Read Alladian 1 Korɛntɛ̀n anmàn-bɔ̀ 12 Bible Online

1 Korɛntɛ̀n anmàn-bɔ̀ 12 - Alladian bible

1 Korɛntɛ̀n anmàn-bɔ̀ 12

¹Zɛtɛn lɔ bɔ̀ dɔ́ nyɛ̀n Ɛnhɛ́n Prɔnprɔn cice ankà: Anwrɔn-nɛ́n-muan-ẅì hɔ̀n, me ji le nyɛ́n nyri ankà annanwɔrɛ léyi dú ɛcice ndɔ hɔ̀n lɔ wú nɔn.

²Nyɛ́n nyrì le ɛnvra léyi nyɛ vá nyri Ɔwɔ ankà nɔn, ecüì tɔ̀n kɛ kɛ́n nyɛ̀n sɩ́ ɔmùan-kɛ́n-tɛ̀-buri-Wɔ tɛ̀sɛ̀n.

³Hɩ le kruhú de mɛ wá mɛ̀n dɔ́ nyɛ̀n le: Ɔwrɔn zriɛmɛ́n bàdà nɛ́n léyi Ɔwɔ Hɛ́n kɛ nyrɔn nɔn, nɛ̀n sɩ́ ɔmùan ɛwú nɛ̀n dɔ̀ le: “Muzhie dú Zhezü tɛn!” kɩ ɔwrɔn zriɛmɛ́n ke sɩ̀ dɔ̀ rɔ́ le: “Zhezü dú Ɛẅɛnwrɔn!” ke dú kɛ Ɛnhɛ́n Prɔnprɔn kè sɩ̀ nyrɔn nɛ̀n.

⁴Ɛnhɛ́n Prɔnprɔn cice-ci mɛ̀ntɛ mɛ̀ntɛ de dù nɔn, tɛ́n Ɛnhɛ́n zri lɔ de kɛ tán yɔ nɔn.

⁵Eci-bɩ̀tan-kɔ̀hɔ̀n mɛ̀ntɛ mɛ̀ntɛ de dù nɔn, tɛ́n Ɛẅɛnwrɔn zri lɔ de ye bɩ́ eci tán nɔn.

⁶Ɔkɔ̀hɔ̀n-hán mɛ̀ntɛ mɛ̀ntɛ de ndù nɔn, tɛ́n Ɔwɔ zri lɔ de hán yɔ lɔ fɛn wá bɔ̀ ɛmɛ̀n nɔn.

⁷Ɔwrɔnwrɔn mɛ̀n Ɛnhɛ́n Prɔnprɔn ke yé n'ecice lɔ, ô kè dú anwrɔn lɔ fɛn anvrɛn.

⁸Ɛnhɛ́n Prɔnprɔn kɛ tán ɔwrɔn tɔ̀n ankà-nyri ankà-dɔ̀, kɩ ɔwrɔn nyàntɛn tɔ̀n Ɛnhɛ́n Prɔnprɔn zri lɔ kɛ tán eci-nyrì ankà-dɔ̀.

⁹Ɛnhɛ́n Prɔnprɔn zri ndɔ lɔ kɛ tán ɔwrɔn tɔ̀n ankaẅì-bùtan léyi ye sɩ́ cɔ́ frɛfrɛ nɔn kɩ ɔwrɔn nyàntɛn nɛ tán ɛkɔrɛ̀srɔn kɛ̀ korɛ ɛnlɔẅiɛ-bɔ̀.

¹⁰Ɛnhɛ́n Prɔnprɔn kɛ tán ɔwrɔn tɔ̀n ɛkɔrɛ̀srɔn kɛ̀ hán anvɛmɛ̀n-frɛ́n-ci, ɔwrɔn nyàntɛn tɔ̀n nɛ srɔ́ Ɔwɔ-mùanwú-ankà-dɔ́-wrɔn, ne vru nɛ tán ɔwrɔn nyàntɛn tɔ̀n ɛyri-kàn léyi kɛ hán ye nyri anhɛ́n gbangbàn mán ankrankran mɛhi. Ɔwrɔn tɔ̀n nɛ tán ɛkɔrɛ̀levri kɛ dɔ́ ankà ɛnbrɛ̀ nyàntɛn bobrebe mɛ̀n kɩ ɛnyàntɛn tɔ̀n nɛ tán ɛnkruemɛ̀n-ẅɛ̀n kɛ̀ yá ɛnbrɛ̀ nyàntɛn hɔ̀n lɔ y'ankà-dɔ̀.

