Read Alladian Rɔmɛ̀n-anmàn-bɔ̀ 15 Bible Online

Rɔmɛ̀n-anmàn-bɔ̀ 15 - Alladian bible

Rɔmɛ̀n-anmàn-bɔ̀ 15

¹Bɔ́ léyi ankaẅì-bùtan ẅɛn bɔ̀ ecüì nɔn, ke ji le bɔ̀ bɩ́ ɛnbɔrɛ wɔwɔ mɛ̀n, anwrɔn hɔ̀n léyi ankaẅì-bùtan kè sɩ̀ ẅɛ̀n ecüì nɔn, y'ɛzɛ̀n-ci-hán lɔ. Ke sɩ́ ji le bɔ́ ji eci léyi dú bɔ́ ɛcüɛn-ci nɔn.

²Ke ji le ɔwrɔnwrɔn ke ji ɛyri, ô kɛ̀ cɔ́ nɛ́n nyran cüɛ̀n, kè dú n'anvrɛn, ô kɛ̀ hán nɛ̀n, nɛ̀n hɔ́n ezì ankaẅì-bùtan mɛ̀n.

³Annanwɔrɛ mɛ̀n lɔ, Krisì kè sɩ̀ jì eci léyi dú n'ɛcüɛn-ci nɔn. Tɛ́n hán ɔmu le Owrú kɛ dɔ̀ nɔn: “Ɔwrá ankà hɔ̀n lɔ fɛn léyi yɛ dɔ́ ku mɛ́n ɛwú nɔn, vá ku mɛ̀n ɛwú.”

⁴Eci lɔ fɛn léyi bɔ́ cɔ́ Ɛwrú hɔ̀n lɔ mɛ̀n nɔn, ye merɛ́n yɔ, ɛnvra sheshe mɛ̀n, ô kè yé bɔ̀ ankà, ô ɛnbɔrɛ-ẅɛ̀n-hɛ́n, mán ɛnbɔrɛ-bi-wá léyi yɔ vá sɩ́ bɔ̀ nɔn, n'ɛwú lɔ bɔ̀ cɔ́ esɛ́.

⁵Ke ji le, Ɔwɔ léyi dú ɛnbɔrɛ-ẅɛ̀n-hɛ́n mán ɛnbɔrɛ-bi-wá shi-bɛ́ nɔn kɛ tán nyɛ̀n ɛwúvà-mùan-krɔn nyɛ́n mán nyɛ́n nyran hɔ̀n mɛhi, ô nyɛ́n bɩ́ Zhezü Krisì sɛnpò lɔ nyɛ́n nán esù ɛwú.

⁶Zɛtɛn, nyɛ lɛ fɛn lɔ, esùva zriemɛ̀n, nyɛ lɛ mrɛ́n Ɔwɔ, bɔ́ Ɛẅɛnwrɔn Zhezü Krisì nɛ̀n Zi.

⁷Ɔmu lɔ, nyɛ́n bɩ́ ny'edomɛ̀n, hán ɔmu le Krisì mán bɩ́ nyɛ̀n Ɔwɔ ci-zrɔ mɛ̀n nɔn.

⁸Ananwɔrɛ mɛ̀n lɔ, mɛ dɔ́ nyɛ̀n ankaẅì-bùtan mɛ̀n le, Krisì srɔ Zhüifɛ̀n-bɔ̀ ci-bɩ̀tan-wrɔn, ô ɔmùan léyi Ɔwɔ wá yɔ nancüì hɔ̀n nɔn kɛ̀ sá nmù, ô ɔmu lɔ, kè yé Ɔwɔ-mùan-zri-dì lɔ.

⁹Nɛ̀n vru nɛ́n và, ô anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn kɛ̀ mrɛ́n Ɔwɔ n'ɛnbɔrɛ-wɔ̀ lɔ kruhú, hán ɔmu le Owrú kɛ dɔ̀ nɔn: “Hɩ le kruhú de mɛ lɛ mrɛ́n mɛ́n ɛnhi wú anmàn hɔ̀n lɔ fɛn wú, kɩ mɛ lɛ krɛ́ v'ɛmrɛ́n cɔ̀.”

¹⁰Owrú ke vru kɛ dɔ̀ le: “Ɛnhi wú anmàn hɔ̀n, pɔpüɛ̀ kɛ̀ brá nyɛ̀n, nyɛ́n mán Ɛẅɛnwrɔn fɛcüè mɛhi!”

¹¹Kɩ nɛ̀n vru nɛ́n dɔ̀ le: “Nyɛ́n zrɔ Ɛẅɛnwrɔn eci nyɛ́n ɛnhi wú anmàn hɔ̀n lɔ fɛn, nyɛ́n krɛ́ n'ɛmrɛ́n cɔ̀, nyɛ́n fɛcüè hɔ̀n lɔ fɛn!”

