛ-di-bɔ̀, bɔ̀ mán Ɛnhɛ́n Prɔnprɔn léyi Ɔwɔ tán anwrɔn hɔ̀n léyi kɛ wá nɛ̀n nɔn.”

³³Ankà-dɔ̀-trɔ-bɔ̀ lɔ bɩ́ ɛmɛ̀nhyì ɛnvra léyi yɔ yá ankà ndɔ lɔ nɔn, kɩ yɔ ji yɔ di ɔkɔ̀hɔ̀n-wá-bɔ̀ lɔ owúemɛ̀n.

³⁴Tɛ́n y'ɛmɛ̀n lɔ, Ɔwɔ-nyànmàn-sùva-wá-wrɔn tɔ̀n ndù ye bi Gamaliɛlɛ̀n, fɛcüè lɔ fɛn ẅɛn n'ɔwa. Nɛ̀n tɔhú ankà-dɔ̀-trɔ-bɔ̀ mrɛ̀ncì wanzi kɩ nɛ̀n sán le, ɔkɔ̀hɔ̀n-wá-bɔ̀ lɔ kɛ srɔ ɛntrɛ ɛnvra cá.

³⁵Zɛtɛn nɛ dɔ́ fɛcüè le: “Izraɛlɛ̀n-bɔ̀, nyɛ́n wá ny'edomɛ̀n esùva, eci léyi nye ji nyɛ́n hán anwrɔn ndɔ hɔ̀n lɔ nɔn hɩ wú.

³⁶Kɛ vá moɛ̀n, Tedasɛ̀n nvà, nɛ́n léyi nɛ krɛ́ n'edomɛ̀n ɔwrɔn ankrankran; ɔwrɔn ɛkoẅì-ɛẅia kɛ́n nɛ̀n ɛsɛ̀n. Tɛ́n ye wri nɛ̀n, anwrɔn hɔ̀n léyi dú nɛ̀n ɛmɛẅi nɔn bonyì kɩ nɛ́n fɛcüè lɔ zrɛ́n mrìmrì.

³⁷N'ɛmɛẅi lɔ, ɛnvra léyi yɛ wá anwrɔn ebɩ́ owrúemɛ̀n nɔn, Galile-wrɔn Zhüda mán srɔ; nɛ̀n bɩ́ anwrɔn fɛcüè kɛ́n nɛ̀n ɛsɛ̀n. Tɛ́n nɛ́n mán ye wri nɛ̀n kɩ anwrɔn léyi dú n'ɛsɛ̀nkɛn-bɔ̀ nɔn bonyì.

³⁸Zɛtɛ̀ lɔ, mɛ dɔ́ nyɛ̀n le: anwrɔn ndɔ hɔ̀n lɔ, nyɛ́n bɩ́ vru wá y'ankà zriɛmɛ́n ɛnkru ɛwúɛ, nyɛ́n teze yɔ. Ɔmuhi ke dú kɛ, y'ankà-tro mán y'eci-hán-ci dú anwrɔnẅiemɛ̀n nvà hô, yɔ mán yɔ lɛ zrɛ́n.

³⁹Tɛ́n, ke dú kɛ, annanwɔrɛ mɛ̀n, y'eci-hán-ci dú Ɔwɔ yri và hô, nyɛ́n sɩ̀ jrɛ́ yɔ rɔ́. Nyɛ́n bɩ́ ji muzhie nyɛ́n tán ny'edomɛ̀n Ɔwɔ anhà-kɔ́n mɛ̀n!” Ankà-dɔ̀-trɔ-bɔ̀ shri Gamaliɛlɛ̀n ankà lɔ nbɩ̀.

⁴⁰Ye vru ye bi ɔkɔ̀hɔ̀n-wá-bɔ̀ lɔ, yɔ hán ye gorɛ yɔ kɩ yɔ wá tán yɔ le, yɔ bɩ́ vru dɔ́ ankà Zhezü bɩmɛ̀n, zɛtɛn yɔ tecüe yɔ.

⁴¹Ɔkɔ̀hɔ̀n-wá-bɔ̀ lɔ cɔhɔ́ ankà-dɔ̀-trɔ-bɔ̀ mrɛ̀ncì zìwú, yɔ dú pɔpüɛ̀-brá mɛ̀n, ɔmuhi Ɔwɔ ci yɔ ɛmrɛ̀n le, yɔ kán ɛgbàn Zhezü bɩmɛ̀n nɔn.

⁴²Kɩ ɛnbɩ lɔ fɛn yɔ dú Ɔwɔ-cice-wɔn lɔ mɛ̀n mán anwrɔn bemɛ̀n, yɔ dú anwrɔn ankà-yé mɛ̀n ɛnvra lɔ fɛn, kɩ yɔ dɔ́ Zhezü, Ebɩ̀die-wrɔn, mɛẅì ankà ankrankran lɔ.