Read Alladian 1 Korɛntɛ̀n anmàn-bɔ̀ 10 Bible Online

1 Korɛntɛ̀n anmàn-bɔ̀ 10 - Alladian bible

1 Korɛntɛ̀n anmàn-bɔ̀ 10

¹Anwrɔn-nɛ́n-muan-ẅì hɔ̀n, me ji le nyɛ́n kore ny'edomɛ̀n eci léyi wɔɛn bɔ́ nancüì hɔ̀n Mohizì vra lɔ nɔn. Yɔ lɛ fɛn anhobɩ́ wì-gbú wá yɔ esùva kɩ yɔ vɔ́n ecüe Wɔnsɛn.

²Ɛnwì-bgú mɛ̀n mán ecüe mɛ̀n, yɔ lɛ fɛn yɔ dú ɔbɔ̀sɔ̀ shikru-wá mɛ̀n yɔ mán Mohizì mɛhi.

³Yɔ lɛ fɛn yɔ zî ɛnhɛ́n mɛ̀n ci zri lɔ,

⁴kɩ yɔ lɛ fɛn yɔ mi ɛnhɛ́n mɛ̀n shi zri lɔ: annanwɔrɛ mɛ̀n lɔ, yɔ mi ɛnshi ɛnhɛ́n-bù-rokò léyi kɛ hɔ́n sɩ́ yɔ nɔn mɛ̀n, kɩ obù-rokò ndɔ lɔ de dú Krisì nɔn.

⁵Tɛn, y'ɛmɛ̀n lɔ anwrɔn janbɔ̀ kè sɩ̀ cüɛ̀n Ɔwɔ ɛvɛ̀, kɩ hɩ le kruhú de yɔ bore kɩ yɔ wú ɛnnùwì nɔn.

⁶Ɛci ndɔ léyi wɔɛ̀n nɔn kɛ tán bɔ̀ sɛnpò, ô bɔ́ bɩ́ ẅɛn ankà-tro gbàngbàn kɛ hán ɔmu le yɔ ẅɛ̀n nɔn hɔ́.

⁷Nyɛ́n bɩ́ dú antɛ̀-buri-Wɔ sɛ́n mɛ̀n hán ɔmu le y'ɛmɛ̀n lɔ anwrɔn janbɔ̀ hán nɔn. Hán ɔmu le Owrú Prɔnprɔn dɔ̀ nɔn: “Anwrɔn kɛ yɛ́, ô kè zî ɛci, kè mi ɛnshi, zɛtɛn yɔ tɔhú, ô yɔ koran.”

⁸Bɔ́ bɩ́ wá bɔ́ domɛ̀n wowie-kɔ̀hɔ̀n-hán mɛ̀n, hán ɔmu le y'ɛmɛ̀n lɔ ɛnjanbɔ̀ hán kɩ anwrɔn tɛ̀bru-kru-ɛẅia-anhɔ̀n bore ɛnbi zri kɩ nwù nɔn.

⁹Bɔ́ bɩ́ wɔɛn Krisì bɔ́ nyan hán ɔmu le y'ɛmɛ̀n lɔ anwrɔn janbɔ̀ hán kɩ ɛnlɛbrì hɔ̀n krá yɔ ɛnyî, kɩ yɔ wù nɔn.

¹⁰Kɩ ɔtrɔmɛ̀n lɔ, nyɛ́n bɩ́ ẅɛn ɛmɛ̀nhyì-bòtò hán ɔmu le y'ɛmɛ̀n lɔ anwrɔn janbɔ̀ hán kɩ owù-Wɔ-kùyüre-wrɔn vá wri yɔ lɛ fɛn nɔn.

¹¹Muzhie ndɔ hɔ̀n lɔ cɔ́ yɔ, ô kɛ̀ tán anwrɔn ndɔ hɔ̀n sɛnpò; ye merɛ́n yɔ yɛ hɛ́n, ô kɛ̀ tán bɔ̀ ankà-bi-dɔ̀, ɔmuhi bɔ́ dú ɛnvra trɔ mùan mɛ̀n tɛ̀sɛ̀n nɔn.

¹²Kɩ, ke dú kɛ ɔwrɔn tɔ̀n ke tro le nɛ̀n nyɔn ɛwúɛ, nɛ̀n wá esùva, ô nɛ́n bɩ́ bore hɛ.

