Read Alladian Galasi anmàn-bɔ̀ 2 Bible Online

Galasi anmàn-bɔ̀ 2 - Alladian bible

Galasi anmàn-bɔ̀ 2

¹Ɛnnànwàn kru ɛvà-anzɔ̀ vacì, mɛ̀n vru ɛmɛẅi mɛ̀n vá Zherüzalɛmɛ̀n anmàn, mɛ̀n mán Barnabasɛ̀n mɛhi; mɛ̀n vru mɛ̀n bɩ́ Titɛ̀n mɛhi bɔ́ hɔ̀n.

²Mɛ̀n hɔ́n nanvrɛn, ô mɛ̀n nyri Ɔwɔ ankà léyi ke ji kɛ̀ dɔ́ mɛ̀n nɔn. Ɛmɛ̀n krubɔrɛ tɔ̀n léyi mɛ̀n mán ɛnkru-ɛvrivri-bɔ̀ mɛhi bɔ́ ẅɛ̀n nɔn, mɛ̀n dɔ́ yɔ́ Ɛmɛẅi ankà Ankrànkràn léyi mɛ dɔ́ tán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn. Mɛ́n sɩ́ ji le m'ɔkɔ̀hɔ̀n léyi mɛ̀n hán mán hɩ le mɛ vá ɛhán yri nɔn, kɛ̀ srɔ eci woro.

³Zɛtɛn, Titɛ̀n léyi dú annyran anvrɛn, hɩ dú Grɛkɛ̀n-wrɔn nɔn,

⁴anwrɔn-nɛ́n-muan-ẅì hɔ̀n, ɛyɔ̀n-bɔ̀ léyi dú bɔ̀ ɛmɛ̀n nɔn, ke ji kɛ̀ hán ye wi nɛ̀n wúcɔ̀-dòmɛ̀n, kɩ yɔ sɩ̀ cɔ̀ n'ɛhán yri rɔ̀a. Anwrɔn ndɔ hɔ̀n lɔ bru bɔ́ fɛcüè lɔ mɛ̀n, ô kɛ̀ kprá bɔ́ ɛkɔrɛ̀-levri léyi dú Zhezü Krisì yri và, ô kè vru kè sɩ́ bɔ̀ ɛnyànmàn wɔ̀nẅìemɛ̀n.

⁵Ɛnvra zriɛmɛ́n mán mɛ̀n, bɔ̀ sɩ̀ tán yɔ ɛkɔrɛ̀-levri, ô kɛ̀ hán tán, nyɛ́n cɔ́ Ɛmɛẅi ankà Ankrànkràn lɔ, annanwɔrɛ mɛ̀n.

⁶Tɛ́n anwrɔn hɔ̀n léyi yɛ krɛ́ ɛnkru-ɛvrivri-bɔ̀ nɔn (annanwɔrɛ mɛ̀n lɔ, eci léyi dú yɔ nɔn ke sɩ́ hán mɛ̀n eci zriɛmɛ́n, ɔmuhi Ɔwɔ ke sɩ́ ci ɔwrɔn anvɛ wú mrɛ̀n nɔn), zɛtɛn anwrɔn ndɔ hɔ̀n lɔ kè sɩ̀ wà ɛnyànmàn wrù kɛ̀ tàn mɛ̀n.

⁷Tɛ́n, yɔ kán ɔmu le Ɔwɔ tán mɛ̀n, mɛ̀n dɔ́ anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, Ɛmɛẅi ankà Ankrankran lɔ, hán ɔmu le nɛ̀n tán Piɛrɛ̀n kɛ̀ dɔ́ Zhüifɛ̀n-bɔ̀ nɔn.

⁸Ɔmuhi Ɔwɔ srɔ mɛ̀n ɛnhi wú anmàn nyàntɛn hɔ̀n kɔ̀hɔ̀n-wá-wrɔn, hán ɔmu zri léyi nɛ̀n srɔ Piɛrɛ̀n Zhüifɛ̀n-bɔ̀ kɔhɔ̀n-wá-wrɔn nɔn.

