Read Alladian Galasi anmàn-bɔ̀ 1 Bible Online

Galasi anmàn-bɔ̀ 1 - Alladian bible

Galasi anmàn-bɔ̀ 1

¹Ebinyan ndɔ lɔ dú Pɔlɛ̀n yri kɛ và, nɛ́n léyi yɛ wá nɛ̀n ɔkɔhɔ̀n-wá-wrɔn, kè sɩ̀ dù anwrɔnẅì mán ɔwrɔn nyantɛn tɔ̀n kɔrè-levriemɛ̀n, tɛ́n Zhezü Krisì mán Ɔwɔ Zi léyi hán nɛ̀n nɛ̀n vá ɔkɔrɛ-bɔ̀ mɛ̀n nɔn.

²Anwrɔn-nɛ́n-muan-ẅì hɔ̀n lɔ fɛn léyi dú ɛnu lɔ nɔn cɔ́ mɛ̀n, ô bɔ̀ yüre Ɔwɔ-fɛcüè-bɔ̀ léyi dú Galasi anmàn nɔn, owrú ndɔ lɔ ô kɛ̀ dɔ́ yɔ le:

³Ɔwɔ léyi dú bɔ́ Zi mán Ɛẅɛnwrɔn Zhezü Krisì nɔn kɛ̀ tán nyɛ̀n nboafɔ̀n mán anwɔwɔ.

⁴Krisì dùku bɩ́ n'edomɛ̀n tán, ô bɔ̀ cɔ́ ɛgbàn-bɩ̀-ce, ô nɛ̀n ẅɛn bɔ̀ ɛnhibù wú ci gbàngbàn kɔrɛ̀srɔn wú nɛ̀n sɔhɔ́, hán ɔmu le dú bɔ́ Zi Ɔwɔ kɔrɛ̀zì-ci nɔn.

⁵Ɛmrɛ́n kè dú Ɔwɔ tɛn ɛnvra lɔ fɛn! Kè dú ɔmu lɔ.

⁶Ny'ejüi léyi nyɛ́n crɛ̀ sɔ́n Ɔwɔ esù-kpràkprà-nán mɛ̀n nɔn, hɩ ci-hán lɔ kɛ frɛ́n mɛ̀n anvɛmɛ̀n: nɛ̀n bi nyɛ̀n Krisì boafɔ̀n lɔ mɛ̀n, kɩ nyɛ tɛn nyɛ́n crɛ ezì nyɛ́n kɛ́n Ɛmɛẅi ankà nyantɛn léyi nye bɩ nyɛ hán Ɛmɛẅi ankà Ankrankran nɔn.

⁷Annanwɔrɛ mɛ̀n lɔ, ɛnyàntɛn zriɛmɛ́n bàdà; anwrɔn kɩ dù kɛ frɛ́n nyɛ̀n ɛnkruemɛ̀n, kɩ ke ji kɛ̀ crɔn Krisì Mɛẅi ankà Ankrankran lɔ.

⁸Zɛtɛn, ke dú kɛ ɔwrɔn tɔ̀n (kɩ ke dú bɔ́ dùku mán, kɩ ke dú Ɔwɔ-kùyüre-wrɔn tɔ̀n léyi dú anhobɩ́ và nɔn mán) kɛ dɔ́ nyɛ̀n Ɛmɛẅi ankà Ankrànkràn tɔ̀n léyi bɔ́ tɛn lɔ mɛhi, kè sɩ̀ dù nzri nɔn, ɔwrɔn ndɔ lɔ ɛẅìɛ̀-dà dú nɛ tɛn!

⁹Mɛ́n gɔ̀ dɔ́ nyɛ̀n kɩ me vru mɛ dɔ́ nyɛ̀n zɛtɛ̀ lɔ: ke dú kɛ ɔwrɔn tɔ̀n kɛ dɔ́ nyɛ̀n Ɛmɛẅi ankà Ankrankran tɔ̀n léyi dú ɛnyàntɛn, kɩ kè sɩ̀ dù hɩ léyi nyɛ́n cɔ̀ nɔn, ɔwrɔn ndɔ lɔ ɛẅìɛ-dà dú nɛ tɛn!

¹⁰Kɛ̂ ɔmu lɔ, anwrɔnẅì mrɛ́n de me ji nɛ́n? Hɔ̂, Ɔwɔ tɛn lɔ de me ji nɔn. Ɔmu lɔ anwrɔnẅì cüɛ̀n de me ji nɛ́n? Ke dú kɛ me vru me ji anwrɔnẅì cüɛ̀n hô, mɛ́n sɩ̀ dú Krisì ci-bɩtan-wrɔn.

