Read Alladian Rɔmɛ̀n-anmàn-bɔ̀ 13 Bible Online

Rɔmɛ̀n-anmàn-bɔ̀ 13 - Alladian bible

Rɔmɛ̀n-anmàn-bɔ̀ 13

¹Ɔwrɔnwrɔn kè die govràn-kɔ̀hɔ̀n-hán-bɔ̀-cüìcüì hɔ̀n léyi ẅɛn ɛkɔrɛ̀-levri nɔn nukùɛ. Ɔmuhi ɛkɔrɛ̀-levri lɔ fɛn dú Ɔwɔ yri và nɔn; yɔ hɔ̀n léyi dù nɔn, nɛ́n de nɛ̀n wá yɔ nɔn.

²Ɔmu lɔ, ɔwrɔn léyi kɛ kɛ́n ɛkɔrɛ̀-levri-wrɔn ezì nɔn, nɛ kɛ́n ɛnyànmàn léyi Ɔwɔ wá nɔn ezì. Anwrɔn hɔ̀n léyi kɛ kɛ́n ɛnyànmàn ezì nɔn kɛ lɛ wán ɛmrɛ̀ncì sɩ́ yɔ dùku y'edomɛ̀n.

³Annanwɔrɛ mɛ̀n lɔ, anwrɔn hɔ̀n léyi kɛ hán anvrɛn nɔn ke sɩ́ sú ɛmrɛ̀nci-bɔ̀, tɛ́n yɔ hɔ̀n léyi kɛ hán ɛgbàn nɔn de ke sú yɔ nɔn. E sɩ́ ji le è sú ɛkɔrɛ̀-levri-wrɔn hán? Zɛtɛn, ɛ̀ hán anvrɛn kɩ ɛ lɛ cɔ́ ɛmrɛ́n,

⁴ɔmuhi ɛkɔrɛ̀-levri-wrɔn dú Ɔwɔ-ci-bɩ̀tan-wrɔn léyi ke le yɩ́ mɛ́n edù, ô ɛ̀ hán eci ankrankran nɔn. Tɛ́n ke dú kɛ ɛ hán eci gbàngbàn hô, è sú nɛ̀n! Ɔmuhi kè sɩ̀ dù ankora de nɛ̀n ẅɛ̀n ɛgbàn-hán kɔrɛ̀-levri nɔn: nɛ̀n dú Ɔwɔ-ci-bɩtan kɔ̀hɔ́n mɛ̀n, ô nɛ̀n yé Ɔwɔ mɛ̀nhyì-bɩ̀ léyi ke ku Ɔwrɔn léyi kɛ hán eci-gbangbàn nɔn ɛwú.

⁵Hɩ le kruhú de zrɔ tán le ye die ɛkɔrɛ̀-levri-bɔ̀ nukùɛ, kɩ kè sɩ̀ dù hɩ le y'a cɔ́ Ɔwɔ mɛ̀nhyɩ̀-bɩ̀, tɛ́n vru dú ankà-nyrì ci-hán nɔn.

⁶Hɩ le kruhú mán de nye di anmàn-wɔ̀ɛn, ɔmuhi anwrɔn hɔ̀n léyi ke yrɛ anmàn-wɔ̀ɛn nɔn, yɔ dú Ɔwɔ-ci-bɩ̀tan-bɔ̀, ô yɔ hán ɔkɔ̀hɔ̀n ndɔ lɔ anvrɛnvrɛn mɛ̀n nɔn.

⁷Nyɛ́n di ɔwrɔnwrɔn ɔwɔ̀ɛn léyi nyɛ́n ẅɛn nɛ̀n nɔn: nyɛ́n di anmàn-wɔ̀ɛn nyɛ́n tán ɔwrɔn léyi nyɛ́n ẅɛn ɔwɔ̀ɛn nɔn, ô nyɛ́n di ɔkɔ̀hɔ̀n-hán wɔ̀ɛn nyɛ́n tán ɔwrɔn léyi nyɛ́n ẅɛn ɔẅɔɛ̀n nɔn; ɔwrɔn léyi ẅɛn ɛwá nɔn, nyɛ́n tán nɛ̀n ɛwá, ô ɔwrɔn léyi ɛmrɛ́n dú nɛ tɛn nɔn, nyɛ́n tán nɛ̀n ɛmrɛ́n.

