Read Alladian Rɔmɛ̀n-anmàn-bɔ̀ 9 Bible Online

Rɔmɛ̀n-anmàn-bɔ̀ 9 - Alladian bible

Rɔmɛ̀n-anmàn-bɔ̀ 9

¹Ankà léyi mɛ vá ɛ dɔ́ yri nɔn dú ankà annanwɔrɛ; mɛ́n sɩ́ ẅɛn ɔyɔ̀n, ɔmuhi mɛ̀n dú Krisì tɛn nɔn; m'ɛnbɔrɛ léyi Ɛnhɛ́n Prɔnprɔn kɛ nyrɔn nɔn ke yé le mɛ dɔ́ ankà annanwɔrɛ:

²obòtò vri mán ejüedì yɩ́ m'ɛnbɔrɛ lɔ ɛnvra lɔ fɛn.

³Mɛ cüɛn ɔmu le mɛ́n mumù mɛ̀n dú Ɔwɔ ẅìɛ-dà lɔ mɛ̀n, ô yɛ mrɛ́n mɛ̀n yɛ sɔhɔ́ Krisì cüɛ̀n lɔ mɛ̀n, nmàn-ẅì hɔ̀n, ɛnbrɛ̀-zri-bɔ̀ anvrɛn kruhú.

⁴Yɔ dú Izraɛlɛ̀n fɛcüè mɛ̀n-bɔ̀: Ɔwɔ srɔ yɔ n'ɛẅì hɔ̀n, nɛ̀n tán yɔ n'ɛmɛ̀n-dù ci-zrɔ, nɛ́n mìrɛ̀n hɔ̀n lɔ, ɛnyànmàn, ɛcice kɔhɔ̀n-hán, ɔmùan-wá hɔ̀n.

⁵Yɔ dú bɔ́ nancüì hɔ̀n mɛẅi-bɔ̀ kɩ Krisì léyi dú ɔwrɔnẅì mɛ̀n nɔn, dú yɔ fɛcüè lɔ mɛ̀n, nɛ́n léyi nɛ̀n dú eci lɔ fɛn wú nɔn, Ɔwɔ léyi dú ɛmrɛ́n mɛ̀n ɛnvra lɔ fɛn nɔn. Kè dú ɔmu lɔ.

⁶Ndɔ lɔ n'ɛmɛ̀n ke sɩ́ dɔ́ le Ɔwɔ mùan-wá lɔ kè sɩ̀ ẅɛ̀n vɔ̀nshɛ́. Annanwɔrɛ mɛ̀n lɔ, Izraɛlɛ̀n mɛẅi-bɔ̀ lɔ, yɔ lɔ fɛn yɔ sɩ̀ dù Izraɛlɛ̀n fɛcüè annanwɔrɛ;

⁷kɩ Abrahamɛ̀n mɛẅi-bɔ̀ lɔ, yɔ lɔ fɛn yɔ sɩ̀ dù n'ɛẅì hɔ̀n annanwɔrɛ, ɔmuhi Ɔwɔ dɔ́ Abrahamɛ̀n le: “Izaakɛ̀n mɛ̀n de ɛ lɛ cɔ́ ɛmɛẅi-bɔ̀ léyi mɛ̀n wá mɛ́n ɔmùan nɔn.”

⁸Hɩ mɛ̀n kɛ dɔ̀ le: kè sɩ̀ dù ɛẅì hɔ̀n léyi ye bî anwrɔnẅìemɛ̀n nɔn de dú Ɔwɔ ẅì hɔ̀n nɔn; tɛ́n ɛẅì hɔ̀n léyi ye bî Ɔwɔ mùan-wá mɛ̀n nɔn, yɔ zri kɩ yɔ dú ɛmɛẅi-bɔ̀ annànwɔrɛ nɔn.

⁹Ɔmuhi nyàn ankà léyi Ɔwɔ dɔ́ n'ɔmùan-wá lɔ mɛ̀n nɔn: “Ɛnvra zri lɔ mɛ̀n me le vru mɛ̀n và kɩ Sara ke le bî ɛnconwrɔn-ẅì tɔ̀n.”

¹⁰Kɩ kè sɩ̀ dù fɛn. Bɔ̀ tro Rebeka ankà mán: n'ɛẅì hɔ̀n anhyrɛ̀ lɔ ẅɛn yɔ zi zri dú bɔ́ nancüì Izaakɛ̀n.

