Read Alladian 1 Korɛntɛ̀n anmàn-bɔ̀ 8 Bible Online

1 Korɛntɛ̀n anmàn-bɔ̀ 8 - Alladian bible

1 Korɛntɛ̀n anmàn-bɔ̀ 8

¹Zɛtɛn bɔ̀ dɔ́ ɔnɔ̀n-ẅia léyi ye ce antɛ̀-buri-Wɔ hɔ̀n nɔn, yi ankà: Annanwɔrɛ mɛ̀n lɔ “Bɔ́ lɔ fɛn bɔ̀ ẅɛn eci-nyrì”, hán ɔmu le nyɛ dɔ̀ nɔn. Tɛ́n eci-nyrì ndɔ lɔ kɛ tán ɔwrɔn ɛgbúgbú-ci-hán, kɩ ɛcüɛ̀n kɛ tán fɛcüè-krubɔrɛ ecüì.

²Ɔwrɔn léyi ke tro le nɛ̀n nyri eci tɔ̀n nɔn, nɛ̀n sɩ̀ nyrì eci lɔ, hán ɔmu le ke ji le nɛ̀n nyrì nɔn.

³Tɛ́n Ɔwrɔn léyi ẅɛn Ɔwɔ cüɛ̀n nɔn, Ɔwɔ nyri nɛ̀n.

⁴Nyàn ankà-yrɛ lɔ: ɛkɔrɛ̀-levri ke le dù yɛ rá ɔnɔ̀n-ẅia léyi ye ce antɛ̀-buri-wɔ hɔ̀n nɛ́n? Bɔ́ nyri anvrɛnvrɛn mɛ̀n le antɛ̀-buri-Wɔ hɔ̀n kè sɩ̀ dù annanwɔrɛ ci zriɛmɛ́n ɛnhibù wú, kɩ Ɔwɔ zri kɩ dù.

⁵Kɩ ke dú kɛ ankà-tro-wɔ hɔ̀n dú anhobɩ́ mán ɛnhi (kɩ ke ji le bɔ́ nyri ɔmu le “anwɔ” mán “ɛẅɛn-bɔ̀” bobrebe ndù),

⁶annànwɔrɛ mɛ̀n lɔ, bɔ́ tɛn, Ɔwɔ zri kɩ dù, Ɔwɔ Zi, nɛ́n léyi nɛ̀n hán eci lɔ fɛn, kɩ n'ɛkruhú de bɔ̀ dú ɛwúvà mɛ̀n nɔn; kɩ Ɛẅɛnwrɔn zri kɩ dù, Zhezü Krisì, n'ɛmɛ̀n de eci lɔ fɛn dù, kɩ n'ɛkruhú bɔ̀ dú ɛwúvà mɛ̀n.

⁷Tɛ́n yɔ lɔ fɛn yɔ sɩ̀ nyrì ankaẅì annanwɔrɛ ndɔ lɔ. Anwrɔn ndɔ hɔ̀n bɩ́ antɛ̀-buri-Wɔ ankà, hán tán kɩ zɛtɛ̀ lɔ yɔ dú ɛmɛ̀n yɔ rá ecice nɔ̀n-ẅia, hán le ɔnɔ̀n-ẅia lɔ dú antɛ̀-buri-Wɔ tɔ̀n tɛn; yɔ wàwúyɛ lɔ ẅɛn ɛjɛ̀ kɩ yɔ nyri ɔmu le ɔnɔ̀n-ẅia ndɔ lɔ wá yɔ ɛnbrá edomɛ̀n.

⁸Kɩ kè sɩ̀ dù ɛci-zî tɔ̀n léyi ke le sɩ́ bɔ̀ Ɔwɔ tɛ̀sɛ̀n nɔn: bɔ́ sɩ́ zrɛ́n eci zriɛmɛ́n ke dú kɛ bɔ̀ sɩ̀ rá nɛ̀n, kɩ bɔ́ sɩ̀ cɔ́ eci zriɛmɛ́n ke dú kɛ bɔ́ rá nɛ̀n.

⁹Tɛ́n, nyɛ́n wá esùva, ô ɛkɔrɛ̀-levri léyi nyɛ́n ẅɛ̀n nyɛ hán eci ɔmu lɔ nɔn, ke bɩ́ sɩ́ ɛzrɛ́n mɛ̀n, anwrɔn hɔ̀n léyi y'ankaẅì-bùtan ẅɛn ɛjɛ̀ nɔn.

¹⁰Annanwɔrɛ mɛ̀n lɔ, ke dú kɛ ankaẅì-bùtan-cɛ́-wrɔn kɛ kán mɛ́n, vɛ́n léyi ɛ̀ ẅɛn “eci-nyrì”, è dú antɛ̀-buri-Wɔ wɔn mɛ̀n e zî ɛci nɔn, nɛ́n wàwúyɛ lɔ ke sɩ̀ yɩ́ nɛ̀n èdù nɛ̀n rá ɔnɔ̀n-ẅia léyi ye ce antɛ̀-buri-wɔ nɛ́n?

¹¹Kɩ ɔmu lɔ, ɛjɛ́ wrɔn ndɔ lɔ, ɔwrɔn-nɛ́n-muan-ẅì ndɔ léyi, Krisì wú n'ɛkruhú, kɛ lɛ zrɛ́n “v'eci-nyrì” lɔ kruhú!

¹²Ɛgbàn ɔmu lɔ nyɛ hán nyɛ́n muan-ẅì hɔ̀n tɛ̀sɛ̀n, kɩ nye wri y'ɛjɛ́ wàwúyɛ lɔ eci edù, nyɛ hán ɛgbàn Krisì dùku tɛ̀sɛ̀n.

¹³Hɩ le kruhú de, ke dú kɛ ɛci-zî tɔ̀n ke sɩ́ nmàn-ẅì ɛzrɛ́n mɛ̀n, mɛ́n sɩ̀ vru rá ɔnɔ̀n-ẅia mrìmrì, ô nmàn-ẅì ke bɩ́ dú ɛzrɛ́n mɛ̀n.