Read Alladian Rɔmɛ̀n-anmàn-bɔ̀ 4 Bible Online

Rɔmɛ̀n-anmàn-bɔ̀ 4 - Alladian bible

Rɔmɛ̀n-anmàn-bɔ̀ 4

¹Abrahamɛ̀n léyi dú bɔ́ nancüì nɔn, ankà tán de bɔ́ lɛ ẅɛ̀n bɔ̀ dɔ́ n'ɛwú nɛ́n? Ɔwrɔnẅì léyi dú nɛ̀n nɔn, ecitan de nɛ́n cɔ̀ nɛ́n?

²Ke dú kɛ Abrahamɛ̀n ke dú ɛnyrɔnnan-wrɔn Ɔwɔ zìwú n'eci-hán mɛ̀n, nɛ lɛ mrɛ́n n'edomɛ̀n tɛ̀. Tɛ́n nɛ́n sɩ̀ mrɛ́n n'edomɛ̀n Ɔwɔ ziwú rɔ́.

³Annanwɔrɛ mɛ̀n lɔ, Owrú Prɔnprɔn kɛ dɔ̀ le: “Abrahamɛ̀n ẅɛn esɛ́ Ɔwɔ mɛ̀n, kɩ Ɔwɔ bɩ́ nɛ̀n srɔ ɛnyrɔnnan-wrɔn n'ankaẅì-bùtan-ẅɛn mɛ̀n.”

⁴Ɔwrɔn léyi kɛ hán ɔkɔhɔ̀n nɔn, nɛ cɔ́ ɔwɔ̀ɛn-dì; ɔwɔ̀ɛn-dì ndɔ lɔ kè sɩ̀ dù ecice kora: nɛ̀n dú ɔkɔhɔ̀n-hán-wɔ̀ɛn-dì.

⁵Tɛ́n ɛnvra léyi ɔwrɔn tɔ̀n ke sɩ́ hán Ɔwɔ kɔhɔ̀n, kɩ ke bú tán le Ɔwɔ ke nyri ɛgbàn-hán-wrɔn ɛnhyɔ̀bɔ̀, Ɔwɔ kɛ srɔ nɛ̀n ɛnyrɔnnan-wrɔn n'ankaẅì-bùtan-ẅɛ̀n kruhú.

⁶Ɔmu lɔ de Davidɛ̀n kɛ dɔ́ ankà tán ɛnbɔrɛbru-wrɔn léyi Ɔwɔ kɛ srɔ ɛnyrɔnnan-wrɔn, kɩ ke sɩ́ crɛ nyan n'eci-hán-ci hɔ̀n lɔ nɔn:

⁷“Ɛnbɔrɛbru dú anwrɔn hɔ̀n léyi Ɔwɔ bɩ́ yɔ ngàshi-gbàn lɔ ce yɔ, hɩ juru y'ɛgbàn hɔ̀n lɔ sɔhɔ́ nɔn tɛn!

⁸Ɛnbɔrɛbru dú ɔwrɔn léyi Ɛẅɛnwrɔn ke sɩ́ krɛ́ n'ɛgbàn hɔ̀n lɔ nɔn tɛ́n!”

⁹Ɛnbɔrɛbru ndɔ lɔ dú tán anwrɔn hɔ̀n léyi ye wí wúcɔ̀-domɛ̀n kɩ, kale yɔ hɔ̀n léyi ye sɩ̀ wì wúcɔ̀-domɛ̀n nɔn mán? Hɛ̀ɛ̀, zɛtɛ̀ lɔ bɔ́ dɔ̀ le “Ɔwɔ srɔ Abrahamɛ̀n ɛnyrɔnnan-wrɔn n'ankàẅì-bùtan-ẅɛ̀n lɔ kruhú”.