¹¹Tɛ́n Ɔwɔ ẅɛn n'ankɔndá ci-hán ɛnvra léyi nɛ mrɛ́n anwrɔn ne bɩ: n'eci-mrɛ́n-bɩ lɔ, kɛ crɛnyan ɔmu le nɛ hán ne bi yɔ nɔn, kɩ kè sɩ̀ dù y'eci-hán-mɛ̀n. Ô nɛ̀n yé le ne di ɔmùan zri n'ɔmùan-wá ci-hán lɔ mɛ̀n nɔn, zɛtɛn Ɔwɔ dɔ́ Rebeka ankà kɩ hɩ vra lɔ mán, Rebeka kɛ vá bî n'ɛẅì hɔ̀n lɔ, kɩ yɔ vá hán anvrɛn mán ɛgbàn: kɩ nɛ̀n dɔ́ yi le: “V'ɛnẅì cüìcüì lɔ, ke le dú ɛcɛ lɔ, n'eci-bɩtan-wrɔn.”

¹³Hán ɔmu le Owrú kɛ dɔ̀ nɔn: “Mɛ̀n cüɛ́n Zhakɔbɛ̀n, tɛ́n mɛ̀n krɔ Ezàhü.”

¹⁴Ankà tán de bɔ́ lɛ dɔ́ n'ɛwú nɛ́n? Ɔwɔ kè sɩ̀ dù ɛnyrɔnnan-wrɔn hán? Annànwɔrɛ mɛ̀n lɔ hɔ̂!

¹⁵Ɔwɔ kɛ dɔ́ Mohizì le: “Mɛ lɛ ẅɛn ɛnhyɔ̀bɔ̀-nyrì mɛ̀n tán ɔwrɔn léyi me ji mɛ̀n nyri ɛnhyɔ̀bɔ̀ nɔn, kɩ mɛ lɛ ẅɛn obòtò mɛ̀n tán ɔwrɔn léyi me ji mɛ̀n bòtò nɔn.”

¹⁶Ndɔ lɔ ke sɩ́ crɛnyan ɔwrɔnẅì ci léyi ke ji nɔn mán n'edùyì-ci-hán, tɛ́n kɛ crɛnyan Ɔwɔ zri leyi ẅɛn ɛnhyɔ̀bɔ̀-nyrì nɔn.

¹⁷Owrú Prɔnprɔn lɔ mɛ̀n, Ɔwɔ kɛ dɔ́ Ezhiptɛ̀n nɛ̀ncüì lɔ le: “Mɛ̀n wá mɛ́n ɛnnɛ̀ncüì, ô v'ɛmɛ̀n lɔ, mɛ̀n yé m'ɛkɔrɛ̀srɔn lɔ, ô m'ebɩ́dì lɔ kè bonyi ɛnhi mumù lɔ fɛn wú.”

¹⁸Ɔmu lɔ de Ɔwɔ ke nyri Ɔwrɔn léyi ne ji nɛ̀n nyri ɛnhyɔ̀bɔ̀ nɔn ɛnhyɔ̀bɔ̀ kɩ kɛ tán ɛnkru-shishi-ci-hán, ɔwrɔn léyi ne ji le kɛ̀ hán ɛnkru shishi ci nɔn.

¹⁹Me bú tán le yɛ lɛ dɔ́ mɛ̀n le: “Zɛtɛn cɛci kruhú kɛ Ɔwɔ ke le vru ke fe bɔ̀a? Ɔmuhi antɔnwrɔn de kɛ lɛ kɛ́n n'ɛkɔrɛ̀zì-ci-hán ezì tɛ̀ nɛ́n?”

²⁰Tɛ́n antɔnwrɔn dú mɛ́n, vɛ́n, ɔwrɔnẅì, ô ɛ̀ kɛ́n Ɔwɔ ezì nɛ́n? Antà-hi-sî ke le yrɛ ɔwrɔn léyi hán nɛ̀n nɔn le: “Cɛci kruhú ɛ hán mɛ̀n ɔmu lɔa?”

²¹Ɛnsî-hán-wrɔn ke le bɩ́ antà kɛ̀ hán eci léyi ne ji nɔn: ne le bɩ́ antà zri lɔ nɛ lɛ hán antà kpokpo léyi ẅɛn anhàn nɔn, nɛ cüɛ̀n hô, nɛ lɛ hán antà kpokpo kora.

²²Zɛtɛn, Ɔwɔ ke ji kè yé n'ɛmɛ̀nhyì-bɩ, ô kɛ̀ hán ye nyri n'ɛkɔrɛ̀-srɔn lɔ. Anwrɔn hɔ̀n léyi y'eci-gbàngbàn-hán srɔ y'edù-ci, hɩ Ɔwɔ mɛ̀nhyì-bɩ vɛ́n yɔ, ô yɛ jrɛ́ yɔ, ɔmu tɛ̀kɩ Ɔwɔ ẅɛn ɛnbɔrɛ hɛ́n y'ɛtɛ̀sɛ̀n.