⁹Zhakɛ̀n, Piɛrɛ̀n mán Zhan hɔ̀n léyi ndù hán Ɔwɔ-fɛcüè bù-nan hɔ́ nɔn, nyri ɔmu le Ɔwɔ wá mɛ̀n ɔkɔ̀hɔ̀n vɛ́n ndɔ lɔ antamɛ̀n; zɛtɛn yɔ tán bɔ̀ ɛkɔrɛ̀, Barnabasɛ̀n mán mɛ̀n, ɔmùan-krɔn ci-hán mɛ̀n. Ɔmu lɔ de, bɔ lɛ fɛn ɔmùan-krɔn mɛ̀n lɔ, bɔ̀ wá le, bɔ́ eci-hán mɛ̀n lɔ, bɔ́ lɛ hɔ́n anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn y'anwanzi bɔ̀ hán ɔkɔ̀hɔ̀n, kɩ yɔ tɛn yɔ lɛ hɔ́n Zhüifɛ̀n-bɔ̀ yri.

¹⁰Yɔ dɔ́ bɔ̀ le bɔ̀ tro ɛmian-bɔ̀ léyi dú y'Ɔwɔ-fɛcüè lɔ mɛ̀n hɩ dú Zherüzalɛmɛ̀n anmàn nɔn y'ankà, hɩ ci lɔ de mɛ̀n wá kpankpan mɛ̀n hán nɔn.

¹¹Tɛ́n ɛnvra léyi Piɛrɛ̀n vá Antiɔshɛ̀n anmàn nɔn, mɛ̀n kɛ́n nɛ̀n ezì kpete mɛ̀n, ɔmuhi n'ankà dú nwù nɔn.

¹²Annanwɔrɛ mɛ̀n lɔ, ɛnvra léyi Zhakɛ̀n kɔhɔ̀n-wá-bɔ̀ lɔ kɛ vá hɔ́n Antiɔshɛ̀n anmàn nɔn, Piɛrɛ̀n mán anwrɔn-nɛ́n-muan-ẅì hɔ̀n léyi kè sɩ̀ dù Zhüifɛ̀n-bɔ̀ nɔn ke zî ɛci ɛyri zri. Tɛ́n, ɛnvra léyi ɔkɔ̀hɔ̀n-wá-bɔ̀ lɔ nvà nɔn, Piɛrɛ̀n mrɛ́n n'edomɛ̀n sɔhɔ́ y'ɛmɛ̀n kɩ nɛ́n mán anwrɔn-nɛ́n-muan-ẅì hɔ̀n léyi kè sɩ̀ dù Zhüifɛ̀n-bɔ̀ nɔn, yɔ sɩ́ vru zî ɛciɛ, ɔmuhi ne sú anwrɔn hɔ̀n léyi ke bɩ́ wúcɔ̀-domɛ̀n-ẅi ankà lɔ ɛshishiemɛ̀n nɔn.

¹³Anwrɔn-nɛ̀n-muan-ẅì hɔ̀n Zhüifɛ̀n-bɔ̀ lɔ mán kɛ hán eci zri léyi Piɛrɛ̀n hán nɔn, kɩ Barnabasɛ̀n mán teze n'edomɛ̀n eci zri lɔ mɛ̀n y'anmùan-anhyrɛ̀-dì lɔ kruhú.

¹⁴Ɛnvra léyi mɛ̀n kán ɔmu le y'esùnàn ke sɩ́ ci annanwɔrɛ Mɛẅi ankà Ankrankran lɔ wú nɔn, mɛ̀n dɔ́ Piɛrɛ̀n anwrɔn lɔ fɛn zìwú le: “Vɛtɛn è dú Zhüifɛ̀n-wrɔn, ɛnu lɔ, v'ɛwúvà lɔ, kè sɩ̀ dù kɛ̀ hàn yɔ léyi yɔ sɩ̀ dù Zhüifɛ̀n-bɔ̀ nɔn, kɩ e sɩ́ hán Zhüifɛ̀n-bɔ̀ nyànmàn-ci. Anhɔntan de ɛ lɛ hán ô ɛ̀ ẅɛn kèkrèmɛ̀n anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, kɛ̀ hán Zhüifɛ̀n-bɔ̀ wúvà ci-hán-ci nɛ́n?”

