Read Alladian 1 Korɛntɛ̀n anmàn-bɔ̀ 4 Bible Online

1 Korɛntɛ̀n anmàn-bɔ̀ 4 - Alladian bible

1 Korɛntɛ̀n anmàn-bɔ̀ 4

¹Ke ji le nyɛ́n bɩ́ bɔ̀ nyɛ́n hán Krisì ci-bɩ̀tan-bɔ̀ léyi yɛ wá Ɔwɔ ankà-bán-ankà annanwɔrɛ hɔ̀n lɔ antamɛ̀n kɛ̀ nán nɔn.

²Eci lɔ fɛn léyi ye ji ɛci-nán-wrɔn tamɛ̀n nɔn, dú ɔmùan-zri-dì.

³Me yri tɛn, ke sɩ́ hán mɛ̀n eci zriɛmɛ́n ke dú kɛ nye ci mɛ̀n ɛmrɛ̀n, kɩ ye sɩ́ mɛ̀n anwrɔnẅì mrɛnci-bɔ̀ zìwú mán. Mɛ́n mumù mán mɛ́n sɩ́ ci m'edomɛ̀n ɛmrɛ̀n.

⁴Annanwɔrɛ mɛ̀n lɔ, m'ɛnbɔrɛ ke sɩ́ yerɛ mɛ̀n ankà zriɛmɛ́n, tɛ́n, hɩ mɛ̀n ke sɩ́ dɔ́ le, mɛ̀n dú ɛnyrɔnnan-wrɔn. Ɛẅɛnwrɔn dú ɔwrɔn léyi ke ci mɛ̀n ɛmrɛ̀n nɔn.

⁵Hɩ le kruhú de ke sɩ́ ji le nyɛ́n ci ɔwrɔn zriɛmɛ́n ɛ̀mrɛ̀n, ke dú kɛ ɛnvra léyi yɛ wá nɔn kɛ vá cɔ̀. Nyɛ́n vrá Ɛẅɛnwrɔn kɛ̀ và: ne le sɩ́ ɛyri-kán mɛ̀n, eci léyi bán ɛyri-yɔwɔ mɛ̀n, kɩ ne le sɩ́ anwrɔnẅì ankà-tro ci-bán-ci hɔ̀n lɔ fɛn ɛntrɛ. Zɛtɛn ɔwrɔnwrɔn kɛ lɛ cɔ́ Ɔwɔ yri, ɛmrɛ́n léyi dú nɛ tɛn nɔn.

⁶Anwrɔn-nɛ́n-muan-ẅì hɔ̀n, ny'ankà-yé kruhú, ankà léyi mɛ̀n dɔ́ nyɛ̀n nɔn, mɛ̀n mán Apolɔsɛ̀n mɛhi bɔ̀ hán hɩ wú ci. Mɛ̀n ji le, bɔ́ sɛnpò wú lɔ, nyɛ́n nyri ankà ndɔ lɔ n'ɛmɛ̀n: “Wá tán le nyɛ́n nyɔn eci léyi ye merɛ́n nɔn n'ɔvɔ̀n hàn.” Ke sɩ́ ji le ɔwrɔn zriɛmɛ́n kè bɩ́ ɔwrɔn tɔ̀n ankà kɛ̀ kɛ́n ɔwrɔn nyàntɛn tɔ̀n ezì.

⁷Ɔmuhi, ecitan mɛ̀n de e tro le è sevri ɛ̀ vrán ɛnyran hɔ̀n nɛ́n? Eci lɔ fɛn léyi ɛ ẅɛ̀n nɔn, kè sɩ̀ dù Ɔwɔ yri kɛ̀ và? Ɔmuhi dú ɔmu lɔ nɔn, cɛci kruhú kɛ e gbú ɔmùan eci léyi ɛ cɔ̀ nɔn hɩ wú, hán le ye sɩ̀ tán mɛ́n eci lɔ nɛ́n?

⁸Zɛtɛn nyɛ́n ẅɛn eci lɔ fɛn léyi nye ji nɔn! Zɛtɛn nyɛ́n di ɛnnɛ̀ncüìɛ! Nyɛ́n srɔ ɛnnɛ̀ncüì hɔ̀n, zɛtɛn bɔ́ tɛn bɔ́ sɩ̀ dì ɛnnɛ̀ncüì! Ankaẅìɛ? Mɛ cüɛn ɔmu le nyɛ́n srɔ ɛnnɛ̀ncüì annanwɔrɛ mɛ̀n, ô bɔ́ mán bɔ̀ cɔ́ nyɛ̀n mɛhi bɔ̀ ẅɛn ɛyri.

⁹Annànwɔrɛ mɛ̀n lɔ me tro le Ɔwɔ hɛ́n bɔ̀, bɔ́ ɔkɔ̀hɔ̀n-wá-bɔ̀ lɔ ɛmɛẅitrɔ yɛ́-yri: bɔ́ dù bɔ̀ hán anwrɔn hɔ̀n léyi ye bó nwù hɩ yɛ kɔ́n ze annɔ̀n gbàngbàn kɔ̀ mɛ̀n: bɔ́ dú eci-nyan-ci léyi kɛ brá ɛnhibù mumù lɔ fɛn, Ɔwɔ-kùyüre-bɔ̀ mán anwrɔnẅì mɛhi pɔpüɛ̀ nɔn.

