Read Alladian 1 Korɛntɛ̀n anmàn-bɔ̀ 6 Bible Online

1 Korɛntɛ̀n anmàn-bɔ̀ 6 - Alladian bible

1 Korɛntɛ̀n anmàn-bɔ̀ 6

¹Ɛnvra léyi ny'ɛmɛ̀n lɔ ɔwrɔn tɔ̀n mán nɛ́n muan-ẅì mɛhi kɛ ẅɛn ankà, anwɔntan kɛ hán ke cì kɛ ne sɩ́ ɛmrɛ̀ncì lɔ anwrɔn hɔ̀n léyi kè sɩ̀ nyrì Ɔwɔ nɔn y'ezìwú, kɩ nɛ́n sɩ́ ji nɛ̀n sɩ́ ankà lɔ Ɔwɔ-fɛcüè-bɔ̀ zìwúɛ?

²Nyɛ́n sɩ̀ nyrì ɔmu le Ɔwɔ-fɛcüè-bɔ̀ ke le ci ɛnhibù ɛmrɛ̀n hàn? Kɩ ke dú kɛ ke ji le nyɛ́n ci ɛnhibù ɛmrɛ̀n, nyɛ́n sɩ̀ ẅɛ̀n ɛkɔrɛ̀-levri ny'a ci ankà léyi kè sɩ̀ ẅɛ̀n vɔ̀nshɛ́ nɔn ɛmrɛ̀n hàn?

³Nyɛ́n sɩ̀ nyrì ɔmu le bɔ́ le ci Ɔwɔ-kùyüre-bɔ̀ ɛmrɛ̀n hàn? Annannan le ɛwúvà ndɔ lɔ n'ankà hɔ̀n lɔ fɛn!

⁴Tɛ́n, ɛnvra léyi nyɛ ẅɛn annankran ankà ndɔ ɔmu lɔ, nyɛ hɔ́n bɩ́ ɛmrɛ̀nci-bɔ̀ léyi kè sɩ̀ dù Ɔwɔ-fɛcüè-mɛ̀n-wrɔn zriɛmɛ́n nɔn!

⁵Mɛ dɔ́ ɛnvɛvrà ankà ndɔ lɔ tán nyɛ̀n. Annanwɔrɛ mɛ̀n lɔ, ny'ɛmɛ̀n lɔ, ɔwrɔn tɔ̀n ke le dú ankà-nyri-wrɔn, ô kè ci anwrɔn-nɛ́n-muan-ẅì hɔ̀n annankran mrɛ̀n!

⁶Zɛtɛn, annanwɔrɛ mɛ̀n lɔ, ke ji le anwrɔn-nɛ́n-muan-ẅì hɔ̀n anhyrɛ̀ kè dú ɛmrɛ̀nciemɛ̀n, kɩ ndɔ lɔ, ɛmrɛ̀nci-bɔ̀ léyi kè sɩ̀ ẅɛ̀n ankaẅì-bùtan nɔn y'ezìwúɛ?

⁷Annanwɔrɛ mɛ̀n lɔ, ɛmrɛ̀nci-ankà léyi dú nyɛ̀n angranmɛ̀n nɔn, ke yé tán le ny'ɔkɔ̀hɔ̀n lɔ dú ɛzɛ́n mɛ̀n. Cɛci kruhú kɛ, nyɛ́n sɩ́ shri ankà-gbàn nyɛ́n bɩ́ɛ? Cɛci kruhú kɛ nyɛ́n sɩ́ teze ye bɩ́ nyɛ̀n ɛci edomɛ̀n yɛ sɔhɔ́a?

⁸Tɛ́n, nyɛ́n de nyɛ́n sɩ́ hán ɛnyrɔnnan-ci, kɩ nye bɩ́ anwrɔn ɛci edomɛ̀n, kɩ nyɛ hán eci-hán ndɔ lɔ anwrɔn-nɛ́n-muan-ẅì hɔ̀n tɛ̀sɛ̀n!

⁹Annanwɔrɛ mɛ̀n lɔ, nyɛ́n nyri ɔmu le anwrɔn hɔ̀n léyi kɛ hán eci gbangbàn nɔn, yɔ sɩ̀ cɔ́ ɛyri Anhobɩ́ Nɛ̀ncüì-dúyri. Nyɛ́n bɩ́ zɛ́n ankà ndɔ lɔ wú: ɛwúvà-gbàngbàn-ci-hán-bɔ̀, antɛ̀-buri-sɛ́n-bɔ̀, ɛncɔnwrɔn mán ɛnnyɔnwrɔn-bi gbàn-hán-bɔ̀, wúcɔ̀ hɔ̀n léyi ke yiri y'edomɛ̀n nɔn,

¹⁰ɛci-yerɛ-bɔ̀, anwrɔn-ankà-yɔ-bɔ̀, ɛntàn-kɔ́n-bɔ̀, ɛyɔ̀n-ankà-dɔ́-bɔ̀ mán ɛfrɛ́n-bɔ̀ ke sɩ̀ cɔ́ ɛyri Anhobɩ́ Nɛ̀ncüì-dúyri.