¹¹Anwrɔn-nɛ́n-muan-ẅì hɔ̀n, mɛ dɔ́ nyɛ̀n le: Ɛmɛẅi ankà ankrankran léyi mɛ dɔ́ nyɛ̀n n'ankà nɔn, kè sɩ̀ dù ɔwrɔnẅì kruemɛ̀n ankà.

¹²Kè sɩ̀ dù ɔwrɔn tɔ̀n de kɛ̀ dɔ́ mɛ̀n yakɛ kè yé mɛ̀n ankà lɔ nɔn, tɛ́n Zhezü Krisì de hán tán mɛ̀n nyri ankà lɔ nɔn.

¹³Nyɛ́n yá yɛ dɔ́ eci léyi mɛ hán ɛnvra léyi mɛ̀n vru mɛ̀n dú Zhüifɛ̀n-bɔ̀ wɔ-sɛ̀n lɔ mɛ̀n nɔn. Nyɛ́n nyri ɔmu le mɛ kɔ́n Ɔwɔ-fɛcüè-bɔ̀ anhà ɛshishiemɛ̀n kɩ mɛ hán kèkrèmɛ̀n, ô mɛ̀n jrɛ́ yɔ.

¹⁴Annyran hɔ̀n sùgbàn-bɔ̀ mɛ̀n, mɛ̀n wi yɔ ezì Zhüifɛ̀n-bɔ̀-Wɔ kɔ̀hɔ̀n-hán lɔ mɛ̀n; edù ke yɩ́ mɛ̀n kɛ vrán yɔ, bɔ́ nancüì hɔ̀n nyànmàn ci-hán mɛ̀n.

¹⁵Tɛ́n Ɔwɔ, n'ɛnboafɔ̀n lɔ mɛ̀n, mrɛ́n mɛ̀n nbɩ̀ yakɛ ye bî mɛ̀n, kɩ nɛ̀n bi mɛ̀n n'eci-bɩ̀tan-kɔ̀hɔn mɛ̀n. Kɩ ɛnvra léyi nɛ̀n wá, nɛ̀n yé mɛ̀n n'ɛnẅì, ô mɛ̀n hán tán ye nyri nɛ̀n anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn mɛ̀n, mɛ̀n sɩ̀ hɔ̀n mɛ̀n yrɛ ɔwrɔn zriɛmɛ́n ankà

¹⁷yakɛ mɛ̀n sɩ̀ hɔ̀n Zherüzalɛmɛ̀n anmàn anwrɔn hɔ̀n léyi gɔ́ dú ɔkɔ̀hɔ̀n-wá-bɔ̀ hɛ́ mɛ̀n ezì nɔn, y'ɛtɛ̀sɛ̀n; tɛ́n ɛnvra zri lɔ, mɛ̀n bɩ́ Arabɛ̀n-bɔ̀ anmàn levri, zɛtɛn mɛ̀n vru ɛmɛẅi mɛ̀n hɔ́n Damasɛ̀n anmàn.

¹⁸Ɛnnànwàn kru anhɔ̀n vacì yakɛ mɛ̀n hɔ́n Zherüzalɛmɛ̀n anmàn, ô mɛ̀n nyri Piɛrɛ̀n, kɩ mɛ̀n cɔ́ nɛ̀n mɛhi bɔ̀ yɛ́ ɛnyanbì kru anhyrɛ̀.

¹⁹Mɛ̀n sɩ̀ kàn ɔkɔ̀hɔ̀n-wá-wrɔn zriɛmɛ́n, tɛ́n Ɛẅɛnwrɔn nɛ́n muan-ẅì Zhakɛ̀n kɩ.

²⁰Owrú ndɔ léyi me merɛ́n nyɛ̀n nɔn, dú annanwɔrɛ; Ɔwɔ zìwú lɔ mɛ wá kpankpan le mɛ́n sɩ́ ẅɛn ɛyɔ̀n.

²¹Zɛtɛn, mɛ̀n hɔ́n ɔkpɔsɔ hɔ̀n léyi dú Siri mán Silisi wú.

²²Zhüde kpɔsɔ wú Wɔ-fɛcüè-bɔ̀ lɔ kè sɩ̀ nyri mɛ̀n antà-dùwrúemɛ̀n.

²³Yɔ yá yɛ dɔ̀ le: “Ɔwrɔn léyi kɛ kɔ́n bɔ̀ anhà ɛnbiɛhɛ́n nɔn, zɛtɛ̀ lɔ kɛ dɔ́ ankaẅì-bùtan léyi nɛ̀n ji ɛjrɛ́-yri nɔn yi ankà zɛtɛn.”

²⁴Kɩ yɔ mrɛ́n Ɔwɔ m'ɛkruhú.