Read Alladian 1 Korɛntɛ̀n anmàn-bɔ̀ 16 Bible Online

1 Korɛntɛ̀n anmàn-bɔ̀ 16 - Alladian bible

1 Korɛntɛ̀n anmàn-bɔ̀ 16

¹Eci-fɔ̀n léyi ye bɩ́ wá ankaẅì-bùtan-ẅɛn-bɔ̀ léyi dú Zherüzalɛmɛ̀n anmàn ɛkɔrɛ̀ nɔn, nyàn n'ankà-dɔ̀: Nyɛ́n hán eci kè ci ankà hɔ̀n léyi mɛ̀n dɔ́ Ɔwɔ-fɛcüè hɔ̀n léyi dú Galasi anmàn nɔn hɩ wú.

²Ɛnyànman-bì lɔ fɛn ɔwrɔnwrɔn kɛ̀ hɛ́n ɔhɔ́nan n'eyri ɛbemɛ̀n eci-fɔn-ci léyi nɛ́n cɔ̀ nɔn, ô ye bɩ́ vrá m'ɛvá bì lɔ, yakɛ yɛ fɔ́n eci.

³Ɛnvra léyi mɛ lɛ và nɔn, me le sɩ́ anwrɔn hɔ̀n léyi nyɛ́n mrɛ́n nyɛ́n bɩ, mɛ lɛ tán yɔ ɔkɔ̀hɔ̀n-wá wrú, yɔ bɩ́ ny'eci-fɔ́n-ci lɔ yɔ hɔ́n Zherüzalɛmɛ̀n anmàn.

⁴Kɩ ke dú kɛ ke ji le mɛ̀n mán mɛ́n hɔ́n nanvrɛn lɔ hô, yɔ mɛhi bɔ́ lɛ hɔ̀n.

⁵Mɛ lɛ vá ny'edúyri, ɛnvra léyi ɔtrɔmɛ̀n lɔ me le ci Masedùhanɛ̀n kpɔsɔ wú, ɔmuhi me le ci nanvrɛn lɔ nɔn.

⁶Me bú tán le mɛ lɛ yɛ́ ny'edúyri ɛnvra jan, ɛshɛ̀ mumù lɔ fɛn; zɛtɛn, nyɛ lɛ wá mɛ̀n ɛkɔrɛ̀ m'ɛyri-hɔ́n mɛ̀n lɔ, ke dú ɛyri totɔtɔ̀n léyi mɛ lɛ hɔ̀n nɔn mán.

⁷Ɔmuhi mɛ́n sɩ́ ji mɛ̀n kán nyɛ̀n m'eciemɛ̀n tɛ̀kɩ. Mɛ ẅɛn esɛ́ le Ɛẅɛnwrɔn kɛ lɛ tán ɛkɔrɛ̀-levri mɛ̀n yɛ́ ny'edúyri ɛnvra jan.

⁸Tɛ́n, mɛ wá le mɛ̀n yɛ́ Efɛzɛ̀n anmàn, hàn kɩ kɛ̀ cɔ́ Ɛnhɛ́n-Prɔnprɔn nyànmán-bì lɔ.

⁹Ɔmuhi ɛnvra anvrɛnvrɛn tɔ̀n kɛ wá tán mɛ̀n vɔ̀nshɛ́ ci-hán tɔ̀n, kɩ mɛ̀n nyri ɔmu le ɛgbri-bɔ̀ cüɛn.

¹⁰Ke dú kɛ Timote kɛ và hô, nyɛ́n hán tán, ô ny'edúyri ci zriɛmɛ́n ke bɩ́ wú nɛ̀n edù, ɔmuhi nɛ hán ɔkɔ̀hɔ̀n kɛ hán mɛ̀n hɔ́, Ɛẅɛnwrɔn kɔ̀hɔn lɔ mɛ̀n nɔn.

¹¹Ke sɩ́ ji le ɔwrɔn zriɛmɛ́n kè gbri nɛ̀n. Zrɔ tán le nyɛ́n wá nɛ̀n ɛkɔrɛ̀ nɛ̀n dú anwɔwɔmɛ̀n n'ɛyri-hɔ́n lɔ mɛ̀n, ô nɛ̀n cɔ́ ɛyri nɛ̀n vru nɛ̀n vá mɛ̀n ɛtɛ̀sɛ̀n, ɔmuhi mɛ̀n mán anwrɔn-nɛ́n-muan-ẅi hɔ̀n mɛhi bɔ́ vrá nɛ̀n nɔn.

