Read Alladian 2 Korɛntɛ̀n anmàn-bɔ̀ 3 Bible Online

2 Korɛntɛ̀n anmàn-bɔ̀ 3 - Alladian bible

2 Korɛntɛ̀n anmàn-bɔ̀ 3

¹Bɔ́ le vru bɔ̀ ji ɛyri bɔ̀ bɩ́ bɔ́ edomɛ̀n bɔ̀ wá bɔ́ dùku b'antamɛ̀n hàn? Kale bɔ́ ji, hán anwrɔn janbɔ̀ hɔ́, yɛ tán nyɛ̀n esùva-wá wrú, ɛnvra tɔ̀n hô, yɛ sán nyɛ̀n esùva-wá hà?

²Nyɛ́n dùku de nyɛ́n dú b'owrú léyi ye merén bɔ́ ɛnbɔrɛ hɔ̀n lɔ mɛ̀n hɩ anwrɔn lɔ fɛn ke le nyrì, ô kɛ̀ krɛ̀ nɔn.

³Hɛ̀ɛ̀, dú annanwɔrɛ le nyɛ́n dú owrú léyi Krisì merɛ́n hɩ bɔ̀ yüre nɔn. Ye sɩ̀ bɩ owrú shi ye merɛ́n nɛ̀n, tɛ́n Ɔwɔ Hɛ́n kɔrɛkɔrɛ mɛ̀n; ye sɩ̀ merɛ́n nɛ̀n obù wrú wú, tɛ́n anwrɔnẅì bɔrɛ mɛ̀n.

⁴Bɔ́ dɔ́ ɔmu lɔ, esɛ́ léyi bɔ̀ ẅɛn Ɔwɔ mɛ̀n Krisì bɩmɛ̀n nɔn hɩ wú.

⁵Annanwɔrɛ mɛ̀n lɔ, bɔ́ sɩ̀ ẅɛ̀n edù b'á hán ɔkɔ̀hɔ̀n ndɔ ɔmu lɔ bɔ́ dùku bɔ́ ecüì zriemɛ̀n. Eci léyi bɔ̀ ẅɛn n'ɛhán kɔrɛ̀-levri nɔn, dú Ɔwɔ yri và;

⁶nɛ́n de nɛ̀n tán bɔ̀ ecüì bɔ̀ srɔ mìrɛ̀n wrù ci-bɩ̀tan-bɔ̀ léyi kè sɩ̀ dù ɛnyànmàn léyi ye merɛ́n nɔn n'ɔkɔrɛ̀-levri wú, tɛ́n Ɛnhɛ́n Prɔnprɔn kɔrɛ̀levri wú. Ɛnyànmàn léyi ye merɛ́n nɔn, ke sɩ́ owúemɛ̀n, tɛ́n Ɛnhɛ́n Prɔnprɔn ke sɩ́ ɔkɔrɛ mɛ̀n.

⁷Ye merɛ́n ɛnyànmàn owrú-ẅì zrizri obù wrú wú kɩ Ɔwɔ ci-zrɔ gbrɛ́n ɛnvra ndɔ lɔ mɛ̀n. Mohizì zì lɔ dú ɛgbrɛ́n vriemɛ̀n, hán tán kɩ Izraɛlɛ̀n ẅì hɔ̀n ke sɩ́ nyan nɛ̀n rɔ́a, tɛ́n ɛgbrɛ́n ndɔ lɔ dú eburi-mán-eburi mɛ̀n. Ke dú kɛ ɛnyànmàn ci hán dú owúemɛ̀n sɩ́, kɩ nɛ̀n ẅɛn ɛgbrɛ́n-ci-zrɔ ɔmu lɔ n'ɛsrɔ mɛ̀n,

⁸andɛ̀n ɛbɛ de Ɛnhɛ́n Prɔnprɔn ci-hán ke sɩ̀ dú eci-zrɔ vriemɛ̀n!

⁹Eci-hán léyi ke sɩ́ anwrɔnẅì nwù-bɔ́ mɛ̀n dú eci-zrɔ mɛ̀n; andɛ̀n ɛbɛ de eci-hán léyi kɛ srɔ anwrɔnẅì ɛnnyrɔnnan-bɔ̀ Ɔwɔ zìwú ke sɩ̀ dú eci-zrɔ mɛ̀n!

¹⁰Bɔ́ lɛ dɔ́ tɛ̀ le eci-zrɔ léyi gbrɛ́n ɛnvra sheshe mɛ̀n nɔn, ke gbú n'edomɛ̀n sɔhɔ́ zɛtɛ̀ ci-zrɔ zìwú, kɩ eci-zrɔ lɔ sevri kà.

¹¹Annanwɔrɛ mɛ̀n lɔ, ke dú kɛ eci léyi dú eburi mán eburiemɛ̀n, dú eci-zrɔ mɛ̀n, andɛ̀n ɛbɛ de eci léyi dú ɛnvra lɔ fɛn nɔn ke sɩ̀ dú eci-zrɔ mɛ̀n!

¹²Ɔmuhi bɔ̀ ẅɛn esɛ́ ɔmu lɔ de esɛ́ yɩ́ bɔ̀ ɛmɛ̀n nɔn.

¹³Bɔ́ sɩ́ hán eci kɛ hán Mohizì léyi vá eci ezì, ô Izraɛlɛ̀n ẅì hɔ̀n ke bɩ́ kán eci gbrɛ́n ci léyi kɛ lɛ zrɛ́n eburi mán eburiemɛ̀n nɔn.

¹⁴Tɛ́n y'ɛnkruemɛ̀n-ẅɛ̀n dú ɛyri yɔwɔ mɛ̀n; hàn kɩ cɔ́ zɛtɛ̀ léyi, eci vru vá nɛ̀n ezì ɛnvra léyi yɔ krɛ́ mìrɛ̀n gbànvri wrú hɔ̀n lɔ nɔn. Ezì-sɛ́n-ci ndɔ lɔ kɛ zrɛ́n Krisì yri-kàn zìwú kɩ.

¹⁵Ɛnyɔncì lɔ mán, ɛnvra totɔtɔ̀n léyi yɔ krɛ́ Mohizì wrú hɔ̀n lɔ nɔn, ezì-sɛ́n-ci tɔ̀n ke murɛ́n y'ɛnkruemɛ̀n-ẅɛn lɔ.

¹⁶Tɛ́n hán ɔmu le ye merɛ́n nɔn: “Ɛnvra léyi yɛ crɛnyan Ɛẅɛnwrɔn nɔn, ezì-sɛ́n-ci lɔ kɛ mrɛ́n sɔhɔ́.”

¹⁷Tɛ́n, ebɩ́ léyi dú “Ɛẅɛnwrɔn” nɔn, ɛnu lɔ n'ɛmɛ̀n kɛ dɔ̀ le Ɛnhɛ́n; kɩ ɛyri léyi Ɔwɔ Hɛ́n ndù nɔn, nanvrɛn lɔ ɔwrɔncüe ndù.

¹⁸Bɔ́ lɛ fɛn ezì woro, bɔ́ yé Ɛẅɛnwrɔn ci-zrɔ lɔ; ɔmu lɔ, yɛ crɔn bɔ̀, ô bɔ̀ cá Ɛẅɛnwrɔn, kɩ bɔ́ dú eci-zrɔ tɔ̀n mɛ̀n, kɩ bó vru bó ci eci-zrɔ vri tɔ̀n mɛ̀n. Annanwɔrɛ mɛ̀n lɔ, nyàn eci léyi Ɛẅɛnwrɔn kɛ hán, nɛ́n léyi nɛ̀n dú Ɛnhɛ́n nɔn.