Read Alladian 1 Korɛntɛ̀n anmàn-bɔ̀ 3 Bible Online

1 Korɛntɛ̀n anmàn-bɔ̀ 3 - Alladian bible

1 Korɛntɛ̀n anmàn-bɔ̀ 3

¹Annanwɔrɛ mɛ̀n lɔ, anwrɔn-nɛ́n-muan-ẅì hɔ̀n, mɛ̀n sɩ̀ cɔ̀ nyɛ̀n ankà-dɔ́ yri kɛ̀ hàn anwrɔn hɔ̀n léyi ẅɛn Ɔwɔ Hɛ́n nɔn: mɛ̀n dɔ́ nyɛ̀n ankà hán ɛnhibù ndɔ lɔ bɔ̀ hɔ́, hán ɛẅì hɔ̀n léyi dú Krisì ankaẅì-bùtan mɛ̀n nɔn.

²Ɛnyàn-shi de mɛ̀n tán nyɛ̀n nɔn, kè sɩ̀ dù ɛci-zî annanwɔrɛ, ɔmuhi ɛci-zî ndɔ lɔ ke sɩ̀ bɩ́ nyɛ̀n edù rɔ́! Kɩ zɛtɛ̀ lɔ mán, nyɛ́n sɩ̀ ẅɛn n'ɛkɔrɛ̀-levri,

³ɔmuhi ny'ɛwúvà dú cá ɛnhibù ndɔ lɔ bɔ̀ wúvà hɔ́. Hɩ le ecüì-hi-kɔ̀n mán annankran dú nyɛ̀n ɛmɛ̀n, nyɛ́n sɩ́ yé tán le nyɛ́n dú ɛnhibù ndɔ lɔ n'anwrɔn, kɩ nyɛ nyrɔn ny'edomɛ̀n kɛ hán anwrɔnẅì hɔ́a?

⁴Ɛnvra léyi ny'ɛmɛ̀n lɔ ɔwrɔn tɔ̀n kɛ dɔ̀ le: “Mɛ̀n dú Pɔlɛ̀n tɛn” kɩ ɛnyàntɛn tɔ̀n kɛ dɔ̀ le: “Mɛ̀n dú Apolɔsɛ̀n tɛn”, ɔmu lɔ, nyɛ́n sɩ́ hán ɔwrɔn totɔtɔn ci-hán-ciɛ?

⁵Annanwɔrɛ mɛ̀n lɔ, antɔnwrɔn dú Apolɔsɛ̀n hàn? Kɩ antɔnwrɔn dú Pɔlɛ̀n hàn? Bɔ́ dú Ɔwɔ ci-bɩ̀tan-bɔ̀ kora-sà hɔ̀n léyi y'ɛwú lɔ nyɛ́n cɔ́ ankaẅì-bùtan nɔn. Bɔ́ ɛmɛ̀n lɔ ɔwrɔnwrɔn kɛ hán ɔkɔhɔ̀n léyi Ɛẅɛnwrɔn wá tán nɛ̀n nɔn:

⁶Mɛ̀n wá ɛtɛ̀-ẅì ɛnhibɩ́, Apolɔsɛ̀n ku nɛ̀n ɛnshi, tɛ́n Ɔwɔ de hán nɛ̀n nɛ̀n sɔ́ nɔn.

⁷Ɔmu lɔ, ɔwrɔn léyi kɛ tɛ́ ɛtɛ̀-ẅì mán ɔwrɔn léyi ke ku nɛ̀n ɛnshi nɔn, yɔ sɩ̀ ẅɛ̀n vɔ̀nshɛ́: Ɔwɔ zri kɩ yɛ krɛ̀, nɛ́n léyi nɛ̀n hán ɛtɛ̀-ẅì lɔ sɔ́ nɔn.

⁸Ɔwrɔn léyi kɛ tɛ̀, mán ɔwrɔn léyi ke ku ɛnshi, yɔ, anwrɔn anhyrɛ̀ lɔ yɔ krɔn; Ɔwɔ kɛ lɛ tán ɔwrɔnwrɔn n'anjakpà n'ɔkɔ̀hɔ̀n-hán mɛ̀n.

⁹Ɔmuhi bɔ̀ dú Ɔwɔ kɔrɛ̀-wá-bɔ̀, kɩ nyɛ́n dú Ɔwɔ kɛ̀tɛ̀ nɔn. Nyɛ́n vru nyɛ́n dú ɔwɔn léyi Ɔwɔ kù nɔn.

¹⁰M'ankà-nyrì léyi Ɔwɔ tán mɛ̀n nɔn, mɛ́n bɩ mɛ̀n hán ɔkɔhɔ̀n hán ɔwɔn-kú-wrɔn anvrɛnvrɛn tɔ̀n hɔ́, kɩ mɛ̀n wá ɔwɔn-bù ɛnhibɩ́. Zɛtɛ̀ lɔ, ɔwrɔn tɔ̀n ke ku ɔwɔn ɔwɔn-hi-nan lɔ ɛwú. Tɛ́n ke ji le ɔwrɔnwrɔn kɛ̀ wá esùva n'ɔwɔnkuemɛ̀n.