¹³Ɔwɔ̀ɛn-nyan hɔ̀n léyi nyɛ́n nyrì nɔn, dú yɔ hɔ̀n léyi anwrɔnẅì kɛ kán ɛnbì lɔ fɛn nɔn. Ɔwɔ dú ɔmùan-zri-di-wrɔn n'ɔmùan-wá hɔ̀n lɔ mɛ̀n, kɩ nɛ́n sɩ̀ tán ɛkɔrɛ̀levri, ô ɔwɔ̀ɛn-nyan cüì kɛ̀ ká nyɛ̀n; tɛ́n, ɛnvra léyi ɔwɔ̀ɛn-nyan kɛ lɛ và nɔn, nɛ lɛ tán nyɛ̀n ecüì, ô nyɛ́n kɛ́n nɛ̀n hɛ́n, kɩ ɔmu lɔ, nyɛ́n cɔ́ ɛyri nyɛ́n dú nɛ̀n ɛmɛ̀n nyɛ́n srɔ ɛntrɛ.

¹⁴Hɩ le kruhú de annyran-anvrɛn hɔ̀n, nyɛ́n wá esùva nyɛ́n bɩ́ hán antɛ̀-buri-wɔ kɔ̀hɔ̀n.

¹⁵Mɛ dɔ́ ankà kɛ hán le nyɛ́n dú ɛnkruemɛ̀n-ẅɛn-bɔ̀ hɔ́; ankà léyi mɛ dɔ́ nyɛ̀n nɔn, nyɛ́n dùku mán nyɛ́n ci n'ɛwú mrɛ̀n.

¹⁶Ɛci-zî prɔnprɔn grashɛ̀n léyi n'ɛkruhú bɔ́ tán Ɔwɔ ɔkùɛn nɔn, nyɛ́n tro n'ankà: ɛnvra léyi bɔ́ mi nɛ̀n nɔn, nɛ́n sɩ́ bɔsɔ bɔ̀, bɔ́ mán Krisì krɛ̀ mɛhi hɛ? Kɩ abùtùkumɛ́n léyi bɔ́ vɔ̀n: ɛnvra léyi bɔ́ rá nɛ̀n nɔn, nɛ́n sɩ́ bɔsɔ bɔ̀, bɔ́ mán Krisì dùwrú lɔ mɛhi hɛ?

¹⁷Ɛci-zî zri kɩ dù; tɛ́n, anwrɔn bobrebe hɔ̀n léyi dú bɔ̀ nɔn, bɔ́ dú edùwrú zri, ɔmuhi, bɔ́ lɛ fɛn bɔ̀ ẅɛn ɛci-zî zri kɩ nɔn.

¹⁸Nyɛ́n nyan Izraɛlɛ̀n fɛcüè lɔ: anwrɔn hɔ̀n léyi kɛ rá ɛcice nɔ̀n lɔ nɔn, yɔ dú ɔbɔ̀sɔ mɛ̀n, yɔ mán Ɔwɔ mɛhi ecice-tɛbrɛ̀ prɔnprɔn lɔ wú.

¹⁹Kɛ, ɔmu lɔ, me ji mɛ̀n dɔ̀ le antɛ̀-buri-Wɔ, kale ɔnɔ̀n-ẅia léyi ye ce nɛ̀n nɔn, yɔ vɔ̀nshɛ́ lɔ kè sɩ̀ ẅɛ̀n ɛnkru hɛ?

²⁰Hɔ̂, tɛ́n mɛ dɔ́ annanwɔrɛ mɛ̀n le eci léyi anwrɔn hɔ̀n léyi kè sɩ̀ nyrì Ɔwɔ hɩ ke ce nɔn, anwá-wrɔn de yɔ ce nɔn, tɛ́n kè sɩ̀ dù Ɔwɔ. Zɛtɛn, mɛ́n sɩ́ ji le nyɛ́n mán anwá-bɔ̀ mɛhi nyɛ́n dú ɔbɔ̀sɔ mɛ̀n.

²¹Nyɛ́n sɩ̀ mi ɛnshi Ɛẅɛnwrɔn grashɛ̀n mɛ̀n, ô ɛnvra zri lɔ nyɛ́n vru nyɛ́n mi ɛnshi anwá-bɔ̀ grashɛ̀n mɛ̀n; nyɛ́n sɩ̀ zî ɛci Ɛẅɛnwrɔn tɛbrɛ̀ wú, ô ɛnvra zri lɔ nyɛ́n vru nyɛ́n zî ɛci anwá-bɔ̀ tɛbrɛ̀ wú.

²²Kale bɔ́ ji bɔ̀ hán Ɛẅɛnwrɔn kɛ̀ kɔ́n ecüì-hi hɛ? Nye tro le bɔ̀ ẅɛn ecüì bɔ̀ vrán nɛ̀n hàn?