¹²Ezahi mán kɛ dɔ̀ le: “Zhese mɛẅi-wrɔn kɛ lɛ và, ne le tɔhú, ô nɛ̀n nyrɔn ɛnhi-wú anmàn hɔ̀n, kɩ fɛcüè hɔ̀n ke bɩ́ y'esɛ́ lɔ kɛ wá nɛ̀n ɛmɛ̀n.”

¹³Ke ji le Ɔwɔ léyi dú esɛ́ shi-bɛ́ nɔn ke hán pɔpüɛ̀ mán anwɔwɔ ke dú nyɛ̀n ɛmɛ̀n, ny'ankaẅì-bùtan léyi nyɛ́n ẅɛn n'ɛwú nɔn, ô nyɛ́n di ɛnnɛ̀ncüì esɛ́ mɛ̀n, Ɛhɛ́n Prɔnprɔn kɔrɛ̀-srɔn mɛ̀n.

¹⁴Nmàn-ẅì hɔ̀n, mɛ́n dùku mɛ́n nyrì le, eci-hán ankrankran yɩ́ nyɛ̀n edomɛ̀n, nyɛ́n cɔ̀ nyɛ́n yá eci léyi ke ji le nyɛ́n nyrì, kɩ nyɛ́n krɔn kpehɛ́n nyɛ́n woro ankà nyɛ́n yé ny'edomɛ̀n.

¹⁵Ɔmu tɛ̀kɩ, mɛ̀n merɛ́n nyɛ̀n owrú ɛkɔrɛ̀levriemɛ̀n, ô owrú lɔ mɛ̀n, mɛ̀n kore nyɛ̀n ankà léyi nyɛ́n gɔ́ nyrì nyɛ́n hɛ́n nɔn. Mɛ̀n merɛ́n owrú ɔmu lɔ ɛkɔrɛ̀-wá léyi Ɔwɔ tán mɛ̀n nɔn hɩ wú,

¹⁶ô mɛ̀n dú Zhezü Krisì ci-bɩ̀tan-wrɔn kè dú fɛcüè hɔ̀n léyi kè sɩ̀ dù Zhüifɛ̀n-bɔ̀ nɔn tɛn. Mɛ hán eci-bɩ̀tan kɔ̀hɔ̀n prɔnprɔn m'Ɔwɔ mɛẅi ankà ankrànkràn dɔ́ mɛ̀n, ô fɛcüè hɔ̀n léyi kè sɩ̀ dù Zhüifɛ̀n-bɔ̀ nɔn, kɛ srɔ ecice-ci léyi kɛ cüɛn Ɔwɔ ɛvɛ̀, ô kè dú eci léyi vɛ́n nɛ̀n, Ɛnhɛ́n Prɔnprɔn mɛ̀n nɔn.

¹⁷Zhezü Krisì mɛhi b'ɔbɔ̀sɔ̀ lɔ mɛ̀n, mɛ lɛ mrɛ́n m'edomɛ̀n Ɔwɔ-kɔ̀hɔ̀n-hán mɛ̀n.

¹⁸Annanwɔrɛ mɛ̀n lɔ, ke dú kɛ mɛ dɔ́ eci tɔ̀n ankà hô, dú eci tɔ̀n léyi Krisì hán tán mɛ̀n, ô mɛ̀n hán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, kɛ̀ ẅɛn Ɔwɔ wá. Nɛ̀n hán eci lɔ ankà-dɔ́ mɛ̀n mán eci-hán mɛ̀n,

¹⁹anvɛmɛ̀n-frɛ́n-ci mán eci-woroan-ci kɔrɛ̀-srɔn mɛ̀n, mán Ɔwɔ Hɛ́n kɔrɛ̀-srɔn mɛ̀n. Ɔmu lɔ de mɛ̀n dɔ́ anvrɛnvrɛn mɛ̀n Krisì mɛẅi ankà ankrànkràn lɔ, me ci ɛyri lɔ fɛn bukru Zherüzalɛmɛ̀n anmàn, hàn kɩ cɔ́ Iliri kpɔsɔ wú.

²⁰Tɛ́n mɛ̀n wá le, mɛ lɛ dɔ́ Ɛmɛẅi ankà Ankrankran lɔ, ɛyri hɔ̀n léyi yɛ vá yá yɛ dɔ́ Krisì ankà, ô ke bɩ́ hán tán ankà-dɔ̀ hɔ̀n lɔ, ke dú anhyrɛ̀, ke dú kɛ ɔwrɔn gɔ́ ci nanvrɛn.

²¹Ɔmu lɔ de mɛ̀n hán eci léyi Owrú dɔ̀ nɔn: “Anwrɔn hɔ̀n léyi ye sɩ̀ gɔ̀ dɔ̀ n'ankà nɔn, kɛ lɛ kán nɛ̀n, kɩ anwrɔn hɔ̀n léyi kɛ vá gɔ̀ yá yɛ dɔ́ n'ankà nɔn, kɛ lɛ yá.”

