Read Alladian 2 Korɛntɛ̀n anmàn-bɔ̀ 11 Bible Online

2 Korɛntɛ̀n anmàn-bɔ̀ 11 - Alladian bible

2 Korɛntɛ̀n anmàn-bɔ̀ 11

¹Ô! Me ji le nyɛ́n shrì nyɛ́n bɩ́ mɛ́n nmù ci-hán lɔ jan! Hɛ̀ɛ̀, zrɔ, nyɛ́n ci mɛ̀n ɛmɛẅi!

²Mɛ kɔ́n ecüì-hi ny'ɛwú ecüì-hi-kɔ̀n tɔ̀n léyi dú Ɔwɔ yri nvà nɔn: mɛ̀n wá nyɛ̀n eyiri-mùan ɛncɔnwrɔn zri yri, Krisì, kɩ me ji mɛ̀n bɩ́ nyɛ̀n mɛ̀n yé nɛ̀n kɛ hán ɛnnyrɔnẅì tɔ̀n léyi nfì, kè sɩ̀ nyrì ɛncɔnwrɔn ankà nɔn.

³Tɛ́n, hán ɔmu le Ɛvɛ̀n teze n'edomɛ̀n bru ɛnlɛbrì tanwrɔn lɔ mɛ̀n nɔn, mɛ ẅɛn ɛnjansù le, ny'ɛnkruemɛ̀n-ẅɛ̀n ke bɩ́ jrɛ́a, ô ke sɩ́ nyɛ̀n esù she Krisì cüɛ̀n-mùan-zri-dì fifi lɔ tɛ̀sɛ̀n.

⁴Annanwɔrɛ mɛ̀n lɔ, nyɛ cüɛn ɔmu le ɔwrɔn tɔ̀n kɛ̀ và kɛ̀ dɔ́ nyɛ̀n Krisì léyi kè sɩ̀ cà ndɔ léyi bɔ̀ dɔ́ nyɛ̀n n'ankà nɔn; nyɛ́n vru nyɛ́n krɔn kpehɛ́n ô nyɛ́n shri ɛnhɛ́n tɔ̀n mán ɛmɛẅi ankà léyi kè sɩ̀ cà Ɛnhɛ́n Prɔnprɔn mán Ɛmɛẅi ankà Ankrankran léyi nyɛ́n cɔ́ b'antamɛ̀n nɔn.

⁵Mɛ́n sɩ́ tro le mɛ̀n dú ɛnhi mɛ̀n vrán ny'ɔkɔ̀hɔ̀n-wá-bɔ̀ léyi nye tro le sevri nɔn!

⁶Ke le dú annanwɔrɛ le, mɛ̀n dú ankà-nyrì-dɔ́-wrɔn anvrɛnvrɛn, tɛ́n kè sɩ̀ dù eci nyriemɛ̀n: bɔ̀ yé nyɛ̀n ndɔ lɔ kpetehe mɛ̀n, ɛnvra lɔ fɛn mán eci lɔ fɛn mɛ̀n.

⁷Ɛnvra léyi mɛ̀n dɔ́ nyɛ̀n Ɔwɔ Mɛẅi ankà Ankrankran lɔ nɔn, mɛ̀n hán nɛ̀n ankora; mɛ̀n sɩ́ m'edomɛ̀n ɛnhi, ô mɛ̀n sɩ́ nyɛ̀n ɛwú. Hɩ le mɛ̀n hán ɔmu lɔ nɔn, m'ankà kè sɩ̀ zrɔ̀a?

⁸Mɛ́n shrì mɛ̀n tán Ɔwɔ-fɛcüè nyàntɛn kè dí mɛ̀n ɔwɔ̀ɛn, ô yɔ dú m'esùva-wá mɛ̀n, ô mɛ̀n dú ny'eci-bɩ̀tan-wrɔn.

⁹Kɩ ɛnvra léyi mɛ̀n dú ny'edúyri nɔn, mɛ̀n sɩ̀ dù ɔwrɔn zriɛmɛ́n kɔrɛ̀-wá mɛ̀n ɛnvra léyi eci kɛ ẅɛn mɛ̀n ɛmìan nɔn, ɔmuhi anwrɔn-nɛ́n-muan-ẅì hɔ̀n léyi dú Maseduhanɛ̀n kpɔsɔ wú và nɔn, vá sɩ́ mɛ̀n ɛci hɔ̀n lɔ fɛn léyi me ji nɔn. Mɛ̀n ẅɛn m'edomɛ̀n mɛ̀n hɛ́n, ô mɛ́n bɩ́ srɔ ɛnlowrú mɛ́n tán nyɛ̀n eci totɔtɔ̀n mɛ̀n, kɩ me le dú esùva ndɔ lɔ n'ɛwá mɛ̀n.