¹²Bɔ́ muan-ẅì Apolɔsɛ̀n tɛn, me yɩ́ nɛ̀n edù ɛnvra zrizri ô nɛ̀n vá ny'edúyri nɛ́n mán anwrɔn-nɛ́n-muan-ẅì hɔ̀n ndɔ hɔ̀n lɔ mɛhi, tɛ́n nɛ́n sɩ́ ji nɛ̀n hán yi ci lɔ zɛtɛ̀ lɔ. Tɛ́n, nɛ lɛ vá nanvrɛn ɛnvra léyi nɛ lɛ cɔ́ eci-hán kɔrɛ̀-levri nɔn.

¹³Nyɛ́n yɛ́ ɛshishiemɛ̀n ankaẅì-bùtan-ẅɛn mɛ̀n, nyɛ́n ẅɛn edùyì, nyɛ́n ẅɛn ecüì.

¹⁴Eci lɔ fɛn hán mɛ̀n lɔ nyɛ́n ẅɛn ɛcüɛ̀n.

¹⁵Nyɛ́n nyri Stefanasɛ̀n mán n'ɛmɛ̀n mɛ̀n-bɔ̀; nyɛ́n nyrì le Akahi kpɔsɔ wú lɔ, yɔ dú ɛnvrakpà-bɔ̀ léyi crɔn ɛnkru, kɩ yɔ dú fɛcüè krubɔrɛ ci-bɩ̀tan-kɔ̀hɔ́n mɛ̀n. Anwrɔn-nɛ́n-muan-ẅì hɔ̀n, zɛtɛn mɛ sán nyɛ̀n ndɔ lɔ:

¹⁶nyɛ́n teze ny'edomɛ̀n nyɛ́n tán anwrɔn ɔmu hɔ̀n lɔ mán yɔ hɔ̀n léyi yɔ mɛhi yɔ hán ɔkɔ̀hɔ̀n edùyiemɛ̀n nɔn, kɛ̀ nyrɔn nyɛ̀n.

¹⁷Mɛ̀n dú ɛnbɔrɛ-bruemɛ̀n, ɔmuhi stefanasɛ̀n, Fortünatüsɛ̀n mán Akahiküsɛ̀n kɛ và nɔn. Yɔ tán mɛ̀n eci léyi kɛ ẅɛn mɛ̀n ɛmìan ɛnvra léyi mɛ̀n sɩ̀ cɔ́ nyɛ̀n ɛkán yri nɔn,

¹⁸kɩ yɔ tán mɛ̀n ɛnbɔrɛ-bi-wá, hán ɔmu le yɔ hán yɔ tán nyɛ̀n nɔn. Nyɛ́n nyrì mrɛ́n anwrɔn ɔmu hɔ̀n lɔ!

¹⁹Ɔwɔ-fɛcüè-bɔ̀ léyi dú Azi kpɔsɔ wú nɔn ke bi nyɛ̀n nyan. Akilasɛ̀n, Prisilɛ̀n mán Ɔwɔ-fɛcüè léyi yɔ mɛhi yɔ bɔrɛkru y'edúyri nɔn, ke yüre nyɛ̀n y'ɛnbɔrɛ ankrankran binyan Ɛẅɛnwrɔn mɛhi y'ɔbɔ̀sɔ̀ lɔ mɛ̀n.

²⁰Anwrɔn-nɛ́n-muan-ẅì hɔ̀n lɔ fɛn léyi dú ɛnu lɔ nɔn, ke bi nyɛ̀n nyan. Nyɛ́n bí ny'edomɛ̀n nyɛ́n nyan ɔwrɔn-nɛ́n-muan-ẅì mùan-sɔ́n mɛ̀n.

²¹Mɛ́n dùku m'antamɛ̀n de me merɛ́n ankà-dɔ̀ ndɔ hɔ̀n lɔ nɔn: Pɔlɛ̀n binyan.

²²Ke dú kɛ ɔwrɔn tɔ̀n ke sɩ́ cüɛn Ɛẅɛnwrɔn hô, muzhie kɛ̀ bó nɛ̀n! Maranata, Bɔ́ Ɛẅɛnwrɔn, và!

²³Ɛẅɛnwrɔn Zhezü boafɔ̀n kè dú nyɛ̀n ɛmɛ̀n.

²⁴Mɛ cüɛn nyɛ lɛ fɛn Zhezü Krisì mɛhi b'ɔbɔ̀sɔ̀ lɔ mɛ̀n.