¹⁰Ɛnvra tán de eci lɔ wɔ̀ɛn nɛ́n? Ɛnvra léyi ye wí Abrahamɛ̀n wúcɔ̀-domɛ̀n, kale ɛnvra léyi yɛ vá wí nɛ̀n wùcɔ̀-domɛ̀n nɛ́n? Hɔ̂, kè sɩ̀ dù ɛnvra léyi ye wí nɛ̀n wúcɔ̀-domɛ̀n nɔn, tɛ́n n'ɛmɛẅi lɔ.

¹¹Ɛnvra sheshe vacì yakɛ ye wí Abrahamɛ̀n wúcɔ̀-domɛ̀n dú eci-woroan-ci tɔ̀n: ndɔ lɔ dú eci-woroan-ci léyi ke yé le Ɔwɔ srɔ Abrahamɛ̀n ɛnyrɔnnan-wrɔn ankaẅì-bùtan léyi nɛ̀n ẅɛ̀n nɔn kruhú, tɛ́n hɩ vra lɔ mɛ̀n, yɛ vá wí nɛ̀n wúcɔ̀-domɛ̀n. Ɔmu lɔ de Abrahamɛ̀n srɔ anwrɔnẅì lɔ fɛn léyi ke bú Ɔwɔ ankà kɛ tán ankaẅì, hɩ yɛ vá wí wúcɔ̀-domɛ̀n nɔn, yɔ zi, kɩ Ɔwɔ ke bɩ́ yɔ mán kɛ hán ɛnyrɔnnan-bɔ̀.

¹²Nɛ̀n vru nɛ̀n dú anwrɔn hɔ̀n léyi ye wí wúcɔ̀-domɛ̀n nɔn yɔ zi, hɩ mɛ̀n kɛ dɔ̀ le, anwrɔn hɔ̀n léyi ke sɩ́ bɩ́ y'edomɛ̀n kɛ hán Abrahamɛ̀n ẅì hɔ̀n kɩ, tɛ́n kɛ nán esù Abrahamɛ̀n sɛnpɔ̀ lɔ wú ankaẅì-bùtan-ẅɛn mɛ̀n, ɛnvra léyi yɛ vá wí nɛ̀n wúcɔ̀-domɛ̀n nɔn.

¹³Ɔwɔ wá Abrahamɛ̀n mán n'ɛmɛẅi-bɔ̀ ɔmùan le nɛ lɛ tán yɔ ɛnhibù lɔ. Ɔmùan-wá ndɔ lɔ Ɔwɔ tán nɔn, kè sɩ̀ dù hɩ le Abrahamɛ̀n kɛ wá ɛnyànmàn nɔn kruhú, tɛ́n, ɔmuhi Ɔwɔ bɩ́ nɛ̀n srɔ ɛnyrɔnnan-wrɔn n'ankaẅì-bùtan-ẅɛn mɛ̀n nɔn.

¹⁴Ke dú kɛ anwrɔn hɔ̀n léyi kɛ wá ɛnyànmàn nɔn zri kɩ, de kɛ cɔ́ Ɔwɔ mùan-wá anvrɛn hɔ̀n lɔ nɔn, ke dú hɩ lɔ hô, ankaẅì-bùtan ke le dú eci woro kɩ Ɔwɔ mùan-wá lɔ ke sɩ̀ ẅɛn ɛnkru.

¹⁵Annanwɔrɛ mɛ̀n lɔ ɛnyànmàn kɛ tán Ɔwɔ ɛmɛ̀nhyì-bɩ̀; tɛ́n ɛyri léyi ɛnyànmàn bàdà nɔn, ɛnyànmàn-fɔndɔ̀n mán bàdà nanvrɛn.