¹¹Ɛnhɛ́n Prɔnprɔn zri ndɔ lɔ de kɛ hán eci ndɔ lɔ fɛn nɔn; nɛ tán ɔwrɔnwrɔn ecice tɔ̀n kɛ vɛ̀n, hán ɔmu le ne ji nɔn.

¹²Annànwɔrɛ mɛ̀n lɔ, Krisì dú cá edùwrú tɔ̀n léyi ẅɛn ɛyri bobrebe nɔn. N'ɛyri bobrebe hɔ̀n lɔ, dú edùwrú zri kɩ.

¹³Kɩ bɔ́ lɛ fɛn lɔ, Zhüifɛ̀n-bɔ̀ hô, kè sɩ̀ dù Zhüifɛ̀n-bɔ̀ hô, anwɔ̀n-bɔ̀ hô, anwrɔn kora hɔ̀n hô, yɛ wá bɔ̀ ɛnshi ɛnkru, ô bɔ̀ dú edùwrú zri, Ɛnhɛ́n Prɔnprɔn zri lɔ mɛ̀n, kɩ bɔ́ lɛ fɛn lɔ, bɔ̀ cɔ́ Ɛnhɛ́n Prɔnprɔn zri ndɔ lɔ n'ɛnshi bò mì.

¹⁴Edùwrú kè sɩ̀ ẅɛ̀n ɛyri zri, tɛ́n ɛyri bobrebe.

¹⁵Ke dú kɛ ɛnán kɛ dɔ̀ le: “Mɛ̀n sɩ̀ dù ɛkɔrɛ̀, ke dú ɔmu lɔ hô, mɛ̀n sɩ̀ dù edùwrú tɛn”, hɩ lɔ mán kɩ ne le dú ɛnvra lɔ fɛn edùwrú yri zri.

¹⁶Kɩ ke dú kɛ nukù kɛ dɔ̀ le: “Mɛ̀n sɩ̀ dù ɛvɛ̀, ke dú ɔmu lɔ hô, mɛ̀n sɩ̀ dù edùwrú tɛn”, hɩ lɔ mán kɩ ne le dú ɛnvra lɔ fɛn edùwrú yri zri.

¹⁷Ke dú kɛ edùwrú mumù lɔ fɛn ke dú ɛvɛ̀ zri kɩ, anwɔntan de nɛ lɛ hán nɛ̀n yá ankà nɛ́n? Kɩ ke dú kɛ ne dú nukù zri kɩ, anwɔntan de nɛ lɛ hán nɛ̀n bɩ́ ɛci-dɔ̀ nɛ́n?

¹⁸Annanwɔrɛ mɛ̀n lɔ Ɔwɔ hɛ́n edùwrú yri hɔ̀n lɔ ɔwrɔnwrɔn ɛyri léyi dú nɛ tɛn, hán ɔmu le nɛ̀n ji nɔn.

¹⁹Edùwrú ke sɩ̀ dù, ke dú kɛ nɛ ẅɛn ɛyri zri kɩ!

²⁰Annanwɔrɛ mɛ̀n lɔ, edùwrú yri bobrebe hɔ̀n de dù nɔn, kɩ edùwrú zri kɩ dù.

²¹Ɛvɛ̀ ke sɩ̀ dɔ́ ɛkɔrɛ̀ rɔ́ le: “Mɛ́n sɩ́ ji mɛ́n!” Kɩ ɛnkru mán ke sɩ̀ dɔ́ annán rɔ́ le: “Mɛ́n sɩ́ ji nyɛ̀n!”