⁸Nyɛ́n bɩ́ ẅɛn ɔwrɔn zriɛmɛ́n ɔwɔ̀ɛn, ke dú kɛ kè sɩ̀ dù ɛcüɛ̀n léyi ke ji le nyɛ́n ẅɛ̀n nyɛ́n tán ny'edomɛ̀n nɔn. Ɔwrɔn léyi kɛ cüɛn nɛ́n nyran hɔ̀n nɔn, nɛ hán ɛnyànmàn ci léyi ke ji nɔn.

⁹Annanwɔrɛ mɛ̀n lɔ, ɛnyànmàn ndɔ hɔ̀n lɔ: “E bɩ́ hán ɛncɔnwrɔn mán ɛnnyɔnwrɔn-bi-gbàn, e bɩ́ wri ɔwrɔn, e bɩ́ yerɛ ɛci, ɛnyran ci ke bɩ́ cüɛn mɛ́n ɛvɛ̀”, mán hɩ le wɔrɔ nɔn, kɛ bɔ̀sɔ́ y'edomɛ̀n ɛnyànmàn zri ndɔ lɔ mɛ̀n: “Ke ji le ɛ̀ cüɛn ɛnyran-wrɔnẅì kɛ̀ hán vɛ́n mumù hɔ́.”

¹⁰Ɔwrɔn léyi ẅɛn ɛcüɛ̀n nɔn, ke sɩ́ hán nɛ́n nyran-wrɔnẅì ɛgbàn zriɛmɛ́n. Ɛcüɛn mɛ̀n de yɛ hán ɛnyànmàn kɔrɛ̀-zì-ci kɛ sá nmù nɔn.

¹¹Nyɛ́n ẅɛn ankà ndɔ lɔ ɛshishiemɛ̀n nyɛ́n hɛ́n hán ɔmu le nyɛ́n nyri ɛnvra léyi bɔ̀ dú ɛmɛ̀n nɔn: Ɛnvra léyi ke ji, ô nyɛ́n dú ɛndà dá mɛ̀n nyɛ́n tɔhú nɔn, ncɔ̀a. Annànwɔrɛ mɛ̀n lɔ, ɛnkru-kɔrɛ̀ bá bɔ̀ ɛtɛ̀sɛ̀n zɛtɛ̀ lɔ, vrán ɛnvra léyi bɔ̀ bukru bɔ́ ẅɛn ankàẅì-bùtan nɔn.

¹²Ɛnnyran gɔ̀n bru ɛmɛ̀n, ɛcɛ̀n bá ɛtɛ̀sɛ̀n. Bɔ́ teze zɛtɛn eci-hán-ci hɔ̀n léyi yɛ hán ɛyri-yɔwɔ mɛ̀n nɔn, ô bɔ̀ bɩ́ anhà-kɔ́n-ci léyi yɛ wá edomɛ̀n ɛcɛ̀n yrikan mɛ̀n nɔn.

¹³Bɔ̀ nyrɔn bɔ́ edomɛ̀n ɛwá mɛ̀n, hán ɔmu le ke ji le bɔ̀ hán ɛcɛ̀n-yri-kàn mɛ̀n nɔn. Bɔ̀ wá bɔ́ edomɛ̀n esùva ɛci-cüì-zîemɛ̀n, ɛntàn-kɔ́n mɛ̀n, esù-gbàngbàn-nán mɛ̀n mán ɛwúvà-gbàngbàn-ẅɛn mɛ̀n, ɛdrɛ̀-hán mɛ̀n mán ecüi-hi-kɔ́n mɛ̀n.

¹⁴Nyɛ́n ẅɛn edomɛ̀n, eci lɔ fɛn léyi Zhezü Krisì Ɛẅɛnwrɔn tán bɔ̀ nɔn, ô nyɛ́n bɩ́ vru teze ny'edomɛ̀n nyɛ́n tán nyɛ́n dukú ny'eci-gbàngbàn léyi nyɛ́n cüɛn n'ɛhán nɔn.