¹⁰Krisì annanwɔrɛ ankà léyi dú mɛ̀n ɛmɛ̀n nɔn, mɛ dɔ̀ le: ɔwrɔn zriɛmɛ́n ke sɩ́ mrɛ́n m'ɔmùan-gbù lɔ kɛ̀ sɔhɔ́ rɔ́, Akàhi kpɔsɔ ndɔ lɔ fɛn wú.

¹¹Cɛci kruhú kɛ mɛ̀n dɔ́ ankà ndɔ lɔa? Ke le dù tán le mɛ́n sɩ́ cüɛ̀n nyɛ̀n hàn? Ɔwɔ nyri anvrɛnvrɛn le mɛ cüɛn nyɛ̀n!

¹²Me le dú eci lɔ n'ɛhán mɛ̀n kɛ lɛ hán zɛtɛ̀ lɔ hɔ́, ô anwrɔn hɔ̀n léyi ke ji kè gbú ɔmùan kɛ̀ dɔ̀ le yɔ mɛhi bɔ̀ krɔn nɔn, mɛ̀n mrɛ́n yɔ ankà-tro ndɔ lɔ ɛnkruemɛ̀n mɛ̀n sɔhɔ́.

¹³Anwrɔn ɔmu hɔ̀n lɔ yɔ dú ɛyɔ̀n kɔ̀hɔ̀n-wá-bɔ̀, ɛfrɛ́n-bɔ̀ léyi kɛ srɔ y'edomɛ̀n Krisì kɔ̀hɔ̀n-wá-bɔ̀ nɔn.

¹⁴Ɛnu lɔ anvɛmɛ̀n-frɛ́n-ci zriɛmɛ́n bàdà nɛ̀n ɛmɛ̀n, ɔmuhi Anwa-wrɔn dùku mán kɛ srɔ n'edòmɛ̀n ɛyri-kán Wɔ-kùyüre-wrɔn nɔn.

¹⁵Kè sɩ̀ dù anvɛmɛ̀n-frɛ́n-ci, ke dú kɛ n'eci-bɩtan-bɔ̀ hɔ̀n mán, kɛ srɔ y'edòmɛ̀n ɛnyrɔnnan Wɔ ci-bɩtan-bɔ̀. Tɛ́n yɔ lɛ cɔ́ ɔtrɔ léyi vɛ́n y'eci-hán hɔ̀n lɔ nɔn.

¹⁶Mɛ sán dɔ̀: ɔwrɔn zriɛmɛ́n ke bɩ́ bɩ́ mɛ̀n kɛ hán nmù-wrɔn. Kɩ zɛtɛn, ke dú kɛ ye tro ndɔ lɔ hô, nyɛ́n shrì nyɛ́n tán le mɛ̀n dú nmù-wrɔn, ô mɛ̀n mán mɛ̀n gbú ɔmùan ẅiɛ jan.

¹⁷Annanwɔrɛ mɛ̀n lɔ, ke dú kɛ mɛ hán ɔmùan-gbú kɔ̀hɔ̀n hô, mɛ́n sɩ́ dɔ́ ankà kɛ hán ɔmu le Ɛẅɛnwrɔn ke ji nɔn, tɛ́n kɛ hán ɔmu le mɛ̀n dú nmù-wrɔn hɔ́.

¹⁸Ɔmuhi bobrebe ndɔ hɔ̀n ke gbú ɔmùan anwrɔnẅì ci-hán wú nɔn, zɛtɛn, mɛ̀n mán me le gbú ɔmùan.

¹⁹Nyɛ́n léyi nyɛ́n dú ankà-nyri-bɔ̀ nɔn, nye ci nmù-hán-bɔ̀ ɛmɛẅi ny'ɛnbɔrɛ anvrɛnvrɛn mɛ̀n!

²⁰Nye shrì nyɛ tán yɛ hán nyɛ̀n anwɔ̀n-bɔ̀ ci, yɛ frɛ́n nyɛ̀n, ye bɩ́ nyɛ̀n ɛci edomɛ̀n yɛ sɔhɔ́, yɛ nyan nyɛ̀n ɛwú, yɛ cüran nyɛ̀n ansa anvɛmɛ̀n.

²¹Anvɛvrà kɛ ẅɛn mɛ̀n n'ɛdɔ́ mɛ̀n: Bɔ̀ ẅɛn ɛjɛ̀ sevri ankà ndɔ lɔ mɛ̀n! Tɛ́n, ɛyri léyi anwrɔn ndɔ hɔ̀n kɛ ẅɛn ɔmùan-gbú kɔrɛ̀-levri nɔn (mɛ dɔ́ ankà kɛ hán le nmù-wrɔn hɔ́) mɛ̀n mán mɛ̀n ẅɛn yi kɔrɛ̀-levri lɔ.

²²Yɔ dú Ebre-bɔ̀a? Mɛ̀n mán. Izraɛlɛ̀n-bɔ̀a? Mɛ̀n mán. Abrahamɛ̀n mɛẅi-bɔ̀a? Mɛ̀n mán.