²³Nyɛ dɔ̀ le, “Ɛkɔrɛ̀-levri dú eci lɔ fɛn hán mɛ̀n.” Hɛ̀ɛ̀, tɛ́n eci lɔ fɛn kè sɩ̀ zrɔ̀a. “Ɛkɔrɛ̀-levri dú eci lɔ fɛn hán mɛ̀n”, tɛ́n eci lɔ fɛn ke sɩ̀ zrɔ̀ tàn fɛcüè.

²⁴Ɔwrɔn zriɛmɛ́n ke bɩ́ ji nɛ́n dùku nɛ́n vɔ̀nshɛ́, tɛ́n nɛ̀n ji anwrɔn nyàntɛn hɔ̀n tɛn.

²⁵Nyɛ́n ẅɛn ɛkɔrɛ̀-levri nyɛ lɛ rá eci lɔ fɛn léyi yɛ hɛ́ dúgbetrɛ hɩ dú ɔnɔ̀n-ẅia, kɩ nyɛ́n sɩ̀ ẅɛ̀n ankà zriɛmɛ́n ny'á yrɛ hɩ wú nɔn;

²⁶ɔmuhi, hán ɔmu le ye merɛ́n nɔn, “Ɛẅɛnwrɔn de ẅɛn ɛnhi mán eci lɔ fɛn léyi dú nɛ̀n ɛmɛ̀n nɔn”.

²⁷Ke dú kɛ ɔwrɔn léyi kè sɩ̀ ẅɛn ankaẅì-bùtan, ke bi nyɛ̀n ɛci-zîemɛ̀n, kɩ nye shrì nyɛ hɔ̀n, nyɛ́n zî ɛci lɔ fɛn léyi yɛ lɛ tán nyɛ̀n nɔn, kɩ nyɛ́n bɩ́ yrɛ ankà zriɛmɛ́n hɩ wú.

²⁸Tɛ́n ke dú kɛ ɔwrɔn tɔ̀n kɛ dɔ́ nyɛ̀n le: “Ɔnɔ̀n-ẅia ndɔ lɔ dú antɛ̀-buri-Wɔ cice nɔ̀n-ẅia”, zɛtɛn ke sɩ́ ji le nyɛ́n rá ɔnɔ̀n-ẅia lɔ, ɔwrɔn léyi dɔ́ ankà ndɔ lɔ nɔn n'ɛkruhú mán n'ankà-tro kruhú.

²⁹Ɛnu lɔ, mɛ́n sɩ́ dɔ́ ny'ankà-tro ankà, tɛ́n ɔwrɔn léyi dɔ́ ankà ndɔ lɔ nɔn, n'ankà-tro ankà de mɛ dɔ̀ nɔn. “Tɛ́n cɛci kruhú kɛ ye le yrɛ ankà ɔmu lɔ, kɛ̂ m'eci-hán kɔrɛ̀levri kɛ lɛ ẅɛn ɛvɔ̀n, nɛ́n mán ɔwrɔn nyàntɛn tɔ̀n ankà-tro mɛhi ɛ?

³⁰Ke dú kɛ mɛ tán Ɔwɔ ɔkùɛn ɛci léyi me zî nɔn kruhú, cɛci kruhú kɛ yɛ lɛ dɔ́ m'ankà-gbàn ɛci-zî ndɔ léyi nɛ kruhú mɛ̀n tán Ɔwɔ ɔkùɛn nɛ́n?”

³¹Ɔmu lɔ, ɛci nye zî hô, ɛnshi nye mi hô, eci totɔtɔ̀n léyi nyɛ hán nɔn, nyɛ́n hán fɛn kè dú Ɔwɔ ci-zrɔ tɛn.

³²Ny'ɛwúvà-ẅɛ̀n ke bɩ́ jrɛ́ anwrɔn hɔ̀n léyi dú Zhüifɛ̀n-bɔ̀, anwrɔn hɔ̀n léyi kè sɩ̀ dù Zhüifɛ̀n-bɔ̀ mán Ɔwɔ-fɛcüè-bɔ̀ nɔn ɛnkruemɛ̀n.

³³Nyɛ́n hán eci kɛ̀ hán mɛ̀n hɔ́: mɛ hán kèkrèmɛ̀n mɛ̀n cüɛn anwrɔn lɔ fɛn ɛvɛ̀ eci lɔ fɛn hán mɛ̀n; mɛ́n sɩ́ ji mɛ́n dùku m'anvrɛn, tɛ́n anwrɔn bobrebe hɔ̀n tɛn, ô yɔ cɔ́ ebɩdie.