¹⁰Krisì kruhú bɔ̀ srɔ nmù-hán-bɔ̀, tɛ́n, nyɛ́n dú ankà-nyriemɛ̀n nyɛ́n mán Krisì mɛhi ny'ɔbɔ̀sɔ̀ lɔ mɛ̀n; bɔ́ jɛ̀, tɛ́n, nyɛ́n ẅɛn ecüì; bɔ̀ srɔ egbri-bɔ̀, tɛ́n, nyɛ́n ẅɛn ɔwá!

¹¹Wacɛ̀n ndɔ lɔ mɛ̀n, bɔ́ kán ɛcizî mán ɛnshi-mi-mùanwú gbàn, bɔ̀ sɩ̀ ẅɛ̀n edùku-ci, ye gorɛ bɔ̀, bɔ́ ci ɛyri-yri;

¹²bɔ́ hán ɔkɔ̀hɔ̀n ɛshishiemɛ̀n, ô bɔ̀ cɔ́ ɛci-zî. Ɛnvra léyi yɛ wora bɔ̀ nɔn, bɔ́ sɛ́n tán yɔ; ɛnvra léyi yɛ hán bɔ̀ ɛgbàn nɔn, bɔ́ shrì bɔ́ bɩ;

¹³ɛnvra léyi yɛ dɔ́ ankà-gbàn ye ku bɔ̀ ɛwú nɔn, bɔ́ mrɛ́n ɔmùan ɔwá mɛ̀n. Zɛtɛ̀ lɔ ye vru ye bɩ́ bɔ̀ yɛ hán ɛnhibù wú worɛ̀n-ci, hán anwrɔnẅìemɛ̀n ci-fɔn hɔ́.

¹⁴Me yüre nyɛ̀n owrú ɔmu lɔ, kè sɩ̀ dù hɩ le mɛ lɛ hán nyɛ̀n anvɛvrà-ci, tɛ́n mɛ̀n yé nyɛ̀n ankà kɛ̀ hán m'ɛẅì hɔ̀n ankrankran hɔ́.

¹⁵Ɔmuhi ke dú kɛ nyɛ ẅɛn ɛnyrɔn-bɔ̀ tɛ̀bru-kru-ɛvà ny'ɛwúvà lɔ mɛ̀n, nyɛ́n mán Krisì mɛhi, nyɛ́n zi zri kɩ nyɛ lɛ ẅɛ̀n: annànwɔrɛ mɛ̀n lɔ, ɛnvra léyi mɛ́n và sɩ́ nyɛ̀n Ɛmɛẅi ankà ankrànkràn lɔ nɔn, mɛ̀n de mɛ̀n srɔ nyɛ́n zi ny'ɛwúvà lɔ mɛ̀n, nyɛ́n mán Krisì mɛhi.

¹⁶Zɛtɛn mɛ sɛ́n nyɛ̀n, nyɛ́n nán esù mɛ́n sɛnpò lɔ wú.

¹⁷Hɩ wú lɔ me yüre nyɛ̀n Timote léyi ke di ɔmùan-zri, hɩ dú m'ɛcüɛn ẅì Ɛẅɛnwrɔn ankaẅì-bùtan lɔ mɛ̀n nɔn. Ne le kore nyɛ̀n ankà-yé hɔ̀n léyi kɛ nyrɔn mɛ̀n ɛwúvà mɛ̀n, mɛ̀n mán Zhezü Krisì, hán hɩ le me yé ɛyri lɔ fɛn, Ɔwɔ-fɛcüè lɔ fɛn mɛ̀n nɔn.

¹⁸Ny'ɛmɛ̀n lɔ anwrɔn janbɔ̀ hán ɛgbúgbú-ci, kɩ yɔ tro le mɛ́n sɩ̀ và nyan nyɛ̀n.

¹⁹Tɛ́n ke dú kɛ Ɛẅɛnwrɔn kɛ tán ɛkɔrɛ̀-levri hô, ɛnvra cá mɛ̀n me le dú nyɛ̀n ɛmɛ̀n. Zɛtɛn me le nyri ɛgbúgbú-ci-hán-bɔ̀ lɔ, ke sɩ̀ dú y'ankà-dɔ̀ zri kɩ, tɛ́n eci léyi yɔ ẅɛn ɛkɔrɛ̀levri yɔ lɛ hán tɛ̀ nɔn!

²⁰Ɔmuhi Anhobɩ́ Nɛ̀ncüì-dúyri lɔ kè sɩ̀ dù anmùan mɛ̀n ankà-dɔ̀, tɛ́n ɛkɔrɛ̀-srɔn ankà.

²¹Ecitan de nyɛ cüɛ̀n nɛ́n? Mɛ̀n bɩ́ ɛtɛ̀ kpò mɛ̀n vá nyɛ̀n ɛmɛ̀n, kale mɛ̀n bɩ́ ɛnbɔrɛ léyi ɛcüɛ̀n mán anwɔwɔ yɩ́ ɛmɛ̀n nɔn mɛ̀n vàà?