²³Yɔ dú Krisì ci-bɩ̀tan-bɔ̀a? Zɛtɛn, mɛ lɛ dɔ́ ankà kɛ lɛ hán tán le ɛnkruemɛ̀n zrɛ́n mɛ̀n kokroho: mɛ̀n dú nɛ̀n mɛ̀n vrán yɔ. Mɛ̀n di ejüe vrán yɔ, mɛ̀n hɔ́n anwɔn-mɛ̀n-wá-wɔn mɛ̀n ɛburiburi, ye gorɛ mɛ̀n bobrebe vrán yɔ, kɩ mɛ̀n dú owú-gbànkán mɛ̀n frɛfrɛ.

²⁴Andɛ̀n ɛnrì, Zhüifɛ̀n-bɔ̀ hán yɛ cüran mɛ̀n ɛngbele mùan ɛẅia-ɛvà-ɔmɔrɔ̀,

²⁵andɛ̀n anhɔ̀n, Rɔmɛ̀n anmàn-bɔ̀ hán ye gorɛ mɛ̀n ɛngbele mɛ̀n, kɩ ɛdɛ̀n zri yɔ wri mɛ̀n eci edù ɛbù mɛ̀n; andɛ̀n anhɔ̀n ecüe kɔ́n mɛ̀n, kɩ ɛdɛ̀n zri mɛ̀n yɛ́ ɛnnyran mán ɛcɛ̀n ɛnshiemɛ̀n.

²⁶M'ɛyri hɔ̀n bobrebe mɛ̀n lɔ, mɛ̀n srɔ́n ɛgbànkàn ɛsù; yɔ hɔ̀n léyi dú ɛnshi léyi ke yɩ̀ kɛ gbɛ́ nɔn mɛ̀n, mán ɛci-gbangbàn-hán-bɔ̀ tamɛ̀n, ɛgbànkàn hɔ̀n léyi nmàn-ẅì hɔ̀n Zhüifɛ̀n-bɔ̀ mán yɔ léyi yɔ sɩ̀ dù Zhüifɛ̀n-bɔ̀ kɛ hán mɛ̀n mɛ kàn, mɛ̀n dú ɛgbànkán mɛ̀n anmàn mán ɛyri-tra mɛ̀n, mɛ̀n dú ɛgbànkán mɛ̀n ecüe wú mán anwrɔn-nén-muan-ẅì hɔ̀n ɛyɔ̀n-bɔ̀ granmɛ̀n.

²⁷Mɛ̀n srɔ́n ejüedì-kɔ̀hɔ̀n mán ɔwɔ̀ɛn-nyan shishi ɛsù; ɛnvra ndɔ hɔ̀n mɛ́n sɩ́ cɔ́ ɛndà-dá-yri; ɛci-zî mùan-wù mán ɛnshi-mùan-wù ẅɛn mɛ̀n; me bɩ́ kishe frɛfrɛ kèkrèmɛ̀n; mɛ̀n kán ɛgbàn ɔwɔ̀rɔ̀ mɛ̀n kɩ edòmɛ̀n-ẅɛn-ci bàda mɛ̀n.

²⁸Kɩ hɩ le wɔrɔ dù nɔn, mɛ́n sɩ́ dɔ́ n'ankà, m'ɛnbì lɔ fɛn ci-hán mán ndù: ankà-tro léyi mɛ ẅɛn Ɔwɔ-fɛcüè-bɔ̀ lɔ fɛn wú nɔn.

²⁹Ke dú kɛ ɔwrɔn tɔ̀n njɛ̀, mɛ̀n mán me dú ɛjɛ́ mɛ̀n; ke dú kɛ ɔwrɔn tɔ̀n kɛ zrɛ́n ankaẅì-bùtan-ẅɛn mɛ̀n, me dú ɛgbànkàn vriemɛ́n.

³⁰Ke dú kɛ ke ji le mɛ̀n gbú ɔmùan, me le gbú ɔmùan m'ɛjɛ̀ lɔ wú.

³¹Ɔwɔ, Ɛẅɛnwrɔn Zhezü nɛ́n Zi (kè dú ɛmrɛ́n mɛ̀n ɛnvra lɔ fɛn!) nyri ɔmu le mɛ́n sɩ́ ẅɛn ɛyɔ̀n.

³²Ɛnvra léyi mɛ̀n dú Damasɛ̀n anmàn nɔn, govràn léyi dú ɛnnɛ̀ncüì Aretasɛ̀n zìwú wrɔn nɔn, hɛ́n gɔliɛ-bɔ̀ anmàn gbàtà-mùan ô kɛ̀ ẅɛn mɛ̀n.

³³Tɛ́n ɛbù-drɛn sùgbàtà cɛ mɛ̀n, yɛ hán mɛ̀n mɛ́n kàkɛ ɛntrɛ ɛkɛ́ tɔ̀n mɛ̀n, kɩ ɔmu lɔ de mɛ̀n srɛ́ dí ɛnnɛ̀ncüì lɔ anta nɔn.