²²Ndɔ lɔ de kè sɩ̀ tàn mɛ̀n ɛkɔrɛ̀levri ɛnvra bobrebe mɛ̀n, ô mɛ̀n và kán nyɛ̀n nɔn.

²³Tɛ́n zɛtɛ̀ lɔ, mɛ̀n hán m'ɔkɔ̀hɔ̀n trɔ ɛyri ndɔ hɔ̀n lɔ wú. Ɛnnànwàn bobrebe mɛ̀n de mɛ̀n wá, ô mɛ̀n và kán nyɛ̀n

²⁴kɩ me ji mɛ̀n hán hɩ ci lɔ ɛnvra léyi mɛ lɛ hɔ́n Ɛspanyɛ̀n hi wú nɔn. Ɔmuhi mɛ̀n ẅɛn esɛ́ le mɛ lɛ kán nyɛ̀n m'eciemɛ̀n kɩ mɛ lɛ cɔ́ ny'ɛkɔrɛ̀-wá ô mɛ̀n hɔ́n ɛnhi wú anmàn ndɔ lɔ wú, ɛnvra léyi nyɛ́n mɛhi bɔ́ lɛ kán bɔ́ edomɛ̀n ɛnvra cá mɛ̀n nɔn.

²⁵Tɛ́n ɛnvra lɔ mɛ̀n, mɛ hɔ́n Zherüzalɛmɛ̀n anmàn, ô mɛ̀n dú ankaẅì-bùtan-ẅɛn-bɔ̀ léyi dú nanvrɛn nɔn, y'eci-bɩ̀tan-kɔ̀hɔ́n mɛ̀n.

²⁶Annanwɔrɛ mɛ̀n lɔ, Maseduhanɛ̀n mán Akahi Krisì-sɛ̀nkɛn-bɔ̀ wá le, yɔ lɛ fɔ́n eci yɔ tán ɛmian-bɔ̀ fɛcüè léyi dú Zherüzalɛmɛ̀n anmàn nɔn.

²⁷Yɔ dùku yɔ wá ɔmùan, tɛ́n annanwɔrɛmɛ̀n lɔ yɔ ẅɛn yɔ ɔwɔ̀ɛn. Ɔmuhi Zhüifɛ̀n-bɔ̀ léyi dú Krisì-sɛ̀nkɛn-bɔ̀ nɔn, dɛ́ y'ɛnhɛ́n mɛ̀n ci-ẅɛ̀n ankrankran lɔ tán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn; kɩ yɔ léyi yɔ sɩ̀ dù Zhüifɛ̀n-bɔ̀ nɔn, yɔ mán ke ji le yɔ wá anwrɔn hɔ̀n léyi ẅɛn y'ankà-tro ankrankran nɔn ɛkɔrɛ̀.

²⁸Ɛnvra léyi mɛ lɛ trɔ ɔkɔ̀hɔ̀n ndɔ lɔ n'ɛhán, hɩ me le bɩ́ ɛkɔrɛ̀-wá ci lɔ mɛ̀n tán yɔ nɔn, me le bɩ́ Ɛspanyɛ̀n levri kɩ me le ci ny'anmàn.

²⁹Kɩ mɛ̀n nyri ɔmu le, ɛnvra léyi mɛ lɛ cɔ́ ny'anmàn nɔn, mɛ lɛ vá Krisì shifúemɛ̀n.

³⁰Tɛ́n nyàn eci léyi mɛ sán nyɛ̀n, anwrɔn-nɛ́n-muan-ẅì hɔ̀n, bɔ́ Ɛẅɛnwrɔn Zhezü Krisì mán ɛcüɛ̀n léyi Ɛnhɛ́n Prɔnprɔn kɛ tán bɔ̀ nɔn bɩmɛ̀n: nyɛ́n cɔ́ mɛ̀n mɛhi bɔ̀ kɔ́n anhà, ny'Ɔwɔ-sɛ̀n tán mɛ̀n.

³¹Nyɛ́n sɛ́n Ɔwɔ, ô anwrɔn hɔ̀n léyi kè sɩ̀ ẅɛ̀n ankaẅì-bùtan Zhüde kpɔsɔ wú nɔn, mɛ̀n di yɔ antá, ô ɛkɔrɛ̀-wá léyi me sɩ́ Zherüzalɛmɛ̀n anmàn nɔn, kè dú eci léyi ankaẅì-bùtan-ẅɛn-bɔ̀ kɛ lɛ cüɛ̀n nɔn.

³²Ɔmu lɔ de mɛ lɛ cɔ́ ny'anmàn, pɔpüɛ̀ kè yɩ́ m'ɛnbɔrɛ lɔ mɛ̀n, ke dú kɛ Ɔwɔ ke ji ɔmu lɔ, kɩ me le bɩ́ ɔwrɔncüe jan ny'anwanzi.

³³Ɔwɔ léyi dú anwɔwɔ shi-bɛ́ nɔn, kɛ và dú nyɛ̀n ɛmɛ̀n. Kè dú ɔmu lɔ.