²³Tɛ́n ne ji nɛ̀n yé ɔmu lɔ le n'eci-zrɔ ẅɛn vɔ̀nshɛ́ anwrɔn nyantɛn hɔ̀n wú, anwrɔn hɔ̀n léyi nɛ̀n ẅɛn yɔ ɛnhyɔ̀bɔ̀-nyrì, anwrɔn hɔ̀n léyi nɛ́n gɔ̀ wá esùva nɛ̀n hɛ́n ô kè dú n'eci-zrɔ lɔ mɛ̀n nɔn.

²⁴Bɔ́ dú ɛmɛ̀n, bɔ́ léyi nɛ̀n bi bɔ̀, kè sɩ̀ dù Zhüifɛ̀n-bɔ̀ mɛ̀n zri kɩ, tɛ́n fɛcüè nyantɛn bɔ̀ mɛ̀n mán.

²⁵Ankà ndɔ lɔ de nɛ dɔ́ Oze wrú lɔ mɛ̀n nɔn: “Fɛcüè léyi kè sɩ̀ gɔ̀ dù mɛ́n fɛcüè nɔn, me le bi nɛ̀n mɛ́n fɛcüè, Kɩ ɛnhi wú anmàn léyi mɛ̀n sɩ̀ gɔ̀ cüɛ̀n hàn nɔn, me le bi nɛ̀n m'ɛcüɛn-hi anvrɛnvrɛn.

²⁶Kɩ ɛyri léyi yɛ dɔ́ yɔ le: ‘Nyɛ́n sɩ̀ dù mɛ́n fɛcüè nɔn’, nanvrɛn lɔ ye le bi yɔ ɔkɔrɛ Wɔ lɔ, n'ɛẅì hɔ̀n.”

²⁷Ezàhi mán dú ɔhɔ́nan kɛ dɔ́ Izraɛlɛ̀n fɛcüè ankà ɔmùan-ɛwú-sɩemɛ̀n le: “Ke dú kɛ Izraɛlɛ̀n-ẅì hɔ̀n dùku mán kɛ cüɛn kɛ hán ecüe gbàtà-mùan hiẅia hɔ́, anwrɔn ẅiɛ y'ɛmɛ̀n lɔ, kɩ kɛ lɛ cɔ́ ebɩdie;

²⁸Ɔmuhi ankà léyi Ɛẅɛnwrɔn dɔ̀ nɔn nɛ lɛ hán yi kpràkpràmɛ̀n kɛ lɛ sá nmù kokroo ɛnhibù wú.”

²⁹Kɩ ɔmu le Ezàhi zri lɔ gɔ́ dɔ̀ nɔn: “Ke dú kɛ ɛnhi mumù lɔ fɛn Ẅɛnwrɔn kè sɩ̀ tán bɔ̀ ɛmɛẅi-bɔ̀ jan, bɔ lɛ dù kɛ lɛ hán Sodɔmɛ̀n hɔ́, kɩ bɔ́ le dù bɔ́ lɛ cá Gomɔrɛ̀n hɔ́.”

³⁰Ankà tán de yɛ lɛ dɔ́ n'ɛwú nɛ́n? Ankà ndɔ lɔ: ɛnhi wú anmàn nyàntɛn-bɔ̀ léyi ke sɩ̀ ji ɛyri ô kɛ̀ srɔ ɛnyrɔnnan-bɔ̀ Ɔwɔ zìwú nɔn, yɛ srɔ yɔ ɛnyrɔnnan-bɔ̀ n'ezìwú ankaẅì-bùtan-ẅɛn mɛ̀n;

³¹zɛtɛn Izraɛlɛ̀n fɛcüè mɛ̀n-bɔ̀ léyi ke ji ɛyri, ô kɛ̀ srɔ ɛnyrɔnnan-bɔ̀ Ɔwɔ zìwú ɛnyànmàn-esùva-wá mɛ̀n nɔn, ke sɩ́ hán ɛnyànmàn ci léyi wá nɔn.

³²Ecitan kruhúɛ? Ɔmuhi yɔ sɩ́ ji ɛyri, ô yɔ cüɛn Ɔwɔ ɛvɛ̀ ankaẅì-bùtan-ẅɛn mɛ̀n, yɔ tro le yɔ lɛ srɔ ɛnyrɔnnan-bɔ̀ y'eci-hán mɛ̀n. Yɔ sɔ́n “obù léyi kɛ hán yɛ trɛnshɛn nɔn” ɛnan,

³³hán ɔmu le Owrú kɛ dɔ̀ nɔn: “Nyɛ́n nyán, mɛ̀n hɛ́n Ɔwɔ zìwú obù léyi kɛ hán yɛ trɛnshɛn nɔn, obù léyi kɛ hán ye bore nɔn. Tɛ́n Ɔwrɔn léyi ke bú n'ankà kɛ tán ankaẅì nɔn, ɛnbɔrɛ ke sɩ̀ wú nɛ̀n.”