¹⁶Ɔmu lɔ de yɛ hán ɔmùanwá ci ankaẅì-bùtan kruhú, ô nɛ̀n dú Ɔwɔ-cice-ci tɔ̀n, kɛ̀ ẅɛn vɔ̀nshɛ́ kɛ̀ tán Abrahamɛ̀n mɛẅi-bɔ̀, kè sɩ̀ dù yɔ hɔ̀n léyi kɛ wá ɛnyànmàn nɔn zri kɩ, tɛ́n yɔ hɔ̀n léyi ẅɛn ankaẅì-bùtan hán Abrahamɛ̀n hɔ́ nɔn. Abrahamɛ̀n dú bɔ́ lɔ fɛn bo zi,

¹⁷hán ɔmu le Owrú kɛ dɔ̀ nɔn: “Mɛ̀n bɩ́ mɛ́n mɛ̀n srɔ ɛnhi wú anmàn hɔ̀n fɛcüè, yɔ nancüì.” Abrahamɛ̀n dú bo zi, Ɔwɔ zìwú, nɛ̀n léyi nɛ̀n ẅɛn yi ankaẅì-bùtan nɔn, Ɔwɔ léyi kɛ tán owú-bɔ̀ ɔkɔrɛ̀, kɩ kɛ hán eci léyi bàdà nɔn, ke dù.

¹⁸Abrahamɛ̀n bú tán kɩ ẅɛn esɛ́, tɛ́n ɛnkrubɔmɛ̀n lɔ esɛ́ bàdà, kɩ ɔmu lɔ de nɛ̀n srɔ “ɛnhi wú anmàn hɔ̀n fɛcüè, yɔ nancüì”, hán ɔmu le Ɔwɔ dɔ́ nɛ̀n nɔn hɔ́: “Ɔmu lɔ de v'ɛmɛẅi-bɔ̀ kɛ lɛ cüɛ́n ke le dù nɔn.”

¹⁹Abrahamɛ̀n ẅɛn ɛnnànwàn kru ɛkoẅi-ɛnrì, tɛ́n n'ankaẅì-bùtan lɔ dú edùsɔ́ mɛ̀n, ɛnvra léyi nɛ ẅɛn n'edùwrú léyi bá owú tɛsɛ̀n mán nɛ́n hi Sara léyi dú ɛmɛ̀n-kpo-hi nɔn, ankà-tro.

²⁰N'esɛ́ léyi nɛ̀n ẅɛn Ɔwɔ mɛ̀n nɔn kè sɩ̀ zrɛ̀n hàn, kɩ Ɔwɔ mùan-wá lɔ dú n'ankà shishi ankà; tɛ́n n'ankaẅì-bùtan lɔ kɛ wá nɛ̀n ecüì edomɛ̀n kɩ nɛ mrɛ́n Ɔwɔ.

²¹Nɛ̀n ẅɛn esɛ́ kpankpan le Ɔwɔ ẅɛn ɔkɔrɛ̀-srɔn kɛ lɛ hán n'ɔmùan-wá ci lɔ.

²²Nyàn eci le kruhú léyi yɛ dɔ́ Abrahamɛ̀n ankà le, n'ankaẅì-bùtan lɔ kruhú de “Ɔwɔ srɔ nɛ̀n ɛnyrɔnnan-wrɔn nɔn”.

²³Tɛ́n ankà-dɔ̀ ndɔ lɔ: “Ɔwɔ srɔ nɛ̀n ɛnyrɔnnan-wrɔn”, ye sɩ̀ merɛ́n nɛ̀n kè dù nɛ́n zri nɛ tɛ́n.

²⁴Ye merɛ́n, dú bɔ́ mán bɔ́ tɛn, bɔ́ léyi yɛ lɛ srɔ bɔ̀ ɛnyrɔnnan-bɔ̀, kɩ bɔ́ bú Ɔwɔ léyi bɩ́ Zhezü bɔ́ Ɛẅɛnwrɔn sɩ́ ɔkɔrɛ-bɔ̀ mɛ̀n nɔn, n'ankà bɔ̀ tán ankaẅì.

²⁵Ɔwɔ dí nɛ̀n owúemɛ̀n bɔ́ ɛgbàn hɔ̀n lɔ kruhú kɩ nɛ̀n vru nɛ̀n sɩ́ yi ɔkɔrɛ-bɔ̀ mɛ̀n, ô nɛ̀n srɔ bɔ̀ ɛnyrɔnnan-bɔ̀ n'ezìwú.