¹¹Nyàn eci léyi dú anwrɔn janbɔ̀ ny'ɛmɛ̀n lɔ nɔn. Tɛ́n ye fi nyɛ̀n edomɛ̀n, ye bɩ́ nyɛ̀n yɛ srɔ Ɔwɔ tɛn, yɛ srɔ nyɛ̀n ɛnnyrɔnnan-bɔ̀ Ɔwɔ zìwú, Ɛẅɛnwrɔn Zhezü Krisì bɩmɛ̀n mán b'Ɔwɔ Hɛ́n mɛ̀n.

¹²Nyɛ hɔ̀n hàn, kɩ nyɛ dɔ̀ le: “Mɛ̀n ẅɛn ɛkɔrɛ̀-levri eci lɔ fɛn mɛ̀n.” Hɛ̀ɛ̀, kɩ fɛn lɔ kè sɩ̀ zrɔ̀ tán nyɛ̀n. Mɛ lɛ dɔ̀ le: “Mɛ̀n ẅɛn ɛkɔrɛ̀-levri eci lɔ fɛn mɛ̀n”, tɛ́n mɛ́n sɩ̀ srɔ m'edomɛ̀n ɔwɔ̀n-wrɔn mɛ̀n tán eci totɔtɔ̀n lɔ fɛn.

¹³Nye vru nyɛ dɔ̀ le: “Ɛci-zî dú ɛmɛ̀ntɛ̀ tɛn kɩ ɛmɛ̀ntɛ̀ dú ɛci-zî tɛn.” Hɛ̀ɛ̀, tɛ́n Ɔwɔ kɛ lɛ jrɛ́ yɔ lɔ fɛn. Tɛ́n ye sɩ̀ hàn edùwrú-ẅia, ô nɛ̀n dú ɛwúvà-gbàngbàn ci-hán mɛ̀n: nɛ̀n dú Ɛẅɛnwrɔn tɛn kɩ Ɛẅɛnwrɔn dú edùwrú tɛn.

¹⁴Ɔwɔ sɩ́ Ɛẅɛnwrɔn ɔkɔrɛ-bɔ̀ mɛ̀n kɩ ne le sɩ́ bɔ̀ ɔkɔrɛ-bɔ̀ mɛ̀n n'ɛkɔrɛ̀-srɔn lɔ mɛ̀n.

¹⁵Nyɛ́n nyri ɔmu le ny'edùwrú hɔ̀n lɔ dú Krisì dùwrú cá tɔ̀n. Kɛ, me le bɩ́ Krisì dúwrú cá lɔ ɔtɔ̀n mɛ̀n srɔ wowie-nyɔnwrɔn dùwrú hɛ̀? Annanwɔrɛ mɛ̀n lɔ hɔ̂!

¹⁶Kale nyɛ́n sɩ̀ nyrì ɔmu le ɛncɔnwrɔn léyi nɛ́n mán wowie-nyɔnwrɔn mɛhi yɔ bɔsɔ y'edomɛ̀n nɔn, yɔ srɔ edùwrú zriɛ? Annanwɔrɛ mɛ̀n lɔ ye merɛ́n le: “Anwrɔn anhyrɛ̀ lɔ kɛ lɛ srɔ eci zri.”

¹⁷Tɛ́n ɔwrɔn léyi nɛ́n mán Ɛẅɛnwrɔn mɛhi yɔ bɔsɔ̀ nɔn, yɔ srɔ ɛnhɛ́n mɛ̀n lɔ eci zri.

¹⁸Nyɛ́n srɛ́ cɔhɔ́ ɛwúvà-gbàngbàn-levri wú! Ɛgbàn nyàntɛn tɔ̀n léyi ɔwrɔn kɛ hán nɔn, ɛgbàn lɔ ke dú ɛntrɛ, tɛ́n ɔwrɔn léyi kɛ ẅɛn ɛwúvà-gbàngbàn nɔn, kɛ hán ɛgbàn ku nɛ́n dùku n'edùwru lɔ wú.

¹⁹Nyɛ́n sɩ̀ nyrì ɔmu le ny'edùwrú lɔ dú Ɛnhɛ́n Prɔnprɔn wɔn, Ɛnhɛ́n ndɔ léyi dú nyɛ̀n ɛmɛ̀n, hɩ Ɔwɔ tán nyɛ̀n nɛ́n? Nyɛ́n sɩ̀ dù nyɛ́n dùku nyɛ tɛn:

²⁰nyɛ́n srɔ Ɔwɔ tɛn, nɛ̀n di yi wɔ̀ɛn. Nyɛ́n bɩ́ ny'edùwrú dùku lɔ, nyɛ́n wá Ɔwɔ ci-zrɔ ci-bɩ̀tan kɔ̀hɔn mɛ̀n.