²²Ɔmu lɔ de edùwrú yri hɔ̀n léyi ye tro le ẅɛn ɛjɛ̀ nɔn, dú vɔ̀nshɛ́ ci;

²³ɛyri hɔ̀n léyi bɔ́ sɩ́ wá ɛvɛ̀ ɛwú nɔn, yɔ de bɔ̀ dú yɔ esùva-wá mɛ̀n kɛ vrán ndɔ hɔ̀n lɔ nɔn; yɔ hɔ̀n léyi ke sɩ́ ji le bɔ̀ dɔ́ y'ankà kpete mɛ̀n nɔn,

²⁴yɔ de yɔ dú ɛvɛ̀-cüɛn-ci léyi y'esùva-wá ẅɛn vɔ̀nshɛ́ vri vrán bɔ́ edùwrú yri ndɔ hɔ̀n lɔ nɔn. Ɔwɔ hán edùwrú, ô n'ɛyri hɔ̀n léyi kè sɩ̀ ẅɛ̀n ɛvɛ̀ nɔn, ɛmrɛ́n kè dú yɔ ɛmɛ̀n:

²⁵ɔmu lɔ de ɛsɔ̀n-voyan bàdà edùwrú mɛ̀n, tɛ́n edùwrú yri hɔ̀n lɔ fɛn ẅɛn y'edomɛ̀n esùva-wá.

²⁶Ke dú kɛ edùwrú yri zri kɛ kán ɛgbàn hô, ndɔ hɔ̀n lɔ fɛn mɛhi yɔ kán ɛgbàn; ke dú kɛ edùwrú yri tɔ̀n ke dú ɛmrɛ́n mɛ̀n hô, ndɔ hɔ̀n lɔ fɛn mɛhi yɔ dú pɔpüɛ̀-brá mɛ̀n.

²⁷Tɛ́n, nyɛ́n dú Krisì dùwrú, kɩ ɔwrɔnwrɔn ny'ɛmɛ̀n lɔ dú edùwrú ndɔ lɔ n'ɛyri tɔ̀n.

²⁸Ɔmu lɔ de, Ɔwɔ-fɛcüè mɛ̀n lɔ, Ɔwɔ wá ɔkɔ̀hɔ̀n-wá-bɔ̀ kpàkpà-bɔ̀, anhyrɛmɛ̀n dú Ɔwɔ-mùanwú-ankà-dɔ́-bɔ̀, kɩ eci-yé-bɔ̀ dú anhɔnmɛ̀n; kɩ zɛtɛn yɛ wá anwrɔn hɔ̀n léyi kɛ hán anvɛmɛ̀n-frɛ́n-ci, anwrɔn hɔ̀n léyi kɛ korɛ ɛnlɔẅiɛ-bɔ̀, anwrɔn hɔ̀n léyi ẅɛn ɛkɔrɛwá cice, kɩ kɛ nyrɔn anwrɔn janbɔ̀, kɩ yɔ vru yɔ vrá ɛnbrɛ̀ vɛnvɛn nyàntɛn hɔ̀n nɔn.

²⁹Yɔ lɛ fɛn, yɔ sɩ̀ dù ɔkɔ̀hɔ̀n-wá-bɔ̀, Ɔwɔ-mùanwú-ankà-dɔ́-bɔ̀, mán eci-yé-bɔ̀. Yɔ lɔ fɛn yɔ sɩ̀ cɔ̀, Ɛnhɛ́n Prɔnprɔn cüì cice, ô yɔ hán anvɛmɛ̀n-frɛ́n-ci,

³⁰ô yɔ kɔrɛ ɛnlɔẅiɛ-bɔ̀, ô yɔ vrá ɛnbrɛ̀ nyàntɛn hɔ̀n, ô yɔ dɔ́ n'ɛmɛ̀n ankà.

³¹Ɔmu lɔ, nyɛ́n ji Ɛnhɛ́n Prɔnprɔn cüì cice léyi ẅɛn vɔ̀nshɛ́ nɔn. Tɛ́n me le yé nyɛ̀n zɛtɛ̀ lɔ ɛnlevri léyi sevri vrán eci lɔ fɛn nɔn.