¹⁵Bɔ́, bɔ̀ dú, Zhüifɛ̀n-bɔ̀ ebîemɛ̀n, kɩ bɔ̀ sɩ̀ dù ɛnhi wú anmàn nyàntɛn bɔ̀ léyi kè sɩ̀ nyrì Ɔwɔ nyànmàn nɔn.

¹⁶Kɩ, bɔ́ nyri ɔmu le ɔwrɔnẅì dú ɛnyrɔnnan mɛ̀n Ɔwɔ zìwú ankaẅì-bùtan léyi nɛ̀n ẅɛn Zhezü Krisì mɛ̀n, tɛ́n kè sɩ̀ dù hɩ le nɛ wá Mohizì nyànmàn lɔ nɔn. Hɩ le kruhú de, bɔ́ mán, bɔ̀ ẅɛn ankaẅì-bùtan Zhezü Krisì mɛ̀n, ô ye nyri ɔmu le bɔ̀ dú ɛnyrɔnnan-bɔ̀ ankaẅì-bùtan léyi bɔ̀ ẅɛn Krisì mɛ̀n, tɛ́n kè sɩ̀ dù hɩ le bɔ́ wá ɛnyànmàn ndɔ lɔ nɔn. Ɔmuhi ɔwrɔn zriɛmɛ́n ke sɩ̀ dú ɛnyrɔnnan-wrɔn Ɔwɔ zìwú ɔmuhi eci lɔ fɛn mɛ̀n lɔ nɛ wá Ɔwɔ nyànmàn nɔn.

¹⁷Tɛ́n zɛtɛn, ke dú kɛ bɔ́ ji bɔ̀ srɔ ɛnyrɔnnan-bɔ̀ Krisì kɔrɛ̀-levri mɛ̀n, bɔ̀ cɔ̀ bɔ́ nyrì le bɔ́ lɛ fɛn lɔ bɔ̀ dú ɛgbàn mɛ̀n hán anwrɔn hɔ̀n léyi kè sɩ̀ dù Zhüifɛ̀n-bɔ̀, kɩ ndɔ lɔ n'ɛmɛ̀n kɛ dɔ̀ le Krisì dú ɛgbàn ci-bɩ̀tan-wrɔn hán? Annanwɔrɛ mɛ̀n lɔ hɔ̂!

¹⁸Annanwɔrɛ mɛ̀n lɔ, ke dú kɛ mɛ sanhán ɛnyànmàn ci léyi mɛ̀n jrɛ́ nɔn, mɛ srɔ m'edomɛ̀n ɔwrɔn tɔ̀n léyi ke sɩ́ wá ɛnyànmàn nɔn.

¹⁹Zɛtɛn, hɩ le kɛ crɛnyan ɛnyànmàn nɔn, mɛ́n wù, owù léyi ɛnyànmàn dùku tán nɔn, ô m'ɛwúvà wrù lɔ kè dú Ɔwɔ tɛn. Mɛ̀n mán Krisì mɛhi de ye wri bɔ̀ ɛgbàn-hán-tɛ̀ wú,

²⁰hán tán kɩ kè sɩ̀ vru dù mɛ̀n de mɛ̀n dù ɛwúvà mɛ̀n, tɛ́n Krisì de dú mɛ̀n ɛmɛ̀n nɔn. Ɔmuhi m'ɔwrɔnẅì wúvà léyi mɛ̀n dú ɛmɛ̀n zɛtɛ̀ lɔ nɔn, mɛ̀n dú nɛ̀n ɛmɛ̀n, Ɔwɔ Ẅì léyi cüɛn mɛ̀n kɩ tán mɛ̀n n'ɛwúvà nɔn, n'ankaẅì-bùtan-ẅɛn mɛ̀n.

²¹Mɛ kɔrɔ, mɛ́n sɩ̀ kɔ́n Ɔwɔ boafɔ̀n mɛ̀n ze. Annanwɔrɛ mɛ̀n lɔ, ke dú kɛ ɛnyànmàn kɔrɛ̀-levri mɛ̀n de yɛ lɛ srɔ ɛnyrɔnnan-wrɔn tɛ̀ Ɔwɔ zìwú nɔn hô, zɛtɛn Krisì wù lɔ dú owù kɔra sà.