¹¹Ɔmuhi Zhezü Krisì mɛ̀n de ɔwɔn-hinan-bù kɛ cɔ́ n'ɛhɛ́n-yri, kɩ ɔwrɔn zriɛmɛ́n ke sɩ̀ hɛ́n obù nyàntɛn nanvrɛn lɔ nɔn.

¹²Anwrɔn ndɔ hɔ̀n ke le bɩ́ ansɩ̀kɛ, ɔkùa, ɛnvra tɔ̀n hô, ɛbùẅì ankrankran kè ku ɔwɔn lɔ; anwrɔn janbɔ̀ ke le bɩ́ ɔbɔ̀hɔ́, ɛfi-sè, ɛnvra tɔ̀n hô, ɛfi-cüì.

¹³Tɛ́n ɔwrɔnwrɔn kɔ̀hɔ̀n léyi hán nɔn de ke le yé n'edomɛ̀n kpetehe ɛmrɛ̀nci-bì lɔ nɔn. Annanwɔrɛ mɛ̀n lɔ, ɛnbì ndɔ lɔ ke le yé n'edomɛ̀n ɛnhyà mɛ̀n, kɩ ɛnhyà kɛ lɛ nyan ɔwrɔnwrɔn kɔ̀hɔ̀n, ô kè yé eci léyi dú nɛ̀n nɔn.

¹⁴Ke dú kɛ ɔwrɔn tɔ̀n wɔn léyi kù nɔn, edù kɛ sɔ́ ɛnhyà mɛ̀n hô, nɛ lɛ cɔ́ anjapkà tɔ̀n.

¹⁵Zɛtɛn, ke dú kɛ ɔwɔn lɔ kɛ biɛ ɛnhyà mɛ̀n hô, ɔwɔn-ku-nɛ́n-zi lɔ ke sɩ̀ cɔ́ anjakpà; tɛ́n nɛ́n mumù nɛ lɛ cɔ́ ɛbɩdie, kɩ ke le dù kɛ lɛ hán le nɛ̀n ci ɛnhyà-ẅì wanzi hɔ́.

¹⁶Annanwɔrɛ mɛ̀n lɔ nyɛ́n nyri ɔmu le nyɛ́n dú Ɔwɔ wɔn, kɩ Ɔwɔ Hɛ́n dú nyɛ̀n ɛmɛ̀n.

¹⁷Zɛtɛn, ke dú kɛ ɔwrɔn tɔ̀n kɛ jrɛ́ Ɔwɔ wɔn lɔ, Ɔwɔ kɛ lɛ jrɛ́ ɔwrɔn lɔ. Ɔmuhi Ɔwɔ wɔn lɔ dú prɔnprɔn, kɩ nyɛ́n de nyɛ́n dú n'ɔwɔn lɔ nɔn.

¹⁸Ɔwrɔn zriɛmɛ́n ke bɩ́ frɛ́n n'edomɛ̀n: ke dú kɛ ɔwrɔn tɔ̀n ny'ɛmɛ̀n lɔ ke tro le nɛ̀n ẅɛn ankà-nyrì, ɛnhibù ndɔ lɔ zìwú hô, ke ji le nɛ̀n srɔ nmù-wrɔn, ô nɛ̀n dú ankà-nyri-wrɔn annanwɔrɛ mɛ̀n.

¹⁹Ɔmuhi ɛnhibù ndɔ lɔ ankà-nyrì dú nmù-ci-hán Ɔwɔ zìwú nɔn. Annanwɔrɛ mɛ̀n lɔ, Owrú Prɔnprɔn kɛ dɔ̀ le: “Ɔwɔ kɛ ẅɛn ankà-nyri-bɔ̀, yɔ dùku y'ɛfrɛ́n tanwrɔn lɔ mɛ̀n.”

²⁰Ne vru nɛ dɔ̀ le: “Ɛẅɛnwrɔn nyri ankà-nyri-bɔ̀ ankà-tro hɔ̀n lɔ, nɛ̀n nyri ɔmu le y'ankà-tro lɔ kè sɩ̀ ẅɛ̀n vɔ̀nshɛ́.”

²¹Ɔmu lɔ, ke sɩ́ ji le ɔwrɔn zriɛmɛ́n kɛ̀ ẅɛn ɔmùan-gbù anwrɔnẅì wú. Ɔmuhi eci lɔ fɛn dú nyɛ tɛn nɔn:

²²Pɔlɛ̀n, Apolɔsɛ̀n, Piɛrɛ̀n, ɛnhibù, ɛwúvà, owù, zɛtɛ̀ vrá mán ɛnvra léyi dú ezì kɛ và nɔn, fɛn lɔ dú nyɛ tɛn;

²³tɛ́n nyɛ́n, nyɛ́n dú Krisì tɛn kɩ Krisì dú Ɔwɔ tɛn.